Pene 7

Te Mau Papairaa Moʻa, “E mau Faarii rarahi no te Pape Varua”

Nahea te taiʻo-maite-raa i te mau papairaa moʻa i te faarahi i to tatou huru pae varua e i te aratai ia tatou i te ora mure ore ra?

Omuaraa

Ua ratere haere te Peresideni Harold B. Lee e ta’na vahine o Freda Joan Lee na te fenua Europa e na te Fenua Moʻa i te matahiti 1972, ma te haapii i te mau misionare e i te mau melo i te mau parau haapiiraa o te evanelia. Ua apeehia’tu raua e Elder Gordon B. Hinckley e ta’na vahine o Marjorie Pay Hinckley. Te parau ra te Tuahine Hinckley e: “E mea faahiahia roa ia hiʻo, e mea nahea ta te Peresideni Lee ia faahaere i te ohipa i mua. E putuputu matou e te mau misionare, i te poʻipoʻi, i roto i te hoê fare pureraa tei î roa i te mau misionare rave tamau e te mau misionare no te reira iho vahi. Ia tiʻa anaʻe oia i niʻa no te paraparau atu ia ratou, e mea varavara oia i te haamata i ta’na paraparauraa na roto i te tahi mau parau aroharaa, e aore râ, te tahi mau parau faaite; e haamata râ oia na roto i te iritiraa i te mau papairaa moʻa, e i reira oia e haamata ai i te hoê aʻoraa. E faaite mai oia i te mau papairaa moʻa ma te ohie rahi, e no reira, i te tahi taime, e mea fifi roa ia ite e, teihea ta’na iho mau parau, e tei hea râ no roto mai i te papairaa moʻa. I muri aʻe i te hoê pureraa mai te reira te huru, ua ani atu vau ia’na e, e mea nahea oia i te tamauaau-raa i te mau papairaa moʻa. … Ua feruri ihora oia maa taime iti e na ô maira, ‘Aita vau e manaʻo nei e, te tamau-aau nei au i te papairaa moʻa. Te manaʻo nei râ vau e, no te rahi o te taime to’u taiʻoraa i te reira, ua riro mai te reira ei tuhaa no’u e ei tuhaa no taʻu mau parau.’ ”¹

Te mau haapiiraa a Harold B. Lee

Eaha te tumu tatou e taiʻo-maite ai i te mau papairaa moʻa?

Mai te pape hoi i riro na e o te riro nei â ei taoʻa faufaa no te oraraa tino nei…., oia atoa te evanelia a te Fatu ra o Iesu Mesia, ua riro ïa ei taoʻa faufaa no te oraraa varua o te mau tamarii a te Atua. Te hiti ra taua faaauraa parau ra i roto i te mau parau a te Faaora i te vahine i te apoo pape i Samaria, a parau ai Oia e: “…area te inu i te pape e horoahia’tu e au nei, e ore roa ïa oia e poʻihâ faahou, e riro râ taua pape e horoahia’tu e au na’na ra, ei pape pihaa i roto ia’na iho, e tiʻa i te pihaaraa e tae noa’tu i te ora mure ra.” (Ioane 4:14).

Te mau faarii rarahi no te pape varua, tei parau-atoa-hia te mau papairaa moʻa, ua horoahia mai ïa te reira i teie mahana e ua faaherehere-maite-hia te reira ia tiʻa i te mau taata atoa ia rave e ia faaamu i to ratou varua ra, eiaha hoi ratou ia poʻihâ faahou. Na te mau parau a te Faaora i faaite mai e, ua faarirohia teie mau papairaa moʻa ei mau parau faufaa rahi roa, inaha, te na ô ra Oia e, “Te imi nei outou i te parau i papaihia ra, no te mea te manaʻo na outou e roaa te ora mure ore i reira: o te faaite ïa iaʻu o taua mau parau ra” (Ioane 5:39); ua riro atoa te hoʻi-faahou-raa o te Ati Nephi e tii i te mau api veo ei faaiteraa i te faufaa rahi o te reira mau papaa parau, inaha, tei roto i reira te mau papairaa faufaa roa no te oraraa o te taata. Te faahitihia ra te faaohiparaa o taua mau papairaa moʻa ra i roto i te faahitiraa parau a Nephi a parau ai oia e, “… ua faaau hoi au i te mau parau papai moʻa atoa ia matou, ia riro te reira ei maitai e ei haapiiraa hoi no matou.” (1 Nephi 19:23). … Ua faahereherehia te mau parau poroʻi a to tatou Metua i roto i te roaraa o te mau u’i e ua paruru-maitehia te reira, e ia ite atoa outou e, i teie tau, tei te pihaaraa te vahi mâ aʻe te mau papairaa moʻa, mai te pape atoa hoi, tei te pihaaraa i te mouʻa te vahi mâ aʻe te pape; te parau mâ aʻe a te Atua, oia te parau tei ore i haaviiviihia, o te parau ïa e hiti mai na roto mai i te utu o te mau peropheta ora o tei maitihia no te aratai ia Iseraela i to tatou nei anotau.²

