Pene 24
Iesu Mesia, te Tamaiti a te Atua Ora
E tamaiti mau o Iesu Mesia na te Atua, e Faaora no te taata nei, e e upoo faatere no Te Ekalesia a Iesu Mesia i te Feia Mo‘a i te mau Mahana Hopea nei.
No roto mai i te oraraa o Heber J. Grant
Ua parau te Peresideni Heber J. Grant e, “Aita’tu e mea here-roa-hia a‘e e te aau o te taata nei maori râ te iteraa papu no ni‘a ia Iesu Mesia ra.”1 Ua tupu te peapea rahi i roto i te Peresideni Grant no te feia aore o ratou e iteraa papu no ni‘a i te Faaora. Ua parau oia e, “Te hiaai rahi o te ao nei i teie mahana, hau atu i te mau mea atoa, o te faaroo papu ïa i te Atua, to tatou Metua, e ia Iesu Mesia, Ta’na Tamaiti, ei Faaora no to te ao nei.”2 Ua ite oia i taua hiaai rahi ra a ratere haere ai oia na te ao nei no te poro i te Evanelia e ua faaroo atoa i te mau haapiiraa hape no ni‘a i te oraraa e te ohipa a Iesu Mesia. Ua oto roa oia no te mea ta’na e parau nei e, “te ti‘aturi ore i te Atua, e i te huru atua o Iesu Mesia.” Teie te hoê hi‘oraa, i te hoê taime, ua faaite mai oia i te parau no te hoê papa‘iraa na te hoê taata, i roto i te ve‘a, o te titau ra “ia faaru‘e te taata i ‘te parau maamaa‘ no ni‘a ia Iesu Mesia ei Atua i ni‘a i te fenua nei e ei Faaora no to te ao nei.” Mea oioi roa te Peresideni Grant i te pato‘i i teie mana‘o e ia faaite i te iteraa papu no te paruru i te parau mau. Ua parau oia e:
“I te mau taime atoa a tai‘o ai au i taua parau ra—e rave rahi ho-‘i te vahi to‘u iteraa i taua parau ra—E imi au i te rave‘a no te faaite i te taata i te mau vahi ta‘u e poro ra, i te ti‘araa o te Feia Mo‘a i te mau Mahana Hope‘a nei no ni‘a i te Evanelia ta tatou e ti‘aturi nei.
“Te rahiraa o te taata e tae mai i roto i taua mau putuputuraa ra, e ere ïa i te melo no te Ekalesia, e i reira ho‘i au e faaite ai e, e mea ti‘a i te Feia Mo‘a atoa i te mau Mahana Hope‘a nei ia farii i te parau haapiiraa e, ua fâ mai te Atua iho i te tamaiti ra o Iotepha Semita, e na te Atua iho i faaite mai ia Iesu Mesia i taua tamaiti ra ei Tamaiti here Na’na.”3
Na te mau parau atoa a te Peresideni Grant no ni‘a i te Faaora e faaite mai ia tatou i to’na here e to’na oaoa i te Fatu. Te parau ra oia e, “eita ta tatou e nehenehe e tai‘o e aore râ, e faaroo i te parau no ni‘a i te mau ohipa tei ravehia e to tatou Fatu e te Faaora o Iesu Mesia, ma te ore tatou e oaoa i te reira, noa’tu e, e ohipa taahoa roa ia na ni‘a iho noa i te tai‘o e aore râ i te faaroo i te parau no ni‘a i te oraraa e te aamu o te hoê taata, noa’tu te au o te reira mau parau. E aamu tahito roa te aamu o Iesu Mesia, tera râ, mai te huru ra e, te vai apî noa nei â te reira. Pinepine noa’tu to‘u tai‘oraa i te mau parau no ni‘a i To’na oraraa e Ta’na mau ohipa, rahi noa‘toa’tu te poupou, te hau, te oaoa, e te au maite i roto i to‘u varua. E oaoa apî noa te tupu mai i roto ia‘u ia hi‘o ana‘e au i Ta’na mau parau e Ta’na faanahonahoraa no te ora e te faaoraraa Ta’na i haapii mai i te taata nei a ora ai Oia i ni‘a i te tino o te fenua nei.”4
