Pene 1

Te aporaa e te haapiiraa i te Evanelia

E maitai te haapiiraa i te Evanelia mai te mea e, e vauvauhia e e fariihia te reira na roto i te faaururaa a te Varua Maitai.

No roto mai i te oraraa o Heber J. Grant

Ua parau te Peresideni Heber J. Grant: “Aita vau i ite i te hoê mea o te horo‘a mai i te oaoa rahi a‘e i roto i te aau o te taata nei maori râ, te raveraa i te ohipa i te utuafare e i rapae i te utuafare no te faaora i te varua o te taata nei. Aita vau i ite i te hoê mea o te fatupu i roto ia tatou i te here rahi a‘e i te mau mea maitai atoa, maori râ, te haapiiraa i teie Evanelia a Iesu Mesia.”¹

Taaê noa’tu to’na maitai ei orometua haapii Evanelia, ua rohi atoa te Peresideni Grant no te apo mai i te tahi mau mea i roto i te mau iteraa papu o vetahi ê. Te parau ra oia e: “E mea au na‘u ia haere i roto i te mau huru putuputuraa atoa a te Feia Mo‘a i te mau Mahana Hopea nei. Aita e putuputuraa ta‘u e haere, i roto anei i te paroita e aore râ, i te tĭtĭ e aore râ, i te mau amuiraa rahi, e aita vau i haamaitaihia, i haapiihia, e i faaitoitohia i roto i to‘u faaroo i te Evanelia; e aita vau e faaroo i te hoê mea tei riro ei pane ora.”²

I te apîraa o Heber J. Grant, ua tupu te hoê mea i ni‘a ia’na tei tauturu ia’na ia ite i te faufaa o te haapiiraa e te aporaa na roto i te Varua. I muri a‘e te parau ra oia e:

“E rave rahi mau mea tei tupu i roto i to‘u tau apîraa, no ni‘a i te faaururaa e te mana no roto mai i te mau taata tei poro i te Evanelia na roto i te varua o te iteraa papu e te pure. Te haamana‘o nei au i te hoê mea tei tupu i te tau e taurearea noa vau, mai te mea ra e, ahuru ma hitu e aore râ, ahuru ma va‘u to‘u matahiti i te reira taime. Ua faaroo vau i te Episekopo Millen Atwood i tera ra tau i te horo‘araa i te hoê a‘oraa i roto i te Paroita Ahuru ma Toru. I taua taime ra, te haapii atoa ra vau i te tarame, e ua hapehape rii te tarame i roto i ta’na mau faahitiraa parau.

“Ua papa‘i au i ta’na pereota matamua, ua ata vau ia‘u iho, e na ô a‘era vau e: ‘I teie pô, i roto i te maororaa e toru ahuru minuti te paraparauraa te Taeae Atwood, e navai roa ïa te mau parau atoa e hinaarohia e au no teie tau to‘eto‘e taatoa i roto i ta‘u haapiiraa tarame i te pô.’ Inaha ho‘i, titauhia ia matou ia afai atu i roto i te hora haapiiraa, i te mau hepetoma tataitahi, e piti pereota, e aore râ, e maha, te vai ra te hape o te tarame i roto, e ia faaite atoa i te faahitiraa afaro.

“Ua feruri au nahea vau ia faatitiaifaro i taua mau hape ra, ma te faaroo atoa i te a‘oraa a te Episekopo Atwood. Tera râ, aita i ti-‘a ia‘u ia papa‘i faahou i te tahi atu mau parau i muri a‘e i taua pereota matamua ra—aita hoê noa a‘e ta‘o; e ia hope te a‘oraa a Millen Atwood, ua tahe noa te pape mata i ni‘a i to‘u na paparia, e roimata no te aau mehara e no te mauruuru, tei faaî i to‘u na mata, no te nehenehe o te iteraa papu ta taua taata ra i faaite no ni‘a i te ohipa hanahana a Iosepha Semita, te peropheta a te Atua, e no ni‘a atoa i te faaururaa nehenehe tei vai i ni‘a i te peropheta i roto i ta’na mau ohipa.