I te mau tau tuuraa evanelia atoa, ua horoʻa mai to tatou Metua ia tatou nei, Ta’na mau tamarii, i te mau papairaa moʻa na roto i Ta’na faaururaa, ia roaa ia tatou te paari no te upootiaraa i niʻa i te faahemaraa na roto i te faaroo Ia’na. Teie mau papairaa moʻa “e mea maitai ei haapiiraa, ei aʻoraa, ei faaiteraa hapa, ei faaite mai i te parau-tia ra: Ia au roa te taata no te Atua i te mau ohipa maitai atoa ra.” (2 Timoteo 3:16–17) No te faufaa rahi o te mau papairaa moʻa i roto i te faanahoraa no te faaoraraa a te Metua, i papaihia ai te tahi mau parau, i reira to te Atua faaueraa ia iritihia te ora ia roaa mai te mau papairaa faufaa rahi, inaha, ia ore hoi te reira, e hiʻa ïa Ta’na mau tamarii, e e haamatapohia ratou i te pouri o te ao nei [a hiʻo 1 Nephi 4:13].³

Aita i maoro aʻe nei ua faauehia tatou ia faaitoito tatou i te taiʻoraa i te mau parau tuatapaparaa no niʻa i te mau papairaa moʻa. Area râ, aita atu e mea faufaa aʻe, maori râ, te raveraa tatou i taua mau papairaa moʻa ra i roto i to tatou rima e te taiʻoraa i te reira. … E itehia te hoê anaanataeraa taaʻe, te hoê varua puai aʻe, te hoê iteraa hohonu aʻe ia taiʻo anaʻe au i te mau papairaa moʻa iho. … Aita’tu e ohipa faufaa aʻe, e titau-roa-hia i teie nei mahana, maori râ, te tuuraa outou i roto i ta outou mau tamarii i te huero o te here i te mau papairaa moʻa.⁴

Ua aʻo mai te Fatu ia tatou ia imi i te mau papairaa moʻa, i te mea e, i roto i reira e iteahia ai ia tatou te eʻa e tae atu ai i te ora mure ore ra, inaha hoi, o te faaite te reira i te taata nei i te haerea e roaa ai te ora mure ore na roto Ia’na ra e i “te Metua o tei tono mai [Ia’na] ra” (Ioane 5:30).⁵

Nahea te taiʻo-maite-raa i te Buka a Moromona i te tautururaa ia tatou ia faarahi e ia tapeʻa tamau noa i to tatou huru pae varua?

I to’u hiʻoraa, mai te huru ra e, e auraa hohonu to te mau parau ta Iosepha Semita i parau atu i te mau taeae, no niʻa i te faufaa o te Buka a Moromona, i te auraa mau tei apohia mai e tatou. Inaha, te na ô ra oia e: “Ua parau vau i te mau taeae e, o te Buka a Moromona te buka tano roa aʻe i te mau huru buka atoa i niʻa i te fenua nei, e te ofaʻi teʻa no ta tatou haapaʻoraa, e te taata e haapaʻo i te mau parau i roto ra, e fatata-atu ïa oia i te Atua na roto i te haapaoraa i te mau faaueraa, i te tahi atu buka” (History of the Church, 4:461).

