Pene 10

Te mana no te hi‘oraa

Na roto i te faaiteraa i to tatou ti‘aturiraa i te mau mahana atoa o to tatou oraraa, te tauturu ra ïa tatou i te haapaariraa i te i‘oa maitai o te Ekalesia e i te faaururaa ia vetahi ê ia haapa‘o i te Evanelia.

No roto mai i te oraraa o Heber J. Grant

No te faaite i te tapa‘o haamauruuru i te Peresideni Heber J. Grant, teie ta Elder John A. Widtsoe, no te Pŭpŭ Tino Ahuru Ma Piti Aposetolo, i papa‘i, “Ua riro to’na oraraa ei haapiiraa no te mau taata atoa.”¹ Ua parau atoa o Elder Samuel O. Bennion, no te Hitu Ahuru, i te parau no te hi‘oraa tei faaitehia e te Peresideni Grant: “E anaanatae rahi to’na i te ohipa maitai na te Fatu; o te Atua ana‘e ta’na e haapa‘o, e ua riro oia ei hi‘oraa maitai no te taata, e na roto i te reira, ua tupu te ohipa i te rahi e te hanahana.”²

Taaê noa’tu to’na faaiteraa i te hi‘oraa maitai, ua haapii atoa te Peresideni Grant e, e nehenehe i te mau melo tataitahi o te Ekalesia ia ora i te hoê oraraa o te haamaitai e o te faahanahana i te ohipa a te Fatu. Ua parau oia e, “Te taata a‘o rahi a‘e e te nehenehe i rotopu i te Feia Mo‘a i te mau Mahana Hopea nei, o te tane ïa e aore râ te vahine o te haapa‘o i te Evanelia a te Fatu o Iesu Mesia.”³

I to’na taviniraa ei melo no te Pŭpŭ Tino Ahuru Ma Piti Aposetolo, ua farii o Elder Heber J. Grant i te hoê rata no ô mai i te hoê hoa to’na e ere i te melo no te Ekalesia. I roto i te hoê a‘oraa na’na i roto i te amuiraa rahi, ua tai‘o mai o Elder Grant i te hoê tuhaa o taua rata ra no te haapapu i te titauraa ia faaite te Feia Mo‘a i te mau Mahana Hopea nei i te hoê hi‘oraa maitai:

“ ‘E Heber:

“ ‘…Ua ite oe, taaê noa’tu to taua auhoaraa roa e te fatata roa ho‘i, ua tupu noa te maere rahi i roto ia‘u no te faaroo rahi o te mau tane e te mau vahine mai to oe te huru. E rave rahi taime to‘u parau-pinepine-raa, i roto i te mau tau‘araa parau e, te mau taata faaroo roa a‘e ta‘u i ite o te haapa‘o nei i te mau mea ta ratou e haapii nei, o te mau Momoni ïa no Utaha. E parau mau teie.’ ”

Ia hope ta’na tai‘oraa i teie parau iti, ua parau a‘era o Elder Grant e: “Te mauruuru nei au i te mea e, aita to‘u hoa i ite i te tabula i‘oa o te mau taata aita e aufau nei i ta ratou tuhaa ahuru, … no te mea i reira ra, aita vau i papu roa e, e parau faahou anei oia e, ‘te mau taata faaroo roa a‘e ta‘u i ite o te haapa‘o nei i te mau mea ta ratou e haapii nei, o te mau Momoni ïa no Utaha.’ Te oaoa nei au i te mea e, te mau Momoni tei matauhia e teie nei taata e ere ïa i te Momoni i roto i te i‘oa noa, ua riro râ ratou ei Feia Mo‘a mau i te mau Mahana Hopea nei. Ua roaa taua mana‘o no’na ra no ni‘a i te taatoaraa o te mau ‘Momoni‘ na roto i te mau taata ta’na i matau; e ua parau pinepine au i mua i te taata e, e hopoia na te Feia Mo‘a tataitahi i te mau Mahana Hopea nei ia faatitiaifaro i to ratou oraraa, ia riro to ratou huru ei faaururaa i te mau taata atoa ia faatura ia ratou, e na roto i te reira, e tupu atoa ïa te faatura i te mau taata atoa. E mea na roto i to tatou haapa‘o i te mau haapiiraa a to tatou Faaora e ti‘a ai i to tatou maramarama ia anaana i mua i te aro o te taata nei, ei reira te taata e hi‘o ai i ta tatou ohipa maitai e a haamaitai ai ratou i te Atua e a farii ai i te Evanelia a Iesu Mesia ra.”