“Noa’tu e ua hau i te piti ahuru ma pae matahiti i teie nei to‘u faarooraa i taua a‘oraa ra, te vai oraora noa ra ïa te reira i teie mahana, e te mau haaputapuraa e te mau mana‘o tei roaa ia‘u i taua taime ra, te vai papu noa ra ïa mai tei fariihia e au i taua tau ra. Ua ite outou e, aita roa’tu vau i feruri faahou e faaohipa i taua mau pereota ra e hape tarame to roto, mai ta‘u i feruri e, e ti‘a vau i ni‘a i roto i te piha haapiiraa, i reira e faaino ai i te i‘oa o te Atua. Na taua iteraa papu ra i faatupu i te hoê putapû rahi matamua i roto i to‘u aau e to‘u varua, aitâ i tupu a‘e nei, no ni‘a i te misioni hanahana a te peropheta. Ua faaroo a‘e nei au e rave rahi iteraa papu tei au-roa-hia e au, e o tei haaputapû ia‘u, teie râ te iteraa papu matamua tei faatahe roa i to‘u roimata, na roto i te faaururaa a te Varua o te Atua i ni‘a i taua taata ra.

“I roto i te rahiraa matahiti tei mairi mai taua taime mai ra, aita roa’tu vau i hitimahuta e i haapeapea faahou i te mau hape o te tarame e aore râ, te faahitiraa parau hape a te feia e poro ra i te Evanelia. Ua ite a‘era vau e, mai te huru ra e, te haava ra vau i te hoê taata na ni‘a i te huru o te ahu ta’na i oomo, haava i te varua o te hoê taata na ni‘a i te ahu o to’na reo. Mai taua mahana mai ra e tae mai i teie mahana, te mea hoê roa tei haaputapû ia‘u maori râ, te Varua, te faaururaa a te Atua ora o te vai i roto i te hoê taata a poro ai oia i te Evanelia, eiaha râ te reo…Ua ite papu vau e, tei te Varua te ora e te haroaroa, eiaha râ i tei te parau papa‘i.” [A hi‘o 2 Korinetia 3:6.]³

Te mau haapiiraa a Heber J.Grant

Ia haapii tatou i te Evanelia, e faatumu tatou i te haapiiraa i ni‘a i te mau parau tumu ohie, e te paari, e i ni‘a atoa i te mau faaueraa.

E ere te maa ta tatou e hi‘o ra e ta tatou e feruri ra e, e mea au, o te riro ei maitai no tatou, ia amu roa râ tatou e ia tamarû roa i te reira. E ere atoa na te hoê tamaaraa rahi e horo‘a mai i te puai e te maitai hau atu, e o te tauturu mai ia tatou ia rave maitai i ta tatou ohipa i roto i te aroraa o te oraraa nei, area râ, i te rahiraa o te taime, na te maa iti ha‘iha‘i roa a‘e e horo‘a mai i te maitai o te vai maoro, i te feia e amu i te reira. No reira, e ere atoa ïa na te maa i faaineinehia e te feia maramarama, e horo‘a mai i te mau taime atoa, i te puai hau atu i roto ia tatou no te rave, ma te hanahana e te itoito, i ta tatou hopoia i roto i te aroraa o te oraraa nei, i te rahiraa râ o te taime, o te mau haapiiraa ïa no roto mai i te taata haehaa roa a‘e te farii i te pahonoraa i roto i to tatou aau e to tatou varua, e o te horo‘a mai i te puai no te haere i mua e no te rave i ta tatou hopoia i roto i te aroraa i te mau mahana atoa no te titau i te maitai.⁴

E mea ti‘a i te mau pŭpŭ tauturu o te Ekalesia ia faariro i te paturaa i te iteraa papu i roto i te feruriraa e i roto i te aau o te Feia Mo‘a, i to te feia apî ihoa râ, ei opuaraa na ratou—te iteraa papu no ni‘a i te parau mau o te Evanelia tei Faaho‘i-faahou-hia mai, no ni‘a ho‘i i te ti‘araa Mesia o to tatou Fatu o Iesu Mesia, no ni‘a atoa i te hanahana o te misioni a te Peropheta Iosepha Semita, no ni-‘a ho‘i i te tupuraa hanahana o teie Ekalesia tei faatiahia e te Atua e Ta’na Tamaiti na roto i te Peropheta, e no ni‘a atoa i te parau e, teie te Ekalesia a Iesu Mesia, e e vai noa te reira e a muri noa’tu, e te mau mea atoa i roto i te reira, —ia ti‘a i te Feia Mo‘a ia farii e ia fana‘o i teie mau iteraa papu, e ia ora ratou ma te haapa-‘o i te mau faaueraa a te Fatu, ia faatupu tamau noa ratou i te rahi i to ratou iteraa i te Parau Mau, ia ti‘a ia ratou ia ora i te hoê oraraa e ti‘a ai ia ratou ia farii i te faaoraraa, te faateiteiraa, e te oaoa mure ore i roto i te Basileia Tiretiera, e i te hopea ra, ia nehenehe atoa ratou ia arata‘i i te tahi atu mau taata o te ao nei ia farii atoa i te ite e te iteraa papu no ni‘a i te Parau Mau na roto i ta ratou mau haapiiraa e to ratou hi‘oraa maitai, ia farii atoa ho‘i taua mau taata i teie nei mau haamaitairaa.⁵

