Pene 16
Tahoê no te Faaora i te mau Varua
Nahea te ohipa faaauraa a te Ekalesia i te tauturu i te Ekalesia e te utuafare ia rave amui i te ohipa no te faaora i te mau varua?
Omuaraa
A tavini ai oia ei melo no te Pŭpŭ no te Tino Ahuru Ma Piti Aposetolo, ua faaue te Peresideniraa Matamua ia Harold B. Lee ia feruri i te hoê faanahoraa no te faatumu i te mau faanahonahoraa atoa a te Ekalesia i niʻa i te opuaraa hoê roa o te evanelia a Iesu Mesia—oia hoi, “te faatupuraa i te tahuti ore e te ora mure ore o te taata nei” (Mose 1: 39). Ua piihia taua faanahoraa ra, te faaauraa. I roto i te parau no te faaauraa, tei roto atoa ïa te parau no te haapapuraa i te faufaa o te utuafare e o te fare, na roto i te hiʻoraa e, ua riro te mau pŭpŭ i roto i te Ekalesia, te mau faanahonahoraa, e te mau faaoaoaraa, ei haapaariraa e ei tururaa i te utuafare. Tei roto atoa te parau no te tuuraa i te taatoaraa o te mau pŭpŭ e te ohipa a te Ekalesia i raro aʻe i te faatereraa a te autahuʻaraa. I te mau matahiti 1960, e rave rahi mau taahiraa tei ravehia no te faatupuraa i teie mau opuaraa, ma te haapapu â i te parau no te pô utuafare, e te hiʻopoʻaraa i te faanahoraa haapiiraa a te Ekalesia no te hapapu-maitai-raa e, te haapaari mau ra te reira i te fare e te utuafare. Te rave-tamau-noa-hia nei â te parau no te faaauraa i roto i te Ekalesia i teie mahana, i raro aʻe i te faatereraa a te Peresideniraa Matamua, ma te pee maite i te mau parau tumu i heheuhia mai e te Fatu.
Ua haapii te Peresideni Lee e: “Te mau mea atoa ta tatou e rave, ia ravehia ïa ‘ma te mata rotahi i te hanahana o te Atua ra.’ [PH&PF 82:19]. Eaha ïa te hanahana o te Atua? Mai te au i ta te Fatu i haapii atu ia Mose ra, o te faatupuraa ïa i te tahuti ore e te ora mure ore o te taata nei. … I roto i te mau ohipa atoa ta tatou i rave i roto i te … faanahoraa no te faaauraa, ua vai noa teie mau parau i roto i te feruriraa. E parau faaohie noa tatou e, ta tatou na opuaraa toopiti i roto i te faaauraa, a tahi, o te faatereraa ïa i te autahuʻaraa mai ta te Fatu i faataa maitai mai, ma te tuati atu i te mau pŭpŭ tauturu i niʻa i te reira, e te piti, ia faaite te mau metua e te utuafare i to ratou mau piiraa mai ta te Fatu i faaue mai ra. E no reira, te ite ra tatou e, te mau mea atoa e ravehia, ia ravehia ïa ma te ui i roto i te feruriraa i teie uiraa hoê roa: e faaravai anei teie ohipa i te maitai o te basileia, te tapeʻa ra anei tatou i to tatou mata ia rotahi i niʻa i taua opuaraa matamua ra o te faanahonahoraa a te Fatu—oia hoi, te faaoraraa i te mau varua e te faatupuraa i te tahuti ore e te ora mure ore o te taata nei?”1
Te mau haapiiraa a Harold B. Lee
Nahea te Ekalesia ia tauturu i te “faatupuraa i te tahuti ore e te ora mure ore o te taata nei”?
