Pene 8

Iosepha Semita, e Peropheta na te Atua Ora

Eaha te tumu te hoê iteraa papu no niʻa i te misioni tohu a Iosepha Semita i riro ai ei mea faufaa no to tatou iteraa papu no niʻa i te evanelia a Iesu Mesia?

Omuaraa

Eiteraa papu paari to te Peresideni Harold B. Lee no niʻa i te Peropheta Iosepha Semita, e e faaohipa pinepine oia i te mau parau a te Peropheta no te haapii i te mau parau tumu o te evanelia. Ua ite oia e, e mea faufaa rahi te hoê iteraa papu no niʻa i te misioni a te Peropheta Iosepha Semita no to tatou iho iteraa papu no niʻa i te evanelia a Iesu Mesia. Ua faatia mai oia i te parau no te mau taata e rave rahi o tei ore i faaite ia vetahi ê i te reira iteraa papu to ratou no niʻa i te Peropheta. Te hoê o te reira mau taata, o te hoê ïa hoa no’na o tei taiʻo i te Buka a Moromona ma te parau mai i te parau no to’na “faatura i te mau haapiiraa o te reira buka.” Ua ui atura te Peresideni Lee ia’na, “Eaha te tumu aita oe i rave i te hoê noa aʻe ohipa no niʻa i te reira? … Eaha te tumu aita oe i tomo mai i roto i te Ekalesia?” Ua horoʻa mai taua taata ra i te hoê pahonoraa tei feruri-maite-hia e a’na. “Te feruri nei au e, te tumu rahi no te reira, no te mea ïa e, e mea fatata roa mai o Iosepha Semita iaʻu. Ahiri oia i ora na e piti tauatini matahiti i mua ra, ia manaʻo vau, ei reira paha ia vau e tiaturi ai ia’na. No te mea râ e, no teie nei roa oia, o tera ïa te tumu aita e tiʻa iaʻu ia farii.” Teie ïa te parau a te Peresideni Lee no niʻa i te pahonoraa a to’na hoa, “Teie ïa te hoê taata, te parau nei e, ‘Te tiaturi nei au i te mau peropheta pohe tei ora na hau atu i te tauatini matahiti i teie nei, area te hoê peropheta ora ra, e mea fifi roa ïa naʻu ia tiaturi ia’na.’ ”¹

Te vai atoa ra te hoê vahine tei parau e, “Ua ite oe, e farii au i te mau mea atoa i roto i te Ekalesia, eiaha râ hoê. … Eita roa’tu taʻu e nehenehe e farii e, e Peropheta o Iosepha Semita na te Atua Ora.” Teie ïa te parau a te Peresideni Lee, “Nahea te hoê taata i te farii i te evanelia e aita oia e farii i te taata tei riro ei mauhaa no te faahoʻi-faahou-raa-hia mai te reira evanelia, aita roa vau e taa ra.”²

Ua parau te Peresideni Lee: “E mea tiʻa ia vai te iteraa paari i roto i to tatou aau e to tatou feruriraa e, o Iesu te Mesia, te Faaora no to te ao nei. E mea tiʻa ia tatou ia ite e, o teie te Ekalesia a Iesu Mesia, te basileia o te Atua i niʻa i te fenua nei i te mau mahana hopea nei; e i te hopea roa, e mea tiʻa ia tatou ia ite papu e, e peropheta o Iosepha Semita na te Atua.”³

Te mau haapiiraa a Harold B. Lee

No te aha i titauhia ai ia tatou ia ite papu e, e peropheta o Iosepha Semita na te Atua?

Eaha te mau mea e faaite ia tatou i te hoê Peropheta mau na te Atua? A tahi, e auvaha parau oia no te Atua no te reira tau i mua i to’na mau taata. A piti, e faahiti faahou mai oia i te mau parau mau i tahito ra, e e imi oia i te raveʻa ia haapaʻo te mau taata i te mau ture tauiui ore o te evanelia. A toru, e farii oia i te tahi atu â mau heheuraa no ô mai i te Fatu ra ei pahonoraa i te mau fifi no te tereraa o te faanahoraa tei faaitehia mai. Taua mau parau mau apî ra no ô mai i te Atua ra, e horoʻahia mai te reira na roto anaʻe i te Peropheta o taua taime ra. Taua taata ra, o Iosepha Semita ïa, e Peropheta na te Atua mai te upoo e tae roa’tu i te avae. Oia ïa, mai ta te Peropheta Amosa i parau ra, “Aita a te Fatu ra a Iehova e peu i rave, maori râ ia faaite i ta’na parau i moʻe i ta’na ra mau tavini i te mau peropheta.” [Amosa 3:7].⁴

