Pene 15

Rave i te ohipa no te oaoa o vetahi ê.

Ia tauturu e ia faaitoito ana‘e tatou ia vetahi ê, e iteahia ia tatou te taviri mau no te oaoa i roto i te oraraa nei.

No roto mai i te oraraa o Heber J. Grant

Emea varavara te Peresideni Heber J. Grant e paraparau no ni‘a i ta’na mau ohipa, tera râ, i te tahi mau taime, na te taata iho e paraparau i te mau ohipa maitai ta ratou i ite ia’na i te raveraa. Te mau melo iho no to’na utuafare te mau taata matamua tei ite e tei fana‘o i te reira mau ohipa ta’na. Ua faaite mai ta’na tamahine o Lucy Grant Cannon i te parau no to’na huru horo‘a noa e to’na maitai i ni‘a i ta’na mau tamarii e ta’na mau mootua:

“E mea taaê mau te haapa‘o o papa i to’na utuafare. Ua faaite tamau noa oia i to’na here ia ratou e i to ratou utuafare. Ua tauturu oia ia ratou noa’tu e, e tusia rahi roa. Ua parau pinepine noa oia e, ‘A tauturu i te raau apî; e nehenehe te raau rarahi e haapa‘o ia ratou iho.’

“I te mau mahana fanauraa atoa o te tamarii tataitahi, e o te mootua, e farii ratou i te hoê rata e te hoê parau moni na’na iho e horo‘a roa mai, e aore râ, na roto mai i te fare rata. I te mau Noela e te Matahiti Apî atoa, e mea pinepine i te tahi atu mau taime, e farii ratou i te buka e te parau moni, te hoho‘a e aore râ, te tahi mau tao‘a horo‘a. E apitihia mai ta’na mau tao‘a horo‘a i to-’na here e ta’na haamaitairaa, e e tae mai ho‘i te reira ia matou nei mai te hoê haamaitairaa.”¹

Ua faaite mai o Lucy i te parau no te aupuru here a to’na metua tane ia’na i te taime a roohia ai oia i te ma‘i arapoa pe e te fiva (diphterie):

“Noa’tu e, ua mairi e toru ahuru ma toru matahiti i teie nei, ia papa‘i ana‘e au, e tahe mai te roimata mauruuru e te oaoa i ni‘a i to‘u mata ia haamana‘o ana‘e au i to’na here ia‘u i te taime a pohehia ai au i te ma‘i. Mai te mau taata e rave rahi tei faaroo ia’na i te parauraa, ua roohia vau i te hoê ma‘i rahi i te ahuru ma pitiraa o to‘u matahiti; tei Washington, D. C., matou i te reira taime. Ahiri e aita te mau tavini o te Fatu i haamaitai ia‘u ma te titau i te mana o te Atua ia tae mai i ni‘a ia‘u, ua pohe mau vau. I roto i taua mau hepetoma ra i roto i to‘u ma‘i rahi, noa’tu e, te vaira e piti na tuati ma‘i aravihi, e mea varavara roa te taime e haere o papa i rapae i te piha i te pô e aore râ i te ao. Ia maitai rii mai au, ua tai‘o mai oia i te parau i mua ia‘u e rave rahi hora te maoro. Ua hopoi mai oia i te tahi mau tao‘a horo‘a e te mau maa rii na‘u i to‘u neheneheraa e farii i te reira, e ua rave oia ma te nehenehe mau mai ta te hoê metua vahine here rahi te huru.

“Aitâ vau i maitai roa’tu ra ia haere, ua faaru‘e atura matou ia Washington. Ua amo o papa ia‘u i ni‘a i te pereoo auauahi e ua haapa‘o noa oia ia‘u e tae roa’tu i te fare. Ahiri oia i haapiihia i te ohipa tuati ma‘i, aita ïa e huru ê atu te marû o ta’na tapea, e aore râ, te maitai o ta’na aupururaa. Ua tae atu matou i Salt Lake i te taime a haamo‘ahia ai te hiero. E rave rahi taime to’na amoamoraa ia‘u na roto i te hiero. E rave rahi hepetoma to‘u tiairaa ia ora to‘u ma‘i, i muri a‘e i to‘u taeraa mai i te fare, e noa’tu e, ua hinaaro te taatoaraa o te utuafare e haapa‘o ia‘u, o o’na ta‘u e hinaaro eiaha e faaatea roa ia‘u, e ua hinaaro atoa oia ia parahi noa i pihai iho ia‘u. Te parau nei au no‘u, tera râ, mai te reira atoa no to‘u mau tuahine atoa i te ma‘i-raa-hia ratou.”²

