Pene 2

Te misioni a te peropheta Iosepha Semita

Ua haamau-papu-hia Te Ekalesia a Iesu Mesia i te Feia Mo‘a i te mau Mahana Hopea nei i ni‘a i te mau heheuraa a te Atua tei horo‘ahia mai na roto i te Peropheta Iosepha Semita.

No roto mai i te oraraa o Heber J. Grant

Ua tupu te iteraa papu o Heber J. Grant no ni‘a i te Peropheta Iosepha Semita i to’na apî -roa-raa ra, a faati‘a ai to’na mama e te hoa o to’na mama, o Eliza R. Snow, ia’na i to raua mau iteraa no ni‘a i te Peropheta. Ua tupu atoa to’na iteraa papu no ni‘a i te peropheta na roto i te mau iteraa papu o te mau peresideni Brigham Young, John Taylor, Wilford Woodruff, Lorenzo Snow, e Joseph F. Smith—e mau taata teie tei matau maitai ia Iosepha Semita. Te parau ra te Peresideni Grant e, “Na roto i te iteraa papu o to‘u mama e o te tahi atu mau taata e tau hanere taata atu â tei matau i te Peropheta Iosepha, e na roto atoa i te mau heheuraa a te Varua o te Atua ia‘u nei, ua ite au e, e Peropheta o Iosepha Semita na te Atua.”¹

I roto i te roaraa o to’na tau faatereraa ei Aposetolo e ei Peresideni no te Ekalesia, e mea au roa na Heber J. Grant ia faaite i to’na iteraa no ni‘a i te Peropheta Iosepha Semita e no ni‘a i te Faaho‘i-raa-hia mai te Evanelia. Te parau ra oia e: “Aita e taata oaoa roa a‘e mai ia‘u i te faaiteraa i to’na iteraa e, te ora nei te Atua, e o Iesu te Mesia, e e Peropheta o Iosepha Semita na te Atua. E mea oaoa roa na‘u te reira.”²

I to Elder Grant taviniraa i roto i te Pŭpŭ Tino Ahuru Ma Piti Aposetolo, na to’na iteraa papu no ni‘a i te Peropheta Iosepha i tauturu atoa ia faafariu i to’na taea‘e o Fred, “inaha, e taata haapa‘o ore oia, te tau‘a ore, te etaeta, e tei faaite i to’na anaanatae ore i te Evanelia a Iesu Mesia.”³ I te hoê mahana tei roto o Elder Grant i te Fare Menemene no Roto Miti, te faaineine ra e horo‘a i te hoê a‘oraa, ite atura oia ia Fred i te tomoraa mai i roto i te fare. Te faati‘a ra oia e:

“I to‘u iteraa ia Fred i roto i te Fare Menemene no te taime matamua, ma te ite e, te imi nei oia i te Atua ia roaa ia’na te maramarama e te ite no ni‘a i te hanahana o teie nei ohipa, pi‘o ihora vau i to‘u upoo i raro e pure atura, ia nehenehe i te Fatu ia faauru mai ia‘u, na roto i te heheuraa a To’na Varua, mai te mea e, e titauhia mai ia‘u ia a‘o i to te amuiraa, ia nehenehe to‘u taea‘e ia faaite mai ia‘u e, ua paraparau vau ma te aravihi hau atu i to‘u natura mau, e ua faauruhia vau e te Fatu. Ua ite a‘era vau e, mai te mea e, e parau mai oia i taua mau parau ra, e nehenehe ïa ia‘u ia faaite ia’na e, ua horo‘a te Atua i te hoê iteraa papu ia’na no ni‘a i te hanahana o teie nei ohipa.”