Ua tamau â o Elder Grant i te tai‘o i taua rata ra: “ ‘Na tera i faatupu i te faatura…Te faaite nei to outou mau taata i to ratou mau ti‘aturiraa i te mau mahana atoa o to ratou oraraa, e te ora nei ratou mai te huru e, e mea faufaa te reira mau ti‘aturiraa to ratou…’ ”

I muri iho, ua parau maira o Elder Grant no ni‘a i teie rata:

“I teie nei, teie te faahitiraa parau ta‘u e hinaaro nei e tuu i roto i to outou feruriraa eiaha ia mo‘e faahou.

“ ‘Mai te mea e, te vaira te hoê mea (e ua reni to‘u hoa i te hoê reni ereere me‘ume‘u maitai i raro a‘e i te parau ra’ te hoê mea”) i roto i te hoê ti‘aturiraa, no ni‘a i te mure ore o te oraraa a muri a‘e, te vaira ïa te mau mea atoa i roto i te reira haapa‘oraa (e ua reni faahou to‘u hoa i te tahi reni ereere i raro a‘e i te parau ra “te mau mea atoa.”)

“Tatou te Feia Mo‘a i te mau Mahana Hopea nei, te ti‘aturi ra anei tatou i te reira? Te ite ra anei tatou i te puai o te parau a to‘u hoa? ‘‘Mai te mea e, te vaira te hoê mea i roto i te hoê ti‘aturiraa, no ni‘a i te mure ore o te oraraa a muri a‘e, te vaira ïa te mau mea atoa i roto i te reira haapa‘oraa.’ Te ti‘aturi ra anei tatou e, te vaira te mau mea atoa i roto i teie ti‘aturiraa no ni‘a i te mure ore o te oraraa a muri a‘e? E mai ta to tatou hoa e parau nei, te faaite mau ra anei tatou i to tatou mau ti‘aturiraa i te mau mahana atoa o to tatou oraraa, e te rave ra anei tatou i te ohipa mai te huru e, ua feruri mau tatou e, e mea faufaa taua mau ti‘aturiraa ra?”⁴

Te mau haapiiraa a Heber J. Grant

E hopoia na tatou te tapea-maite-raa e te haapuairaa i te hi‘oraa maitai o te Ekalesia.

Ua itehia tatou i teie nei no to tatou huru—e mau taata afaro e te mata‘u i te Atua; e na roto ana‘e i to tatou haapa‘oraa i te Evanelia, e te iteraa e, e parau mau te reira, e ti‘a ai ia tatou ia haamou i te mau mana‘o ti‘a ore, e faatupu ai i te mana‘o maitai, e e arata‘i mai ai i te tahi atu mau taata i pihaiiho ia tatou nei.

Ua tupu teie huru no te mea ua roaa te iteraa ia tatou, e no te mea e rave rahi te taata tei haapa‘o i te reira. E hopoia na te taata tataitahi i rotopu ia tatou nei ia tapea maite e ia haapuai i te hi‘oraa maitai o teie Ekalesia, e mai te mea e, e haapa‘o outou e o vau nei i te Evanelia a Iesu Mesia, te haamaitai ra ïa tatou i te ohipa a te Fatu tei faati‘a-faahou-hia i ni‘a i te fenua nei i roto i teie tau tuuraa Evanelia.

