Pene 8
Te apeeraa i te feia ta te atua i maiti no te faatere
E turu tatou i te feia faatere o te Ekalesia na roto i te pureraa no ratou, te haapa‘oraa i ta ratou mau a‘oraa faauruhia, e te patururaa ia ratou i roto i ta ratou mau ohipa.
No roto mai i te oraraa o Heber J. Grant
I te haamataraa Elder Heber J. Grant i ta’na ohipa i roto i te Pŭpŭ Tino Ahuru Ma Piti Aposetolo, ua faaite oia i te ti‘aturi papu i te Peresideni no te Ekalesia. I muri noa a‘e i to’na piiraahia, ua papa‘i oia i te hoê rata i to’na taea‘e Anthony W. Ivins, “E nehenehe ta‘u e parau papu e, aitâ vau i ite a‘e nei i roto i to‘u oraraa i te hoê taime a ore ai au e hinaaro e taui i ta‘u faanahoraa ohipa i mua i te faaueraa no roto mai i te mau tavini o te Atua.”1
Ei melo no te Pŭpŭ Tino Ahuru Ma Piti, e rave rahi iteraa tei roaa ia Elder Grant tei haapuai i to’na iteraa papu no ni‘a i te Peresideni o te Ekalesia i roto i to’na ti‘araa ei auvaha parau no te Fatu i ni‘a i te fenua nei. I muri a‘e, i to’na iho riroraa mai ei Peresideni no te Ekalesia, ua faaite oia i te parau no te hoê o taua iteraa ra, oia ho‘i, ua ite oia i te faaururaa a te Fatu i ni‘a i te Peresideni Wilford Woodruff. Inaha, i te matahiti 1890, ua faaara te Peresideni Woodruff e, ua titau mai te Fatu i te Feia Mo‘a ia faati‘a ratou i te hoê ohipa hamaniraa tihota i Utaha. Tei roto atoa o Elder Grant i te tomite tei haamauhia no te “tuatapapa i taua opuaraa ra.” I muri a‘e i to te tomite tuatapapa-maite-raa i taua opuaraa ra, ua faaoti amui a‘era ratou e, e mea ti‘a i te Ekalesia ia faaore i taua mana‘o ra.
Tera râ, te parau ra te Peresideni Grant, “Aita te Peresideni Woodruff i mauruuru. Ua faati‘a- faahou-hia te tahi atu tomite. I ti- ‘a na vau i roto i te tomite matamua, e ua pii oia ia‘u ia ti‘a i roto i te piti o te tomite. Ua taparu vau ia ore au ia ti‘a i reira, no te mea ua faaite a‘e na vau i to‘u mana‘o, e ua tarima a‘e na vau i te hoê parau faaiteraa, aita râ oia i farii i ta‘u aniraa ia iritihia vau. Ua hi‘opo‘a faahou matou i taua ohipa ra, ma te haapa‘o maitai, e ua faaite atoa te piti o te tomite e, e ere taua mana‘o ra i te mana‘o maitai. Ua parau a‘era te Peresideni Woodruff e: ‘Eiaha e haapeapea no te raport. Te faaururaa tei tae mai ia‘u nei, maori râ, ia patu i te ohipa hamaniraa tihota.’ ”
No to ratou auraro i te arata‘iraa a te peropheta o te Fatu, ua faaineine a‘era te Peresideni Grant e te tahi atu mau taata i te mau faanahoraa no te patu i te hoê fare no te hamani i te tihota. Tera râ, no te fifi tei tupu i roto i te parau no te tereraa moni i to ratou fenua i te matahiti 1891, ua fifi atoa ratou no te imiraa i te moni no te patu i taua fare ra. E ua ti‘a faahou maira te tahi pŭpŭ taata imi faufaa aravihi no te parau mai e, e ere i te mea ti‘a ia tamau noa te Ekalesia i te rave i taua opuaraa. Te haamana‘o nei te Peresideni Grant i te pahonoraa a to’na ti‘a faatere i taua mana‘o ra:
“I te tuuraahia mai taua mana‘o ra, teie ta Wilford Woodruff pahonoraa: ‘Mai te mahana a ite ai au i te hanahana o te Evanelia a Iesu Mesia tei heheuhia mai na roto i te Peropheta Iosepha Semita, mai te mahana a haere ai au e poro i taua Evanelia ra, i roto i to‘u ti‘araa haehaa roa ei tahu‘a, noa’tu to‘u mana‘o e, e pohe paha vau, mai te mea e, ua farerei au i te pohe i roto i te raveraa i te ohipa no taua Evanelia ra, aita vau i fariu noa a‘e i te atau e i te aui; I teie nei, ua tae mai te faaururaa a te Fatu ia‘u ia patu i taua fare ra. I te mau taime atoa a feruri ai au e, e faaru‘e i taua opuaraa ra, ua tupu mai te poiri; e i te mau taime atoa a feruri ai au e, e patu i te reira, ua tupu mai te maramarama. E patu tatou i teie fare noa’tu e, e veve te Ekalesia.’ ”
“E ua patu mau matou i te reira fare”, te na reira ra te Peresideni Grant, “e aita te Ekalesia i veve.” Ua patu râ te Ekalesia, i muri a‘e, i te tahi atu mau fare, ma te haamau i te hoê faanahoraa ohipa tei riro ei haamaitairaa no te Ekalesia taatoa e no te Feia Mo‘a tataitahi i te mau Mahana Hopea nei.2
E rave rahi matahiti i muri mai, ua horo‘a mai te Peresideni Heber J. Grant i teie a‘oraa ohie roa no te arata‘i i te oraraa o te Feia Mo‘a i te mau Mahana Hopea nei: “Aita vau i ite i te hoê mea hau atu i te faufaa no te oraraa nei, maori râ, te parau no te haapa‘o i te a‘oraa e te arata‘iraa a te Fatu, e a To’na mau tavini, i teie anotau to tatou nei.”3
Te mau haapiiraa a Heber J. Grant
E pii te Fatu i To’na mau peropheta ma te arata‘i ia ratou na roto i te faaururaa.
No reira te hinaaro nei au na roto i teie ohipa e na roto i te mau ohipa atoa, e faaite i to‘u iteraa papu na roto i te hanahana e na roto ho‘i i te haehaa, no ni‘a i te hanahana o te misioni a te Peropheta Iosepha Semita, e no ni‘a i te hanahana o te misioni a te mau taata atoa tei maitihia no te mono mai ia’na.4
Eiaha e mata‘u e au mau taea‘e e e au mau tuahine here, i te mea e, aore roa e taata e ti‘a i te upoo o te Ekalesia a Iesu Mesia maori râ, ua hinaaro to tatou Metua i te Ao ra ia’na i reira.5
E nehenehe ta‘u e parau e, ua niniihia mai te mau haamaitairaa e rave rahi a te Fatu i ni‘a i te mau taata atoa tei ti‘a i te upoo o teie Ekalesia, no te mea ua imi maite ratou ma te parau ti‘a i te faaururaa a te Varua o te Atua no te arata‘i ia ratou i roto i te mau mea atoa ta ratou i rave.6
Ua matau vau ia Brigham Young i to‘u tamariiraa e ono matahiti to‘u… E nehenehe ta‘u e faaite i to‘u iteraa papu no ni‘a i to’na maitai, to’na here ia‘u i roto i to‘u huru taata, no ni‘a atoa i to’na here i te Atua e no ni‘a i te faaururaa a te Fatu tei fariihia e a’na a ti‘a ai oia i te vahi e ti‘ahia nei e au i teie nei, i te taime a parahi ai au i roto i te amuiraa no te faaroo i ta’na mau parau faauruhia.
Ua piihia vau i roto i te Pŭpŭ Tino Ahuru Ma Piti Aposetolo na roto i te hoê faaururaa a te Fatu tei tae mai i te Peresideni John Taylor, e mai te taime a tomo ai au i roto i te Pŭpŭ Tino Ahuru Ma Piti, oia ho‘i, e piti matahiti i muri a‘e i te riroraa o John Taylor ei Peresideni no te Ekalesia, e tae roa’tu i to’na poheraa, ua putuputu vau e o’na i te mau hepetoma atoa…Ua ite au e, e tavini mau oia no te Atua ora; ua ite au e, ua farii oia i te faaururaa a te Fatu; e ua ite au e, i te mau taime atoa a parau ai oia e: “Teie te hinaaro o te Fatu”, e ua turu to’na mau hoa i roto i te apooraa a te mau aposetolo i to’na mana‘o, e i te mau taime atoa ua tano oia, e na te faaururaa a te Fatu i faaite mai e, to’na paari na roto i te mana o te Atua, ua hau a‘e ïa i te paari o te tahi atu mau taata.
