Pene 17
Ia riro ei mau taata ai‘a haapa‘o
Tatou te Feia Mo‘a i te mau Mahana Hope‘a nei, e hopoi‘a na tatou ia riro tatou ei feia ai‘a haapa‘o i te ture fenua e ia imi tatou i te mau rave‘a atoa no te tauturu i to tatou faatereraa hau ia faatere i te fenua ia au i te mau ture morare.
No roto mai i te oraraa o Heber J. Grant
Ua faataahia te Peresideni Heber J. Grant ei Peresideni no te Ekalesia i te matahiti 1918, i te matahiti a hope ai te Tama‘i Matamua o te Ao nei. E ua tavini oia e tae noa’tu i to’na poheraa i te matahiti 1945, te matahiti a hope ai te Tama‘i Piti o te Ao nei. Ua arata‘i oia i te Ekalesia i roto i te anotau a tupu ai te ati rahi i te pae faarava‘iraa faufaa, tei faatupu i te ino rahi i roto i te mau utuafare e i te mau hau o te ao atoa nei. Na roto i to’na faaitoitoraa e te tautururaa i te Feia Mo‘a i roto i te fifi i te pae moni, i roto i te tama‘i, e i muri a‘e i te tama‘i, ua tupu te tauiraa i roto i te huru o te mau faatereraa hau ati a‘e te ao nei. Na teie mau tauiraa i faatupu i te faufaa o te ohipa a te faatereraa hau i roto i te oraraa o te taata, e ua haaferuri atoa te reira mau tauiraa i te taata no ni‘a i to ratou faatereraa hau.
I roto i taua mau tau fifi ra, ua a‘o te Peresideni Heber J. Grant i te Feia Mo‘a ia faaô atoa ia ratou i roto i te mau parau no ni‘a i to ratou faatereraa hau, no te tuhaa fenua iho anei, no te retioni anei, e no te fenua taatoa anei. Aita râ oia i haapa‘o noa i te a‘o i te taata; ua rave roa oia iho i taua ohipa ra. Teie te hoê hi‘oraa, noa’tu te rahi o te ohipa i roto i to’na oraraa Peresideni no te Ekalesia, ua paturu papu oia i te ohipa tei parauhia Te Opaniraa, e pŭpŭ teie no te Fenua Marite o te titau ra ia opanihia te hamaniraa, e te hooraa i te mau inu taero.
E taata faatura te Peresideni Grant i te mau ture o to’na fenua, e ua haapii oia e, na te Atua i haamau i te Ture Niu o te Hau Marite. Te parau ra oia e, “Mai to‘u na‘ina‘iraa mai â, ua ite au e, te ti‘aturi papu nei tatou e, e mauhaa faauruhia te Ture Niu o to tatou fenua, e na te Atua i arata‘i i te feia tei hamani i te reira, e i tei paruru i te ti‘amâraa o teie fenua.”1
I te tau a tavini ai te Peresideni Grant ei Aposetolo e ei Peresideni no te Ekalesia, te rahiraa o te mau melo o te Ekalesia, e mau taata ïa no te Fenua Marite iho. No reira, te rahiraa o te mau mea ta’na i parau, e mau parau ïa no ni‘a i te Fenua Marite. Tera râ, ua riro ta’na mau haapiiraa ei mau parau mau e o te nehenehe e faaohipa i te ao taatoa nei.
Te mau haapiiraa a Heber J. Grant
E ti‘a i te Feia Mo‘a i te mau Mahana Hope‘a nei ia paturu i to ratou mau ti‘a faatere no te hau e ia haapa‘o i te mau ture o to ratou fenua.
Ua ite papu roa vau ma te feaa ore e, e hopoi‘a na te Feia Mo‘a tataitahi i te mau Mahana Hope‘a nei ia paturu e ia haapa‘o i te ture.2
Teie te faahitiraa parau a te Ekalesia, tei papa‘ihia i roto i te Tuhaa 134 o te Parau Haapiiraa e te mau Parau Fafau, no ni‘a i to tatou ti‘aturiraa i ni‘a i te faatereraa hau e i ni‘a i te mau ture, mai tei fariihia na roto i te hoê maitiraa amui, na te hoê amuiraa rahi a te Ekalesia, hau atu i te hoê tenetere i teie nei:
“Te faaroo nei matou e ua faati‘ahia te mau faatereraa hau e te Atua ei maitai no te taata nei; e e faautu‘a oia i te taata nei no ta ratou mau ohipa i roto i taua mau hau fenua ra, i te haamauraa i te mau ture e i te faatereraa i te reira, no te maitai e te vai-haunoa-raa o te amuiraa taata nei.