No te faaineine ia tatou ia fariihia tatou i mua i te aro o te Fatu, te vai nei ta tatou ekalesia. Eaha te parau a te Aposetolo Paulo— ua haapaʻohia te tahi pae ei aposetolo, ei peropheta, ei tiai, ei orometua, ei haapii evanelia—oia hoi, ua faanahonahohia te Ekalesia—no te aha? “Ei faaau i te feia moʻa, i te ohipa ra e orometua, ia tupu i te maitai te tino o te Mesia ra: Ia riro tatou atoa nei ei taata paari i te faaroo hoê e te ite hoê i te Tamaiti a te Atua, ia taeʻa te faito ra i te î o te Mesia ra.” [A hiʻo Ephesia 4:11–13]. Ua ite te Fatu e aita tatou i paari, e ua horoʻa mai oia i te Ekalesia ia tatou nei no te tauturu ia tatou ia paari.2
E ere te ohipa a te Ekalesia i te haamau-noa-raa i te hoê faanahonahoraa sotiare e aore râ, i te raveraa i te tahi atu mau huru opuaraa taaʻe atu i te opuaraa no te faaoraraa i te mau varua.3
Te opuaraa [a te Ekalesia o te] haamaitairaa ïa i te oraraa o te feia o tei riro ei melo i roto i te Ekalesia. … O [te] haapiiraa ïa i te melo o te tino, e aore râ, i te mau melo o te Ekalesia i te mau parau haapiiraa e te mau haapiiraa, ia riro te mau melo ei taata paari i te faaroo hoê e i te ite i te Tamaiti a te Atua, e taua ite ra, ia au i te parau a te Fatu iho, o ta’na i parau i roto i taua pure haamanaʻo-tamau-hia ra i roto i te Faufaa Apî, “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai” (Ioane 17:3).4
No te aha te faanahonahoraa? … E faanahonaho tatou no te rave i te ohipa a te Fatu ma te maitai e te ohie atu na roto i te opereraa i te ohipa, na roto i te horoʻaraa i te hopoiʻa. E faanaho tatou, e faaohie e e haamaitai atu i te ohipa a te Fatu na roto i te fariiraa i te hopoiʻa e i te faaotiraa i te reira hopoiʻa, e na te reira e faariro i te mau melo ei mau aratai. Mai ta te Fatu i parau ra i te taime a horoʻa ai oia i teie faaueraa hoê roa— “A pee mai iaʻu, e faariro vau ia orua ei ravaai taata” — mai ta tatou e parau nei i teie mahana e— “Ia haapaʻo outou i taʻu mau faaueraa, e faariro vau ia outou ei mau aratai no te taata e ei mau aratai i rotopu i to’u mau taata.”5
Ua riro te Ekalesia e te basileia o te Atua ei ekaleisa n to te ao atoa nei e ere no te hoê anaʻe nunaa e no te hoê anaʻe pŭpŭ taata. Ta tatou tautooraa tamau o te horoʻaraa ïa i te Feia Moʻa atoa o Tei Teitei Roa ra e noho ra i te mau vahi atoa, i te mau raveʻa atoa ia tupu ratou i te paari e ia hope roa, ia rahi te puai e te mana no te maitai i niʻa i te fenua nei, e ia roaa te haapaʻo maitai ia ratou.6
No te aha e mea faufaa ia haapaari i te utuafare i roto i te mau mea atoa ta tatou e rave i roto i te Ekalesia?