Ia tae mai to’na taime no te paraparau, haere atura o Elder Grant i te purupiti, hohora a‘era i te hoê buka no te arata‘i ia’na i roto i te a‘oraa ta’na i faaineine no te a‘o. Na o atura oia i to te amuiraa e, “Aita ta‘u e nehenehe e faaite atu ia outou e, no te aha râ, tera râ, i roto i to‘u oraraa taatoa, aitâ vau i titau u‘ana a‘e nei i te faaururaa a te Fatu mai ta‘u e titau nei i teie mahana.” Ua “titau oia i te faaroo e te pure a te taata” e ua tamau i te ani i roto i to’na aau i te faaururaa. Ia hope e 30 minuti to’na paraparauraa, ho‘i atura oia e parahi. Te parau ra oia i muri a‘e e:

“I to‘u parahiraa i raro i muri a‘e i ta‘u a‘oraa, haamana‘o ihora vau e, te vai matara noa ra ta‘u buka i ni‘a i te purupiti. Tei muri noa mai ia‘u te parahiraa te Peresideni George Q. Cannon [Tauturu Hoê i roto i te Peresideniraa Matamua]…, e ua faaroo vau ia’na i te parauraa ia’na iho e, ‘Mauruuru e te Atua no te puai o teie iteraa papu!‘ I to‘u faarooraa i te reira, haamana‘o a‘era vau e, ua mo‘ehia ia‘u te a‘oraa o ta‘u i faaineine no te a‘o, e i reira, tahe maira to‘u roimata mai te pape uâ ra te huru, faaea noa’tura vau e to‘u na poro rima i ni‘a i te turi avae ma te tapoi i to‘u mata i te rima, ia ore te taata i pihaiiho ia‘u ia ite e, te ta‘i ra vau mai te hoê tamarii te huru. I to‘u faarooraa i te mau parau a George Q. Cannon, ua ite ihora vau e, ua faaroo mai e ua pahono mai te Atua i ta‘u pure. Ua ite a‘era vau e, ua putapu te aau o to‘u taea‘e.

“Fatata te taatoaraa o na minuti e toru ahuru i hope i ni‘a noa i to‘u iteraa papu no ni‘a i to‘u iteraa e, te ora nei te Atua, e o Iesu te Mesia, e no ni‘a atoa i te mau ohipa maere e te umerehia a te Peropheta Iosepha Semita, ma te faaite papu i te ite ta te Atua i horo‘a mai ia‘u e, e peropheta mau o Iosepha Semita no te Atua mau e te Atua ora.

“Ia poipoi a‘e, ua haere mai to‘u taea‘e i to‘u piha toro‘a e ua na o maira, ‘Heber, tei roto vau i tera pureraa i nanahi ra e ua faaroo vau ia oe i te pororaa.’

“Na o atura vau e, ‘A tahi ra oe a faaroo ai i to oe taea‘e ia poro, e ere anei ?’

“Na o maira oia e, ‘oh, aita, e rave rahi taime to‘u faarooraa ia oe. Matau noa vau ia tae mai na muri a‘e i te hora, e ia tauma i te tahua i ni‘a. E mea pinepine te taime e haere au i rapae hou te faaotiraa o te pureraa. Tera râ, aitâ oe i paraparau a‘e nei mai ta oe i paraparau i nanahi ra. E aravihi taaê atu to oe i to oe paraparauraa mai. Ua faauruhia oe e te Fatu.’ Ua tuea noa teie mau parau i te mau parau ta‘u i faahiti i roto i ta‘u pure i te Fatu i nanahi ra!

“Na o atura vau ia’na e, ‘Te tamau noa anei oe i te pure no te ani i te hoê iteraa papu no ni‘a i te Evanelia?‘

“Na o mai nei oia e, ‘E, e te rahi noa’tura to‘u mana‘ona‘oraa.

“Ui atura vau e, ‘Eaha ta‘u i poro i nanahi ra?‘

“Pahono mai nei oia e, ‘Ua ite oe eaha ta oe i poro‘

“Na o atura vau e, ‘Ahani, faaite mai na oe ia‘u.’

“ ‘Ua poro oe i te parau no te misioni hanahana a te Peropheta Iosepha Semita.’