E rave rahi taime to‘u haereraa i te apooraa…, ma te ite e, e tuatapapahia tera parau e tera parau i reira, e ua papu to‘u mana‘o no ni‘a i te reira parau, ia au i te mau taata atoa o te faaoti i to’na mana‘o… I to‘u haereraa i te apooraa…ma te ite papu e, e farii au i tera faaotiraa, tera râ, e maitiraa taaê roa ta‘u i turu, no te mea ua tae mai te faaururaa a te Fatu i roto ia John Taylor. I roto i tera mau huru taime atoa, ua ti‘a te tavini a te Fatu, oia te Peresideni Taylor, e ua faaoti to’na mana‘o teitei, na roto i te faaururaa a te Fatu, ia turu i te mau mea maitai a‘e no te taata.
E nehenehe ta‘u e faati‘a e rave rahi mau taime a tonohia ai te mau aposetolo no te rave i te tahi mau ohipa i raro a‘e i te faaururaa a te Fatu ia John Taylor, a feruri ai ratou e, eita e oti ia ratou taua ohipa ra. Ua ho‘i mai ratou e ua faaite mai i to ratou iteraa papu e, na roto i te tautururaa a te Fatu ua ti‘a ia ratou ia rave i te ohipa tei faauehia ia ratou e te Peresideni Taylor, te Peropheta o te Fatu…
E nehenehe ta‘u e faaite i to‘u iteraa papu e, e tavini mau o Wilford Woodruff no te Atua ora, e e Peropheta mau na te Atua. Ua faafariu e ua bapetizo o Wilford Woodruff, te hoê taata haehaa, e rave rahi hanere taata i roto noa i te tahi tau ava‘e te maoro, i Herefordshire, i Peretane…Te ti‘aturi nei au e, aita e taata ê atu tei ora i ni‘a i te fenua nei, tei hau atu ia’na i roto i te parau no te faafariuraa i te taata i te Evanelia a Iesu Mesia. E taata teie tei hau i te nehenehe e te faahiahia to’na haehaa, e taata aita i faaô ia’na i roto i te mau ohipa imiraa moni; e taata tei horo‘a i to’na taime i roto i te ohipa faaapu, te tanuraa i te mau maa hotu e te faatupuraa i te mau huero maa; e taata haehaa, e ua faaroo vau e rave rahi taata tei parau e, aita oia i ravai i te ite no te faatere i te Ekalesia a te Mesia. Te hinaaro nei râ vau e faaite ia outou i to‘u iteraa papu e, na roto i te faaururaa a te fatu, e no te haehaa o taua taata ra, e no te huru Atua o to’na oraraa e no te mea ho‘i e, ua here te Atua ia’na, ua haamaitaihia oia hau atu i te hoê taime, i te maitai no te paari tei hau roa i te paari o te mau taata maramarama i te pae no te moni i roto i te Ekalesia…
Ua ite au e, e Peropheta o Lorenzo Snow na te Atua…Ua ti‘a mai o Lorenzo Snow i roto i te peresideniraa o te Ekalesia i te va-‘u ahuru ma paeraa o to’na matahiti, e te ohipa tei ravehia e a’na i roto i na matahiti e toru o to’na oraraa, e ohipa ïa no te nehenehe ia mata‘ita‘i. Ua faati‘a mai oia i te Ekalesia…ua fatata roa i te topatari…Teie taata, aita oia i matau i te ohipa putu moni, ua pŭpŭ râ oia e rave rahi matahiti o to’na oraraa no te rave i te ohipa i roto i te hiero. I roto i na matahiti poto roa e toru o to’na oraraa, ua faatere oia i te faufaa moni a te Ekalesia a te Mesia, i raro a‘e i te faaururaa a te Atua ora; i te parauraa a te tahi mau taata o te ao nei, aita e maraa taua ohipa ra ia’na; tera râ, i roto i taua na matahiti e toru ra, ua taui oia i te mau mea atoa i te pae faufaa, mai te poiri haere ti‘a mai i roto i te maramara…