Tei hea te reni paruru matamua i roto i teie ekalesia? O te Paraimere anei? O te Haapiiraa Sabati anei? E ere o te reira ta to tatou Metua i te Ao ra i heheu mai. A taiʻo faahou outou i te tuhaa ono ahuru e ma vau o te Parau Haapiiraa e te Mau Parau Fafau. E ite outou e, ua tuu te Fatu i te utuafare, te reni paruru matamua, i mua roa i te tahua aroraa no te aro i te mau mana o te nehenehe e haamou i te mau paruru. (PH&PF 68:25–32).7
E faaterehia te mau faanahonahoraa o te autahuʻaraa no te turu i te utuafare; e roaa atoa te tauturu papu mai roto mai i te mau faanahonahoraa a te pŭpŭ tauturu. E nehenehe te faatereraa paari a te [autahuʻaraa] e tauturu ia tatou ia rave i ta tatou tuhaa no te faatupuraa i te opuaraa tumu a te Atua, oia hoi, “ia faatupu i te tahuti ore e te ora mure ore o te taata nei” (Mose 1: 39). Na te mau heheuraa a te Atua e te haapiiraa a te taata e faaite mai ia tatou i te faufaa rahi o te utuafare i roto i te parau no te faatiaraa i te oraraa o te hoê taata. … No reira, ta tatou ohipa rahi i roto i te parau no te faanahonahoraa, o te hamaniraa ïa i te paepae ia hinaaro tatou e faatia i te hoê taata, e eiaha tatou e haamoʻe i te paepae no te varua.8
O te utuafare te faanahoraa tumu e te faufaa aʻe i te mau faanahoraa atoa a te Atua. Te taviri no te taatoaraa o ta tatou faanahonahoraa faaauraa, ua horoʻahia mai te reira ia tatou nei i te taime a faaite ai te Peresideniraa Matamua i te hoê o te mau parau tumu faufaa rahi, i niʻa hoi i te reira tatou i haamauhia ai: “O te utuafare te niu no te hoê oraraa parau tiʻa, e aita e tiʻa i te tahi atu faanahoraa ia rave i to’na tiʻaraa e ia faaoti i te ohipa i faataahia na’na. Te ohipa rahi roa o te tiʻa i te mau pŭpŭ tauturu ia rave, o te tautururaa ïa i te utuafare i roto i to’na mau fifi, te horoʻaraa i te tauturu e i te aupuru taaʻe, i te vahi e titauhia.”
No reira, eiaha ia moʻehia, te mau ohipa atoa e ravehia i roto i te Ekalesia, ia ravehia ïa no te haapaari—eiaha no te iriti—i te tereraa o te hoê utuafare nahonaho maitai. Mai te mea e, te ino ra te faatereraa a te metua, e mea tiʻa i te mau taeae hahaere o te autahuʻaraa e i te mau pŭpŭ tauturu ia horoʻa i te aratairaa e titauhia. To’na auraa mau ra, maori râ, te mau ohipa atoa tei paturuhia e te Ekalesia, e mea tiʻa ïa ia faanahohia ma te haamanaʻo noa i taua parau ra, ma te haapapu taaʻe i te faufaa no te faaitoitoraa i te utuafare tataitahi ia haapaʻo maite i te pô utuafare i te mau hepetoma atoa, e te faaitoitoraa e te tautururaa hoi i te mau metua tane tei mau i te autahuʻaraa ia amo i to ratou tiʻaraa ei upoo faatere no to ratou utuafare.9
Eita roa’tu te Atua e titau i te hoê taata ia faatusia i to’na utuafare ia tiʻa ia’na ia faaoti i te tahi atu mau ohipa ta’na i roto i te basileia. Ehia taime to matou tamataraa i te haapapu e, te ohipa faufaa aʻe a te Fatu o ta tatou e rave, tatou te mau metua tane e te mau tane faaipoipo, o te ohipa ïa i rotopu i te mau papai o to tatou iho fare? Tei niʻa te mau metua tane i te hoê tiʻaraa o te ore roa e iriti-ê-hia ia ratou.10
Ia feruri anaʻe au i te ohipa ta tatou e rave nei, e te mea ta’na e horoʻa mai, e haamanaʻo vau i te mau parau a te Peropheta Mika, “E riro ia tae i te mau mahana hopea ra, e faatiahia ai te mouʻa ra o te fare o Iehova i niʻa i te tupuaʻi mouʻa, e faateiteihia ïa i niʻa i te mau aivi; e tairuru atoa mai te mau etene i reira.
“E rave rahi te fenua e haere, a parau ai e, E haere mai, e haere tatou i niʻa i te mouʻa o Iehova, i te hiero o te Atua o Iakoba; e na’na e haapii mai ia tatou i ta’na haapaʻoraa, e haere tatou na te eʻa ta’na e faaite maira: na Ziona’tu hoi te ture i te revaraa’tu, e te parau a Iehova, i na Ierusalema’tu ïa.” (Mika 4:1–2).