“Te faaroo nei matou e e ore roa e ti‘a i te hoê hau ia vai noa ma te hau, maori râ ia faatupuhia e ia haapa‘ohia ho‘i te reira mau ture o te haapapu na te taata tataitahi te ti‘amâraa no te mana‘o, te ti‘araa ho‘i ia mau e ia faatere i te mau faufaa, e te parururaa i te ora.
“Te faaroo nei matou e ua titauhia i roto i te mau hau atoa te mau taata toro‘a no te hau, e te mau haavâ no te haamana i te mau ture no taua hau ra; e e mea ti‘a ho‘i ia imihia te taata o te faatere i te ture mai te au-noa-raaa e te parau ti‘a e ia paturuhia ho‘i taua huru taata ra e te reo o te mau taata mai te mea e e hau repupirita ïa, e aore râ, na roto i te hinaaro o te arii ra.
“Te faaroo nei matou e ua faatupuhia te haapa‘oraa faaroo e te Atua; e e faautu‘ahia te taata nei e a’na, e e a’na ana‘e, no te haapa‘oraa i te reira, maori râ ia faatupu to ratou mau mana‘o no te haapa‘oraa faaroo i to ratou haapeapearaa i te mau ti‘araa e te mau ti‘amâraa o vetahi ê ra; tera râ aita matou i faaroo e e ti‘araa to te ture taata nei no te faaau i te faatumuraa i te mau ture no te haamoriraa no te ruuruu i te mau mana‘o o te taata nei, e ia faaue i te mau huru o te mau haamoriraa i te vahi taata e aore râ i te vahi taata ore; ia tinai te taata haavâ i te hara, eiaha roa râ e faatere i te mana‘o o te taata nei; ia faautu‘a atu i te hara, e ore roa râ e ti‘a ia haavî atu i te ti‘amâraa o te aau taata.
“Te faaroo nei matou e ua ruuruuhia te mau taata atoa nei ia paturu e ia tauturu i te mau faatereraa hau tei reira ratou i te parahiraa, a paruruhia‘i i roto i to ratou mau ti‘araa e te mau ture o taua hau ra; e e mea ti‘a ore roa te tiarepu e te orure hau o te mau melo atoa i paruruhia e taua hau ra, e e mea ti‘a ia faautu‘ahia’tu no te reira; e e ti‘araa to te mau hau atoa ia faatupu i te mau ture o tei mana‘ohia no te haapapû i te maitai no te mau taata atoa; teie râ, ia vai mo‘a noa te ti‘amâraa o te mana‘o.
“Te faaroo nei matou e e mea ti‘a ia faaturahia te taata atoa i roto i to’na ti‘araa, te mau faatere hau e te mau haavâ i to ratou mau ti‘araa, i tuuhia mai no te parururaa i te feia hara ore e no te faautu‘a atu i te feia rave hara; e ia faatura te taata atoa i te ture mai te haapa‘o i te reira, no te mea ia ore te reira e monohia mai te hau noa e te màrû i te orure hau e te ri‘ari‘a; i haamauhia ho‘i te mau ture a te taata nei no te faatereraa i te mau mea e maitai ai tatou nei ei taata hoê e te mau nunaa paatoa ho‘i, i ropu i te taata e te taata; e te mau ture mo‘a i horo‘ahia mai mai te ra‘i mai, no te faataaraa i te mau ture no ni‘a i te mau mea no te pae varua, no te faaroo e te haamoriraa, ia haapa‘o apitihia e te taata nei i Tei Hamani ia’na ra.
“Te faaroo nei matou e e ti‘araa to te mau faatere hau, te mau tufaa hau, e te mau hau fenua nei, e ua ruuruuhia ho‘i ia faatupu i te mau ture no te parururaa i te mau melo atoa i roto i te ti‘amâraa no te haapa‘o i to ratou faaroo; tera râ aita matou i faaroo e e ti‘araa to ratou i roto i te parau ti‘a no te faaore atu i taua ti‘araa o te mau melo, e a ore râ ia faatere ia ratou i roto i to ratou mau mana‘o, ia haapa‘o e ia faatura ratou i te mau ture e ia ore taua mau mana‘o ra no te haapa‘oraa i te faaroo ra e faati‘a i te orure hau e te pato‘iraa i te mana o te ture.