Teie te auraa i to’u hiʻoraa, oia hoi, i roto i teie nei mau papairaa moʻa, ua faaitehia te mau parau mau tiʻa o te evanelia; e ere râ i te reira anaʻe, inaha, na roto atoa i teie nei ite piti, e rahi atu te papuraa o to tatou iteraa i te auraa o te mau haapiiraa a te mau peropheta i tahito ra, oia atoa i ta te Fatu e i ta Ta’na ra mau pípí a ora ai e a haapii ai ratou i rotopu i te taata nei.⁶

Te hinaaro ra te hoê taata ia faatata atu oia i te Atua ra, e tiʻa ïa ia’na ia na reira na roto i te taiʻoraa i te Buka a Moromona.⁷

Aita’tu e raveʻa maitai aʻe no te faananea’tu â i to outou hiaai pae varua e no te tapeʻa-tamau-raa i to outou faito varua, maori râ, ia taiʻo e ia taiʻo faahou â, e matahiti e matahiti atu, i te mau mea faahiahia tei haapiihia i roto i te Buka a Moromona. Ua horoʻahia mai te reira ia tatou nei, oia te îraa o te evanelia, na roto i te melahi ra ia Moroni no te horoʻa mai i te taata nei. Teie hoi te hoê hiʻoraa, e aamu teie o tei faatiahia mai e te Peresideni German E. Ellsworth, tei faaite mai i to’na iteraa papu i roto i te hiero i mua i te tahi atu mau peresideni misioni. Te parau ra oia e, e rave rahi matahiti i mairi aʻe nei, te faatere ra oia i te Misioni no Northern States, ua taotohia oia, e aore râ, ua ite oia i te hoê orama, inaha, te mataitai ra oia i te Aivi Tumora e ua tupu ihora i roto ia’na te tahi mau feruriraa no niʻa i te mau ohipa tei tupu i taua vahi moʻa ra. I reira to’na fariiraa i te hoê titauraa papu maitai: “A poro i to te ao nei te Buka a Moromona. Na te reira e aratai i to te ao nei i te Mesia ra.”⁸

Mai te mea te hinaaro ra outou e haapaari i te mau tamarii haapii … i te mau haapiiraa taiva, teie mau raveʻa faaturori manaʻo, o te haapeʻapeʻa i to ratou faaroo no te Bibilia, a horoʻa’tu ïa ia ratou i te hoê iteraa hohonu i te mau haapiiraa o te Buka a Moromona. A hiʻopoʻa e a hiʻopoʻa tamau noa i te reira.

Eaha te maororaa aita outou i taiʻo faahou i te Buka a Moromona? Ua hitimahuta rii au i te tahi aʻe nei taime i mairi i to’u paraparauraa e piti na taata o tei haere-atoa-mai-na i roto i ta tatou faanahoraa haapiiraa evanelia e rave rahi matahiti i mairi aʻe nei, e i teie nei, tei niʻa raua toopiti atoa i te tahi atu mau huru tiʻaraa haapiiraa, e ua roaa ta raua parau tu’ite. Ua fariu ê raua i te mau parau mau o te evanelia, e i teie nei, te maro nei raua i te mau haapiiraa a te Ekalesia e te tamata nei i te haamou e i te tahitohito i te reira.

Ua paraparau vau ia raua toopiti atoa, e i to’u titorotororaa i te huru no to raua taiʻoraa i te Buka a Moromona, ua na ô maira te hoê o raua iaʻu e: “Hoê ahuru e ma maha matahiti i teie nei aitâ vau i taiʻo-faahou atu ra i te hoê noa aʻe parau i roto i te Buka a Moromona.”

Na ô maira te tahi e, “Aita vau e haamanaʻo ra i te taime hopea a taiʻo ai au i te hoê parau i roto i te Buka a Moromona.” Mai te reira atoa ïa tatou, mai te mea e, aita tatou e tamau noa i te faaî ia tatou i te mau haapiiraa o teie nei buka faufaa rahi o ta te Fatu i horoʻa mai ia tatou nei no te hoê tumu—oia hoi, no te faatitiaifaro i teie mau hape e teie mau aimaroraa atoa i to tatou nei anotau mai Ta’na iho i fafau mai e na reira Oia ia tae i te tahi atu tau.⁹

Ua paraparau vau i te hoê taata tiʻaraa maitai i roto i ta tatou fare haapiiraa. … A riro ai oia ei melo no te Ekalesia, ua faaite oia i to’na manaʻo feaa no te haamou i te faaroo o te feia apî. Ua parau oia e, “Aita vau i rave faahou i te reira huru ohipa i na avaʻe e toru i mairi aʻe nei, e te Taeae Lee.”