Te huru mau o te Peresideni Grant o to’na ïa iteraa papu no ni‘a i te Faaora e no ni‘a i te Evanelia tei faaho‘i-faahou-hia mai. O Elder John A. Widtsoe tei faatoro‘ahia ei Aposetolo na te Peresideni Grant, tei papa‘i e: “Te feia tei roaa ia ratou te faufaa, o te feia ïa e tapea papu i te mau parau niu e te mau parau arata‘i. O te huru mau ïa tei tupu i roto i te oraraa o te Peresideni Grant. Na te faaroo i te Atua e i ta’na Tamaiti, o Iesu Mesia, e i te Evanelia i faaho‘i-faahou-hia mai, i arata‘i ia’na mai to’na tamariiriiraa mai. Eita roa’tu te taata e maramarama i te parau no to’na toro‘a ohipa mai te mea e, aita ratou e pee i te mana arata‘i o To’na faaroo … Ua haaputapu to’na iteraa papu no te huru Atuaraa o Iesu Mesia e no te Evanelia i faaho‘ihia mai i te aau.”5
Te mau haapiiraa a Heber J. Grant
E Tamaiti mau o Iesu Mesia na te Atua.
Te ti‘aturi papu nei tatou e, e Tamaiti mau o Iesu Mesia na te Atua, te fanau tahi a te Atua, te matamehai i te varua ra e te fanau tahi i te tino nei; e Tamaiti na te Atua mai ia outou e o vau atoa nei e mau tamarii na to tatou metua.6
Te oaoa nei au i te mea e, ua haamauhia te Ekalesia a Iesu Mesia i ni‘a i te orama rahi matamua tei fariihia e te tamaiti ra o Iotepha Semita hau atu i te hanere matahiti i teie nei. Te parau ra oia e, ua ite oia e piti na Taata no te Ra‘i mai, to raua hanahana e te teitei, eita ïa e ti‘a i te hoê taata ia faataa, e i parau mai ho‘i te hoê o raua ma te faatoro atu i ni‘a i te tahi i te na ôraa e: “O Ta‘u Tamaiti here Teie, a faaroo Ia’na.” [Hi‘o Iotepha Semita— Aamu 1:17.] Eita te feaaa e nehenehe e tupu i roto i te aau o te hoê Feia Mo‘a i te mau Mahana Hope‘a nei no ni‘a i te riroraa o Iesu Mesia ei Tamaiti na te Atua ora, no te mea na te Atua iho i faaite Ia’na ia Iotepha Semita.7
“A hi‘o mai na i taua taaa nei!” te parau ïa a Ponotio Pilato, te tavana Roma i Iudea, i to Iesu ti‘araa mai, ma te hei raau taratara i te heiraa e te ahu uteute i te ahuraa, i mua i te feia iino tei pii i te na ôraa e, “E faasatauro ia’na, e faasatauro atu!” [Ioane 19:5–6.]
I roto i to ratou pouri e te ti‘aturiraa hape e te pohehae, ua faariro te naho‘a taata i te taata tei faahapahia, mai te hoê taata rave parau ino, e taata ofati i te mau ture matarohia, e taata faaino, ta ratou i faasatauro ma te oaoa rahi e te ti‘a ore. Te tahi noa pŭpŭ iti taata, tane e te vahine, tei hi‘o atu Ia’na i roto i To’na ra huru mau—te Tamaiti a te Atua, te Faaora o te taata nei!
Ahuru e ma iva tenetere te faahanahana-raa-hia te oro‘a fanauraa o te Mesia na te mau nunaa taata ma te parau e, e Keretetiano ratou. I te mau matahiti atoa, te amuitahi nei te oto o te mau oe, te ta‘i navnave o te pehe, e te mau reo faaara no te faaite i te parau poro‘i a te melahi “Ei hau to teie nei ao, e ia ite auhia mai te taata nei.” [Luka 2:14.]