“Te faaroo nei matou e e mea ti‘a ia faautu‘ahia’tu te raveraa i te hara mai te au i te huru no te hape i ravehia ra; ia faautu‘ahia-’tu ho‘i te taparahi taata, te orure hau, te eiâ, te eiâ haru, e te hamaniiaraa i te tau hau, i te mau huru atoa ra ia faautu‘a-ana‘e-hia ïa mai te au i te rahiraa no te ino e tupu i rotopu i te taata nei, na roto i te mau ture o te hau tei reira taua hara ra i ravehia‘i; e no te hau e no te mana‘o hau màrû o te taata nei e ti‘a ïa i te taata ia tia’tu i mua ma to ratou aravihi i te afairaa’tu i te taata o tei faahapa i te mau ture maitai i te faautu‘araa ra.
“Aita matou e ti‘aturi nei e e mea ti‘a ia amui i te mana no te haapa‘oraa faaroo i to te hau fenua nei, na roto i te reira e paturuhia te hoê amuiraa haapa‘oraa faaroo e e haavî atu i te tahi ra i roto i te raveraa i te mau ohipa no te pae varua, e e patoihia’tu te mau ti‘araa o te mau melo tataitahi, i roto i to ratou meloraa i roto i te hau fenua.” [PH&PF 134:1–9.]
A haamana‘o outou e, ua nene‘ihia teie parau i tera roa ra tau, i te matahiti 1835, ei ti‘araa no te Ekalesia, e aita roa’tu te reira i taui.3
I te putuputuraa te Feia Mo‘a i roto i teie Amuiraa Rahi [Atopa 1940’] tei roto noâ te ao nei i te parau no te tama‘i [te Tama‘i Rahi Piti o te Ao nei]. E rave rahi milioni tamarii a te Fatu te mauiui nei e te oto nei. Te farii nei ratou i te mau mauiui atoa e te mau ati atoa o taua tama‘i ra…
Te itehia nei to tatou mau taea‘e e te mau tuahine i na pae e piti atoa o teie aroraa ri‘ari‘a. I te tahi pae e te tahi pae, ua ruuruuhia ratou i to ratou fenua na ni‘a i to ratou mau tupuna, to ratou mau fetii, te mau hoa, e na roto i to ratou here i te ai‘a…
Aita’tu ta te Feia Mo‘a i te tahi pae e te tahi pae, e ohipa e ti‘a ia rave maori râ, te patururaa i te hau fenua tei titauhia ia ratou ia haapa‘o. Tera râ, te pure ra ratou i te ao e te pô no te ani i te Atua ia huri i te aau o to ratou mau ti‘a faatere i ni‘a i te parau no te hau, ia mou ho‘i te ino o te tama‘i.4
Te huru o to tatou faatura i te mau hui mana faatere i roto i te fenua ta tatou e ti‘a ra, e te huru no to tatou patururaa i te faatereraa hau fenua, o te huru atoa ïa o to tatou ti‘araa taata ai‘a mana, e i reira atoa to tatou faatereraa hau fenua e faatura mai ai e e paturu mai ai ia tatou.5
Ia haamauhia te hoê ture e ia riro mai ho‘i ei ture niu, aore roa ïa e taata tei haamau‘a i ta’na moni no te tauturu i te taata ia ofati i taua ture ra e nehenehe ia parau papu e, e taata ai‘a parau ti‘a oia.6
Te hinaaro nei au e tuu papu atu i teie parau [na Abraham Lincoln, te 16raa o te peresideni o te Hau Marite, ] ta‘u e tai‘o atu i raro nei, i roto i te aau o te Feia Mo‘a atoa i te mau Mahana Hope‘a nei e faaroo mai i te reira.
“Ia haapii te mau metua vahine Marite atoa i te parau no te faatura i te ture i ta ratou mau tamarii rii i ni‘a i to ratou turi avae; ia haapiihia ho‘i te reira i roto i te mau fare haapiiraa, i roto i te mau vahi atoa e ti‘a ia haapiihia, e i roto i te mau fare haapiiraa teitei; ia papa‘ihia te reira i roto i te mau buka na te mau tamarii na‘ina‘i, e i roto i te mau buka haapii papa‘i e i roto i te mau aamu; ia haapiihia te reira i roto i te mau haapa‘oraa faaroo, ia porohia i roto i te mau putuputuraa a te mau ti‘a faatere o te hau, e ia haapapûhia to’na parau i roto i te mau fare haavaraa.” [A hi-‘o “The Perpetuation of Our Political Institutions”, faahitia i roto i The Speeches of Abraham Lincoln (1908), 6.]7
E faaô tatou ia tatou i roto i te parau no te maitiraa i te mau ti‘a faatere maitai e no te haamauraa i te mau ture maitai.
