Pene 9
Te oaoa o te ohipa misionare
E hopoia rahi ta tatou i te pororaa i te Evanelia a Iesu Mesia. Ia ravehia teie ohipa, e roaa te oaoa e te hau ia tatou.
No roto mai i te oraraa o Heber J. Grant
Ua rave te Peresideni Heber J. Grant i te ohipa misionare i roto i to’na oraraa taatoa, na roto i te faaiteraa i te Evanelia i te mau melo o to’na fetii, i te mau hoa, e i te mau hoa ohipa. Ua rave oia i ta’na ohipa misionare rave tamau matamua i te matahiti 1901, a piihia ai oia ia faatere i te misioni matamua no Tapone.
Ua haamata te Peresideni Grant i to’na piiraa i te fenua Tapone na roto i te ti‘aturi papu e te oaoa rahi. Ua papa‘i oia e: “E faaroo papu to‘u e, o teie te misioni manuia roa a‘e i te mau misioni atoa o te Ekalesia. Te haamata marû noa nei, tera râ, e riro te ohipa ootiraa i te hoê ohipa rahi roa e o te fatupu i te maere i roto i to te ao nei i te mau matahiti i muri nei.”1
Ua haamo‘a te Peresideni Heber J. Grant, o’na e e toru misionare ê atu, i te fenua Tapone no te pororaa o te Evanelia, i te ava-‘e Atete matahiti 1901, e ua rave itoito i te ohipa “noa’tu te taere.” I te taime a tatarahia ai te Peresideni Grant i te ava‘e Setepa matahiti 1903, e piti ana‘e taata ta’na i bapetizo. I roto i te amuiraa rahi no te ava‘e Atopa matahiti 1903, ua faaite mai oia i teie mau parau i muri nei:
“Te tatarahapa nei au i te mea e, aita ta‘u e nehenehe e parau atu ia outou e, e ohipa faahiahia ta matou i rave i te fenua Tapone. Eita vau e haavare ia outou, inaha, e ohipa iti ha‘iha‘i roa tei oti ia‘u i roto i to‘u ti‘araa peresideni no taua misioni ra; e mea iti roa‘toa te ohipa i ravehia—i roto i te parau no te faafariuraa mai i te taata—e te mau Orometua tei tonohia i reira no te rave i te ohipa, e aore râ, te mau tuahine i pihai iho ia‘u. I taua taime atoa ra, ua ite papu vau i roto i to‘u aau e, e tupu te ohipa rahi e te faufaa i roto i taua fenua ra. E nunaa maitai roa taua mau taata ra.”2
E piti ahutu ma hoê matahiti i muri mai, ua faaoti te Peresideni Grant e to’na na tauturu i roto i te Peresideniraa Matamua ia opani i taua misioni ra, te tumu rahi, no te “iti ïa o te manuia o te ohipa misionare” i reira.3 E ua iriti-faahou-hia te reira misioni i te matahiti 1948.
I te 18 no Me 1996, e 48 matahiti i muri a‘e i te iriti-faahou-raahia te misioni, ua haere atu te Peresideni Gordon B. Hinckley i te fenua Tapone, e ua paraparau oia i roto i te hoê pureraa pae auahi, i mua i te hoê nahoa rahi, mea tiatia noa te tahi pae. I taua taime ra, e hiero to Tapone, e ua rahi te melo o te Ekalesia e ua hau atu i te 100, 000 i roto e 25 tĭtĭ e e 9 misioni. Ua faahaamana‘o faahou te Peresideni Hinckley i te haamataraa te ohipa i Tapone e ua parau oia e: “Ahiri e tei ô nei te Peresideni Grant i teie nei, e oto oia i te mauruuru, e o te reira ïa te tupu nei i ni‘a ia‘u i teie taime ia hi‘o atu vau i to outou mau mata…Te ite nei au i te hoê puai aitâ i ferurihia a‘e nei e au i roto i teie fenua.”4
Te mau haapiiraa a Heber J. Grant
E hopoia e e haamaitairaa ho‘i na tatou te faaiteraa i te Evanelia.