I to’u aniraa ia’na e, “Eaha te mea tei faataui ia oe?” ua faʻi maira oia i te tahi manaʻo maitai ia faaroohia’tu:

“A piti ahuru matahi te maoro i teie nei aita vau i hiʻo noa aʻe nei i roto i te Buka a Moromona, tera râ, ua faauehia vau ia rave i te hoê ohipa i roto i te Ekalesia. Na roto i taua faaueraa ra, ua titauhia iaʻu ia tuatapapa maite i te Buka a Moromona e i te evanelia, e no reira, i roto i na avaʻe i mairi aʻe nei, ua amui faahou mai au i te Ekalesia nei ma te haamata apî faahou. I teie nei, ia haere mai taʻu mau tamarii haapii e farerei iaʻu, ma te manaʻo pe-ʻapeʻa no niʻa i te mau haapiiraa o te philosophia, teie taʻu parau ia ratou e, ‘Eiaha e haapeʻapeʻa. Ua ite taua e, e parau mau te evanelia e ua tiʻa te Ekalesia.’ ”¹⁰

E mea nahea to te mau papairaa moʻa horoʻaraa mai i te parau mau?

Ua itehia i teie mau matahiti i mairi aʻe nei te tahi mau haapiiraa e te tahi mau philosophia o tei faatupu i te umeumeraa i roto i te mau haapiiraa tahito o te haapaʻoraa, te morare e te mau autaatiraa utuafare. Ua rave itoito te feia tahitohito i te ohipa … no te haamou i te faaroo i te mau haapiiraa tahito e te mana o te mau papairaa moʻa e no te [mono mai i te reira] i te mau haapiiraa faaurû-ore-hia a te taata nei o te tauiui noa a tauiui-noaatoa ai te tau e te vahi.¹¹

Te parau nei au e, e haapii tatou i to tatou mau taata ia imi i ta ratou mau pahonoraa i roto i te mau papairaa moʻa. Ahani paʻi e, e paari iti to roto ia tatou tataitahi no te parau e, eita e tiʻa ia tatou ia pahono i te hoê aʻe uiraa maori râ, ua itehia ia tatou te hoê pahonoraa i roto i te mau papairaa moʻa! E mai te mea e, e faaroo tatou i te hoê taata i te haapiiraa i te parau faahapa no niʻa i te mau mea tei papaihia i roto i te mau papairaa moʻa, e ite ihoa tatou e ua hape taua mau mea e parauhia ra—e mea ohie roa. Te vahi fifi râ, e rave rahi paʻi o tatou aita e taiʻo nei i te mau papairaa moʻa. Aita tatou i ite e, eaha to roto i te reira, feruri-haerenoa’tura tatou na niʻa i te mau mea e itehia e tatou i roto i te mau papairaa moʻa. Te feruri nei au e, o tera ïa te hoê o to tatou mau fifi rahi i teie mahana.

Ia putuputu anaʻe au e te mau misionare e ia ui mai ratou i te mau uiraa no niʻa i te hiero, e parau atu vau ia ratou no te tapu i te aparauraa, “Eita vau e tamata i te pahono i te hoê aʻe o ta outou mau uiraa, maori râ, e itehia iaʻu te hoê pahonoraa i roto i te mau buka tumu o te evanelia, e aore râ, i roto i te mau parau a te mau Peresideni o te Ekalesia.”