…Te faaite nei au i to‘u iteraa papu e, mai to‘u na‘ina‘iraa ra, ia ore ana‘e au e maramarama maitai i te mau haapiiraa o te Evanelia, ia faaroo ana‘e au ia Joseph F. Smith ia poro i te Evanelia, e rurutaina to‘u tino, e e tahe te roimata i ni‘a i to‘u paparia, i raro a‘e i te faaururaa a te Atua ora…Ia faaroo ana‘e au ia’na ia poro i te Evanelia a Iesu Mesia, e î to‘u tino i te varua. Te faaite nei au i to‘u iteraa papu e, o oia te hoê o te mau peropheta rarahi a te Atua tei ora na; ua parahi tamau te Atua i pihai iho ia’na mai te mahana a haere ai oia ei tamaiti apî roa, ahuru ma pae matahiti te paari, no te poro i te Evanelia a Iesu Mesia i te mau fenua Vaihi, e tae roa’tu i te mahana a hope ai ta’na ohipa i ni‘a i te fenua nei, i muri a‘e e ono ahuru e ma pae matahiti to’na raveraa i te ohipa na te Atua.7
Noa’tu e, ua riro vau ei mauhaa paruparu e te haehaa i roto i te rima o te Fatu, ua topa mai te hopoia i ni‘a ia‘u no te mono i taua mau taata faahiahia ra tei faatere mai i te Ekalesia—te Peropheta Iosepha Semita, ta‘u e ti‘aturi nei e, aita e taata rahi atu ia’na tei ora i ni‘a i te fenua nei; taua taata omua faahiahia ra, o Brigham Young; te aito rahi no te tiamâraa, o John Taylor; te taata faafariu taata i roto i te Evanelia a Iesu Mesia, o Wilford Woodruff, e o Lorenzo Snow te taata taaê mau e va‘u ahuru ma pae matahiti, tei faati‘a mai i te Ekalesia i roto e toru matahiti. …i te hoê faito maitai i te pae faufaa; e te taata tei herehia e te feia atoa tei ite ia’na, te hoê o te mau taata faahiahia o te ao nei, o Jopseph F. Smith, te taata rahi a‘e o ta‘u i ite tei poro i te parau ti‘a.8
Aita i te hopea to‘u maere ia feruri e, o vau te ti‘a no te Fatu i ni‘a i te fenua nei. Mai to‘u apîraa mai to‘u faahoaraa i te mau taata faahiahia e te faufaa rahi tei na mua atu ia‘u. E ua riro te reira ei maereraa na‘u ia feruri ana‘e au i teie nei e, tei roto atoa vau i to ratou ana‘iraa parau.
Teie te mau parau hopea a te Peresideni Joseph F. Smith i to’na aroha-rima-raa mai ia‘u i taua pô ra a pohe atu ai oia— “E haamaitai te Fatu ia oe e ta‘u tamaiti, e haamaitai te Fatu ia oe; ua farii oe i te hoê hopoia rahi roa. Haamana‘o noa oe e, na te Fatu teie ohipa, e ere na te taata. Ua hau a‘e te Fatu i te rahi i te mau huru taata atoa. Ua ite oia i te taata Ta’na e hinaaro no te faatere i Ta’na Ekalesia, e eita roa’tu oia e hape. E haamaitai te Fatu ia oe.”9
E farii te mau peropheta i te faaururaa ei maitai no te Ekalesia.