Te pure nei au no to tatou fenua e te ani nei au i te Fatu ia haamaitai i te feia e faatere nei i te nunaa; i te mau tuhaa fenua, i te mau oire, e i te mau fenua. Te pure nei au i te Atua ia faauru Oia i te nunaa ia haapa‘o i Ta’na mau ture, e ia maiti i te mau taata maitai i ni‘a i te toro‘a; ia vaiiho i to ratou mau amahamaharaa poritita i te hiti e ia imi i te taata maitai no te ti‘a i roto i te toro‘a, eiaha râ te taata e amui atu i te feia ofati ture o to tatou fenua. Te vai nei ta tatou hiroa faaroo tei faaue ia tatou ia haapa‘o e ia paturu i te mau ture o te fenua [a hi‘o Hiroa Faaroo 1:12]. Ia tauturu mai te Atua ia tatou ia na reira.8
Te faaroo-pinepine-hia nei te parau, e te faaroo noa nei â vau i te reira i teie taime e, te hinaaro nei te Peresideniraa o te Ekalesia a Iesu Mesia, oia te faatere nei i te Ekalesia e o te mau nei i te Autahu‘araa, ia maitihia tera taata e aore râ tera taata i tera ti‘araa.
No ni‘a i te parau no te maitiraa, te faati‘a nei te Peresideniraa o te Ekalesia i te mau tane atoa, te mau vahine atoa e te mau tamarii atoa ua ti‘a te matahiti no te maiti, ia maiti ia au i to ratou mana‘o. Te ani papu nei râ matou i te mau tane atoa e te mau vahine atoa, ia ite maitai i ta ratou hopoi‘a, e ia titau i to tatou Metua i te Ao ra ia arata‘i ia ratou i roto i te ohipa poritita e te ohipa no te haapa‘oraa faaroo; e ia paruru i te parau ti‘a.9
Te pato‘i u‘ana nei au i te Feia Mo‘a i te mau Mahana Hope‘a nei ia ano‘i noa ratou i te parau no te Ekalesia e te parau no te faatereraa hau fenua. Ahiri râ e, e mana to‘u e aore râ, e rave‘a ta-‘u, i roto i to‘u ti‘araa melo no te Ekalesia, no te tura‘i ia ravehia te taata maitai roa a‘e no te tavini i te nunaa, eita roa’tu ïa vau e pato‘i i te reira, e faaohipa mau râ vau i te reira e hope noa’tu to-‘u oraraa.10
Te faaau nei au i te Politita mai te ma‘i puupuu (rougeole) te huru. E ere te ma‘i puupuu i te ma‘i ino mai te mea e, e inu outou i te tî “saffron” [aihere] e aore râ, i te tahi atu huru tî, ia vai noa te puupuu na ni‘a ê noa i te iri o te tino. Ia faarahi roa ana-‘e râ te reira, e mare‘are‘a ïa to outou iri, e i te tahi taime, e huri roa te ori‘o mata. No reira, eiaha e vaiiho i te politita ia riro ei feruriraa tamau na outou. Te ti‘aturi nei au e, ei taata maitai roa a‘e te ti‘a i ni‘a i te toro‘a e ti‘a ai. Te ti‘aturi nei au e, ia maitihia te mau taata parau ti‘a e te afaro e te maitai no te parahi i ni‘a i te mau parahiraa e te mau ti‘araa e ti‘a ai.11
E mea ti‘a i te Feia Mo‘a tataitahi i te mau Mahana Hope‘a nei ia pure i te mau mahana atoa ia tauturu mai te Fatu ia’na ia feruri ma te afaro, e ia haere ma te afaro, ma te hi‘o ore i to’na iho maitai i te pae faufaa e i te pae politita.12
E mea ti‘a i te mau faatereraa hau ia niuhia e ia arata‘ihia na roto i te mau ture maitai i te pae morare.