Te parau atu nei au ia outou e te mau metua vahine e te mau metua tane Moʻa no te Mau Mahana Hopea Nei, mai te mea e, e tiʻa mai outou i niʻa i te hopoiʻa o te haapiiraa i ta outou mau tamarii i roto i te utuafare—te faaineineraa te mau pŭpŭ autahuʻaraa i te mau metua tane, e te Sotaiete Tauturu i te mau metua vahine—te vaira te mahana e haere mai ai to te ao atoa i to tatou nei uputa ma te parau mai e, “A faaite mai na ia matou i ta outou haapaʻoraa ia haere atoa matou i to outou na haerea.”11
Nahea te mau pŭpŭ tauturu ia rave amui i te ohipa i raro aʻe i te faatereraa a te autahuʻaraa no te haapaari i te utuafare?
Ei haapotoraa noa i te auraa no te parau ra, faaauraa, … o te tuuraa ïa i te autahuʻaraa o te Atua i te vahi ta te Fatu i faataa— oia hoi, ei pû i te ropuraa mau o te Ekalesia e o te basileia o te Atua— e ia hiʻo e, e tiʻaraa atoa to te mau utuafare o te Feia Moʻa i te Mau Mahana Hopea Nei i roto i te faanahoraa hanahana o te faaoraraa o te mau varua.12
I teie nei, ua haamauhia i roto i te Ekalesia i pihaʻi iho i te autahuʻaraa, te mau pŭpŭ tauturu, e aore râ, mai tei parauhia i roto i te Faufaa Apî, “te tauturu e te faaite” tei apitihia’tu i te autahuʻaraa [a hiʻo 1 Korinetia 12:28]. No niʻa i teie mau pŭpŭ, ua faahiti te Peresideni Joseph F. Smith i teie parau: “Te feruri nei au i ta tatou mau pŭpŭ tauturu; eaha te reira? E mau tauturu ïa no te faanahonahoraa o te Ekalesia. E ere ratou i te mau pŭpŭ faataaʻehia. Te hinaaro nei au e parau i te mau Pŭpŭ Haamaitairaa Te Tahi e te Tahi no te Feia Apî Tamaroa e no te Feia Apî Tamahine, e i te Sotaiete Tauturu, e i te Paraimere, e i te Haapiiraa Sabati, e i te mau pŭpŭ haapiiraa evanelia, e i te tahi atu mau pŭpŭ i roto i te Ekalesia e, aita roa hoê o ratou i riro ei mau pŭpŭ faataaʻehia i te Autahuʻaraa a te Tamaiti a te Atua, e ore roa te hoê e fariihia e te Fatu mai te mea e, e faaatea ê atu ratou ia ratou i te reo e i te aʻoraa a te feia tei mau i te Autahuʻaraa e tei riro ei faatere ia ratou. Tei raro aʻe ratou i te mau mana e i te tura o te Ekalesia, e aita ratou i faataaʻehia i te reira; aita atoa e tiʻa ia ratou ia rave i te tura no ratou iho i roto i ta ratou mau pŭpŭ, ma te faataaʻe ia ratou i te Autahuʻaraa e i te Ekalesia.” [Gospel Doctrine, te neineʻiraa 5 (1939), api 383].13
I roto i te heheuraa rahi no teie tau no niʻa i te faatereraa o te Ekalesia, teie te parau hopea a te Fatu:
“Inaha, o teie hoi te raveʻa no taʻu mau aposetolo, i te mau mahana tahito ra, no te faatupuraa i taʻu ekalesia iaʻu nei.
“No reira a tuu atu i te mau taata atoa ia tiʻa mai i roto i to’na iho toroʻa, e ia rave hoi i te ohipa i roto i to’na iho parauraa; e eiaha hoi te upoo ia parau atu i te avae aita e faufaa to te avae; no te mea ia ore te avae nafea atu ïa te tino ia tiʻa mai ai i niʻa ra?
“E e faufaa atoa to te tino i te mau melo atoa ra, ia tiʻa i te taatoaraa ia haamaitaihia i roto i te hoê ra, ia vai tiʻa mau te tino taatoa.” (PH&PF 84:108–110).