I roto i te hohonuraa o to’u varua, ua … ite au e, e peropheta o Iosepha Semita na te Atua Ora. Ua ite au e, ua ora na oia e ua pohe no te faahoi mai i teie nei u’i i te mau raveʻa e roaa ai ia ratou te faaoraraa. Ua ite au e, te parahi nei oia i niʻa i te hoê parahiraa teitei e te mau nei i te mau taviri no teie tau tuuraa evanelia hopea. Ua ite au e, te feia e pee ia’na ma te farii i ta’na ra mau haapiiraa e ma te farii ia’na ei peropheta mau na te Atua e i ta’na mau heheuraa e ta’na mau haapiiraa ei parau na te Atua, e ore roa ratou e roaa i te uputa o hade. [PH&PF 21:4–6]⁵

E mea tiʻa ia tatou ia farii i te misioni hanahana a te Peropheta Iosepha Semita, oia tei riro ei mauhaa na roto hoi i te reira i tupu ai te faahoʻi-faahou-raa-hia mai o te evanelia e te faanahonahoraa-hia te Ekalesia a Iesu Mesia. E mea tiʻa i te melo tataitahi o te Ekalesia, ia farii i to’na iho iteraa papu no niʻa i te hanahana o te ohipa i haamauhia e Iosepha Semita, no te faaineineraa ia ratou no te tau mileniuma. O te reira te parau tei haapii-papu-hia e te feia moʻa i muri aʻe i te anotau o te Faaora i niʻa i te fenua nei, e o tei faahiti-faahou-hia e te hoê o te mau tiʻa faatere i to tatou nei anotau, te manaʻo nei au e, te faaau ra oia i te reira i te parabole no na paratenia maamaa e pae e na paratenia paari e pae i roto i te parabole a te Fatu ra [a hiʻo Mataio 25:1–13], inaha, te na ô ra oia e, “Ia tae i taua tau ra, aore e tane, aore hoi e vahine e tiʻa ia rohi tamau noa ma te tiaturi noa i te maramarama tipee. Na te maramarama râ i roto ia’na iho e aratai i te taata tataitahi.” [Orson F. Whitney, Life of Heber C. Kimball (1945), api 450].⁶

Outou o tei imi maite i roto i te mau papairaa moʻa, outou tei titau ia roaa te hoê iteraa papu no niʻa i te faaiteraa hanahana a te Varua o te tiʻa ia outou ia farii na roto i te faaiteraa a te Varua Maitai, e nehenehe e tupu i roto ia outou … te hoê ohipa faahiahia mau o tei ore â i tupu aʻe nei, a parau ai outou i roto i to outou aau e, “Ua ite au ma to’u varua atoa i teie nei, inaha, aitâ te reira huru ite i roaa iaʻu mai taʻu e ite nei i teie nei e, O Iesu te Fatu, te Faaora no to te ao nei, e o Iosepha Semita, te maratiri, e peropheta oia o ta te Fatu i faaohipa no te faatia-faahou i Ta’na Ekalesia i teie nei mahana.”⁷

E mea nahea to Iosepha Semita faaineineraahia no to’na piiraa ei Peropheta no te Faatia- faahou-raa?

O Iosepha Semita te taata o ta te Fatu i haapaʻo mai to’na apîraa mai â e o ta’na i faaahu i te mana no te raʻi mai, e ua haapii ia’na i te mau mea e titauhia ia’na ia ite e ia farii i te autahuʻaraa e ia haamau i te niu o te basileia o te Atua i te mau mahana hopea nei.⁸

