Pene 24

Te Tipaeraa Maitai Mau i te Fare

E mea papu anei tatou i niʻa i te haerea e aratai nei ia tatou i to tatou utuafare mure ore e to tatou oraraa i pihaʻi iho i te Metua?

Omuaraa

I roto i ta’na tau faatereraa, ua haapapu maite o Harold B. Lee i ta’na mau haapiiraa: “Te ohipa ta tatou e tautoo nei o te haapaʻoraa ïa ia tatou iho e ia ora tatou i te hoê oraraa ia nehenehe ia tatou i te hoê mahana, ia hoi faahou i taua Atua ra o tei horoʻa mai i te ora ia tatou—i pihaʻi iho i taua Metua i te Ao ra.”¹

Te faahaamanaʻo ra oia e: “I te tahi taime i mairi aʻe nei, ua taiʻo vau i te hoê parau tei papaʻihia e te hoê taata papaʻi veʻa tuiroo; te faaite ra taua papaʻi veʻa ra e mea nahea oia i te faanahoraa i te hoê aparauraa maitai roa e te tahi mau taata o ta’na i hinaaro e uiui. E ui oia i te hoê uiraa mai teie rii te huru: ‘E nehenehe anei oe e faaite mai iaʻu i te mau parau ta oe e hinaaro i te papaʻi i niʻa i to oe menema?’ E te parau ra oia e, e rave rahi o tei pahono mai teie te huru ‘A arearea,’ ‘ua haere i te tahi atu apooraa,’ e te vai atu ra. E i muri iho, ua anihia’tu i te papaʻi veʻa eaha ta’na e papaʻi i niʻa i to’na menema. Ua pahono oia ma te mărû e te papu maitai, ‘Ua tae maitai au i te fare.’

“Ia maramarama maitai anaʻe tatou i te auraa hohonu o teie mau parau, i reira tatou e ui ai ia tatou iho e, ‘Eaha te tumu rahi o te oraraa nei, e eaha ta tatou tiaʻiraa i roto i te oraraa a muri aʻe, inaha, te tiʻaturi nei tatou i te hoê oraraa i muri aʻe i teie oraraa?’ Noa’tu e no tei hea haapaʻoraa ratou, fatata te mau taata atoa teie e hiʻo nei i te hoê oraraa ua rau te huru o to’na tatararaa. Mai te mea e, ua tano toʻu manaʻo, e riro ïa tatou pauroa i te hinaaro i te papaʻi i niʻa i to tatou menema e, ‘Ua tae maitai au i te fare,’ ei parau faaite i te ohipa o to tatou oraraa.²

Te mau haapiiraa a Harold B. Lee

Eaha te opuaraa o to tatou oraraa tahuti nei?

Eaha te opuaraa o te oraraa nei … ? Te pahonoraa hoê roa, e iteahia i roto i te hoê irava o tei faaite mai i te opuaraa a te Atua i to’na horoʻaraa mai i te ora i te taata atoa, e ua faataa-maitai-hia taua opuaraa i roto i te hoê heheuraa i horoʻahia i te peropheta Mose ra: “Inaha, o teie hoi taʻu ohipa e toʻu hanahana hoi, ia faatupu i te tahuti ore e te ora mure o te taata nei.”[Mose 1:39]. Mai te mea e, e huti te hoê taata i to’na aho no te hoê taime iti poto noa i roto i te oraraa tahuti nei, e i muri iho, pohe atu ai, e aore râ, mai te mea e, ua ora oia i te matahiti o te tumu raau, ua tupu ïa te opuaraa a to tatou Metua mai te mea e, ua roaa ia’na te tahuti ore. E teie nei mea o tei parauhia te ora mure ore, ua titauhia ïa i te hoê taata ia ora i te hoê oraraa e tiʻa ai ia’na ia farii i te ora mure ore i mua i te aro o te Atua te Metua e te Tamaiti.³