Ua ite-atoa-hia te ohipa a te Peresideni Grant i rapae i to’na iho utuafare. Te faati‘a ra o Lucy e:

I te hoê taime, tau mahana rii noa na mua a‘e i te Noela, te faaineine ra vau i te tahi mau tao‘a horo‘a rii na te hoê utuafare riirii, ua tomo maira o papa e ua faaite atura vau ia’na i te reira mau mea, ma te faati‘a atu ia’na i te parau no taua utuafare ra, mai ta-‘u i faaroo i te aamu no roto mai i te metua vahine. Ua parau atu vau ia’na e, e mea ti‘a ia‘u ia faaineine i to‘u mau ahu no te hiero, inaha, e horo‘a atu vau i te reira i taua vahine ra ia oomo oia ia poipoi a‘e. I te mahana i muri iho, i to’na faaho‘iraa mai i to‘u mau ahu, ua faaite maira oia ia‘u e, i to’na tomoraa i te uputa aua o te hiero, tei reira o papa i te tiai-noa-raa. Aitâ oia i ite a‘e nei ia-’na, na roto noa râ i ta‘u faataaraa ia’na, ua tapea oia i te reira vahine, e ua horo‘a atura ia’na ra i te hoê vehi rata ma te parau atu e ia oaoa te utuafare i te Noela. E piiti ahuru dollars to roto i te reira vehi rata.”³

Noa’tu e, e rave rahi taime to’na tupu-raa-hia i te ma‘i haaparuparu, ua tamau noa te Peresideni Grant i te imi i te mau rave‘a no te tavini. Noa’tu te paruparu o to’na tino, ta’na ohipa au roa, o te tere-ori-haere ïa na ni‘a i te pereoo uira. Fatata e pô te mahana ia haere oia, e i roto i te reira mau tere, e ani oia i te mau melo o te utuafare e i te mau hoa ia haere atu na muri iho ia’na. I roto i te reira mau tere, e mea pinepine oia i te faaite i to’na here ia vetahi ê na roto i te tapearaahia i te fare ma‘i e aore râ, te farereiraa i te taata i to ratou fare.⁴

I roto i ta’na faateniteniraa i te Peresideni Grant, ua papa‘i o Elder John A. Widtsoe, no te Pŭpŭ Tino Ahuru Ma Piti Aposetolo e: “To’na here rahi a‘e, te here ïa i te taata. Ua riro te mau tamarii a to’na Metua i te Ao ra ei mana‘ona‘oraa na’na i roto i to’na oraraa taatoa… E ere taua here ra i roto noa i te mana‘ona‘oraa i te taata i roto i to ratou rahiraa, i roto atoa râ i te aupururaa i te taata hoê ra. Ua farii tamau te feia riirii e te rava‘i ore i ta’na mau horo‘a. Ua riro te pahono oioi a to’na aau i te feia tei atihia, ei peu matauhia e to’na mau hoa. Ua horo‘ahia te moni, e tae noa’tu i te tauturu ta te taata puai e horo‘a i te taata paruparu ra. E taata horo‘a noa oia, e taata aroha rahi, e no reira, e taata here oia i to’na mau hoa e to’na utuafare. Te ti‘a nei oia i roto i to’na piha toro‘a ma te here i roto i te aau i te mau taata atoa, ma te faaitoito i te mau taata atoa ia haapae i te hinaaro pipiri.”⁵

Te mau haapiiraa a Heber J. Grant

Ia itehia to tatou here i te Fatu na roto i te ohipa tei au i ta te Mesia.