Ia au i te tereraa o te aamu, ua maitihia te mau tiʻa faatere peropheta mai roto mai i te huru oraraa haehaa, ma te ore i haapiihia i te parau no te faaroo i roto i te mau haapiiraa faaroo. E hiʻo anaʻe tatou i te piiraa o te mau peropheta e rave rahi. No reira, e hoʻi au i muri i roto i te aamu: E taata faaapu tei faufaahia o Elia; E taata tiaʻi mamoe o Amosa i Iudea; e taata aiʻa te peropheta Isaia no Ierusalema; I te oire no Iudea o Mika i faaea ai; E tamaiti apî o Ieremia no te hoê utuafare tahuʻa i tahito ra; E tahuʻa o Ezekiela i roto i te hiero; E feia ravaai o Petero, Anederea, Iakobo, e o Ioane; e hamani fare te toroʻa o Iesu e to’na metua tane o Iosepha. No reira paha te Fatu i maiti ai [i te Peropheta Iosepha Semita] ei peropheta faatere i teie tau tuuraa evanelia. … Ua maiti oia i te hoê taata o te nehenehe e horoʻahia te paari i roto ia’na no niʻa i te mau mea a te Atua—oia te mau mea o tei papu e, e riro ïa ei ohipa maamaa no te feia tei haapii-noahia i te mau mea no te ao nei.⁹

I roto i te oraraa o te tamaiti peropheta ra o Iosepha Semita, hou a horoʻahia mai ai ia’na na heheuraa rahi roa e piti o tei horoʻahia mai i te taata nei, ua iteahia te mana o te diabolo na mua rii noa aʻe a horoʻahia mai ai taua na heheuraa ra—i roto i te Uru Raau Moʻa, e i niʻa i te Aivi Cumora. Mai te mea ra e, e mea titauhia ia ite te Peropheta i te huru e te mana o taua puai ra, ia a ineine oia no te upootiaraa i niʻa i te reira.¹⁰

Eita te hoê peropheta e riro mai ei faatere i te pae varua na roto i te taiʻo-maite-noa-raa i te mau buka no niʻa i te faaroo, eita atoa na roto noa i te haereraa i te haapiiraa faaroo. … E riro mai râ te hoê taata ei peropheta e aore râ, ei taata aratai i te pae faaroo na roto i te mau farereiraa pae varua tei tupu. No reira, na te Atua iho e horoʻa mai i te parau tuite a te hoê taata aravihi i te pae varua.¹¹

Eaha te mau ohipa rarahi ta te Fatu i faatia na roto i te Peropheta Iosepha Semita?

Ua ite-aʻe-hia na te misioni a te Peropheta Iosepha Semita … fatata e 2400 matahiti hou a fanauhia mai ai oia. Te mau parau tohu i tohuhia … no niʻa ia Mose e o Iosepha, ua papaihia ïa te reira i niʻa i te mau api veo e o tei ravehia mai e te mau tamaiti a Lehi mai roto mai i te rima o Labana, te haamanaʻo ra outou. I roto i te reira e itehia ai teie parau tohu no niʻa i te Peropheta Iosepha Semita, e ere no niʻa i te tahi taata ê atu:

“Oia ïa, ua na ô maira Iosepha [e mea papu roa e, o taua Iosepha ra ïa tei hoohia i Aiphiti]: Te na ô maira te Fatu iaʻu ra e: E faatupu vau i te hoê hiʻo maitai no roto mai i to tauupu; … e e horoa’tu hoi au i te mana ia’na ia faatupu i taʻu parau na te huaai o to oe ra tauupu—Eiaha i te faatupuraa i taʻu parau anaʻe, i te faaite-papu-raa râ ia ratou i taʻu parau i parauhia na i rotopu ia ratou ra. … Inaha, e haamaitai mai te Fatu i taua hiʻo ra; e e haamamûhia te taata e imi ia’na e taparahi. … E mairihia oia i to’u nei iʻoa; e i te iʻoa atoa hoi o to’na ra metua. E riro oia mai iaʻu nei te huru; no te mea te mau mea ta te Fatu e faatupu na roto ia’na ra, na roto i te mana o te Fatu, e aratai ïa i to’u ra mau taata i te ora.” [A hiʻo 2 Nephi 3:7,11,14–15].¹²