I roto i te ao varua, e tamarii te taata na te Atua. Ua hamanihia te fenua nei e ua faanahonahohia ei vahi parahiraa no te mau varua o te raʻi tei fanauhia mai i roto i te tino pohe noa no te “tamata ia ratou i reira, ia ite …e, e haapaʻo anei ratou i te mau mea atoa ta te Fatu to ratou Atua e faaue ia ratou ra.” [Hiʻo Aberahama 3:25]. Te tumu te Atua i na reira ai, “no te faatupu [ïa] i te tahuti ore e te ora mure ore” e aore râ, ei faaiteraa i te manuïa o te oraraa tahuti nei, e nehenehe atoa e parau e, no te faahoʻi i te mau varua atoa i mua i te aro o “taua Atua ra o tei horoʻa i te ora ia ratou” e i roto i te hoê tino tiʻa faahou e ore e pohe faahou e o tei maitai roa, ia ora e a muri noa’tu i mua i te aro o te Fatu to tatou Orometua e te Metua no tatou paatoa.⁴

Na te [Peresideni Georges F. Richards] i faatia mai i teie nei aamu, e aamu no te hoê taurearea o tei hinaaro roa ia roaa to’na maramarama. Aita e nehenehe i to’na na metua ia afaʻi ia’na i te fare haapiiraa tuarua, no reira, ua haere avae noa’tura oia e tae atura i te fare haapiiraa tuarua o te oire; e i to’na imi-itoito-raa, ua iteahia ia’na te hoê vahi [i reira] oia i tarahu ai i to’na faaearaa e ta’na maa. I muri aʻe ra, ua horoʻa mai te hoê o to’na mau orometua haapii nana, te hoê ohipa tapu raau no te aufau i ta’na haapiiraa. I te iteraa te tahi atu mau orometua e, e mea ite oia i te tapupu raau, ua faaue atoa aʻera ratou ia’na ia tapu i ta ratou raau. Aita i maoro, ite aʻera oia e, aita to’na e taime faahou no te haere i te fare haapiiraa tuarua, e ua tupu to’na oaoa i to’na manuïaraa i roto i te ohipa tapupu raau.

E faaiteraa teie no te hoê huru e fariihia e rave rahi o tatou. Ua haere mai tatou i niʻa i te fenua nei no te hoê opuaraa papu maitai— oia hoi, te rave-faaoti-hua-raa i to tatou iho ora, e aore râ, e nehenehe atoa e parau e, no te faaineine i te oraraa i muri nei, e oraraa mure ore. Mai te mea ra e, ua moʻehia i te tahi pae o tatou ta tatou opuaraa, e ua mauruuru noa tatou i te taoʻa e te roo ta te oraraa nei i horoʻa mai, oia hoi, ua mauruuru noa tatou i te ohipa “tapupu raau.”⁵

E tiʻa anei ia tatou, tatou tei farii i te iteraa papu [no niʻa ia Iesu] … ia tiʻaoro atu i to tatou Metua ma to tatou aau atoa: “E te Fatu, eaha vau, eaha to oe hinaaro?” [Ohipa 9:6].

E mai te mea e, e pure tatou ma te aau tae mau e ma te faaroo, e horoʻahia mai ia tatou te pahonoraa i ta tatou pure mai roto mai i te mau papaʻiraa. Ua horoʻahia mai te pahonoraa o tei faahiti-pinepine-hia, i tera taime e tera taime, oia hoi, te mau mea atoa ta tatou e rave, ia ravehia ïa “ma te mata rotahi i te hanahana o te Atua ra.” [PH&PF 82:19]. Eaha te hanahana o te Atua? Ua parau atu te Fatu i te reira ia Mose:

“… teie hoi taʻu ohipa e toʻu hanahana hoi—ia faatupu i te tahuti ore e te ora mure ore o te taata nei.” (Poe Taoʻa Rahi, Mose 1:39).

Ma taua opuaraa i mua ia tatou, ma hiʻo atu i te mau mea e rave rahi o te oraraa nei, e mai te mea e, ua faaauhia ta tatou mau ohipa atoa, e ta tatou mau faaotiraa atoa i niʻa i te huru oraraa i reira e tiʻa ai ia tatou ia tiʻa i mua i te aro o te Fatu to tatou Metua i te Ao ra, ia roaa, oia hoi, ia farii i te ora mure ore.⁶

I roto i te mau papaʻiraa moʻa, i roto hoi i te mau papaʻiraa a te feia faatere faaurûhia o te Ekalesia, e i roto i te mau tuatapaparaa, e nehenehe e parau e, te ora mure ore, o te oraraa ïa i pihaʻi iho i te mau Taata mure ore, te Atua Metua e Ta’na Tamaiti o Iesu Mesia. E parau poto noa tatou e, te ora mure ore o te ora ïa o te Atua. …

No te titau ia tapaʻe i teie faito teitei tiretiera, e mea tiʻa tei titauraa ia riro ei titauraa hopea ore no te mau taata tahuti atoa.⁷

Ua ineine anei tatou no te tiʻa atu i mua i te haavâraa a te Atua?