Tera râ, i te taime no te tamataraa rahi ra, e i te mau tau atoa, ua rau te mana‘o o te taata no ni‘a Ia’na. Te tahi pae, te feia tei pato‘i Ia’na ma te riri u‘ana, mai te riri o te naho‘a rahi ra, ua faariro ratou Ia’na e Ta’na ra mau pipi “ei feia faatupu i te morare keretetiano tei faaiti e tei faaino i te puai o te fenua Europa no teie tau.” Area te tahi pae ra, ma te mana‘o maramarama, tei roaa ia ratou na roto i to ratou iteraa, ua faariro ïa ratou Ia’na ei taata tei omua i te hoê faanahoraa “tei faaruperupe i te parau no te ohipa, no te parau ti‘a, no te parau mau, te mâ, e te maitai; tei paturu i te ture, tei haafaufaa i te parau no te ti‘amâraa, e mea faufaa roa te reira, e o te tahoê i te taata i roto i te hoê autaea‘eraa rahi.”
E rave rahi o tei faariro Ia’na “ei taata maitai roa ra—te taata mata‘u ore”, aita râ ratou e farii i To’na huru Atua.
E rave rahi milioni te farii nei Ia’na mai te hoê Orometua rahi, tera râ, eita ta’na mau haapiiraa e tano i ni‘a i te huru o teie tau. Te tahi rii noa—e mea iti roa!—o te mau taata o te fenua nei, o te farii nei Ia’na i roto i To’na ra huru mau—“Te Fanau Tahi ra no te Metua; tei haere mai i te ao nei, oia o Iesu, ia faasataurohia no [to] te ao nei, e ia [amo] i te hara [a to] te ao nei, e ia haamo‘a i te ao nei, e ia tamâ i te reira i te mau ohipa ti‘a ore atoa ra.” [A hi‘o PH&PF 76:23, 41.]8
I haere mai Iesu Mesia i te fenua nei no te faaora i te taata nei.
I te mau melo atoa o te Ekalesia i te ao atoa nei, e i te feia atoa e here nei i te parau no te hau i te mau vahi atoa, te parau atu nei matou e, eiaha e hi‘o noa i teie Taata no Galilea mai te hoê orometua rahi, eiaha ho‘i mai te hoê noa taata arata‘i faahiahia, ei Arii râ no te Hau, te Tumu no te Faaoraraa, i ô nei e i teie nei, oia te Faaora mau o te Ao nei!9
Te hinaaro nei tatou ia haere te mau taata atoa i mua, e te pure nei tatou i te Atua ia haamaitai i te mau taata atoa e tautoo nei ia maitai te mau taata atoa na roto i te mau huru rave‘a atoa; e te parau nei tatou no te mau taata atoa e ti‘aturi nei e, o Iesu te Mesia e o te haapii nei i te reira: E te Atua, haamaitai mai i taua mau taata ra…O Iesu te Faaora o te ao nei, te Faaora o te taata, tei haere mai i te fenua nei no te hoê misioni hanahana ia pohe no te faaoraraa o te taata nei. E Tamaiti mau o Iesu Mesia na te Atua, te Fanau Tahi i te tino nei. Oia to tatou Faaora, e te haamori nei tatou Ia’na, e te arue nei tatou i te Atua no te mau taata atoa i ni‘a i te tino o te fenua nei e haamori nei i to tatou Fatu ei Faaora no to te ao nei.10
Mai te omuaraa mai o te aamu o te ao nei e tae mai i teie mahana, ua parau mai te Atua to tatou Metua, i tera taime e tera taime, na roto i to’na iho vaha e na roto i te vaha o to’na mau peropheta faauruhia e, e tono mai oia i ta’na Tamaiti fanau tahi i ni‘a i te fenua nei, e na roto ia’na, na roto i te ti‘a-faahou-raa, tei riro te Fatu ei matamua no te feia i mairi i te taoto, e faaorahia te taata nei i te faautu‘araa o te pohe, o te tae mai i ni‘a i te mau taata atoa, e na roto i te haapa‘o i te ture o te oraraa parau ti‘a, ta’na i haapii e i faaite roa mai i te hi‘oraa i roto i to’na oraraa, ia tamâhia ratou i ta ratou iho hara e ia riro ratou ei feia ai‘a no te Basileia o te Ra‘i ra.11