I roto i teie tau tuuraa o te evanelia, mai te au atoa hoi i roto i te mau tau tuuraa evanelia atoa i niʻa i te fenua nei na mua’tu, ua horoʻahia mai na roto i te peropheta o teie nei tau, o Iosepha Semita, te iteraa mau no niʻa i te Atua e i ta’na Tamaiti, to tatou Faaora, i te taime a paraparau mai ai raua ia’na, i roto i to raua huru taata faahanahanahia o te nehenehe e paraparau i te taata, e e iteahia e te taata, ei faaiteraa i to raua huru mau, a haamata ai te tau tuuraa no te îraa o te mau tau, no te faaineineraa i te tae-piti-raa mai o te Fatu no te faatere ei Fatu no te mau fatu e ei Arii no te mau arii i te omuaraa o te mileniuma.¹³

I te taime e itehia te toparaa i roto i te faaroo e i roto i te iteraa, i roto i to’na maitai rahi, ua faahoʻi mai te Fatu i te iteraa hope no niʻa i te Atua e i Ta’na Tamaiti, e i te taime e farii tatou i te tahi mau horoʻaraa ite no te raʻi mai no niʻa i te Metua e i te Tamaiti, te parau ra tatou e, tei roto tatou i te hoê tau tuuraa apî. Mai te reira te huru i te anotau o Adamu; mai te reira atoa i te anotau o Aberahama; i te anotau o Mose; Mai te reira atoa i To’na haereraa mai i te Ati Nephi ra; i te mau taata o Enoha; mai te reira ïa te huru o to te Faaora haereraa mai i rotopu i te taata nei no te haapii ia ratou i te auraa i rotopu i te Atua e i te Tamaiti a te Atua. …

Te auraa no te reira ra, maori râ ïa, no te haamata i te tau tuuraa no te îraa o te mau tau, e mea nahea te reira i te haamataraa? Na roto ïa i te hoê heheuraa no niʻa i te huru o te Atua te Metua e te Tamaiti tei horoʻahia i te tamaiti peropheta ra ia Iosepha Semita.¹⁴

“Ua rahi aʻe ta Iosepha Semita, te Peropheta e te Hiʻo a te Fatu, i rave, maori râ, ia Iesu anaʻe, no te faaoraraa i te taata nei i roto i teie nei ao, i tei ravehia e te hoê taata ê atu o tei ora na i niʻa iho i te reira” (PH&PF 135:3). I teie nei, e riro te tahi mau taata i te feruri e, e parau huru haavare rii teie, [e ere roa’tu ïa] inaha, ia hiʻo anaʻe tatou i te mea Ta’na i horoʻa mai ia tatou nei na roto i teie taurearea apî faahiahia, inaha, i roto i te hoê tau poto roa, e piti matahiti, ua horoʻa mai oia i teie buka papairaa moʻa faahiahia roa, oia te hoê ite piti no te misioni a te Fatu, te Buka a Moromona. … Teie taurearea, aita i fanaʻo i te ite tei fanaʻohia e te feia maramarama, tera râ, ma te faaurûhia e te mana o te Atua Manahope, ua huri oia i taua mau păpăa parau ra mai te hoê reo ite-ore-hia e a’na, huri mai i roto i to tatou reo i teie mahana, tei roto hoi i reira te îraa o te evanelia mure ore.¹⁵

O Iosepha Semita, te taurearea haapii-ore-hia i te mau haapiiraa faaroo o teie anotau, haapii-ore- atoa-hia i te mau haapiiraa teitei o to’na ra tau … o oia ïa te hoê o te tiʻa ia farii i te mau haapiiraa e i te mau muhumuhuraa a te Varua. Eita e tiʻa ia Iosepha Semita ia haamau i teie ekalesia. Eita e tiʻa ia’na ia faatupu i te ohipa a te Fatu, te Buka a Moromona. E vahavaha ratou i te Peropheta Iosepha Semita no to’na huru taata. E uiui ratou e, e mea nahea teie ekalesia i te haamataraa, te vai râ anei te mau mea atoa mai te hoê tii haamanaʻoraa te huru—te Buka a Moromona iho. Eita e tiʻa ia Iosepha, i roto i to’na huru taata, ia rave i teie mau mea, tera râ, na roto i te mana o te Atua Manahope, ua faatupu o Iosepha i te temeio no te faatupu i te basileia mai roto mai i te poiri i roto i te evanelia a Iesu Mesia i faahoʻi-faahou-hia mai.¹⁶