E tiʻa outou paatoa … i mua i “te haavâraa a Tei Moʻa i Iseraela nei … ei reira e tae mai ai te haavâraa ra … mai tei au i te haavâraa moʻa a te Atua.” (2 Nephi 9:15). E mai te au i te orama a Ioane ra, “E heua ihora na buka ra: e heua ihora hoi te tahi buka oia te buka ora ra: e haavâhia ihora taua feia i pohe ra i te mau parau i papaʻihia i roto i taua na buka ra, i ta ratou ra mau ohipa.” (Apokalupo 20:12). Teie “mau buka” e parauhia nei, “te parauhia ra ïa no te mau papaa parau [no ta outou mau ohipa]i haapaʻohia i niʻa i te ao nei. … Te buka no te ora, o te papaa parau te reira o te haapaʻohia nei i te raʻi ra.” (PH&PF 128:7). O outou o tei ora ma te parau tiʻa e ua pohe ma te ore e riro ei mau tavini no te hara, e aore râ, o tei tatarahapa i ta outou mau hara ma te aau tae mau, e tomo ïa outou i roto i te “faaearaa o te Fatu,” oia te faaearaa tei parauhia “te îraa ïa no te hanahana o te Fatu.” [Hiʻo PH&PF 84:24].⁸

I roto i te mau papaʻiraa faaurûhia, ua faaitehia ia tatou e, “Na ta tatou mau parau tatou e faahapa, (e aore râ, e faateitei), na ta tatou mau ohipa atoa tatou e faahapa (e aore râ, e faaitoito )… [a hiʻo Alama 12:14], ia arataihia’tu tatou i mua i te aro o te Haavâ Rahi no tatou paatoa, ma te tiʻaturi e, e farii tatou i te haapoupouraa a te Fatu: “Ua tiʻa roa, e teie nei tavini maitai e te haavare ore.” [Mataio 25:21]. Taaʻe noa’tu te aratairaa i matarohia e te feia no te ohipa faaroo, oia hoi, o te Aposetolo Paulo te tiaʻi uputa no te oraraa i muri aʻe i teie oraraa, ua faaitehia mai ia tatou e, “e te tiaʻi uputa ra, o Tei Moʻa ïa i Iseraela nei; e aore oia i tarahu i te tavini i reira ra.” (2 Nephi 9:41).⁹

Te hade rahi aʻe e mamaehia e te hoê taata, o te amaraa ïa te manaʻo o to’na aau. Te parau ra te mau papaʻiraa moʻa e, na to- ’na mau manaʻo oia e faahapa mai, e roaa ia’na te hoê haamanaʻoraa maramarama i te mau mea atoa o to’na oraraa (hiʻo Alama 12:14; 11:43). Te haamanaʻo ra outou i roto i te mau papaʻiraa moʻa, te parauhia ra no te buka ora a te Arenio, e papaa parau no te oraraa o te taata nei, o te haapaʻohia nei i te raʻi ra. … E haavâhia te taata mai te au i te mau papaa parau i haapaʻohia no to tatou nei oraraa. (Hiʻo PH&PF 128:6–7). I teie nei, ia ore e roaa ia tatou taua faito teitei o te hanahana ra, e ia ite hoi tatou i te mea i erehia e tatou nei, ei reira te manaʻo o te aau e ama ai, e te manaʻo nei au e, e riro te reira ei ohipa mauiui mau no te hoê taata, hau atu i ta te auahi e faatupu.¹⁰