E ere te fanauraa o te Mesia to tatou Fatu i te hoê ohipa iti noa nei, e ohipa faufaa rahi râ i roto i te aamu o te ao nei ta te mau peropheta i ite atea mai, ta te mau rohi pehe ho‘i i pehepehe ra, ma te apiti mai ho‘i te mau melahi i to ratou reo i to te tahuti nei i te arueraa i te Atua. O te reira te mahana tei faataahia e tei tohuhia e to tatou Metua i te ao ra e faaite mai ai oia ia’na i ta’na ra mau tamarii i ni‘a i te fenua nei, na roto i ta’na Tamaiti Fanau Tahi…
Ua haere mai Oia ia ite te taata i te Atua mai ia’na ra te huru, inaha, ua faaite oia e, o tei hi‘o atu ia’na ra ua hi‘o ïa i te Metua, inaha, o te hoho‘a mau ïa no’na iho [hi‘o Ioane 14:7–9; Hebera 1:3].
I haere mai oia no te haapii ia tatou i te huru o te Atua, e na roto i te hi‘oraa e te haapiiraa, ua faaite mai oia i te e‘a e arata‘i atu ia tatou i mua i to’na ra aro mai te mea e, e pee tatou i te reira e‘a. I haere mai oia no te ofati i te tapea no te pohe tei ruuruu i te taata nei, e no te faatupu i te ti‘a-faahou-raa te tumu o hade i re ai e i fati ai te tara o te pohe.12
I roto i te ohipa hanahana o To’na oraraa, ua haapii te Fatu i te Evanelia, e i roto i to’na huru tahuti nei, ua faaite mai Oia ia tatou i te huru o te taata maitai roa ra.
Ua riro te Evanelia ei faanahoraa no te arata‘i i te taata i roto i to ratou mau amuiraa i te tahuti nei, e no te arata‘i ia ratou i te pae varua ia faaorahia e ia faateiteihia ho‘i ratou i roto i te ao a muri a‘e.13
I roto i te tau poto o ta’na ohipa, ua faati‘a oia i ta’na Ekalesia, ua maiti hoê ahuru e ma piti aposetolo, ma te arata‘ihia e Petero, e ua horo‘a’tu ia ratou ra i te mau taviri o te autahu‘araa, e ua haapapû maitai ia ratou i te faanahonahoraa o ta’na Ekalesia e i te mau parau haapiiraa o ta’na Evanelia, e ia haapa‘o ho‘i te taata i te reira, e faaorahia ïa ratou e e arata‘i-faahou-hia’tu i mua i te aro o te Atua.14
Fanauhia i roto i te fare vairaa animala, i roto i te hoê phatene, e faasataurohia ho‘i i ropu i na taata eiâ e piti, ua riro te oraraa o Iesu Mesia ei hoê o te mau hape rahi roa i roto i te hi‘oraa a te taata nei, tera râ, ua haere mai to tatou Fatu i te fenua nei eiaha no te haapa‘o i To’na iho hinaaro, i te hinaaro râ o To’na ra Metua, e ua rave oia i Ta’na ohipa e tae roa’tu i te hopea. Ua re te pohe, o hade e te menema ia’na, e ua roaa te terono ia’na i te rima atau o To’na ra Metua.15
“Te ti‘aturi nei matou e, na roto i te Taraehara a te Mesia e ti-‘a ai i te taata atoa ia faaorahia, na roto i te haapa‘oraa i te mau ture e te mau oro‘a o te Evanelia.” [Te mau Hiroa Faaroo 1:3.]