Te ti‘aturi nei au e, te orometua tei roto ia’na te here i te Atua e te iteraa no ni‘a Ia’na, te here ia Iesu Mesia e te iteraa papu no ni‘a i To’na huru Atua, te iteraa papu no ni‘a i te misioni hanahana a te Peropheta Iosepha Semita; te orometua e tanu i teie mau mea i roto i te aau e i roto i te tino taatoa o te mau tamarii ta’na e haapii ra, ua pûpû mau ïa taua orometua ra ia’na i roto i te hoê o te mau ohipa hanahana roa a‘e e te nehenehe e te faahiahia ta te hoê taata e nehenehe e pûpû ia’na.⁶

E mata na i te haapii e i te haapa‘o i te mau parau tumu matamua o te Evanelia, ei reira te mau parau aro o te ra‘i e faatia‘ihia ai e tae noa’tu ua tae outou i te ra‘i ra.⁷

Mai te mau himene ta tatou e himene pinepine nei…eita roa’tu e ti‘a ia parau e, ua pinepine roa ta tatou parauraa i te mau faaueraa a te Fatu i to tatou mau taata, e te faaitoitoraa i te Feia Mo‘a ia haapa‘o i te reira.⁸

E rave rahi taime to te taata parauraa mai ia‘u e, “Ua ma‘ihia vau e ua rohirohi roa vau i te faaroo noa i taua mau mea noa nei â. Aita e faufaa ia faahiti tamau noa i te reira.” E rave rahi taata e faahapa nei i te mau a‘oraa ta ratou e faaroo nei no te mea te vai ra te mau mea i faahiti-pinepine- hia i roto…Mai te mea ra e, ua ite te Fatu i te faufaa no te faahiti-pinepine-raa i te parau, ei rave‘a no te oomoraa i te parau poro‘i ta’na e parau, i roto i te upoo o te taata. I roto i ta’na haapiiraa, e faahiti pinepine te Faaora i taua mana‘o noa nei â, i tera taime e tera taime, na roto i te mau reo taaê, mai te mea ra e, no te taamu papu i te reira i roto i te upoo e te aau o te mau taata e faaroo ia’na.⁹

E haapii tatou na roto i te mana o te Varua Mo‘a, ei reira tatou e riro ai ei feia haapii Evanelia maitai.

I roto i to‘u tere matamua i muri a‘e i to‘u riroraa ei melo no te Pŭpŭ Tino Ahuru Ma Piti, e o Elder Brigham Young, Tamaiti, [melo atoa no te Pŭpŭ Tino Ahuru Ma Piti, ] te haamana‘o ra vau i te faaotiraa vau i to‘u mana‘o e, eita vau e paraparau faahou, i roto i taua tere ra—o te hope i roto i te maha ava‘e— i te parau ta tatou e parau nei e “Te Parau Paari”…Ua faaoti au e, i roto i te pureraa ta‘u e haere i mua nei, e imi au i te tahi atu tumu parau. Ua tamata vau i te paraparau i te roaraa e 20 minuti i ni‘a i te tahi atu tumu parau, e mea ino mau ïa. I muri iho, ua paraparau faahou vau e 20 minuti, ma te ohie, i ni‘a i te tumu parau no te Parau Paari; e ua faaitehia mai ia‘u i muri a‘e e, te hoê mea faufaa roa no te mau taata i roto i taua oire iti na‘ina‘i ra ta‘u i haere atu e farerei, maori râ, ia haapiihia ïa ratou i te parau no te Parau Paari…I muri a‘e i taua ohipa i tupu ra, ua faaoti ihora vau i to‘u mana‘o e, ia tupu noa’tu te mana‘o i roto ia‘u e paraparau i ni‘a i te hoê tumu parau, e te vai ra te hinaaro ia na reira, noa’tu e, ua haapii noa na vau i te reira tumu parau e rave rahi hepetoma te maoro, e haapii faahou â ïa vau i te reira…