Te hinaaro nei au e haapapu maitai e, e ohipa faufaa rahi ta tatou e rave, oia ho‘i, te piiraa tatou i to te ao nei ia tatarahapa i ta ratou hara, e ia haere mai i te Atua ra. E e hopoia na tatou na ni-‘a a‘e i te mau hopoia atoa, ia haere e poro i te Evanelia a te Fatu o Iesu Mesia, te faaho‘i-faahou-raa- hia mai i te fenua nei te faanahonahoraa no te ora e no te faaoraraa. Te hinaarohia nei i te ao taatoa nei ia rahi atu te mau misionare. No reira, e mea ti‘a i te Feia Mo‘a i te mau Mahana Hopea nei ia faanahonaho maitai i ta ratou mau ohipa e ta ratou mau faufaa, ia rahi atu te taata e ineine e e hinaaro, te feia paari ihoa râ, e te aravihi, e to ratou iteraa papu e te ite i te hanahana o teie ohipa, ia haere i te misioni…Ua roaa mau ia tatou te poe tao‘a rahi. Ua roaa ia tatou te mea tei hau i te faufaa i te mau tao‘a atoa e te mau ite aivanaa i roaa i to te ao nei. Ua roaa ia tatou te faanahonahoraa no te ora e no te faaoraraa. Te ture matamua tei hau i te rahi o te here ïa i te Fatu to tatou Atua ma to tatou aau atoa, to tatou varua atoa, e to tatou mana‘o e to tatou puai atoa; e mai te reira atoa te piti, ia aroha i to tatou taata tupu mai te aroha ia tatou iho [a hi‘o Mataio 22:37–39]. E te rave‘a maitai roa a‘e i te ao atoa nei no te faaite i to tatou here i to tatou taata tupu, o te haereraa ïa e poro i te Evanelia a te Fatu o Iesu Mesia.5
Te faaoraraa i te mau varua, tae noa’tu i to tatou iho varua, o te ohipa rahi ïa tei hau i te faufaa i te mau ohipa atoa, e o te horo‘a mai ia tatou nei i te mau haamaitairaa a to tatou Metua e te here o to tatou Fatu o Iesu Mesia.6
Teie te misioni tei faauehia mai ia tatou, ia faaara i te mau nunaa i te haavaraa e tae mai, ia poro i te Evanelia a te Taraehara, …e ia titau manihini i te mau taata atoa ia haere mai i te Mesia ra e ia farii i te haamaitairaa no To’na taraehara hanahana. Te mea ta tatou e parau nei e, “Te Momoni” tei roto te reira i te ao nei ei maitai no to te ao nei. Aita e tumu ê atu ta’na faanahoraa ohipa misionare maori râ, no te haamaitai ïa. Aita te reira e aro nei i te mau faaroo ê atu e vai nei i teie mahana. Te ti-‘a nei râ te reira no te faatupu i te hau, te hau o te Atua “o tei hau ê atu i te ite taata nei.” [A hi‘o Philipi 4:7] Ua ineine no te rave i te maitai na roto i te mau rave‘a atoa. Te taparu nei te reira i te taata ia mau faahou i te faaroo “i tuuhia mai i te feia mo‘a i mutaa ihora”, [a hi‘o Iuda 1:3] ma te ti‘aturi e, e faaora te reira i te taata nei i te hara a to te ao nei, e faateitei ho‘i i te taata i mua i te aro o te Atua, te Metua, e ia Iesu Mesia, te Tamaiti, “oia te Maramarama e te Ora no to te Ao nei.” [PH&PF 10:70.]7
Ua ite tatou e, ta tatou ohipa matamua e te faufaa rahi, o te here ïa i te Fatu to tatou Atua ma to tatou aau atoa, to tatou varua atoa, to tatou mana‘o atoa e to tatou puai atoa; e mai te reira atoa te piti, ia aroha i to tatou taata tupu. Aita te taata i te ao atoa nei, ia faaauhia i ni‘a i to ratou rahiraa, e faaite papu nei i te here i to ratou mau taata tupu e i te hinaaro i te maitai no ratou, mai ta te Feia Mo‘a i te mau Mahana Hopea nei te huru. Te poro nei ta tatou ohipa misionare i to te ao atoa nei i to tatou hinaaro ia faatusia i ta tatou faufaa moni e ia rave i te ohipa, ma te titau ore i te maitai tahuti nei, no te faaoraraa i te varua o te mau tamarii a to tatou Metua i te ao ra.8