Te mauruuru nei au na roto i te tupuraa teie huru, e ua î roa to‘u aau i te mauruuru i te Fatu no te tauiraa rahi tei tupu, e te ti‘aturi nei au e, te mau tane e te mau vahine atoa e melo ratou no teie Ekalesia, e faauruhia ratou no te faaoti papu maitai e, e haapa‘o ratou i teie Evanelia ia riro ho‘i to ratou oraraa ei haapiiraa i te parau mau o te reira Evanelia.⁵

Te mau faainoraa i ni‘a i te Ekalesia, te mau hamani-ino-raa e te mau haavareraa no ni‘a i to tatou mau taata, ua faatata te reira i te ore pauroa no te mea, te ite nei te taata i te hinaaro o to tatou aau, aita to tatou e hinaaro iino i ni‘a i te feia e faaino nei ia tatou. Ua tauturu te Fatu ia tatou i te mau taime e rave rahi ia faahoa i te tahi mau taata tei riro na ei enemi no tatou. Ua ite ratou e, e tavini no te Fatu te Feia Mo‘a atoa i te mau Mahana Hopea nei, e te hinaaro nei ratou ia ite eaha ta te Fatu e hinaaro ia rave ratou, e noa’tu e, e mea taaê roa to ratou hinaaro i to tatou, te ite nei râ te taata e, te hoê Feia Mo‘a mau i te mau Mahana Hopea nei, o te hoê ïa taata e ti‘a ia ti‘aturihia i roto i te mau mea atoa, no te mea, to’na hinaaro, o te iteraa ïa i te mana‘o e te hinaaro o te Atua. E feruri paha ratou e ua hape tatou, tera râ, e ite ratou i to tatou parau ti‘a e te paieti ho‘i.⁶

E haere outou i te vahi ta outou e hinaaro e haere i rotopu i te mau peresibutero no Iseraela, a ratere na te tahi pae e tae atu i te tahi pae o te Ekalesia, ei reira outou e ite ai i te iteraa papu e ama ra i roto i te aau o te Feia Mo‘a i te mau Mahana Hopea nei no te faaite e, na te Atua Manahope teie ohipa e na ta’na Tamaiti o Iesu Mesia i faati‘a i te reira. Ua itehia ia outou teie iteraa papu, e ua faaroo outou i te faaite-raa-hia te reira, tera râ, te ora tamau ra anei tatou mai te Feia Mo‘a i te mau Mahana Hopea nei te huru? Te ora ra anei tatou mai tei titauhia ia tatou ia ora, ia au i te iteraa papu rahi tei tuuhia mai i roto ia tatou? Te haapa‘o ra anei tatou i Ta’na mau faaueraa mai tei titauhia ia tatou? E nehenehe ta tatou e parau e, tei ni‘a i to tatou tapono te hopoia no te tapea-maite-raa i te roo o te Ekalesia, tatou paatoa.⁷

Ia haamaitai mai te Fatu i te mau taata no Ziona. E mata na tatou i te haapa‘o i ta’na mau faaueraa ia nehenehe i te mau taata atoa, na roto i te iteraa i ta tatou mau ohipa, to tatou parau ti‘a, to tatou paieti, ia faatura mai ia tatou, noa’tu te ti‘aturi nei ratou i to tatou faaroo e aore râ aita.⁸

Te Feia Mo‘a i te mau Mahana Hopea nei e rave i te ohipa ti‘a ore, e riro ratou i te faaino ia ratou iho e i te parau mau.

Te parau nei â vau e, te hoê Feia Mo‘a i te mau Mahana Hopea nei e rave i te ohipa ti‘a ore, e faautuahia ïa oia eiaha no taua ohipa ti‘a ore ana‘e ra, no te ino atoa râ ta’na i faatae mai i ni‘a i te Ekalesia. Mai te mea e, e inu te hoê taata no te ekalesia i te ava, e ite paha te hoê taata ia’na, e o te reira paha te hoho‘a matamua o te hoê Momoni ta’na i ite. E parauhia ïa oia e Momoni, e na roto ia’na, ua haavahia ïa te taatoaraa. Te taata tei ite i te reira, e parau oia e, “Mai te mea e, tera te huru o te Momoni, aita ïa vau e hinaaro i te hoê noa a‘e o te reira”, e ia faaroo oia i te a‘oraa a te hoê Momoni, e faaatea oia ia’na i te reira. No reira, e rave rahi hara e tapiri i te uputa o te aau o te mau taata i te Basileia o te Atua.⁹

E mea ha‘iha‘i roa ta te pororaa e ta te parau, maori râ, ua tuea to tatou oraraa i te mau mea ta tatou e haapii.¹⁰