Te ti‘aturi nei tatou e, ua fanauhia te Mesia ei tamaiti Atua, i te hoê vahine, e ua ora Oia i te tahuti nei, e ua faasataurohia i ni‘a i te satauro, ua pohe, ua faaru‘e To’na varua i To’na tino, ua hunahia, e ua ti‘a faahou i te toru o te mahana, e ua apiti faahou To’na Varua e To’na tino…
Te faaite papu nei tatou e, na te mau taata [o Iotepha Semita raua o Sidney Rigdon] ta Iesu i haere atu e farerei no te faati‘a i Ta’na Ekalesia, i papa‘i i teie mau parau no ni‘a i taua orama hanahana ra:
“E a feruri noa‘i maua i teie mau mea nei, ua faatiai mai te Fatu i te na mata o to maua ite e ua araara a‘era, e ua anaana maira te hanahana o te Fatu e ati noa‘e ra.
“E ua ite mata’tura maua i te hanahana no te Tamaiti, i te pae atau no te Metua, e ua farii ho‘i i to’na îraa;
“E ua ite ho‘i i te mau melahi mo‘a, e o ratou ho‘i o tei haamo‘ahia i mua i to’na ra terono i te haamoriraa i te Atua, e te Arenio, o tei haamori ho‘i ia’na e a muri e a muri noa’tu.
“E i teie nei, i muri mai i te mau parau faaite e rave rahi o tei horo‘ahia no’na ra, o teie ho‘i te parau faaiteraa hopea roa ra, o ta maua e faaite atu nei no’na ra; Oia ho‘i te ora nei oia!
“No te mea ua ite mata’tura maua ia’na, i te pae atau ho‘i no te Atua; e ua faaroo maua i te reo i te faaiteraa mai e o oia ana‘e te Fanau Tahi ra no te Metua—
“Na’na, e na roto ia’na, e no’na ho‘i, te mau ao e hamanihia nei e i hamanihia na ho‘i, e te mau taata ho‘i no reira e mau tamaiti e e mau tamahine fanau ho‘i ratou no te Atua ra.” [PH&PF 76:19–24.]
…Te amui atoa’tu nei matou i to matou iteraa haehaa: te ora nei te Atua, o Iesu te Mesia, e taata ti‘a faahou oia, e mai te au i To’na ra hoho‘a, te mau tane atoa, te mau vahine atoa e te mau tamarii atoa tei ora na, e ti‘a mai ïa ratou na roto mai i te menema, ei taata ti‘a faahou, mai te Mesia i ti‘a faahou ra, te feia parau ti‘a i te oraraa oaoa hanahana e te haereraa mure ore i mua.16
Te oaoa nei au ia ite e, o Iesu te Faaora o te ao nei, to tatou taea‘e matahiapo, e na roto ana‘e i To’na i‘oa e To’na ana‘e i‘oa, i raro a‘e i teie nei ra‘i, e roaa ai ia tatou te faaoraraa, e ia ho‘i faahou e parahi i piha‘i iho i to tatou Metua i te Ao ra e i to tatou Faaora, e i te feia tei herehia e tatou tei reva a‘e nei.17
Na Roto i Ta’na Taraehara, ua Horo‘a mai te Faaora ia tatou nei i te hau, te tamahanahana e te oaoa.
Na roto i te haapaoraa i te Evanelia a te Mesia, e na roto atoa i te oaoa e roaa mai no te taviniraa Ia’na, i reira e tae mai ai te hau e ti‘a i te vai-maite-raa.
Ua parau atura Iesu i te taata e rave rahi ra:
“E haere mai outou ia‘u nei, e te feia atoa i haa rahi, e tei teiaha i te hopoi‘a, e na‘u outou e faaora.
“A rave mai i ta‘u zugo i ni‘a ia outou, e ia haapiihia outou e au, te màrû nei ho‘i au e te haehaa o te aau: e e noaa ho‘i te ora i to outou varua.