Te haamauruuru nei au i te Fatu no to‘u auhoaraa, mai to‘u tamariiriiraa, i te Peresideni Brigham Young, John Taylor, Wilford Woodruff, Lorenzo Snow, e te Peresideni Joseph F. Smith. Te haamauruuru nei au i te Fatu i te mea e, i roto i te taatoaraa o to-‘u auhoaraa e taua mau taata ra, aita e ohipa ê atu ta‘u i ite no ni-‘a ia ratou maori râ, te maitai…Aita roa’tu vau i faaroo noa a‘e, i te vahi taata anei, e aore râ, i te vahi mo‘emo‘e anei, i te hoê parau no roto mai i te mau tavini o te Atua, tei maitihia no te ti‘a ei faatere i teie ohipa, taaê atu i te mau parau no te faateitei e no te haamaitai i te mau taata o te Atua.10
Ua oaoa roa vau, na roto i to‘u ti‘araa ei hoê o te mau Aposetolo na te Fatu o Iesu Mesia ra, i te iteraa ma te feaa ore e, ua pûpû hope roa o John Taylor, Wilford Woodruff, Lorenzo Snow, e o Joseph F. Smith i to ratou aau no te rave i te ohipa no te haereraa i mua o te Feia Mo‘a i te mau Mahana Hopea nei, no te parareraa o te Evanelia i teie fenua e i te fenua êê, e ia ite atoa e, te hinaaro hopea o to ratou oraraa, o te faahaereraa ïa i te Evanelia no te ora i mua, e te faatupuraa i te faaoraraa o te Feia Mo‘a i te mau Mahana Hopea nei. Te mauruuru nei au ia ite papu e…ua faatumuhia te aau o teie feia faatere i ni‘a i te parau no te ora maitai e te haereraa i mua o te mau taata o te Atua, e aita ho‘i ratou e taotia i to ratou puai no te imi i te maitai o te taata, e to ratou mau mana‘o, ta ratou mau pure e to ratou mau hinaaro i te mau mahana atoa, no te haereraa ïa i mua o te taata. Ua ite au e, te feia tei turu i teie mau taata ma te faaroo, na roto i ta ratou mau pure, e na roto i ta ratou mau ohipa maitai, ua haamaitaihia ïa ratou e te Atua, eiaha na roto noa i te tupuraa to ratou faaroo e to ratou here i te Atua i te rahi, e te iteraa i te hanahana o te ohipa o te Evanelia ta tatou e rave nei, ua haamaitaihia râ ratou i te pae no te maa, i roto i te parau no te fare toa, ua haamaitaihia to ratou fenua, e ua roaa ia ratou te paari i roto i to ratou mau utuafare, no te haapii ia ratou ia paari ma te a‘o a te Fatu ra.”11
Ia ti‘a vau i mua i te Feia Mo‘a i te mau Mahana Hopea nei, aita to‘u e mana‘o ê atu i roto i to‘u aau maori râ, te parauraa i te parau ei maitai no ratou, ei haamaitairaa ia ratou; e te tano maitai no te faaitoito ia ratou, e no te haamau i roto i to ratou aau i te hoê hinaaro e te mana‘o papu ia riro mai ei feia hau atu i te faaroo, i te itoito, i te puai i roto i te raveraa i te mau ohipa e tuuhia mai i ni‘a ia ratou i roto i to ratou oraraa a muri a‘e, hau atu i to ratou huru i mutaa ihora.12
E haamaitaihia tatou na roto i to tatou faaturaraa e to tatou apeeraa i te feia e faatere ia tatou.
A pure no te feia faatere no te Ekalesia, e a turu ia ratou i roto i te mau ohipa atoa ta ratou e rave.13
Ua ite au na roto ia‘u iho e, i roto i te mau fare o te Feia Mo‘a i te mau Mahana Hopea nei, mai te anotau o te Peresideni Brigham Young, John Taylor, Wilford Woodruff, Lorenzo Snow e o Joseph F. Smith, e tae roa mai i teie nei mahana, ua faataehia i te Atua ra, te mau pure tuutuu ore i tera mahana e tera mahana, no te ani i te faaururaa a te Fatu ia faatae mai i ni‘a i te feia tei ti-‘a ei peresideniraa no teie Ekalesia, oia te mau aposetolo e te tahi atu mau huimana faatere; ia ti‘a ia ratou paatoa ia faauruhia e te Atua no te rave i te mau mea te riro ei maitai no Ta’na mau tamarii e no te parareraa o te Evanelia a Iesu Mesia i te ao atoa nei. Ua ite au, i muri a‘e e rave rahi matahiti te taviniraa e, te feia e ti-‘a ei aposetolo na te Fatu o Iesu Mesia, i to tatou nei anotau, ua noaa ïa ia ratou te varua o te Atua ora.14