Eaha te huru tane e te huru vahine tatou e au ai, tatou te Feia Mo‘a i te mau Mahana Hopea nei, ia au i te iteraa faahiahia tei roaa ia tatou, oia ho‘i, te ora nei te Atua, o Iesu te Mesia, e peropheta o Iosepha Semita na te Atua? E mea ti‘a ia tatou ia riro ei feia parau ti‘a roa a‘e, ei feia haapa‘o roa a‘e, ei feia aroha roa a‘e, ei feia maitai roa a‘e i ni‘a i te tino o te fenua nei.⁶

Eiaha ia mo‘ehia ia tatou ta tatou hopoia ia riro ei feia faaroo e te tavini i te Fatu, e eita ho‘i te ohipa taviniraa Ia’na e riro ei ohipa ti‘a mau mai te mea e, aita tatou e tavini i to tatou taata tupu.⁷

Te taparu haehaa nei matou i te mau melo atoa o te Ekalesia ia here i to ratou mau taea‘e e to ratou mau tuahine, e i te mau taata atoa, noa’tu o vai te taata, e noa’tu te vahi; ia faaore roa i te riri i roto i to ratou oraraa, ia faaî i to ratou aau i te aroha, te faaoroma‘i, e te faaore hapa.⁸

Te Evanelia a te Mesia, e Evanelia ïa no te here e te hau, no te faaoroma‘i e te mauiui rahi, no te farii e te faaore hapa, no te maitai e te ohipa maitai, no te aroha e te autaea‘e. Te hiaai tao‘a, te nounou, te mau hinaaro iino, te hiaai i te mana, e te haavîraa i to tatou mau taata tupu ma te parau ti‘a ore, aita to te reira mau mea atoa e parahiraa i roto i te aau o te Feia Mo‘a i te mau Mahana Hopea nei e aita atoa i roto i te aau o te feia tei mata‘u i te Atua i te mau vahi atoa ra.⁹

E nehenehe ta tatou ohipa e ta tatou taviniraa e faateitei e e faaitoito ho‘i ia vetahi ê ra.

Ua faaroo vau i te aamu no te hoê taea‘e (ua mo‘ehia ia‘u to’na i‘oa i teie nei) tei haere atu i roto i te hoê pureraa i te mau mahana matamua o te Ekalesia. Ua titau te Peresideni Brigham Young i te tahi mau ô no te hapono atu i Missouri River no te tauturu i te Feia Mo‘a ia haaputuputu ratou i Ziona ra. Ua hinaaro oia i te mau taata atoa e nehenehe ta ratou, ia horo‘a hoê puaatoro oni e aore râ, hoê puaatoro ufa, e aore râ, te tahi atu huru horo‘a. Ua ti-‘a maira te hoê taea‘e maitai roa e na ô maira, “E horo‘a vau hoê puaatoro ufa.” Ua ti‘a atoa maira te tahi atu taea‘e e na ô maira, “E horo‘a vau hoê puatoro ufa.” E piti puaatoro ufa e hoê utuafare rahi ta te taea‘e matamua; area ta te piti o te taea‘e ra, afa tatini ïa ta’na rahiraa puaatoro ufa, e hoê utuafare na‘ina‘i. I reira, ua tae maira te varua [o te diabolo] i roto i te taata matamua ra, [i te parauraa e, ] “I teie nei, a hi‘o na, aita to oe utuafare rahi e ravai ra; eita oe e ravai hoê noa puaatoro. I teie nei, to tera taata, e utua-fare na‘ina‘i to’na, e e ono ta’na puaatoro; e nehenehe ta’na e horo‘a e piti, e aore râ e toru puatoro, e e ravai noa hoa ta’na” I to’na ho‘iraa i te fare, a haere noa ai oia, ua rahi roa to’na inoino. I te pae hopea ra, feruri a‘era oia e, “Ia mana‘o vau, eita vau e horo‘a.” e i muri iho, ite a‘era oia i te taaêraa i rotopu i te varua e faahema nei ia’na, e te varua tei tura‘i ia’na ia parau i te Peresideni o te Ekalesia e, e horo‘a oia hoê puaatoro ufa. Teie te hoê varua, te parau nei ia’na eiaha e rave i ta’na hopoia, eiaha ia riro ei taata parau ti‘a, eiaha e haapa‘o i ta’na fafauraa. Faaea ta‘ue a‘era oia, fariu haere a‘era, e na o ihora, “E te diabolo, mamu, ia ore ana‘e, mai ta‘u ho‘i i ite e, te ora nei au, e haere au i te piha toro‘a o te Taeae Brigham ra no te horo‘a atu i te tahi atu puaatoro ufa.” I taua taime ra, aita oia i faahema-faahou-hia.