I to‘u tau faatereraa, ua oaoa roa vau i te faaiteraa e, mai te mea e, e haehaa to roto ia tatou e te aau pure e te hinaaro ia haapii i te taata, e faauru mai te Faatu ia tatou.¹⁰

Te vai ra te mata‘u e te mamahu i roto ia tatou paatoa ia ti‘a ana‘e tatou i mua i te taata no te poro ia ratou i te faanahoraa o te ora e te faaoraraa. Te feruri nei au e, ua ti‘a roa ïa te reira, i te mea e, te ite ra ïa tatou i to tatou iho tiamâ ore, to tatou paruparu, e to tatou iho taa ore ia haapii i te taata ta tatou e paraparau atu ma te tauturu ore a te Varua Mo‘a… Te mauruuru nei au i te mea e, ua vai noa taua varua mamahu ra i roto ia‘u i te taime a paraparau ai au i te Feia Mo‘a i te mau Mahana Hopea nei, no te mea, aita vau e hinaaro ia tupu te mana‘o i roto ia‘u e, aita te maramarama e te faaururaa a te Atua e parahi nei i roto ia‘u, a paraparau ai au i te taata. Ua ite au e, eita vau e taa i te mea maitai roa a‘e no te taata, maori râ, na roto i te reo o te faaururaa.¹¹

To‘u hinaaro tumu i roto i ta‘u paraparauraa i te Feia Mo‘a i te mau Mahana Hopea nei, maori râ, ia haamaramaramahia to‘u feruriraa na roto i te faaururaa a te Varua Mo‘a. Ua ite au e, i roto i te ohipa haapiiraa i te taata, mai te mea e, aita te taata parau e faauruhia e to tatou Metua i te Ao ra, eita ïa e ti‘a ia’na ia faahiti i te hoê parau ei maitai e aore râ, ei faufaa no te Feia Mo‘a.¹²

Aita roa e taata e nehenehe e haapii i te Evanelia a Iesu Mesia na roto i te faaururaa a te Atua ora, e na roto ho‘i i te mana no te ra‘i mai, maori râ, ia haapa‘o oia i te reira i roto i te oraraa.¹³

Teie ta tatou hopoia—te tuuraa ia tatou i ni‘a i te hoê ti‘araa, e ia ti‘a ho‘i tatou i ni‘a no te haapii i te taata, e nehenehe ta tatou e haapii ia ratou na roto i te faaururaa a te varua o te Atua o te tae mai i ni‘a iho ia tatou; mai te mea râ e, aita tatou e haapa‘o i te mau faaueraa a te Atua, eita ïa ta tatou e nehenehe e faaitoito ma te mana, e ma te itoito, e ma te puai, i te tahi atu mau taata ia haapa‘o ratou i te mau faaueraa o ta tatou iho e haapa‘o ore nei.¹⁴

Ia riro tatou ei feia faaroo maitai e te hinaaro papu ia faaohipa i te mau mea i apohia mai e tatou, ei reira tatou e fana‘o ai i te mau putuputuraa e te mau haapiiraa a te Ekalesia.

Noa’tu eaha te puai o te iteraa papu, e aore râ, eaha te huru o te faaururaa i roto i te reira, mai te mea e, aita te taata faaroo e tau‘a maira i te parau, eita ïa te parau e ô i roto i te upoo. E au ïa e, e huero maitai teie e tanuhia nei i roto i te repo ino.¹⁵

E faariro te taata poia i te maa ei maa maitai. Te taata tei poia i te Evanelia a Iesu Mesia e faatupu ïa oia i te au i roto ia tatou i ta tatou mau amuiraa.¹⁶