“Pahono atura vau e, ‘E ua faauruhia vau hau atu i to‘u aravihi mau; aitâ oe i faaroo a‘e nei ia‘u i te hoê taime i te paraparauraa mai ta‘u i paraparau i nanahi ra. Hinaaro anei oe ia rave te Fatu i te hoê tapu raau no te tairi ia oe ia topa oe i raro? Eaha’tu â te iteraa papu ta oe e titau nei no ni‘a i te Evanelia a Iesu Mesia hau atu i to te hoê taata tei paraparau ma te aravihi hau atu i to’na iho natura mau, e na roto i te faaururaa a te Atua, a faaite ai oia i te hanahana o te misioni a te Peropheta Iosepha Semita?‘

“I te Sabati i muri iho, ua ani mai oia ia‘u ia bapetizo ia’na.”⁴

Te mau haapiiraa a Heber J. Grant

Ua faaho‘i mai te Atua i te îraa o te Evanelia na roto i te peropheta Iosepha Semita.

Teie te parau poro‘i a Te Ekalesia a Iesu Mesia i te Feia Mo‘a i te mau Mahana Hopea nei i to te ao nei, oia ho‘i, te ora nei te Atua, o Iesu Mesia Ta’na Tamaiti, e ua fâ mai raua i te tamaiti ra o Iosepha Semita, e ua fafau mai ia’na e, e riro oia ei mauhaa i roto i te rima o te Fatu no te faaho‘i mai i te Evanelia mau i te fenua nei.⁵

I muri mai i te faatatauro-raa-hia o Iesu e te poheraa te mau aposetolo ta’na i maiti, tei farerei i te pohe maratiri i raro a‘e i te rima o te feia tei pato‘i i te mau parau mau ta’na i haapii ra, mai te mea ra e, ua faufaa ore ta’na misioni e ta’na ohipa; area râ, i muri mai, i te iteraa te taata i te mau parau haapiiraa teretetiano, ua fariu te mau taata maitai i ni‘a ia’na no te imi i te maramarama e te puai, ma te tapea maite i to ratou ti‘aturi i ta’na misioni e ta’na ohipa, e na roto i te reira, ua riro mai te parau no te Teretetiano ei ohipa faufaa i roto i te ao nei.

A tere noa‘i te tau, ua tupu maira te hamani-ino-raa i roto i te ekalesia i tahito ra. Ua haapa‘o-ore- hia te mau ture faatere i te ekalesia tei haamauhia e te Faaora, ua ruri-ê-hia te mau oro‘a, ua ofatihia te faufaa haapa‘o-tamau-hia ra [a hi‘o Isaia 24:5]. E ua haamata te taata i te haapii i ta ratou iho ture [a hi‘o Mataio 15:9]; ua tupu mai te tahi huru haamoriraa tei parauhia e Teretetiano, tera râ, aita te mana o te Atua i roto i te reira, mai tei vai na i roto i te ekalesia i tahito ra. Ati a‘era te fenua nei i te poiri pae varua e te taata i te poiri taotao [a hi‘o Isaia 60:2].

I muri iho, tae maira te hoê anotau faufaa rahi roa i roto i te aai o te ao nei. Ua tae mai te tau, i faataahia e te Fatu, e i tohuhia e ta’na ra mau peropheta, e haamata‘i te tahi atu tau tuuraa no te îraa o te mau tau atoa, i reira ho‘i te Evanelia o te basileia i faaho‘ihia mai ai, e i porohia‘i i te ao atoa nei, ei faaiteraa i te mau taata atoa hou a tae mai ai te hopea ra.

Ua poupou faahou to te ra‘i ra, ua faaite faahou mai te mau tino no te ra‘i mai i te hinaaro o te Metua i ta’na mau tamarii te parahi nei i ni‘a i te fenua nei, e ua oaoa te taata i te iriti-raa-hia Te Tau Tuuraa no te Îraa o te mau Tau atoa.