I teie nei, e mea ti‘a i te Feia Mo‘a atoa i te mau Mahana Hopea nei ia riro ei feia tauturu, eiaha râ ei feia ti‘aturi i ni‘a ia vetahi ê.¹⁰

Te haamana‘o nei au i te hoê taime te parahi noa ra vau i roto i te State Bank [Fare Moni], ite atura vau i te hoê taea‘e ruau i te haereraa mai, o John Furster to’na i‘oa. Oia te hoê o te mau taata matamua tei bapetizohia i Scandinavie. Ia mairi oia i te haamaramarama o te fare moni, muhumuhu maira te varua ia‘u e, “A horo‘a e piti ahuru dollars na tera taata.” Haere atura vau e fare-rei i te taata haapa‘o moni, horo‘a atura ia’na te hoê parau tarahu tarimahia no te tino moni e 20 dollars, e haere atura vau na ni‘a i te purumu, e roaahia’tura ia‘u o Furster tane i mua i te fare toa Z. C. M. I. Ua aroha rima’tura vau ia’na e tuu atura i tera piti ahuru dollars i roto i to’na rima. Tau matahiti i muri a‘e, ua faaroo a‘era vau e, i taua poipoi ra, ua pure te Taeae Furster ia roaa ia-’na te rave‘a no te haere i Logan e ia rave i te hoê ohipa iti i roto i te hiero i reira. I taua taime ra, aitâ te hiero no Roto Miti i oti roa’tura. Tera e piti ahuru dollars, o te tino moni ïa i hinaarohia e a’na, e e rave rahi matahiti i muri a‘e, ua haamauruuru mai oia ia‘u ma te ta‘i, no to‘u horo‘araa ia’na i taua moni ra.

I te hoê mahana a parahi noa ai au i roto i to‘u piha toro‘a, ua tupu maira te hoê mana‘o i roto ia‘u ia haere i ô te Tuahine Emily Woodmansee e ia horo‘a tarahu atu e pae ahuru dollars na’na. Ua na reira vau, e ite atura vau e, te fifi mau ra oia i te pae no te oraraa…Aita’tu ïa e mea i titau-rahi- roa-hia e au maori râ, te faaroo-ohie-raa to‘u aau i te mau feruriraa mai teie te huru.¹¹

Ia faahiti outou i te hoê parau maitai, na te reira e tauturu ia outou ia parau i te tahi atu parau maitai. Te mau ohipa tauturu atoa ta outou e rave, ia au i te ite tei roaa ia outou, no te tauturu i te hoê o to outou taata tupu, na te reira e horo‘a ia outou i te aravihi rahi no te tauturu i te tahi atu taata. E tupu i te rahi o te hinaaro o te hoê taata ia rave i te ohipa maitai, na roto i te mau ohipa maitai atoa ta’na e rave. I te tahi mau taime ua feruri au e, e rave rahi taata, no te mea aita e vaira i roto ia ratou te aau maitai e te hinaaro e tauturu ia vetahi ê, ua feruri ratou e, mai te mea e, e parau ratou e aore râ, e rave ratou i te hoê mea maitai, eita ïa ta ratou e nehenehe faahou e rave i te hoê ohipa maitai, e aore râ, e parau i te hoê parau maitai a muri a‘e. Mai te mea e, te vaira ta outou fare vairaa huero ua î roa i te huero, e e horo‘a outou hoê e aore râ, e piti pute huero, e iti mai ïa te toe i roto i ta outou fare vairaa huero; ia rave râ outou i te hoê ohipa maitai, e aore râ, ia parau atu outou i te tahi mau parau faaitoito i te taata e vaira i roto i te peapea, e o te aro nei ho‘i i roto i to’na oraraa, e rahi atu ïa to outou aravihi i te rave i te reira a muri a‘e. Eiaha e ora noa ma te tapiri noa i to outou utu i te oreraa e parau i te mau parau maitaitai e te faaitoito, eiaha atoa e tapiri noa to outou aau i te oreraa e rave i te ohipa no vetahi ê. Ahaamau i te hoê ture i roto i to outou oraraa: tamata noa i te tauturu i te hoê taata ia amo i ta’na hopoia.¹²

Te taviniraa o te taviri mau ïa no te oaoa i roto i te oararaa.