Te vai ra te tahi mau taata e haere nei i te mau pureraa e matahiti e matahiti atu, e te faaroo nei i te mau tavini o te Fatu i te haapiiraa ia ratou ma te ohie e te haehaa i ta ratou mau hopoia, e i reira, haere atu ai i rapae i taua mau pureraa ra, e aita roa’tu i faaohipa i te mea ta ratou i faaroo; ua haafaahiahia ratou ia ratou i te mea e, ua haere tamau noa ratou i te pureraa. Teie nei, e au mau hoa e, mai te mea e, e tamau noa outou i te haere i te tamaaraa i te ahiahi, parahi atura i raro e hi‘o maitai atura i te maa, e aita’tura i amu noa a‘e i te reira, eita e maoro roa, e pohe outou i te poia. Te vai ra te tahi Feia Mo‘a i te Mahana Hopea nei e haere nei i te pureraa, e te pohe nei ratou i te poia varua no te mea aita ratou e farii nei e e tamarû nei i te maa varua e horo‘ahia ra i reira. Eiaha tatou ia riro ei feia faroo noa i te parau, ei feia faaohipa atoa râ i te reira [a hi‘o Iakobo 1:22].¹⁷

Ia haere ana‘e tatou i roto i te hoê pureraa, e ite tatou i te varua o taua pureraa ra. Mai te mea e, aita tatou i tae i roto i te reira pureraa e na te tahi taata i faaite mai ia tatou i te varua nehenehe tei vai i reira, e te ohipa tei tupu i ni‘a i te feia tei tae e tei farii i te reira, eita ïa tatou e ite papu maitai i te reira mau mea. E au mau ïa mai te hoê taata tei poia roa e e haere mai te hoê taata e faaite mai ia’na i te parau no te hoê tamaaraa maitai roa, eita râ oia e ite papu maitai i te au o te reira tamaaraa. Na tatou iho e amu i ta tatou maa, e ora tatou no tatou iho, e ti‘a tatou i ni‘a i te reni o ta tatou hopoia ia nehenehe ia tatou ia amu i te Varua o te Fatu, ia faaitehia mai te Varua o te Fatu.

…Titauhia ia Francis M. Lyman [no te Pŭpŭ Tino Ahuru Ma Piti Aposetolo] ia haere na Tooele mai i te pô na mua a‘e i ta matou apooraa e e faaea ai oia hoê pô [i Salt Lake City]e hoê mahana taatoa ia ti‘a ia’na ia tae mai i te mau apooraa a te Peresideniraa e te mau Aposetolo o te faaoti e piti e aore râ, e toru hora muri a‘e, tera râ, aita roa oia i mairi i te hoê noa a‘e o te reira mau apooraa.

I te hoê mahana ua parau atu vau ia’na: “Mea faahiahia roa na-‘u ia hi‘o i to oe vitiviti e te taeraa mai i ta tatou mau apooraa atoa.”

Na ô maira oia e: “Aita vau e hinaaro ia mairi au i te hoê noa a‘e faaururaa no ô mai i te Fatu ra; aita vau e hinaaro ia tae mai te Varua o te Fatu i roto ia‘u na roto mai i te tahi taata ê atu. Ua hinaaro vau ia farii i te reira, e ia vai te reira i roto ia‘u, e ia taa i te reira, e ia ite i te reira na roto ia‘u iho.”¹⁸

Na roto i te pure faaroo, e roaa te maitai e te puai i te feia haapii e te feia apo.

Te hinaaro nei au, mai tei matarohia e au ia paraparau ana‘e au i te Feia Mo‘a, ia farii i te haamaitairaa o to outou faaroo e ta outou mau pure, ia nehenehe i te hoê Varua maitai ia parahi mai i rotopu ia tatou, ia haamaitaihia ho‘i tatou paatoa te tahi e te tahi i roto i to tatou faaroo mo‘a na roto i to tatou amuitahiraa mai i ô nei… Ua ite au e, te feruri nei te tahi mau taata e, e parau oti noa teie na te feia orero ia titau i te faroo e te pure a te Feia Mo‘a, te hinaaro nei râ vau e parau atu e, te feruri nei au e, e haafaufaa ore rahi mau to te taata i te parau no te taparuraa i te Fatu ia haamaitai e ia faauru i te feia e a‘o nei. I roto i te mau taime mai teie te huru, te hapa nei tatou i te rahiraa o te taime, no to tatou oreraa e faatumu i to tatou mau feruriraa e to tatou mau mana‘o i ni‘a i te taata a‘o e te oreraa e titau papu e na roto i te pure ia haamaitaihia oia e te Fatu. Te tatarahapa nei au iho nei i te haamo‘eraa i te tahi taime, a paraparau ai to‘u mau taea‘e, i te pure i te Fatu ia haamaitai mai ia ratou i To’na Varua Mo‘a.