O Iosepha Semita te taata ta te Fatu i maiti no te haamata i te ohipa rahi o te anotau hopea nei. Ua fâ mai te Metua e te Tamaiti ia’na ra na roto i te hoê orama hanahana, ua horo‘ahia ia’na te mau taviri no te autahu‘araa mure ore, ma te farii i te mana no te horo‘a’tu i te reira i te tahi atu mau taata, e te fafauraa e, e ore roa te autahu‘araa e iriti-ê-faahou-hia i te fenua nei, e tae roa’tu e, ua hope te mau opuaraa a te Metua i te faatupuhia.⁶

Ua farerei au i te mau vahi e rave rahi i te mau taata o tei tuatapapa i te parau no to tatou faaroo. Te parau ra te tahi pae o te reira mau taata e: “E nehenehe ta‘u e farii i te mau mea atoa ta outou e haapii nei mai te mea e, e ere no ni‘a i teie taata o Iosepha Semita. Ahani pai outou e, e tatara noa a‘e ia’na!”

Eita roa’tu tatou e na reira. Eita atoa tatou e iriti ia Iesu Mesia, te Tamaiti a te Atua ora. E piti huru: Ua ite mau o Iosepha Semita i te Atua e ua paraparau roa oia Ia’na, e na te Atua iho i faaite mai ia Iesu Mesia i te tamaiti ra o Iosepha Semita, e ua parau roa mai Iesu Mesia ia Iosepha Semita e, e riro oia ei mauhaa i roto i te rima o te Atua no te faati‘a faahou i te Evanelia mau a Iesu Mesia i ni‘a i te fenua nei—aita ana‘e ra, ua riro ïa te parau no te Momoni ei aamu haavare. E ere râ te parau no te Momoni i te aamu haavare! O te mana ïa o te Atua no te faaoraraa. O te Ekalesia ïa a Iesu Mesia, tei faati‘ahia i raro a‘e i Ta’na faaueraa, e eita roa te ti‘aturi ore o to te ao nei e nehenehe e ruri ê i te mau mea tumu i apitihia i Te Ekalesia a Iesu Mesia i te Feia Mo‘a i te mau Mahana Hopea nei.

Te ti‘aturi nei te Feia Mo‘a atoa i te mau Mahana Hopea nei e, ua fâ mai te Atua i te tamaiti ra o Iosepha Semita, e te ti‘aturi nei te Feia Mo‘a atoa i te mau Mahana Hopea nei e, na te Atua iho i faaite mai ia Iesu Mesia i te tamaiti ra o Iosepha Semita ei: “Tamaiti here na‘u: a faaroo Ia’na” [Iosepha Semita—Aamu 1:17.]⁷

Ua niu-papu-hia teie Ekalesia i ni‘a i te heheuraa a te Atua ora na roto ia Iosepha Semita te Peropheta.⁸

Ua riro te Orama Matamua a Iosepha Semita ei omuaraa no “te hoê ohipa umerehia e te maerehia.”

Te ohipa hau roa a‘e i te hanahana tei tupu i roto i te aai o te ao nei mai te tau a ora ai te Faaora iho i ni‘a i te fenua nei, maori râ, te faaotiraa te Atua iho ia haere mai Oia i ni‘a i te fenua nei e Ta’na Tamaiti here, te Tamaiti fanautahi, to tatou Taraehara e to tatou Faaora, e ia fâ mai i te tamaiti ra o Iosepha.⁹

Ua tapo‘i maira te hanahana o te Fatu i ni‘a ia Iosepha Semita, e ua faaite maira te Atua ia’na iho i roto i te hoê orama, i roto i to’na ra huru hanahana e te tura, e ta’na Tamaiti Fanau Tahi, o Iehova, e ua parau maira to’na iho reo ia Iosepha Semita ia riro ei mauhaa no te iriti i te tau tuuraa rahi a‘e o te mau tau tuuraa Evanelia atoa.