I roto i ta’na oreraa parau aroha hopea i te nunaa taata marite, ua parau o George Washington [te peresideni matamua no te Fenua Marite] e:
“I roto i te mau ture e te mau peu atoa o te faahotu mai i te manuia i roto i te ohipa politita, ua riro ïa te haapa‘oraa faaroo e te parau no te maitai pae morare ei pou papu. E mea faufaa ore ia tiaoro te hoê taata e, e taata here oia i te ai‘a mai te mea e, e haa oia no te haamou i teie na pou o te oaoa o te taata nei, tei riro ho‘i ei turu papu no te ohipa a te taata e te taata ai‘a.
“Noa’tu te maitai ta te haapiiraa nehenehe e faatupu i ni‘a i te feruriraa o te taata, eita râ ta tatou e nehenehe e parau e, e hotu te huru maitai i te pae morare i roto i te fenua noa’tu e, aita e vai ra te ture o te haapa‘oraa faaroo.
“E ara maitai tatou i te feruri e, e mau te huru maitai i te pae morare noa’tu e, aita te haapa‘oraa faaroo.” [A hi‘o “George Washington: Farewell Address”, i roto i te William Benton, nene‘ihia, The Annals of America, 21 buka (1968–87), 3:612.]13
Te faaite nei tatou… e, e oto te Atua i te tama‘i e e faautu‘a ho‘i oia i te faautu‘araa mure ore, ia au i to’na hinaaro, i te feia e faatupu i te reira ma te ti‘a ore.
Te faaite papu nei tatou e, e afaro te mau peapea i te ao atoa nei na roto i te mau rave‘a [hau] mai te mea e, e faatitiaifaro te tahi nunaa e te tahi nunaa ma te ore e imi i te maitai no’na iho e na roto ho‘i i te parau ti‘a. No reira, te taparu atu nei matou i te mau ti‘a faatere o te mau nunaa atoa e i te mau taata atoa, ia haamaitai e ia faaafaro i to ratou mau peapea, ia ore ho‘i te au‘a o te riri o te Atua ia niniihia mai i ni‘a i te fenua nei, i te mea e, ua parau oia e, e ninii mai oia i To’na riri u‘ana i ni‘a i te feia parau ti‘a ore ma te faito ore.14
E mea au ore na te Atua te tama‘i, e aore râ, te ino, inaha, e na mua te reira i te tama‘i…I te mau nunaa atoa, te parau nei matou e, faaafaro i to outou mau peapea na roto i te mau rave‘a hau. Tera ta Fatu raveraa.15
Aita e taata e nehenehe e rave i te ohipa parau ti‘a ore, e aore râ, e ofati i te ture o to’na fenua, a riro ai ei Feia Mo‘a mau i te mau Mahana Hope‘a nei. Aita e nunaa e aita atoa e ti‘a faatere nunaa e nehenehe e rave i te hape, e e ofati ho‘i i ta ratou fafauraa, e ia faahapahia i mua i te Atua e i te taata nei, mai te tahi atu huru taata tei rave atoa i te hapa. E upootia te parau mau. Ia riro teie mau parau “Paruru i te parau ti‘a, noa’tu te ati”, ei parau poro na te Feia Mo‘a atoa i te mau Mahana Hope‘a nei.16
Te mau mana‘o tauturu no te haapiiraa e te aparauraa
-
Nahea te mau melo o te Ekalesia e ti‘a ai ia haa e ia paturu i te hoê faatereraa hau fenua maitai?
-
No te aha e mea faufaa ia faaohipa tatou i to tatou ti‘araa mana no te maiti i te taime e ti‘a ia tatou ia na reira? Mai te mea e, e nehenehe ta tatou e maiti, eaha ta tatou e rave no te faaineine ia tatou ia rave i taua ohipa ra?
-
Nahea tatou i te tauturu i te mau ti‘a faatere o to tatou hau fenua ia faatere mai te au i te mau ture morare maitai?
-
Nahea te mau taata e te mau utuafare ia tauturu i te haamaitairaa i to ratou oire?
-
Eaha te ti‘a ia tatou ia rave i roto i to tatou utuafare no te faaitoito i te mau melo o te utuafare ia faatura i te ture?
I roto i to tatou mau fenua e i to tatou mau oire, e imi tatou i te mau rave‘a atoa no te maiti i te mau ti‘a faatere maitai e no te haamau i te mau ture maitai.