E mea ti‘a i te feia apî tamaroa tataitahi…ia faatupu i te mana‘o puai ia faaineine ia’na no te rave i te ohipa ma to’na aravihi taatoa, ia ti‘a ia’na ia faaoti i te mau mea atoa e ti‘a ia’na ia rave no te haamau-papu-raa i te parau mau i ni‘a i te fenua nei.9
Te parau nei te taata e: “Aita matou e taa nei e nohea mai te puai o te ‘Momoni, ‘ aita matou e taa nei e, no te aha [e rave rahi hanere] tamaroa e te tamahine, e haere ai na te ao nei, no te hoê pu‘e tau o to ratou oraraa, na ratou iho e amo te haamau‘araa e aore râ, na to ratou utuafare, ma te horo‘a tamoni ore e te hoo ore i to ratou taime no te poro i te Evanelia, ma te faaerehia ho‘i ratou i ta ratou moni ohipa, ma te aufau i to ratou mau tere, no te poro i to outou faaroo.” E ite te Feia Mo‘a atoa no te mau Mahana Hopea nei i te reira. Te ite nei ratou i te reira no te mea, tera mau tamaroa e tera mau tamahine e haere nei e poro i te Evanelia, te haapa‘o atoa ra ratou i te reira. Te haapa‘o mau nei ratou i te mau titauraa tei faaitehia mai e te Faaora “Aroha i te Fatu to tatou Atua ma to tatou aau atoa, to tatou mana‘o atoa, to tatou varua atoa e to tatou puai atoa”, e te piti o te ture rahi, “ia here i to tatou taata tupu mai to tatou here ia tatou iho.”10
Eiaha ia mo‘ehia ia tatou e, ua parau mai te Fatu ia tatou e, e hopoia na tatou te faaararaa i to tatou taata tupu e te pororaa i teie nei Evanelia—tei ni‘a te reira hopoia ia tatou paatoa—ia riro tatou ei mau misionare e tia‘i…
Ia ite maitai tatou e, na tatou tataitahi teie ohipa, e no reira, e imi tatou i te mau rave‘a atoa no te faahaere i te reira ohipa i mua.11
E faatupu te ohipa misionare i te oaoa rahi i roto i te aau o te taata.
Te ti‘aturi nei au e, te Feia Mo‘a atoa i te mau Mahana Hopea nei tei farii i te hoê iteraa papu no ni‘a i te hanahana o te ohipa ta tatou e rave nei, ua farii atoa ïa i te iteraa o Alama—oia ho‘i, te hinaaro ia faaroo to te ao atoa i te iteraa papu no ni‘a i te Evanelia a te Fatu o Iesu Mesia [a hi‘o Alama 29:1–9]. Ia roaa te iteraa papu o te tane e te vahine no ni‘a i te hanahana o te misioni a te Peropheta Iosepha Semita, e tupu te hinaaro rahi i roto ia ratou ia farii atoa to te ao atoa nei i te reira iteraa e te faaroo. E hinaaro ratou ia tae te Evanelia i te mau varua parau ti‘a atoa. E aita e ohipa ê atu i te ao atoa nei o te faatupu i roto i te aau o te taata, ia au i to‘u iho iteraa, i te oaoa rahi, te hau e te maitai, maori râ, te pororaa i te Evanelia a te Fatu o Iesu Mesia.12
Aita e pŭpŭ taata oaoa, e te poupou e te hau e vai nei i roto i te hoê tuhaa o te ohipa a te Atua i ni‘a i te fenua nei i teie anotau, mai te mau taata e rave nei i te ohipa misionare. Te taviniraa, o te taviri ïa no te oaoa. Ia rave te hoê taata i te ohipa no te maitai o te taata nei, ia rave te hoê taata i te ohipa ma te tamoni ore e te hoo ore, ma te tiai ore i te haamaitairaa tahuti nei, i reira te oaoa mau e te rahi e tae mai ai i roto i te aau o te taata nei.13