I te hoê taime ua horo‘a te hoê taata i te hoê a‘oraa nehenehe roa. I muri a‘e na ô maira te hoê o to’na mau hoa e: “Ua ite oe, e mea nehenehe roa ta oe a‘oraa, mea faahiahia mau, tera râ, no te puai te maniania o ta oe mau ohipa i rave, aita’tura vau i faaroo i te hoê noa a‘e o ta oe mau parau.”¹¹

Ua faaroo a‘e nei au i te hoê taata aravihi i te paraparauraa i roto i te mau tamaaraa rarahi, i te paraparauraa i te tahi atu taata no ni‘a i te faaroo o te Feia Mo‘a i te mau Mahana Hopea nei. Te na ô ra oia e, “No te aha, te mau ‘Momoni, ‘ te feia e haapa‘o nei i ta ratou haapa‘oraa, aita ratou e inu i te ti, te taofe, e puhipuhi i te avaava e aore râ e inu i te ava.” Na ô atura te tahi taata e, “Aita vau e ti‘aturi i te reira parau.” Na ô atura taua taata ra e, “E parau mau teie.”

Te parahi ra teie na taata toopiti e ere i te “Momoni” i ni‘a i te hoê o te mau amuraa maa no taua tamaaraa ra. I reira, haere mai nei te hoê “Momoni.” Na ô a‘era te taata e paruru ra i te “Momoni” e, “Teie te hoê Momoni. E parahi oia i pihai iho ia taua. Te parie nei au ia oe e, eita oia e inu i te taofe.” Ua fariihia te parie. Ua inu ihora te “Momoni” i te taofe! Ia haere atu raua i rapae, na ô ihora te taata tei pau e, “ Aita vau e ti‘aturi faahou i taua taata ra, oia o te poro nei e, te ti‘aturi nei oia e, ua horo‘a mai te Atua i hoê heheuraa na roto ia Iosepha Semita, no te parau i te taata ia haapae i tera mau mea, e teie nei, te haere mai nei oia i ô nei, e te haapa‘o ore nei i te mau haapiiraa a to’na peropheta i mua i te mau taata atoa. Ua ti‘aturi ho‘i au i taua taata ra, i teie nei râ, aita vau e ti‘aturi faahou ia’na.”¹²

Mai te mea e haapa‘o tatou i ta tatou haapa‘oraa, e anaana ïa to tatou hi‘oraa maitai mai te hoê maramarama i mua i to te ao atoa.

Te hinaaro nei au e parau i te Feia Mo‘a i te mau Mahana Hopea nei e, e mea faufaa no tatou, tatou tei farii i te iteraa papu no ni‘a i te hanahana o te ohipa ta tatou e rave nei, ia faatitiaifaro i to tatou oraraa i te mau mahana atoa, ia tupu te hanahana i roto i te ohipa a te Atua na roto i te mau ohipa maitai ta tatou e rave, ia anaana ho‘i to tatou maramarama, e ia hi‘o te taata i ta tatou ohipa maitai, e ia haamaitai ratou i te Atua [a hi‘o Mataio 5:16]. Aitâ e taata i ni‘a i te tino o te fenua nei i haamaitaihia a‘e nei mai te Feia Mo‘a i te mau Mahana Hopea nei te huru; aitâ e nunaa taata i farii a‘e nei i te mau faaiteraa e rave rahi o te maitai e te aroha e te faaoroma‘i o te Atua mai tei tuuhia mai i ni‘a ia tatou nei, e te parau nei au e, e mea ti‘a ia tatou, hau atu i te tahi atu mau taata i ni‘a i te fenua nei, ia ora i te oraraa mai to te Atua ra te huru e te afaro ho‘i.¹³

Ua parau te Faaora i Ta’na mau pipi e, o ratou te miti no te fenua nei, ia maaro râ te miti ra, ua riro ïa ei mea faufaa ore, e faaru‘ehia ïa e e taataahihia e te avae taata. Ua parau atoa oia ia ratou e, o ratou te maramarama o teie nei ao, e oire faati‘ahia i ni‘a i te mou‘a ra, e ore ïa e mo‘e. Ua parau oia ia ratou e, e ore ho‘i te taata nei e tutui i te lamepa a tuu ai i raro a‘e i te farii, ei ni‘a râ i te vairaa ra ia maramarama to te fare atoa ra. E ua a‘o oia ia ratou ia anaana to ratou maramarama e ia hi‘o te taata i ta ratou ohipa maitai, e ia haamaitai i te Atua ra. [A hi‘o Mataio 5:13–16]