Aita e ti‘a i te hoê taata ia parau e, eaha te tupu mai no te hoê ohipa taviniraa tei ravehia, e aita atoa tatou e ite e, ahea te reira e tae mai i ni‘a ia tatou, e aore râ, i ni‘a i to tatou mau hoa. Eita paha te haamauruururaa e tae mai i te taime a rave ai tatou i taua taviniraa ra, e tae mai râ te reira i muri a‘e, e i roto i te hoê faito papu maitai. Te ti‘aturi nei au e, eita tatou e ere i hoê mea i roto i te oraraa nei mai te mea e, e tavini tatou, na roto i te faatusiaraa, e te raveraa i te mea ti‘a.¹³

Te taviri mau no te oaoa i roto i te oraraa nei o te ohiparaa ïa no te oaoa o vetahi ê. Te aroha nei au i te taata aau pipiri tei ore â i ite a‘e nei i te huru o te oaoa e roaa i te feia tei farii i te mauruuru no roto mai i te feia o ta ratou i tauturu i roto i te aroraa o te oraraa nei.¹⁴

Te rave‘a papu mau e roaa ai te oaoa i roto i te oraraa nei, e te rave‘a no te faaineine ia tatou no te oraraa a muri a‘e, o te taviniraa ïa.¹⁵

Te ti‘aturi papu nei au e, te rave‘a e roaa ai te hau e te oaoa i roto i te oraraa nei, o te taviniraa ïa. Te ti‘aturi nei au e, o te taviniraa te taviri mau no te oaoa, i te mea e, ia rave ana‘e tatou i te ohipa, mai te ohipa misionare, e nehenehe ta tatou e hi‘o i muri i roto i te toe‘a o to tatou oraraa, i te ohipa tei ravehia e tatou i roto i te misioni. Ia rave ana‘e tatou i te mau huru ohipa maitai atoa, e tupu mai te mana‘o oaoa e te mauruuru i roto i to tatou aau, area te oaoa no roto mai i te mau mea arearea ra, e mure ïa te reira.¹⁶

E ture ïa na te Atua, oia ho‘i, ia au i te taviniraa ta tatou i rave, ia au i te ohipa ta tatou i rave i roto i teie Ekalesia e i rapae ho-‘i—oia ho‘i, te mea ta tatou i faatusia no te Ekalesia e no te feia i rapae i te Ekalesia, e ta tatou e faaite i te faatura—e tupu ïa tatou i te rahi i roto i te aroha o te Atua e i roto ho‘i i te here o te Atua, e e tupu atoa tatou i te rahi i roto i te faatupuraa i te mau tumu i tuuhia mai ai tatou i ni‘a i te fenua nei.¹⁷

Ia parahi mai te Fatu i pihai iho ia outou paatoa, e au mau taea‘e e au mau tuahine, i te mau vahi atoa e nohohia na e outou. Ia vai mai to’na hau i roto i to outou aau; Ia faauru mai ho‘i To’na Varua ia outou ia rave i te mau ohipa apî na roto i te taviniraa i te taea‘e e te taata tupu.¹⁸

Te mau mana‘o tauturu no te haapiiraa e te aparauraa

No te aha e itehia ai ia tatou “te taviri mau no te oaoa” ia “rave ana‘e tatou i te ohipa no te oaoa o vetahi ê”?
No te aha tatou e otiatia ai i te tahi taime ia tavini itoito ia vetahi ê? Eaha te ti‘a ia tatou ia rave no te farii i te oaoa hau atu ia tavini ana‘e tatou?
Eaha te ti‘a ia tatou ia rave no te tauturu i te mau tamarii e i te feia apî ia roaa ia ratou te hinaaro ia tavini?
Nahea e ti‘a ai ia tatou ia faarahi i to tatou aravihi ia ite i te hinaaro o vetahi ê?
Eaha te auraa no te parau e “ia riro ei taata faateitei, eiaha râ ei taata ti‘aturi i ni‘a ia vetahi ê?
Nahea te ohipa taviniraa i te tauturu ia tatou “ia faaineine ia tatou no te oraraa a muri a‘e”?
Eaha te tahi mau mea taaê e te ohie o te ti‘a ia tatou ia rave no te pee i te hi‘oraa o te Peresideni Grant no ni‘a i te ohipa taviniraa? Nahea e ti‘a ai ia tatou ia tavini noa’tu eaha te huru o to tatou oraraa?