Aita te reira i tupu mai te hoê faaiteiteraa rahi, te hoê hautiraa teata taata ora, e ohipa iti ha‘iha‘i roa râ e te tura, e te hanahana rahi, aita e nehenehe e parau to’na faufaa rahi.

Ua faaroo-faahou-hia te reo o te Fatu, tei vai muhu ore noa na e rave rahi te tau. E ua horo‘a- faahou-hia mai taua parau hanahana ra, tei faahiti pinepinehia na ho‘i: “Ta‘u Tamaiti Here Teie. A faaroo ia’na! E ua heheu-faahou-hia mai te huru mau o te Metua e ta’na Tamaiti Fanau Tahi, ia ite ho‘i te taata atoa i to raua huru mau.¹⁰

Ua riro taua ohipa ra ei tapa‘o no te haamataraa o te “hoê ohipa umerehia e te maerehia”, tei tohu- ê-hia na e Isaia te Peropheta [a hi‘o Isaia 29:13–14], ta Daniela i haapapu mai [a hi‘o Daniela 2:29–44], e ta Ioane Heheu Parau i tohu ra [a hi‘o Apokalupo 14:6–7]. Ua riro te tae-tino-raa mai te Metua e te Tamaiti, e te maitiraa raua ia Iosepha ei faatere no te Tau Tuuraa o te Îraa o te mau Tau, ei omuaraa no teie ohipa, e ua faati‘a-roahia te reira na roto i te fâraa mai te mau melahi e te tahi atu mau ve‘a mo‘a, ma te horo‘a mai ia Iosepha te mau mana o te Autahu‘araa, te mana no te rave i te ohipa i roto i te i‘oa o te Atua—no te faaite i te Evanelia a Iesu Mesia i te taata atoa na roto i te mana no te Atua, e na roto i te faaueraa a te Atua, no te faanaho e no te faati‘a i te Ekalesia mau a te Mesia i te mau mahana hopea nei.¹¹

Na roto i te haehaa, e na roto atoa i te ite-papu-raa i te hopoia, te faaite nei matou i to te ao atoa nei e, na roto i te fâraa mai te Metua e te Tamaiti i te Peropheta Iosepha Semita, i te omuaraa no te tau faatupuraa raau o te matahiti 1820, ua matara te tau tuuraa Evanelia rahi a‘e i te mau tau tuuraa atoa, e tau tuuraa no te maramarama, tei anaana mai no ô mai i te Atua ra, tei haamaramarama i te feruriraa o te taata, ma te faarahi i te maramarama e te ite, oia te hanahana o te Atua.’¹²

Ua faaho‘ihia mai te mau taviri o te autahu‘araa na roto i te peropheta Iosepha Semita.

“Te tiaruri nei matou e, hou te taata e a‘o ai i te Evanelia e hou oia e faatere ai i te mau oro‘a o te reira, e mea ti‘a ia’na ia maitihia e te Atua na roto i te tohu e te tuuraa rima o te feia i haamanahia.” [Te mau Hiroa Faaroo 1:5]

E te faaara nei tatou i to te ao atoa nei e…tei ia tatou nei taua mana ra. Te faaara nei tatou e, te taata tei bapetizo i te Faaora o te ao nei, tei parauhia o Ioane Bapetizo, ua pou mai oia i ni‘a i te fenua nei, ua tuu i to’na na rima i ni‘a i te upoo o Iosepha Semita raua o Olive Tautere, e ua horo‘a ia raua i te Autahu‘araa a Aarona, e aore râ, te Autahu‘araa iti, tei mau i te autahu‘araa no te bapetizo. Ia oti ta’na faatoro‘araa ia raua, ua parau maira ia raua ia bapetizo te tahi i te tahi, e ua fafau maira ia raua e, o Petero, Iakobo e o Ioane, na aposetolo a te Fatu o Iesu Mesia, tei ti‘a ei upoo faatere i te Ekalesia i muri a‘e i te faatatauroraa, o te haere mai e farerei ia raua a muri a‘e no te horo‘a mai ia raua i te aposetoloraa, te Autahu‘araa a Melehisedeka, e aore râ, te Autahu‘araa teitei.