I roto i te mau buka tumu o te evanelia, ua horoʻa mai te Fatu ia tatou i te mau raveʻa e tiʻa ai ia tatou ia ite i te parau mau e te parau hape. E tiʻa anei ia tatou paatoa ia haapaʻo i teie nei parau: “E rave oe i te mau mea ta oe i farii ra, o tei horoahia’tu ia oe i roto i taʻu nei mau papairaa moʻa ei ture, ia riro te reira ei ture no te faatereraa i taʻu nei Ekalesia” (PH&PF 42:59).¹²

Te vai ra ihoa te hinaaro ia haere i ô atu i ta te Fatu i fafau mai, e ia tamata i te faaohipa i te manaʻo i te tahi mau taime, e aore râ, ia feruri-haere-noa i niʻa i teie mau haapiiraa. Te hinaaro nei au ia haamanaʻo outou i te reira. Eiaha e tamata i te haere i ô atu i ta te Fatu i heheu mai. Mai te mea e, aita outou i ite, a parau e, aita outou i ite; eiaha râ e parau e, aita outou i ite mai te mea e, e mea tiʻa ia outou ia ite, no te mea, e mea tiʻa ia outou ia riro ei mau taata taiʻo-maite i te mau papairaa moʻa. E mea tiʻa ia pahonohia te mau maimiraa no niʻa i te mau haapiiraa o te evanelia a Iesu Mesia, na roto i te mau papairaa moʻa, mai te mea e, e tiʻa ia na reirahia.¹³

Tei ia tatou nei te mea aita e vai ra i roto i te tahi atu Ekalesia: E maha buka faahiahia mau, e mai te mea e, e taiʻo tatou i te reira mau buka paatoa, e mea maramarama maitai te parau mau i roto ra, e ore roa tatou e hahi ê. Teie te hoê hiʻoraa, mai te mea e, e hinaaro tatou ia ite i te tatararaa o te parabole no te zitania ia au i te manaʻo o te Fatu, aita’tu ïa e ohipa ta tatou e rave, maori râ, te taiʻoraa i te heheuraa tei papaihia i roto i te tuhaa 86 o te Parau Haapiiraa e te Mau Parau Fafau, e i reira, ua iteahia ia tatou te ta-tararaa a te Fatu. Mai te mea e, e hinaaro tatou ia ite i te hoê mea mai tei papaihia i roto i te mau haapiiraa o te “Beatitude” [Te Aoraa], e aore râ, te Pure a te Fatu, e nehenehe ta tatou e taiʻo i te papairaa tano mau i roto i te Toru Nephi. E rave rahi mau haapiiraa tei vai-noâ-nă i roto i te poiri, ua maramarama e ua papu te reira i roto i to tatou feruriraa i teie nei.¹⁴

Eaha te tumu tatou e faaohipa ai i te mau papairaa moʻa ia haapii anaʻe tatou i te evanelia?

E ohipa na te feia tei titauhia ia haapii i Ta’na mau tamarii, ia haapii ratou i te mau parau tumu o te evanelia. Aita tatou i piihia no te haapii i te tahi mau mea rii, e aore râ, i te tahi mau uiuiraa manaʻo no niʻa i te parau mau. Aita tatou i piihia no te haapii i te mau philosophia e aore râ, i te mau ite ihi o teie nei ao. Ua piihia râ tatou no te haapii i te mau parau tumu o te evanelia mai te itehia i roto i te mau buka tumu o te evanelia—te Bibilia, te Buka a Moromona, te Parau Haapiiraa e te Mau Parau Fafau, te Poe Taoʻa Rahi.

Ua haamaitaihia tatou na roto i te iteraa tatou i teie nei mau parau mau e te fariiraa i te taatoaraa o te mau papairaa moʻa i iteahia i te ao nei. O te mau melo anaʻe o te Ekalesia tei fanaʻo i taua haamaitairaa ra.¹⁵

Ua papu ia matou e, e hiaai rahi to to tatou mau melo i te evanelia, ma te anoʻi-ore-hia, e ma te î i te parau mau e te iteraa. … Eiaha tatou e faahaʻumani i [to tatou mau melo] … i roto i to tatou mau utuafare e aore râ, i roto i te mau haapiiraa a te Ekalesia, na roto i te horoʻaraa ia ratou te mau topata anoʻinoʻihia o te eva nelia, i te mea e, to ratou hinaaro, o te inuraa ïa ma te puha rahi i te pape ora! … Mai te mea ra e, te moʻehia ra i te tahi mau taata e, te mau mauhaa tamaʻi puai aʻe ta te Fatu i horoʻa mai ia tatou no te aro i te ino, ia au i Ta’na iho ra parau, o te mau parau haapiiraa maramarama ïa e te ohie no te faaoraraa, e vai ra i roto i te mau papairaa moʻa. Te maere nei matou i te faarooraa e, te vai nei te tahi mau taeae to tatou i roto i teie mau oire maitatai … o tei faaoti ia vaiiho i te hiti te mau haapiiraa o tei faataahia, e ia haapii i te mau parau huru rau aita roa i tuati i niʻa i te mau parau mau faufaa o te evanelia.¹⁶