Ia tomo anaʻe tatou na roto i te uputa o te pohe … e parau mai Oia ia tatou e, “I teie nei, ua rave outou i toʻu iʻoa i niʻa ia outou iho. Eaha te ohipa i ravehia e outou i toʻu iʻoa? Outou e te mau melo o taʻu ekalesia, ua faaino anei outou i te iʻoa o te Fatu ra o Iesu Mesia? A feruri na, ia faatuatua mai oia i te mata, a feruri na, ia tairiiri mai Oia i To’na upoo a huri mai ai i te tua e a haere ê atu ai. … I teie nei, a feruri na, ia farerei anaʻe tatou Ia’na, e itehia te mata ataata i niʻa Ia’na. E hohora mai Oia i To’na na rima farii ia tatou, ma te parau mai ia tatou e, “E taʻu tamaiti, e taʻu tamahine, ua haapaʻo maite oe i niʻa i te fenua. Ua tapeʻa maite oe i te faaroo. Ua oti ta oe ohipa. I teie nei, te vai nei te hoê korona i faaineinehia no oe i roto i toʻu basileia.” [Hiʻo 2 Timoteo 4:7–8]. Aita taʻu e nehenehe e feruri i te tahi atu oaoaraa rahi i te ao atoa nei, tei hau atu i taua farereiraa i mua i te aro o te Manahope, i roto i taua ao ra a muri aʻe.¹¹

Nahea tatou ia faaineine ia tatou no te farerei i te Fatu?

Ua horoʻa mai te Fatu ia tatou nei i te tahi tau mahana hau atu, e aore râ, te tahi tau hepetoma hau atu, e aore râ, te tahi tau matahiti hau atu a tere ai hoi te tau—aita e faataaraa e eaha te roaraa— i te mea e, i roto i te taiʻoraa a te Manahope, e faufaa rahi to te mahana faaineineraa tataʻitahi. Ua parau te hoê peropheta e, “Teie nei oraraa te taime ia faaineine te taata ia farerei i te Atua; oia ïa, o te mahana ïa, te mahana o teie nei oraraa, ia rave te taata i ta ratou ohipa. … Inaha hoi, ia faaroaroa outou i te mahana e tatarahapa ai outou ra, e ia tae mai i te pohe, … e tamau te diabolo ia outou no’na iho.” (Alama 34:32, 35).¹²

E mea tiʻa ia tatou ia haamanaʻo e, aita e taaʻeraa rahi i rotopu i te pohe-oioi-raa tatou e aore râ, ia paari tatou a pohe ai; e ere te taime e pohe ai tatou te mea faufaa; te mea faufaa râ, o te huru ïa o to tatou ineineraa a pohe ai tatou. Teie te mahana e faaineine ai te taata ia ratou no te farerei atu i to ratou Atua. E maitai rahi To’na i te mea e, ua horoʻa mai oia ia tatou nei i te hoê tau tamataraa i reira hoi te taata e haamaitai roa ai ia’na.¹³

Teie te mahana e hamata ai tatou i te imi i to tatou varua. Ua itehia anei ia outou e, eaha te faaueraa faufaa roa aʻe i te mau faaueraa no outou i teie mahana? … E hamata anei outou i te rohi i niʻa i te reira i teie mahana? E aore râ, e tiaʻi anei outou e tae atu i te taime ua taere roa? E parau te tamarii e, “Oia, ia rahi mai au, e rave ïa vau i tera e tera ohipa.” Eaha ïa te reira mau ohipa? Ia rahi anaʻe oia, … e parau oia e, “Ia faaipoipo-anaʻe-hia vau, e rave ïa vau i tera e tera ohipa.” E ia oti anaʻe oia i te faaipoipohia, e taui pauroa te mau mea atoa, e “Oia, ia faatuhaahia anaʻe au.” E ia tae oia i te faatuhaaraa, te farara mai nei te hoê mataʻi toetoe i niʻa ia’na, e ua taere roa to’na ite-taʻue-raa e, ua ere oia i te mau mea atoa. E ua taere roa ïa. E taime iti rahi roa to’na, e oraraa taatoa. Aita râ oia i haafaufaa i te reira. I teie nei, i teie mahana, teie te mahana e haamata ai tatou i te rave i te hoê mea no niʻa i te reira, hou a taere roa ai.¹⁴

Te haamanaʻo nei au i te hoê aamu tei faatiʻahia mai iaʻu i te fenua Hawaii i te tau mahanahana i mairi aʻe nei, no niʻa i te hoê tamahine iti naʻinaʻi tei afaʻi mai i to’na hoa i to’na utuafare. Te hauti noa ra raua, area te mama ruau ra, tei roto ïa i te fare i te taiʻo-noa-raa i te bibilia. I te mau taime atoa e haere mai teie tamahine i te fare, e ite oia i te mama ruau te taiʻo noa ra i te bibilia, e i te pae hopea, ua parau atu oia i te mootua e, “Eaha to oe mama ruau e taiʻo noa ai i te bibilia?” Pahono atura te mootua iti e, “A, te rû nei toʻu mama ruau i te tamau i te parau no ta’na hiʻopoaraa hopea.”