“Te màrû nei ho‘i ta‘u zugo e te mâmâ nei ta‘u hopoi‘a.” [Mataio 11:28–30.]
Ua parau atura Iesu i Ta’na mau Aposetolo i roto i te piha no te Oro‘a Pasa ra:
“E hau ta‘u e vaiiho ia outou nei, o to‘u nei hau ta‘u e ho atu no outou; e ere mai ta to te ao nei horo‘a ta‘u horo‘a ia outou. Eiaha e taiâ to outou aau, eiaha ho‘i e mata‘u.” [Ioane 14:27.]
Na To’na hau e haamâmâ i to tatou mamae, e faaora i to tatou aau oto, e iriti i te riri i roto ia tatou, e faatupu i roto ia tatou i te here i to tatou mau taata tupu e na te reira e faaî i to tatou varua i te màrû e te oaoa.
E tae Ta’na parau e te maitai o To’na taraehara i te mau hopea atoa o te fenua nei; e riro te reira ei haamaitairaa i te mau taata i te mau hopea moana ra. Te mau vahi atoa ta te taata e haere, e nehenehe ta ratou e paraparau Ia’na. I te vahi tei reira Oia ra, e iteatoa-hia ïa te Varua Mo‘a i reira, e te hotu no “te hinaaro, te oaoa, te hau, te faaoroma‘i, te màrû, te maitai, te faaroo.” [Galatia 5:22.]
Oia to tatou tamahanahana e to tatou tamarû, to tatou arata‘i e te faa‘o, to tatou faoraraa e te faateiteiraa, no te mea, “aita’tu ho‘i e i‘oa i faaitehia mai i te taata i raro a‘e i teie nei ra‘i, e ora‘i tatou nei.” [Te Ohipa 4:12.]
No roto mai te parau mau mure ore i To’na paari hanahana: “Eaha ta te taata faufaa i noaa, ia noaa ia’na te tao‘a atoa o teie nei ao, ia ere oia i te ora? Eaha ho‘i ta te taata e ore e horo‘a ei hoo i to’na iho ora? [Mataio 16:26.] ”E ere ho‘i te basileia o te Atua ra i te amu e te inu, o te parau ti‘a râ, e te hau, e te oaoaraa i te Varua Maitai ra“ te na reira Paulo [A hi‘o Roma 14:17.]
Na mua noa a‘e a pure ai Oia i te pure hanahana ra [hi‘o Ioane 17], ua parau atura Iesu i te mau aposetolo ma te haapii atu ia ratou: “I parau atu vau ia outou i teie nei mau parau, ia hauhia to outou ia‘u nei. E pohe to outou i teie nei ao. E faaitoito râ, ua riro te re o teie nei ao ia‘u.” [Ioane 16:33.]18
Te ora nei Iesu Mesia e te arata‘i nei Oia i Ta’na Ekalesia i teie mahana.