Ia feruri anaʻe outou i niʻa i teie nei mau papairaa moʻa, e mea papu maitai e, ua horoʻahia mai te reira no te haapapu i te titauraa ia farerei e ia faaau pinepine e te tamau hoi o te mau pŭpŭ rau, oia hoi, te mau pŭpŭ autahuʻaraa e te mau pŭpŭ tauturu e te tahi atu mau pŭpŭ taatoa e vai ra i roto i te basileia o te Atua, no teie e maha tumu i muri nei:
A tahi, ia taa maitai te ohipa a te pŭpŭ tataʻi tahi, e ere no te haru i te tuhaa a te tahi atu, mai te au i te mata ia parau atu i te rima e, “Ore noa’tu â oe iaʻu nei.”
Apiti, ua aifaito te faufaa o te pŭpŭ tataitahi i roto i te ohipa no te faaoraraa, mai te au i te tufaa tataitahi o te mau melo tataitahi o te tino tei riro ei faufaa no te faatiaraa i te hoê tino taata.
A toru, ia haamaitai-amui-hia e aore râ, ia haapii-amui-hia hoi te taatoaraa; e
Te maha, ia vai maitai noa te faanahoraa, e aore râ, e nehenehe atoa ia parau e, i roto i te faanahoraa a te Fatu no te faaoraraa o ta’na mau tamarii, e rave te Ekalesia i te ohipa mai te au i te hoê tino taata tei faanahonaho-maitai-hia, ia ohipa maitai te mau melo atoa mai tei titauhia.14
I te mau tau i mairi aʻe nei, ua hoi faahou mai tatou i niʻa i te mau ohipa o tei haapapu mai e, te tiaau noa nei tatou i te mau faanahonahoraa, eiaha râ i te nânâ. Te faaitoito atu nei matou ia outou o te haa nei … ia haapaʻo i taua faaueraa faufaa ra ei opuaraa tumu: “ia faatupu i te tahuti ore e te ora mure ore o te taata nei” (Mose 1: 39). Tamau noa, mai te mea e, e hinaaro tatou i te hoê faito no te ite e, e tano anei tera faanahonahoraa e aore râ, tera faanahonahoraa: e turu anei te reira i te haereraa i mua o te taata e tae atu ai i taua tapaʻo ra no te ora mure ore i mua i te aro o te Metua? Mai te mea e, eita, e aita hoi e tuati ra i niʻa i te reira, aita ïa e tiʻa ia faaitoitohia te reira i roto i te Ekalesia.15
Te Mau Manaʻo Tauturu no te Haapiiraa e te Aparauraa
-
No te aha, i roto i te mau mea atoa ta tatou e rave i roto i te Ekalesia, e mea faufaa ia haamanaʻo tatou i te opuaraa hopea a te Ekalesia— “ia faatupu i te tahuti ore e te ora mure ore o te taata nei”? (Mose 1:39).
-
Nahea te Ekalesia ia tauturu ia tatou ia haamaitai i to tatou oraraa? Nahea oia ia tauturu ia tatou “ia tupu e ia hope roa i te paari”?
-
No te aha te utuafare i riro ai ei faanahoraa tumu e te faufaa aʻe i te mau faanahoraa atoa a te Atua? Eaha te tiʻa ia tatou ia rave i roto i ta tatou mau hopoiʻa o te Ekalesia no te haapaari i te utuafare?
-
I to outou manaʻoraa, eaha te auraa no te parau a te Peresideni Lee a parau ai oia e, ua riro te autahuʻaraa “ei pû i te ropuraa mau o te Ekalesia”? Nahea te aʻoraa tei horoʻahia i roto i te PH&PF 84:108–10 i te tauturu ia tatou ia taa e, nahea te autahuʻaraa e te mau pŭpŭ tauturu o te Ekalesia ia rave amui i te ohipa?
-
Nahea te mau faanahonahoraa a te autahuʻaraa e a te pŭpŭ tauturu, ia faaterehia ia riro ei turu no te utuafare”? Nahea teie mau fanahonahoraa i te tururaa i to outou utuafare?
-
I roto i ta tatou mau tautooraa no te tavini i roto i te Ekalesia, no te aha e mea tiʻa ia tatou ia ara maitai e, eiaha te mau faanahonahoraa ia faufaa aʻe i te taata? Nahea tatou ia rave i te reira?