Te faaara nei tatou i to te ao atoa nei e, ua tae mai ratou, e ua roaa ia tatou taua mana ra, e e ore roa te ti‘aturi ore o to te ao atoa nei e ruri ê i te parau mau no taua na farereiraa ra, —oia taua na faatoro‘araa ra. Mai te mea e, e parau mau teie mau mea, e ore ïa e ti‘a i te ti‘aturi ore ia ruri ê i te reira. E te faaara nei tatou e, e parau mau teie mau mea.¹³

Na te hotu o te faaho‘iraa mai e haapapu i te misioni a Iosepha Semita.

Te faaiteraa papu rahi roa a‘e o te hanahana o te orama matamua, e tae noa’tu i te mau fâraa mai o te mau melahi e te tahi atu mau ve‘a ia Iosepha te Peropheta i muri a‘e i te orama matamua, o te mau hotu ïa tei roaa mai na roto i te mau parau poro‘i e te autahu‘araa tei horo‘ahia mai. Ua faaho‘ihia mai te Evanelia mau i ni‘a i te fenua nei. Ua iritihia mai te parau nehenehe o te nunaa o teie fenua i tahito ra, oia ho‘i, te Buka a Moromona, mai roto mai i te vahi i hunahia ai te reira, i roto i te Aivi Cumora, tei roto i reira te îraa o te Evanelia tei haapiihia e te Fatu e te Faaora, o Iesu Mesia, i ni‘a i teie fenua no Amerika. Ua faati‘ahia Te Ekalesia a Iesu Mesia i te Feia Mo‘a i te mau Mahana Hopea nei i te 6 no Eperera 1830, i roto i te oire no Fayette, i te Mataeinaa Seneka ra, i New York, e ua tupu i te rahi…, noa’tu te hamaniino-raa e te mau haafifiraa tei rave- tamau-hia.¹⁴

Ia feruri ana‘e tatou i te ohipa nehenehe ta te Peropheta Iosepha Semita i rave, e feruri au i te tahi taime e, nahea te hoê taata maramarama e nehenehe ai e hi‘o i roto i te oraraa o taua taata ra, e ite ai i te parau no to’na tapea-raa-hia i te fare auri, to’na mau horo-haere-raa, te parau no te mau hamani-ino-raa, no to’na parai-raa-hia i te ta e te huruhuru manu, no te faahaparaa no te pohe tei tae mai i ni‘a ia’na, e ia tai‘o ho‘i i te mau mea nehenehe i roto i te Parau Haapiiraa e te mau Parau Fafau, ma te ore e ite i te faaururaa a te Fatu i roto i ta’na mau ohipa i rave.

Aita vau e taa nei e, nahea te hoê taata maramarama e nehenehe ai e feruri e, e ti‘a i te hoê taata, ma te tauturu ore a te Fatu, ia hamani i te Buka a Moromona, ua hanere te matahiti i teie nei, e aita i pohe i te faaino i roto i tera roaraa tau, taaê noa’tu te tahitohitoraa tei tupu, no tera tumu e tera tumu. I teie mahana, taua buka ra tei iritihia e Iosepha Semita, te mauhaa a te Fatu, te ti‘a nei ïa ma te hanahana. I teie mahana o te reira ïa ta tatou misionare rahi roa a‘e no te pororaa i te Evanelia; aita e vaira te tahi atu mea e nehenehe e faaauhia i te reira.¹⁵