Ua faaite atu o [Moroni] i te Peropheta e … ua fatata roa te taime e porohia ai te evanelia ma te mana i roto i to’na ra îraa i to te mau nunaa atoa. Ei faatiaraa te reira i te fafauraa i fafauhia’tu ia Ioane i te taime a maue ai te melahi na ropu i te reva, “ma te evanelia e tiʻa i te vairaa ra ei pororaa’tu i te feia e parahi i te ao nei ra” (Apokalupo 14:6). Ua tupu ïa te faahoʻi-faahou-raa-hia mai te îraa o taua evanelia ra i te taime a faahoʻihia mai ai te Buka a Moromona i te ao nei na roto i te Peropheta Iosepha Semita, e o tei parauhia hoi e, tei roto i te reira buka te îraa o te evanelia.¹⁷

I te 21 no Setepa 1823 [ua fa mai o Moroni ia Iosepha Semita ma te parau mai e,] “e mea tiʻa ia haamata-oioi-hia te ohipa faaineineraa no te tae-piti-raa mai o te Mesia; ua fatata roa te taime e porohia ai te evanelia ma te mana, i roto i to’na ra îraa, i te mau nunaa atoa … ia ineine hoi te taata no te tau mileniuma,” oia hoi, no te taeraa mai o te Fatu (History of the Church, 4:537). E tiʻa atoa ia tatou ia parau e, te opuaraa matamua o te faahoʻiraahia mai o te evanelia, no te faaineine ïa i te hoê nunaa ia tiʻa atu i mua i te aro o te Fatu ia hoʻi mai Oia; ia ore te reira, … e ore e tiʻa ia tatou ia tiʻa i mua i To’na aro.¹⁸

I teie mahana ua riro te ohipa o te basileia o te Atua i niʻa i te fenua nei ei tii haamanaʻoraa i te iʻoa o te Peropheta Iosepha Semita. Ehia rahiraa milioni taata tei farii-hope-roa i te hanahana o ta’na misioni, mai tei porohia e tei arataihia e a’na e ati tiʻa aʻe te ao nei. Ua riro tatou ei fatu aiʻa no taua poe taoʻa rahi ra, oia te evanelia a Iesu Mesia, o tei faahoʻi-faahou-hia mai na roto ia’na, oia te mauhaa na te Atua, no te tauturu ia tatou ia ora e ia pohe mai te mea e titauhia, ia ineine hoi tatou i te taime tiʻa mau no taua tau mileniuma ra. Eiaha roa’tu tatou e haamoʻe i te reira. O teie te taime, a vaivai aʻe te tau, no te faaineine ia tatou ia farerei i te Atua.¹⁹

Te Mau Manaʻo Tauturu no te Haapiiraa e te Aparauraa

Nahea tatou tataitahi ia haapuai i to tatou iteraa papu no niʻa i te misioni a te Peropheta Iosepha Semita? Eaha te mea tei haapuai i to outou iteraa papu no niʻa i te Peropheta?
Nahea tatou ia pee i te hiʻoraa o te Peropheta Iosepha no te faarahi i to tatou iho paari e to tatou huru pae varua? Eaha te mau huru o te Mesia o te ite-papu-hia i roto i te oraraa o te Peropheta Iosepha Semita?
Eaha te tahi mau parau mau faufaa no te evanelia o tei heheuhia mai na roto i te Peropheta Iosepha Semita?
Eaha te ohipa ta Iosepha Semita i rave no te faaora i te mau tamarii atoa a te Atua? Eaha te mau tauiraa i tupu i roto i to outou oraraa na roto i te mau heheuraa tei fariihia e te Peropheta Iosepha Semita?
Nahea outou i te faaite ia vetahi ê i to outou iteraa papu no niʻa i te Peropheta Iosepha Semita?

Ua faaite te Peresideni Harold B. Lee e: “ua … ite au e, e peropheta o Iosepha Semita na te Atua Ora. Ua ite au e, ua ora na oia e ua pohe no te faahoi mai i teie nei u’i te mau raveʻa e roaa ai ia ratou te faaoraraa.”

Na roto i te orama matamua, ua haamatahia te tau tuuraa no te îraa o te mau tau na roto “i te hoê heheuraa no niʻa i te huru o te Atua te Metua e te Tamaiti” i te peropheta maitihia a te Fatu ra.