Te faaroo, e horo‘a ïa no ô mai i te Atua ra, e ia roaa te faaroo i te taata no te haapa‘o i te Evanelia, e no te faaroo i te a‘o a te feia e faatere nei i roto i te mau paroita e te mau tĭtĭ, e a te mau Huimana Faatere Rahi o te Ekalesia, ua iteahia ia‘u e, ua haamaitai rahi mai te Fatu ia ratou, e e rave rahi o ratou tei matara i rapae i te mau fifi rarahi no te pae moni e no te tahi atu huru fifi, na roto i te hoê raveraa temeio faahiahia.15
E mata na tatou i te faaineine ia tatou e i te faaite i to tatou hinaaro ia apee i to tatou mau ti‘a faatere, e ia paturu ia ratou…E haamaitai-mau-hia outou ia pee ana‘e outou i te parau e te a‘o a te feia ta te Atua i maiti no te faatere i te Ekalesia. Na roto i te faaturaraa i te taata ta te Atua i maiti, e faatura e e haamaitai atoa te Atua ia outou; e ia haapa‘o outou i ta outou hopoia, e tupu outou i te rahi i roto i te maramarama e i te faaururaa o te Varua o te Atua. E ia tupu ho‘i tatou tataitahi i te rahi, e tupu atoa ïa te Ekalesia i te rahi… Na te Atua teie ohipa. E peropheta o Iosepha Semita na te Atua; E haamana‘o tatou i te reira e tia‘i. E mata na râ tatou “i te imi i te basileia o te Atua, e te parau-tia Na’na”, e amuiatoa- hia mai te mau mea atoa i reira [ a hi‘o Mataio 6:33]. Te rave nei tatou i te ohipa no te ora mure ore. Eiaha e vaiiho i te paari, te tao‘a e aore râ, te ite o te ao nei, e aore râ, te tahi atu mau mea, e haamatapo ia tatou i te iteraa e, na te Atua teie ohipa, e tei te fenua nei te auvaha parau o te Atua; ia parau oia ra, ia ineine ïa tatou, e ia faaite i te hinaaro, na roto i to tatou taime, to tatou taleni e te mau mea atoa tei horo‘ahia ia tatou, ia rave i te ohipa no te faatupu i te hinaaro o te Atua. Te parau atu nei au ia outou e, e faaite te Atua e, ua ti‘a mau To’na auvaha parau.16
Te ti‘aturi nei au e te pure nei au ia haapa‘o te feia mo‘a i te Evanelia a Iesu Mesia. Te ti‘aturi nei au e, e faaroo ratou i te mau haapiiraa a te mau peresideni tĭtĭ e te mau episekopo no te mau paroita. Te hinaaro nei au e parau e, te hinaaro nei matou ia haapii te mau peresideni tĭtĭ atoa e te mau episekopo atoa i te parau mau i te mau taata. Te hinaaro nei matou ia parau ratou i te mau taata e, te titauhia nei ratou ia haapa‘o i te Parau Paari, ia aufau ti‘a i ta ratou tuhaa ahuru, ia haamana‘o i te mau fafauraa tei fafauhia e ratou i roto i te hiero o te Atua, …e te hinaaro nei matou ia rave ratou i ta ratou ohipa ei feia mo‘a, e ia poro i te Evanelia na roto i te oraraa i te reira.17
E rave rahi taata, mai te mea e, e poro tamau noa te mau tavini o te Fatu ia ratou i tera matahiti e tera matahiti, aita e faufaahia taua mau parau ra i ni‘a ia ratou. Ia faaroo râ ratou i te parau a te tahi mau taata no ni‘a i te paari o te ao nei, e mea oioi roa ïa ratou i te pee i te reira. Te haamana‘o nei au …i to‘u horo‘araa i te hoê a‘oraa no ni‘a i te Parau Paari. I muri a‘e, faaitehia mai ia‘u e, ua ma‘ihia te hoê tuahine maitai, tei faaroo i ta‘u a‘oraa, e ua niuniu oia i te hoê taote no Roto Miti ia haere mai na ni‘a i te hoê pereoo auahi taaê e hi‘o ia’na, e ua aufau oia e rave rahi hanere dollars no te faaroo i teie taote ia parau mai ia’na e, ua rahi roa ta’na ti e inu nei, e e pohe oia mai te mea e, aita oia e faaea i te inu i te reira. Ua haapa‘o oia i ta’na parau e ua maitai oia. Ahiri oia i faaroo noa i ta‘u parau, e ere i te mea tamoni, ua apî ïa oia e rave rahi hanere dollars, e ua tuati maitai ïa oia i ni‘a i te mau haapiiraa a te Fatu, mai tei faaitehia i roto i te Parau Paari.18
Te himene tamau nei tatou e, “Mauruuru matou e te Atua, no ta oe na Peropheta, ia arata‘i noa mai ia matou, i teie nei tau hopea.” [Te mau himene no 10]
E rave rahi taata o te apiti nei i te tahi atu mau parau i te reira himene i te na oraa e: “mai te mea e, e arata‘i oia ia matou i te vahi ta matou e hinaaro nei e haere, e ua tuea to’na mana‘o i ni-‘a i to matou mau hinaaro e to matou mau mana‘o.”