Mai te mea e, e titauhia, e mea ti‘a i te mau tavini atoa o te Atua tei roaa te ite i te Evanelia, ia horo‘a i to ratou ora no teie ohipa, inaha, te ohipa mau teie a te Fatu, te faanahonahoraa no te ora e te faaoraraa, te Evanelia a to tatou Fatu e te Faaora, o Iesu Mesia. Ia ite papu ana‘e tatou e, ua roaa mau ia tatou te Poe Tao‘a Rahi, e te Evanelia ta tatou e horo‘a i to te ao nei, o te ora mure ore ïa no te feia e farii e o te haapa‘o i te reira; ia ite ana‘e tatou i te reira, e ia faaea ana‘e tatou i te feruri noa i te heheuraa tei horo‘ahia i te Peropheta Iosepha Semita raua o Olive Tautere, i reira ho‘i to te Fatu parauraa e: “E mai te mea e hope to orua pue mahana i te pororaa i te parau tatarahapa i teie nei mau taata, e ia arata‘i mai orua, i te hoê noa a‘e varua taata ia‘u nei, aue ho‘i to orua oaoa rahi i pihai iho ia’na i roto i te basileia o to‘u Metua! E i teie nei, mai te mea ua rahi to orua oaoa i te varua taata hoê a‘e o tei arata‘ihia mai e orua ia‘u nei i roto i te basileia o to‘u Metua, eaha’tura â ïa te huru o to orua oaoa rahi ia rahi noa’tu â ta orua varua taata e arata‘i mai ia‘u nei” [PH&PF 18: 15–16]; ei reira ïa tatou e haamata ai i te ite e i te maramarama e i te ta‘araa i te aano o teie nei ohipa.14
Te oto nei au no te tane e aore râ, no te vahine tei ore â i ite i te oaoa hau e roaa i te misionre e poro i te Evanelia a Iesu Mesia, e o te arata‘i mai i te mau varua parau ti‘a i te parau mau, e o te faaroo i te faaiteraa o te aau mehara e te mauruuru no roto mai i te aau o te feia tei maramarama i te parau no te ora mure na roto i ta’na ohipa. Te oto atoa nei au no te feia tei ore â i ite i te oaoa hau e roaa mai na roto i te tororaa i to ratou rima no te tauturu i te feia nava‘i ore. Oia mau, te vai atu ra te haamaitairaa e roaa ia tatou na roto i te horo‘araa i te reira, eiaha râ na roto i te tapeanoa-raa, aita to‘u mana‘o e feaa nei no te reira. Te vai faahou atu ra te mau haamaitairaa e roaa ia tatou na roto i te haereraa e poro i te Evanelia a Iesu Mesia, e na roto i te raveraa i te ohipa no te faaoraraa o te varua taata nei, eiaha râ na roto noa i te iteraa i te parau mau o ta tatou haapa‘oraa, e a faaea noa ai i te fare no te rave i te mau ohipa matarohia o te oraraa, a haaputu noa ai i te mau tao‘a o teie nei ao o te pe i roto i te faaohiparaa. Hoê fifi rahi maori râ, te pinepineraa tatou i te ore e ite i te ohipa faufaa roa a‘e te ti‘a ia tatou ia rave, oia te ohipa au-roa-hia a‘e i mua i te aro o to tatou Metua i te Ao ra.15
Na roto ana‘e i te mana o te Varua e ti‘a ai ia tatou ia poro i te Evanelia e ia tauturu i te feia faafariu-api-hia mai ia faahotu i to ratou iteraa papu.
Te hinaaro nei au e faaite ia outou e, tera mau misionare taatoa tei haere e poro i te Evanelia… ua tuuhia i ni‘a i to ratou upoo te rima o te mau tavini mana o te Atua, e mau taata tei mau i to’na mana; e i te mau vahi atoa o te ao nei, i te mau fenua atoa e i te mau ahura‘i atoa, mai te mau fenua apatoerau e tae roa’tu i Afirita Apatoa, i te mau vahi atoa ta ratou i haere, ua pee-tamaumaite te Varua o te Atua ora ia ratou. I te mau fenua atoa e i te mau ahura‘i atoa, ua roaa i te tane e te vahine te iteraa papu no ni‘a i te Varua Mo‘a, e ua farii i te Evanelia.16