O Iesu Mesia te Tamaiti a te Atua ora… Te poro nei tatou i to te ao atoa nei e, ua ite tatou e, te ora nei Oia.19
Teie Ekalesia… o te hoê ïa ohipa umerehia e te maerehia. Aita e ohipa mai te reira te huru i te ao atoa nei, i te mea e, na Iesu Mesia, te Tamaiti a te Atua i faati‘a i te reira, e Oia te upoo faatere no te reira.20
O Iesu te Mesia, e o Oia te ofa‘i tihi no teie nei ohipa rahi—Na’na e arata‘i nei i te reira, e e tamau noa Oia i te arata‘i i te reira.21
Te faaite papu nei tatou e, ua fâ mai te Atua te Metua e Ta’na Tamaiti o Iesu Mesia, i to tatou nei anotau i te Peropheta Iotepha Semita ra no te faanaho faahou i Ta’na Ekalesia ia ore ho‘i ia haamou-faahou-hia, e ua faaho‘i mai te mau ve‘a no te ra‘i mai i To’na autahu‘araa e i te mana mo‘a o te reira.22
Aita vau i ite e nahea ia parau i to‘u oaoa rahi ia faateitei i to‘u reo no te faaiteraa i to‘u iteraa papu i te feia ta‘u i farerei e, ua ite au e, te ora nei te Atua, ua ite au e, o Iesu te Mesia, te Faaora no to te ao nei, te Faaora o te taata nei; ua ite au e, e peropheta o Iotepha Semita na te Atua ora mau, e ua ite papu vau e, e mauhaa maitihia o Brigham Young na te Atua ora, e ua ite atoa vau e, o John Taylor, o Wilford Woodruff, o Lorenzo Snow, e i teie mahana o Joseph F. Smith, e mau ti‘a ana‘e ratou no te Atua ora, e e auvaha parau no te Atua i ni‘a i te fenua nei. [Ua faaite te Peresideni Grant i teie iteraa papu i te 4 no Atopa 1918, mai te mea ra e, e hitu hepetoma hou a mono mai ai oia ia Joseph F. Smith ei Peresideni no te Ekalesia.]23
Te pii nei matou i te mau taata atoa o te ao nei ia haere mai i te Mesia ra, na roto ho‘i ia’na i roaa ai te faaoraraa i te feia e rave i ni‘a iho ia ratou i to’na ra i‘oa, e tei haapa‘o i te mau faaueraa ta’na i horo‘a mai ra. Te faaite nei matou i to matou iteraa e, ua faaho‘i hia mai te îraa no ta’na Evanelia, ua faati‘ahia ta’na Ekalesia, e e tamau noa te reira i te parare e tae roa’tu i te taime e upootia te hau i rotopu i te taata nei, e tae mai ho‘i to’na ra basileia e e haapa‘ohia ho‘i to’na hinaaro i te fenua nei mai tei te ra‘i atoa ra. E te Fatu e, haapeepee mai na te taeraa mai o taua mahana hanahana ra.24
Te mau mana‘o tauturu no te haapiiraa e te aparauraa
-
No te aha te faaroo i te Metua i te Ao ra e ia Iesu Mesia i riro ai “ei hiaai rahi no to te ao nei i teie mahana, hau atu i te mau mea atoa”? Eaha te mau mea o te ao nei o te faaino i te faaroo o te taata ia Iesu Mesia ei Tamaiti na te Atua? Eaha te ti‘a ia tatou ia rave no te faarahi i to tatou faaroo i te Faaora?
-
Eaha te mau taa‘eraa ta to outou iteraa papu no te Faaora i faatupu i roto i to outou oraraa i te mau mahana atoa? Ia ite outou e, ua roaa te re i te Faaora i ni‘a i te mau fifi atoa, nahea te reira i te horo‘a i te ti‘aturiraa i roto ia outou ia farerei ana‘e outou i te mau fifi?
-
Eaha te tumu i haere mai ai Iesu Mesia i te fenua nei? Nahea tatou i te tauturu maitai roa’tu i te Fatu i roto i Ta’na mau opuaraa?
-
Nahea te haereraa i mua o te Ekalesia i te faaite papu i te misioni tamau a Iesu Mesia? Ia ite outou e, te ti‘a nei te Mesia i te upoo o te Ekalesia, nahea te reira iteraa i te faarahi i to outou itoito i te raveraa i te ohipa no te basileia o te Atua?
-
Ia maramarama ana‘e tatou i te misioni a te Faaora, nahea te reira i te taurutu ia tatou i roto i ta tatou mau ohipa e rave i rotopu i te feia e ere i ta tatou faaroo?
“Ua haere mai to tatou Fatu i te fenua nei eiaha no te haapa‘o i To’na iho hinaaro, i te hinaaro râ o To’na ra Metua, e ua rave oia i Ta’na ohipa e tae roa’tu i te hopea. Ua re te pohe, o hade e te menema ia’na, e ua roaa te terono ia’na i te rima atau o To’na ra Metua.”