Aita oia i hape roa. E te feruri nei au e, e mea tano roa ia feruri maite tatou i te faufaa no te tamauraa tatou i te parau no te hiʻopoaraa hopea.¹⁵

Ehia taime to outou faataere-noa-raa i te mahana no te tatarahapa i ta outou mau ohipa tiʻa ore? E tiʻa’tu tatou i mua i te haavâraa a te Hiʻo Parau Tiʻa, inaha, e hiʻo oia i to tatou mau aravihi, e to tatou mau otiʻa, te mau raveʻa i horoʻahia ia tatou, e tae noa- ’tu i to tatou mau vahi fifi. Te taata o tei rave i te hara e ua tatarahapa, e i muri aʻe ra, rave ihora i te mau ohipa maitai i roto i to’na oraraa, e iti aʻe ïa tei erehia e a’na i taua mahana haavâraa parau tiʻa ra i tei erehia e te taata tei ore i rave i te mau hara rarahi roa, tera râ, aita oia i rave i te mau mea e oti ia’na i te rave ia au i to’na aravihi e ia au hoi i te raveʻa i horoʻahia ia’na.¹⁶

A parahi ai tatou i ô nei i teie mahana, ma te hiʻo maite i to tatou oraraa, a feruri na e, e tupu mai te hoê mea ia haere atu tatou i rapae i teie nei amuiraa, e ua tapeʻahia to tatou ora. Te vai ra anei te tahi mau ohipa oti ore i te ravehia e tatou hou a tae mai ai taua taime ra? … Te vai ra anei te tahi mau hapehape o te titauhia ia faaafaro hou a tae mai ai taua taime ra? Te vai ra anei te tahi mau hoa to outou i te tahi atu pae e tiaʻi maira ia outou e o ta outou e oaoa ia farerei atu mai te mea e, e faaoti outou i te tahi mau ohipa i titauhia ia outou ia rave i teie mahana? Ua ineine anei outou no te farerei i te mau hoa i reira, i te mea e, ua rave outou i te mau mea atoa e tiʻa ia ravehia e outou no te oaoa o ta ratou mau tiaʻiraa? Te vai ra anei te tahi mau hara ta outou o te titauhia ia tatarahapa hou a hoʻi atu ai outou i Ia’na ra o tei horoʻa mai i te ora ia outou ra?¹⁷

I ô nei e i teie nei i roto i te tahuti nei, ua horoʻahia ia tatou tataitahi te raveʻa no te maitiraa i te huru o te ture ta tatou e maiti e, e haapaʻo tatou. Te ora nei e te haapaʻo nei tatou i teie nei i te mau ture tiretiera, e na te reira e faariro ia tatou ei mau taata titau i te hanahana tiretiera, e aore râ, te ora nei tatou i te mau ture teretetiera, e na te reira mau ture ïa e faariro ia tatou ei mau taata titau i te hanahana teretetiera, e aore râ, te ture tiretia. Na te huru o to tatou haapaʻo i te mau ture o teie mau basileia rau i roto i te tau o te oraraa tahuti i niʻa i te fenua nei, e faataa i te parahiraa e parahihia e tatou i roto i te mau ao mure ore.¹⁸

Nahea outou ia faaineine ia outou no te farerei i te Fatu? … Ua parau te Fatu e, “No reira, a haamoʻa na outou ia outou iho ia riro to outou manaʻo rotahi i te Atua ra, e e tae mai ïa te mau mahana e ite ai outou Ia’na ra; … e e na reirahia i to’na ihora tau mau, e i to’na iho raveʻa, e mate au hoi i to’na iho hinaaro.” (PH&PF 88:68). Teie te faanahoraa Ta’na i horoʻa mai ia tatou nei i roto i te hoê heheuraa …, “Oia mau, te na reira mai nei te Fatu: E tupu mai â teie o te mau varua atoa o te faaruʻe i ta’na mau hara ra e o te haere mai iaʻu nei, e o te pii mai i toʻu nei iʻoa, e o te haapaʻo i toʻu nei mata e e ite mai hoi e te vai nei au.” [PH&PF 93:1].¹⁹

Eaha te utuʻa a te taata e ora i te oraraa “e tiʻa ai ia’na ia ite e, te ora nei te Atua e o Iesu te Mesia”?