Mai te tau o Iosepha Semita e tae roa mai i teie nei mahana, ua arata‘i tamau noa te mau peropheta o te Atua ia tatou, e ua arata-‘i maitai ratou ia tatou, i te taime ua haapa‘o tatou i taua arata‘iraa ra. Te mau hape tei ravehia, no to tatou ïa oreraa e faaroo i te peropheta tei ia’na te ti‘araa no te arata‘i i te mau taata o te Atua…
Ua ite au e, te haerea papu roa a‘e no te Feia Mo‘a i te mau Mahana Hopea nei, e ere ïa i te himene-noa-raa e, “Mauruuru matou e te Atua, no ta oe na Peropheta, ia arata‘i noa mai ia matou, i teie nei tau hopea”, ia ineine râ e ia faaite i te hinaaro ia arata‘ihia.19
Te mau mana‘o tauturu no te haapiiraa e te aparauraa
-
Eaha te auraa no te parau ra, e paturu e e apee i te feia tei piihia no te faatere ia tatou?
-
Eaha te ti‘a i te mau metua ia rave no te haapii i ta ratou mau tamarii ia paturu i te feia faatere no te Ekalesia?
-
Eaha te mau haamaitairaa tei noaa ia outou e te mau melo no to outou utuafare na roto i to outou haapa‘oraa i te a‘oraa a te feia faatere o te Ekalesia? E mea nahea to te reira iteraa faarahiraa i to outou faaroo e to outou iteraa papu?
-
Eaha te a‘o tei faariihia e tatou no roto mai i te peropheta ora, aita i maoro a‘e nei? Eaha te tahi mau ohipa papu te ti‘a ia outou ia rave no te haapa‘o i te mau haapiiraa a te peropheta?
Hoho‘a tei patahia i te matahiti 1925. Te ti‘a ra, mai te aui haere atu i te atau: David O. McKay, Rudger Clawson, e o Orson F. Whitney no te Pŭpŭ Tino Ahuru Ma Piti; Anthony W. Ivins, Tauturu matamua i roto i te Peresideniraa Matamua; Richard R. Lyman no te Pŭpŭ Tino Ahuru Ma Piti; Heber J. Grant, Peresideni no te Ekalesia; Reed Smoot no te Pŭpŭ Tino Ahuru Ma Piti; Charles W. Nibley, Tauturu piti i roto i te Peresideniraa Matamua; Sylvester Q. Cannon, Episekopo faatere rahi; George Albert Smith e o Joseph Fielding Smith no te Pŭpŭ Tino Ahuru Ma Piti. Te tuturi ra, mai te aui haere i te atau: Hyrum G. Smith, Patereareha no te Ekalesia ; Melvin J. Ballard, Stephen L Richards, John A. Widtsoe, e o George F. Richards no te Pŭpŭ Tino Ahuru Ma Piti. Aita e hohoa: James E. Talmage no te Pŭpŭ Tino Ahuru Ma Piti.
Te Peresideniraa Matamua i te matahiti 1936. Mai te aui haere atu i te atau, Peresideni J. Reuben Clark Jr., Tauturu Hoê; Peresideni Heber J. Grant; e Peresideni David O. McKay, Tauturu Piti.