Ua tano teie a‘oraa no tatou. O tatou te maramarama o teie nei ao. Ua roaa ia tatou te faaururaa a te Atua Manahope ra. Ua roaa ia tatou te iteraa papu no ni‘a i te Evanelia, e ua ite tatou e, te ora nei te Atua, o Iesu te Mesia, e peropheta mau o Iosepha Semita na te Atua… Tei roto teie iteraa papu i te aau o te Feia Mo‘a tataitahi i te mau Mahana Hopea nei i te amaraa. I teie nei, te ora ra anei tatou ia ti‘a i ta tatou ohipa maitai ia haamaitai i te ohipa a te Atua? E ti‘a anei i to tatou hi‘oraa ia peehia e te mau taata atoa? Te faaite ra anei tatou na roto i to tatou hi‘oraa e, e faaroo to tatou i te Evanelia?¹⁴

Te parau nei â vau e, e hopoia papu maitai na te melo tataitahi e te mau melo atoa o Te Ekalesia a Iesu Mesia i te Feia Mo‘a i te mau Mahana Hopea nei ia faatitiaifaro i to ratou oraraa ia riro to ratou hoho‘a ei hi‘oraa na te mau taata atoa, e na roto i te reira, e tae mai ai te mau haamaitairaa i ni‘a ia ratou iho e to ratou huaai, e e faatupu atoa ai ho‘i i te auhoaraa i te ohipa na te Fatu. Ia riro teie e titauraa teitei roa na te Feia Mo‘a atoa i te mau Mahana Hopea nei.¹⁵

Te pure nei au ia tauturu mai te Atua to tatou Metua i te ao ra ia tatou ia vai parau ti‘a noa e te paieti i mua ia’na, e na roto i to tatou haapa‘o, to tatou haavare ore i te taata, e na roto i to tatou oraraa afaro, e faaite tamau noa tatou e, e mau tavini mau tatou no te Atua ora, ma te tutava tamau i te haaparare i te Evanelia a Iesu Mesia.¹⁶

E nehenehe to tatou hi‘oraa maitai e arata‘i ia vetahi ê ia imi i te faanahonahoraa no te ora e te faaoraraa.

E mata na te Feia Mo‘a tataitahi i te mau Mahana Hopea nei ia haapa‘o i te Evanelia, ia ti‘a i te parau mau ia porohia na roto i to ratou hoho‘a.¹⁷

Te taata a‘o rahi a‘e e te nehenehe i rotopu i te Feia Mo‘a i te mau Mahana Hopea nei, o te tane ïa e aore râ te vahine o te haapa‘o i te Evanelia a te Fatu o Iesu Mesia. “Faaite mai i to oe faaroo na roto i ta oe ohipa” tera ïa te mea faufaa a‘e. Te parau ra o Iakobo e, e faaite oia i to’na faaroo na roto i ta’na ohipa, e te faaroo ho‘i aore e ohipa ra, e mea pohe ïa. E au ïa mai te tino aore e varua to roto. [A hi‘o Iakobo 2:17–18, 26.]… Mea na roto i ta tatou mau ohipa, te haapa‘oraa i to tatou faaroo e to tatou itoito, e nehenehe ai ta tatou e poro i teie Evanelia. Te haamata nei te mau taata o te ao nei i te ite, i te maramarama e te mau hotu no roto mai te Evanelia a Iesu Mesia, mai tei haapiihia e te Feia Mo‘a i te Mau Mahana Hopea Nei, ei mau hotu maitai ïa… Te hoê haapiiraa rahi roa ta te Faaora i tuu mai Oia ïa: “Na roto i to ratou hotu, e ite ai outou ia ratou” [Mataio7:20]. Aita vau i ite i te tahi atu mau pŭpŭ taata oaoa, iroto i to ratou mau utuafare, ta ratou mau ohipa, te haapa‘oraa maoti râ, te Feia Mo‘a i te Mau Mahana Hopea Nei. Aita vau e parau ra no te mau Momoni haapa‘o ore.¹⁸