Te raʻi ra, mai te au i to tatou iteraa, o te vahi ïa e parahihia e te feia parau tiʻa, ia faaruʻe mai ratou i teie oraraa i te fenua nei, e e vahi hoi i reira te Atua e te Mesia e parahi ai. Te parau ra te Aposetolo Paulo no niʻa i teie huru oaoa, “Aore i hiʻohia e te mata ra, aore i faaroohia e te tariʻa ra, aore hoi i ô i roto i te aau o te taata ra, o ta te Atua ïa i vaiiho no te feia i hinaaro Ia’na ra” (1 Korinetia 2:9).²⁰

No te mau taata e rave rahi, ua rau te auraa no te parau ra, te manuïaraa, area no te mau tamarii atoa a te Atua ra, o te iteraa ïa Ia’na e te vai-maitai-raa i pihaʻi iho Ia’na.²¹

Hoê noa iho titauraa i roto i te ohipa a to tatou Metua, oia hoi, i te pae hopea, ia oti ta tatou ohipa i niʻa i te fenua nei, noa’tu e, e taime poto roa e aore râ, e taime roa, ua titau-atoa-hia ia tatou ia upootiʻa i niʻa i te ao e ia roaa te tiʻaraa o taua parahiraa ra o tei parauhia te Basileia Tiretiera.²²

Te taata e ora i te hoê oraraa e tiʻa ai ia’na ia ite e, te ora nei te Atua e o Iesu te Mesia, e o tei hinaaro hoi ia tiʻaoro tamau Ia’na ia ite e, ua fariihia anei to’na haerea, o te taata ïa e ora nei i te îraa o te oraraa i ô nei, e o te faaineine nei no te ao tiretiera, oia hoi, te oraraa e a muri noa’tu i pihaʻi iho i to’na Metua i te Ao ra.²³

E faahaamanaʻo faahou atu â vau ia outou ia feruri maite i te fafauraa nehenehe a te Fatu i te feia haapaʻo maitai atoa:

“E mai te mea ua rotahi to outou mata i toʻu hanahana ra, e faaîhia to outou mau tino paatoa i te maramarama, e e ore roa hoi te pouri i roto ia outou na; e o te tino o tei faaîhia i te maramarama ra e ite ïa i te mau mea atoa.” (P&PF 88:67).

E te taata e imi i te reira, e roaa ïa ia’na taua iteraa aueue ore ra, e na te reira e tuu papu i to’na avae i niʻa i te eʻa o te aratai papu i te titauraa hanahana o te tahuti ore e te ora mure ore, o taʻu ïa pure haehaa.²⁴

Te Mau manaʻo Tauturu no te Haapiiraa e te Aparauraa

Eaha te mau mea i riro ai tatou i te tahi mau taime mai teie taurearea tapupu raau?
Eaha te mea e tauturu ia tatou ia feruri tamau noa i te mau mahana atoa i te titauraa o te hoi- papu-raa i to tatou Metua i te Ao ra?
Nahea tatou i te maiti i teie nei i te parahiraa e parahihia e outou i roto i te mau ao mure ore ra? Eaha te faahopearaa o te ohipa faataere noa i to outou faaineineraa no te tia’tu i mua i te haavâraa a te Atua?
Eaha ta tatou e rave mai te mea e horoʻa mai â te Atua ia tatou hoê aʻe mahana faahou?
Eaha te auraa no te parau, ia ora ma te mata rotahi i te hanahana o te Atua? (Hiʻo PH&PF 88:67–68).
Eaha te auraa ia rave i niʻa ia outou iho i te iʻoa o te Fatu o Iesu Mesia? Eaha ta tatou e rave no te faatura i To’na ra iʻoa?
Eaha ta outou taiʻoraa i te mau haapiiraa a te Peresideni Harold B. Lee i haapii mai ia outou no niʻa i te huru no te hoʻipapu- raa i te Atua ra?

Ua haapii mai te Peresideni Harold B. Lee e, e mea tiʻa ia faatumuhia ta tatou haaraa i roto i te tahuti nei i niʻa i te “oraraa o te îraa o te oraraa i ô nei, e … o te faaineineraa no te ao tiretiera.”