Ua ite au na roto i te mau ohipa i tupu e, aita e taea‘e e ti‘a mai i ni‘a no te paraparau i te Feia Mo‘a, mai te mea e, e hinaaro mau to’na ia maitai ratou, ma te ore e titau papu i te faaroo e te pure a te mau taata…Ei pahonoraa i te mau pure a te Feia Mo‘a tei haaputuputu mai, ua ite au e, e haamaitai mai te Atua ia‘u e i te tahi atu mau taata o te ti‘a mai i mua ia outou i tera taime e tera taime no te poro atu ia outou i te mau hopoia e te mau titauraa tei titauhia ia outou ia rave no tei Hamani ia outou.¹⁹

Ia haere tatou i te pureraa, e haere tatou ma te pure i roto i to tatou aau ia faauru mai te Fatu i te feia e a‘o mai, na roto i To’na varua, e ia hope ta ratou a‘oraa mai ia tatou na roto i te faaururaa a To’na Varua, ia ho‘i tatou ma te mana‘o papu, ma te hinaaro, ma te pure, ia apo maite tatou i te haapiiraa tei faaroohia e tatou, ia ti‘a ia tatou ia faaohipa i te reira i roto i to tatou oraraa.²⁰

Aitâ vau i farii a‘e nei i roto i to‘u oraraa i te poupou, e aore râ, i te oaoa, e aore râ, i te hau o te nehenehe e faaauhia i te poupou, te oaoa e te hau tei iteahia e au i te haereraa mai te taata tei faaroo ia‘u i te pororaa i te Evanelia a Iesu Mesia, e farerei ia‘u ma te parau mai e, ua roaa ia ratou te iteraa i te hanahana o teie nei ohipa; e te mau parau tei matara mai roto mai i to‘u na vaha, ua faatupu ïa te reira i te ite i roto i to ratou aau e, ua faaho‘i-faahouhia mai i te fenua nei te faanahonahoraa no te ora e te faaoraraa. Te ti‘aturi nei au e, aita e vai nei i te ao taatoa nei te hoê mea o te nehenehe e faaauhia i te poupou ta te hoê taata e farii ia ite ana‘e oia e, ua riro oia ei mauhaa i roto i te rima o te Atua ora no te farerei i te hoê taata aau parau ti‘a, no te faauru i roto ia’na i te here i te Atua e te hinaaro ia tavini Ia’na.²¹

Te mau mana‘o tauturu no te haapiiraa e te aparauraa

No te aha e mea faufaa ia “na ni‘a iho noa” i te haapii i te mau parau tumu o te Evanelia? Eaha te maitai tei noaa ia outou na roto i te haapii-pinepine-raa-hia te mau parau tumu o te Evanelia?
Eaha te mau taime e nehenehe tatou e haapii i te Evanelia? Ia faaineine ana‘e tatou no te haapii, no te aha e mea faufaa ia faaite tatou i te Fatu i to tatou paruparu?
Eaha te auraa no te parau ra, e haapii na roto i te faaururaa a te Varua Mo‘a? (Hi‘o atoa 2 Nephi 33:1; PH&PF 50:13–22; 100:5–8.) Eaha ta tatou e rave no te farii i te arata‘iraa a te Varua i roto i ta tatou haapiiraa? (Hi‘o atoa Alama 17:2–3; PH&PF 11:18–21; 42:14.)
Eaha ta tatou hopoia a faaroo ai tatou ia vetahi ê ia haapii i te Evanelia? Eaha te ohipa e tupu i roto i te piha haapiiraa mai te mea e, e faaroo maitai tatou? Nahea to tatou faaroo maitai i te tauturu i te orometua e ia vetahi ê i roto i te piha haapiiraa?
Eaha te ti‘a i te mau orometua ia rave no te faaitoito i te mau melo o te piha haapiiraa ia faaô i roto i te mau haapiiraa?
E mea nahea te mau putuputuraa a te Ekalesia i te tautururaa ia outou ia tupu i te rahi i te pae varua? No te aha e hopoia na tatou ia pure no te feia e haapii i roto i te mau putuputuraa a te Ekalesia?
A faaineine ai tatou no te tuatapapa i te mau haapiiraa a te Peresideni Grant, eaha te ti‘a ia tatou ia rave no te faaohipa i te mea i apohia mai e tatou i roto i teie pene?

sister teaching — “Aita vau i ite i te hoê mea o te fatupu i roto ia tatou i te here rahi a‘e i te mau mea maitai atoa, maori râ, te haapiiraa i teie Evanelia a Iesu Mesia.”