Ia haamaitai mai te Atua ia outou tataitahi e ia outou paatoa na. E mata na tatou tataitahi e o tatou paatoa tei roaa te iteraa papu no te hanahana o te ohipa ta tatou e rave nei, ia faatitiaifaro i to tatou oraraa, ia ti‘a ho‘i i te feia tei ore i ite i te parau mau, na roto i te iteraa i to tatou itoito, to tatou faaroo, to tatou haehaa, e to tatou hinaaro ia tavini i te Atua, ia imi i te parau mau tei titauhia ia tatou ia faaite ia ratou. Teie ta‘u pure e to‘u hinaaro.¹⁹

Te ora nei te Atua; o Iesu te Mesia; e peropheta o Iosepha Semita na te Atua ora; ua roaa ia tatou te parau mau; e mata na te feia tei ite i te reira, ia ora i te oraraa e ti‘a ai i te feia tei ore i ite, ia imi i te faanahonahoraa no te ora e te faaoraraa e ia roaa ia ratou te ora mure, te horo‘a tei hau i te rahi i te mau horo‘a atoa a te Atua i te taata nei.²⁰

Te pure nei au ia tae mai te mau haamaitairaa a te Atua Manahope i ni‘a i te mau melo atoa o teie nei Ekalesia, te Feia Mo‘a haapa‘o e te itoito paatoa i te mau Mahana Hopea nei. Ia ti‘a ia tatou ia poro i te Evanelia a te Fatu o Iesu Mesia na roto i te huru parau ti‘a, te afaro e te paieti ho‘i o to tatou oraraa. Mai te mea e, e na reira tatou, e mea papu e, e upootia tatou i te pae hopea ra.²¹

Te oaoa nei au ia faaite atu ia outou, na roto i te mana e te ite rahi ta te Atua i horo‘a mai ia‘u nei, i to‘u iteraa e, te ora nei ho‘i oia, o te Atua to tatou Metua, e o Iesu Mesia to tatou Taraehara e to tatou Faaora.

Ia tauturu mai te Fatu ia outou na e ia‘u nei e i te mau taata atoa tei farii i taua iteraa ra, ia haa ma to ratou aravihi atoa no te faahaere mai ia vetahi ê i roto i taua iteraa ra, na roto i to tatou hi‘oraa. Aue to‘u oaoa i to tatou Metua i te Ao ra i te mea e, ua maiti oia ia Iosepha Semita ei mauhaa i roto i to’na rima no te faati‘a faahou i te faanahonahoraa no te ora e te faaoraraa i ni‘a i te fenua nei. Ia haamaitai mai te Fatu ia outou paatoa, e ia haamaitai i te mau taata parau ti‘a atoa i ni‘a i te fenua nei, e ia tauturu i te Feia Mo‘a tataitahi i te mau Mahana Hopea nei ia ora i te hoê oraraa e ti‘a ai i to’na hoho‘a ia anaana e ia taturu ia vetahi ê ia ite i te parau mau.²²

Te mau mana‘o tauturu no te haapiiraa e te aparauraa

No te aha e mea puai te mana o te hi‘oraa?
Eaha te auraa no te parau ra, e amo i te roo o te Ekalesia i ni‘a i to tatou tapono?
Nahea tatou ia riro ei mau hi‘oraa maitai a‘e no te mau melo o to tatou utuafare, no te mau melo o te paroita, e aore râ, o te amaa, e no to tatou mau taata tupu?
O vai te mau taata tei haaputapu ia outou na roto i to ratou hi‘oraa? No te aha teie mau taata i haaputapu ai i to outou oraraa?
Eaha te tahi mau hi‘oraa tei faaite mai i te faaururaa tei tupu i roto ia vetahi ê ia imi i te Evanelia, na roto i te ohipa maitai a te Feia Mo‘a i te mau Mahana Hopea nei?

lighthouse — E nehenehe te hi‘oraa maitai o te Feia Mo‘a i te mau Mahana Hopea nei e anaana ei maramarama no vetahi ê.