Ua tae au i Grantsville, te paroita rahi roa a‘e i roto i te tĭtĭ no Tooele no Ziona, e ua haafatata atu vau i te Fatu fatata mai te huru o Olive Tautere i te taime a parau atu ai oia i te Fatu e, “Te hinaaro nei au e iriti i te parau”, e pahono mai nei te Fatu e, e nehenehe ta’na e iriti i te parau. Tera râ, no te oreraa oia e manuia, i muri a‘e, ua parauhia maira ia’na e, aita oia i tuatapapa maite, e aita ho‘i i pure no ni‘a i te reira, e aita ho‘i i faaoti i ta’na tuhaa [a hi‘o PH&PF 9:7–8]…Ua ti‘a vau i ni‘a e ua paraparau vau e pae minuti te maoro, e ua rarihia vau i te hou, i to‘u mana‘oraa, mai te huru ra e, ua utuhihia vau i roto i te pape, e ua pau roa to‘u mau mana‘o. E mea ino roa ta‘u a‘oraa, mai te huru i ta te hoê taata tahuti nei…
I [muri a‘e] ua haere au e rave rahi maire i te atea i taua fare pureraa ra, i roto i te hoê faaapu, i rotopu i te mau ruru maa animala, e ia navai te atea i te fare pureraa, ia papu maitai ia‘u e, aita e taata e ite maira ia‘u, ua tuturi a‘era vau i raro i muri mai i taua mau ruru ra, e ua oto roa vau i te haama. Ua ani au i te Atua ia faaore mai i ta‘u hapa i te mea e, ua mo‘ehia ia‘u e, eita e ti‘a i te taata ia poro i te Evanelia a te Fatu o Iesu Mesia ma te mana, te puai, e te faaururaa maori râ, ia faarii ratou i te mana no ô mai i te Atua ra; e ua parau atu vau ia’na i reira, o vau te hoê tamaiti na‘ina‘i, mai te mea e, e faaore mai oia i to‘u aau teitei, mai te mea e, e faaore mai oia i to‘u feruriraa e, noa’tu e aita e Varua, e nehenehe te mau huru taata atoa e poro i te parau mau e ia ite i te mau aau e hinaaro e farii i te reira, e haamana‘o vau e tae roa’tu i to‘u poheraa e, nohea mai te faaururaa, a poro ai tatou i te Evanelia a te Fatu o Iesu Mesia, te faanahonahoraa no te ora e te faaoraraa tei faaite-faahou-hia mai i to te fenua nei.
Te oaoa nei au ia parau atu e, i roto i te roaraa e maha ahuru matahiti e tae roa mai i teie nei, aita vau i haama faahou mai tei haamahia e au i taua mahana ra; e no te aha? Mauruuru i te Fatu, no te mea, aita vau e ti‘a faahou nei i ni‘a i to‘u avae ma te feruri e, e nehenehe ta te hoê taata e haaputapu i te aau o te feia faaroo…tera râ, ia roaa te Varua o te Atua ora i taua taata ra e tia‘i, e ia nehenehe ia’na ia faaite i te iteraa papu e, teie te parau mau ta outou e o vau nei e haapa‘o nei.17
“Te ti‘aturi nei tatou i te horo‘a no te parau i te parau ê ê”, e i te tatararaa i te reira [a hi‘o Hiroa Faaroo 1:7]. O Karl G. Maeser—te hoê Feia Mo‘a haapa‘o maitai i te mau Mahana Hopea nei— ua faati‘a mai oia iho ia‘u i teie ohipa tei tupu… Ua parau mai oia e: “E te taea‘e Grant, i te pô a bapetizohia ai au, ua hi‘o vau i ni‘a i te ra-‘i e ua parau vau: ‘E te Atua e, ua itehia ia‘u te Evanelia a to Tamaiti o Iesu Mesia, e te ti‘aturi nei au i te reira. Ua haapa‘o vau i te reira na roto i te haereraa i raro i te pape no te bapetizoraa. A faaite mai na oe ia‘u i te hoê tapa‘o, a faaite mai oe i te hoê faaiteraa papu a te varua e, ua itehia ia‘u te parau mau, e te pŭpŭ atu nei au i to‘u ora no te haereraa i mua o teie ohipa.’