Te mau mea atoa ta tatou e haapii i roto i te Ekalesia nei, e mea tiʻa ïa ia haamauhia i niʻa i te mau papairaa moʻa. … E rave mai tatou i ta tatou mau parau mai roto i te mau papairaa moʻa, e ia iteahia ia outou te tahi mau aamu i roto i te mau papairaa moʻa, e aore râ, te tahi heheuraa i roto i te Buka a Moromona, a faaohipa i te reira, eiaha e rave mai i roto i te tahi atu mau buka mai te mea e, te vai ra te reira i roto i teie mau buka. Te parau nei tatou i teie mau buka, te mau buka tumu a te Ekalesia, i te mea e, e mau buka tumu mau te reira. …Ia hinaaro outou e faito i te parau mau, a rave i te mau buka tumu a te Ekalesia no te faito i te reira. …Mai te mea e, aita to roto i te mau buka tumu, e nehenehe ta outou e parau e, e manaʻo feruri-noa-hia te reira. E manaʻo ïa no te taata iho, i te huriraa i roto i te tahi atu faahitiraa; e mai te mea e, te patoʻi ra te reira i tei papaihia i roto i te papairaa moʻa, e ite outou na roto atoa i taua tapaʻo ra e, e ere te reira i te parau mau. Teie te faito o te mau parau mau atoa. Ia ore râ outou e ite i te faito mau, aita ïa e tiʻa ia outou ia faito papu i te parau mau.¹⁷

Te feruri ra vau i te tau … a haapiihia ai au i te mau papairaa moʻa i to’u vai-tamarii-raa i roto i te Paraimere. … A haamanaʻo na, e tupu mai te faaroo na roto i te faarooraa i te parau a te Atua, mai ta Paulo i parau ra [a hiʻo Roma 10:17]. … I roto i taʻu piha haapiiraa Paraimere, e orometua faahiahia roa to’u–eiaha no te mea e, ua haere oia i te haapiiraa e ua roaa te ite rahi ia’na no te ohipa haapii, no te mea râ e, te vai ra i roto ia’na te tiaturiraa e … no te faatupu i te faaroo i roto ia matou, e mea tiʻa ia’na ia haapii ia matou i te mau papairaa moʻa.¹⁸

E tupu anei to tatou iteraa papu e to tatou huru pae varua i te rahi na roto i te taiʻo-maite- raa i te mau papairaa moʻa?

Te faatupu tamau ra anei outou i to outou iteraa papu i te rahi na roto i te taiʻo-maite-raa i te mau papairaa moʻa? E peu matau anei na outou i te mau mahana atoa ia taiʻo i te mau papairaa moʻa? Ia ore tatou e taiʻo i te papairaa moʻa i te mau mahana atoa, e iti mai to tatou iteraa papu, aita to tatou huru pae varua e haere i te rahiraa. E mea tiʻa ia tatou iho ia taiʻo-maite i te mau papairaa moʻa e ia faariro i te reira ei peu na tatou i te mau mahana atoa.¹⁹

Te raveʻa no te patu i to outou huru pae varua, [o te] taiʻomaite-raa ïa i te evanelia.²⁰

A tutava i roto i to outou utuafare, e a haapii ia vetahi ê, ia faataa i te tahi taime i roto i te hoê mahana, i te hoê hora maniania ore, ei taime feruri-maite-raa. A faatupu i te taiʻoraa i te mau papairaa moʻa e toru ahuru aʻe minuti i te mahana hoê. I te hora po-ʻipoʻi roa anei, e aore râ, i te pô anei, te taime tano maitai no outou, a faataa i te hoê hora no outou no te feruri-maite-raa na roto i te pure, i reira hoi to outou varua e tuati ai i niʻa i to te Atua, e a paraparau atu Ia’na i te mau fifi eita e roaa i te taata nei ia feruri, e tei riro ei mau fifi teimaha roa no te puai taata nei.²¹

E taiʻo anaʻe tatou i teie mau buka moʻa ma te tu’ua ore te mahana. Tera râ, eita e ravai ia haapii tatou i te parau no To’na oraraa e Ta’na ohipa na roto noa i te taiʻo-maite-raa. Ei pahonoraa i te uiraa e nahea te hoê taata e ite ai Ia’na e i Ta’na e haapii ra, te parau ra te Fatu e: “O tei hinaaro maite i te haapaʻo i to’na ra hinaaro, e ite ïa” (Ioane 7:17). Ia manaʻo outou, e riro anei te hoê taata tei ore â i rave aʻe nei i te mau tamatamataraa i roto i te fare maimiraa [Laboratoire] ei faatere no te ite ihi? E tiaturi anei outou i te mau manaʻo paraparau o te hoê taata o tei ore i ite i te parau no te pehe, e aore râ, e tiaturi anei outou i te manaʻo o te hoê taata tei ore i peni aʻe nei? Oia atoa te taata mai ia outou o te hinaaro e “ite i te Atua” o te taata ïa e haapaʻo i to’na hinaaro e o te haapaʻo i ta’na mau faaueraa e o te faaohipa i te mau mea i orahia e Iesu.²²

Tei roto tatou i te ohipa a te Fatu. E tiʻaraa to tatou ia farii i te aratairaa a te varua, mai te mea e ora tatou ma te tiamâ. Te hinaaro nei te Atua ia ora tatou ma te tiamâ e ia taiʻo maite i te mau papairaa moʻa, e ia riro hoi te reira ei peu na tatou i te mau mahana atoa, ia ore tatou ia hiʻa i roto i te mau ohipa tei piihia ia tatou ia rave i roto i te basileia o to tatou Metua.²³

Te Mau Manaʻo Tauturu no te Haapiiraa e te Aparauraa

E mea nahea te mau papairaa moʻa i riro ai ei taoʻa faufaa no to tatou oraraa pae varua, mai te pape i riro ei mea faufaa no to tatou oraraa pae tino nei? Nahea te taiʻo-maite-raa i te mau papairaa moʻa i te tauturu ia tatou ia upootia i niʻa i te faahemaraa?
E mea nahea te Buka a Moromona i te aratairaa ia tatou ia Iesu Mesia ra? Nahea te Buka a Moromona i te tautururaa ia tatou ia ite i te parau mau e i te parau hape? E mea nahea te taiʻo- maite-raa outou i te Buka a Moromona i te tauiraa i to outou oraraa?
Eaha te mau mea tei tupu i niʻa ia outou i roto i ta outou mau maimiraa i te mau pahonoraa i ta outou mau uiraa i roto i te mau papairaa moʻa?
Ia haapii anaʻe tatou, no te aha e mea faufaa ia turu’i i niʻa i te mau papairaa moʻa e i niʻa i te mau haapiiraa a te mau peropheta?
E mea nahea i tiʻa ai ia outou ia faariro i te taiʻo-maite-raa i te papairaa moʻa ei hoê titauraa matamua i roto i to outou oraraa? E mea nahea i tiʻa ai ia outou ia faaitoito i ta outou mau tamarii e aore râ, i te tahi atu mau melo o te utuafare ia taiʻo-maite i te mau papairaa moʻa?
Nahea to tatou taiʻo-maite-raa i te mau papairaa moʻa i te faananea i to tatou aravihi no te rave faaoti i te “mau piiraa teitei tei piihia ia tatou i roto i te basileia o to tatou Metua”?

Ua here te Peresideni Harold B. Lee i te mau papairaa moʻa e ua faaohipa oia i te reira no te haapii i te Feia Moʻa. Ua parau oia e, “Ia ore tatou e taiʻo i te mau papairaa moʻa i te mau mahana atoa, e rairai noa’tu to tatou iteraa papu, aita to tatou huru varua e haere i te rahiraa.”