I taua taime ra, o te Taeae Franklin D. Richards [no te Pŭpŭ Tino Ahuru Ma Piti Aposetolo] te peresideni o te misioni no Europa, e tei Liverpool te pû faatereraa o te Ekalesia te vairaa. Ua reva’tu oia i Helemani no te hi‘o i te bapetizoraa o te taata faafariu-matamua-hia i roto i te Evanelia i taua fenua rahi ra. A ho‘i atu ai oia i to’na ra fare, te tahi tau maire i te atea, ua faaite te Taeae Maeser i to’na hinaaro ia paraparau i te tahi mau parau tumu no te Evanelia, na roto i te tautururaa a te hoê taata auvaha parau. O te Taeae Willam Budge taua auvaha parau ra…Ua ui maira te Taeae Maeser i te hoê uiraa na roto i te reo purutia, aita ho‘i oia e taa i te reo Peretane, e ua pahono atu te Taeae Richards na roto i te reo Peretane, aita ho‘i oia e taa i te reo purutia; na te Taeae Budge ïa e auvaha i te mau uiraa e te mau pahonoraa. I muri a‘e i te tahi mau uiraa e te tahi mau pahonoraa na roto i te auvaha parau, ua na ô a‘era te Taeae Richards: “Eiaha e auvaha i teie uiraa, te taa ra vau i te reira;” e ua parau maira te Taeae Maeser: “Eiaha e auvaha i teie pahonoraa, te taa ra vau i te reira.” E ua paraparau noa raua e rave rahi maire i te atea, te uiraa na roto i te reo purutia, te pahonoraa na roto i te reo Peretane; ua taa te tahi i te reo o te tahi. Ua tae atura raua i te anavai Elbe e i to raua haereraa na ni‘a i te e‘a turu, taaê atura raua i reira; Ia tae a‘era raua i te tahi pae mai, ua ui faahou maira te Taea Maeser i te hoê uiraa, e ua parau atura te Taeae Richards: “Auvaha mai na e te Taeae Budge.” Ia horo‘ahia mai te pahonoraa, ua parau maira te Taeae Maeser: “Auvaha mai na.” Ta’na uiraa i muri iho teie ïa: “E te Aposetolo Richards, no te aha i arau a‘e ra, ua taa taua i te tahi e te tahi, e i teie nei, aita taua e taa faahou?” Ua parau atura te Taeae Richards ia’na e, te hoê o te mau hotu o te Evanelia a Iesu Mesia, o te horo‘a ïa no te parau i te reo ê ê e te iritiraa i te reira. E ua na ô atura oia: “Ua horo‘a iho nei te Atua ia oe e ia‘u i teie pô i te haamaitairaa no te amuraa i te hoê o te mau hotu o te Evanelia na roto i te iritiraa i te reo ê ê. E te Taeae Maeser, i farii iho nei oe i te hoê faaiteraa no ô mai i te Atua ra e, ua itehia ia oe te parau mau.”
Ua parau maira te Taeae Maeser ia‘u na ô maira: “Ua rurutaina vau mai te hoê raoere raau te huru, e ua hi‘o faahou atura vau i ni‘a i te ra‘i e na ô atura: ‘E te Atua e, ua roaa ia‘u te iteraa ta‘u i ani atu, e te pŭpŭ atu nei au i to‘u ora, mai te mea e, e titauhia, no teie ohipa nei.’ ”18
Te mau mana‘o tauturu no te haapiiraa e te aparauraa
-
Eaha te mau haamaitairaa te tae mai i ni‘a ia tatou ia faaite ana-‘e tatou i te Evanelia a Iesu Mesia? Eaha te mea tei tupu i roto ia outou i to outou iteraa i te mau melo o to outou utuafare e te mau hoa i te fariiraa i te Evanelia?
-
Eaha ta te Fatu e titau nei i To’na Feia Mo‘a no te hopoi i Ta’na parau i to te ao nei? Nahea tatou ia faarahi i te faaroo e te itoito no te faaite i te Evanelia?
-
Nahea tatou ia faanaho maite i ta tatou mau ohipa ia ti‘a ia tatou ia faaite i te Evanelia? Mai te aha te huru te tauiraa te mau rave‘a misionare i tera tau e tera tau o to tatou oraraa?
-
No te aha aita e ti‘a ia poro i te parau mau o te Evanelia mai te mea e, aita te mana o te Varua Maitai? E mea nahea to te Varua tautururaa ia outou ia faaite i te Evanelia?
-
Ua roaa ia Karl G. Maeser te haapapuraa i to’na iteraa papu iteapi-hia mai i te taime a horo‘ahia mai ai ia’na e ia Elder Franklin D. Richards te horo‘a no te iritiraa i te reo ê ê. Eaha te tahi atu mau horo‘a a te Varua e ti‘a ia tatou ia imi no te haapuai i to tatou iteraa papu e te iteraa papu o vetahi ê? (A hi‘o PH&PF 46:8–26.)
-
Eaha te ohipa tei ravehia e te Taeae Maeser e o Elder Richards no te farii i te haapapuraa i te iteraa papu o te Taeae Maeser? Nahea tatou i te tauturu i te feia faafariu apî ia faahotu i to ratou iteraa papu?
Na te aui haere i te atau: Goro Takahashi, tei riro ei hoa no te mau misionare matamua i Tapone, e o Elders Louis A. Kelsch, Horace S. Ensign, Heber J. Grant, e oAlma O. Taylor. Ua tavini o Elder Grant ei peresideni no te misioni matamua i Tapone mai te 12 no Atete 1901 e tae atu i te 8 no Setepa 1903.