Ua riro teie Ekalesia ei…ohipa umerehia e te maerehia. Aita e ohipa mai te reira i te ao taatoa nei, no te mea, na Iesu Mesia, te Tamaiti a te Atua i faati‘a i te reira, e o oia te upoofaatere no te reira; no te mea ua faaite mai Iesu Mesia ia’na iho i te Peropheta e ia Olive Tautere, e i te tahi atu mau taata; e no te mea, ei pahonoraa i te pure, ua horo‘a te Atua i te mau taata e ati a‘e te ao taatoa nei tei reira te Evanelia, i te hoê iteraa e te iteraa papu no ni‘a i te hanahana o te ohipa ta tatou e rave nei.¹⁶

Ua faati‘ahia te mou‘a o te fare o Iehova i ni‘a i te tupuai mou‘a, e e tairuru mai te mau taata no te mau fenua atoa i reira [a hi‘o Isaia 2:2]. Na roto i te mau haamaitairaa ta te Fatu i tuu mai i ni‘a i ta ratou ohipa, ua haavîhia e ua uaa te medebara mai te roti ra te huru. E rearea te medebara e te vahi papamaro no ratou ra. [A hi‘o Isaia 35:1] Ua faati‘ahia te mau oire, ua tahe te pape e ua horo‘a i te ora i te fenua marô, ua faaroohia te pehe e te reo o te mau tamarii na roto i te mau aroa tei vai ano noa na e te muhu ore e ra ê te tau.

Ua faati‘ahia te mau hiero i reira i ravehia ai te ohipa faaoraraa no te mau taata e rave rahi, tei ora e tei pohe…

Ia hi‘o ana‘ehia te faati‘a-raa-hia teie Ekalesia, tei ravehia ma te haehaa e te fifi, e ia hi‘o-ana‘e- hia to’na aamu i roto i te hamaniino-raa, te veve, e te oto, e ti‘a anei ia huna e, e ohipa rahi e te maere tei ravehia, e ua tupu te fafauraa a te Fatu, e ua faaitehia mai te mana no te rave i te ohipa ta to’na rima i faataa ia ravehia?

Te hanahana e te tura, ia faaauhia’tu ïa i te Atua to tatou Metua, na roto ia Iesu Mesia, ta’na Tamaiti, e a muri noa’tu, no te mea, o oia te tumu no te mau mea atoa.¹⁷

Teie Evanelia ta Iesu Mesia o ta‘u i farii e o ta outou i farii, o te faanahonahoraa ïa no te ora e no te faaoraraa o tei heheu-faahou-hia mai i to te fenua nei. O te Evanelia atoa ïa tei porohia na e to tatou Fatu o Iesu Mesia…

Ua ite au e, te ora nei te Atua. Ua ite au e, o Iesu te Mesia. Ua ite au e, e peropheta o Iosepha Semita na te Atua. Ua afai au i to‘u rima i ni‘a. Ua ooti au i te hotu o te Evanelia. Ua amu vau i te reira, e e mea au mau, oia ïa, ua hau to’na au i to te mau mea atoa. Ua ite au e, ua maiti te Atua i To’na peropheta Iosepha Semita e ua horo‘a ia’na i te mau arata‘iraa e te mana no te faati‘a i teie ohipa, e te itehia nei i teie nei te mana e te roo o Iosepha Semita mai ta te melahi [Moroni] i parau maira. E haamaitaihia e e faainohia to’na i‘oa i te ao atoa nei [a hi‘o Iosepha Semita— Aamu 1:33], tera râ, e faainohia na te feia ana‘e tei tahitohito ia’na. Te feia tei ite ia’na, te feia tei ite i ta’na mau haapiiraa, ua ite ïa ratou e, e oraraa viivii ore to’na, e ta’na mau haapiiraa, e mau ture ïa na te Atua…

Te parau faahou atu nei au e: Teie atoa te Evanelia tei porohia na e to tatou Fatu o Iesu Mesia, i horo‘a ai Oia i to’na ora ei faaiteraa no te reira, e ua horo‘a-atoa-hia te ora o to tatou Peropheta e Patereareha [Iosepha e o Hairamu Semita] ei faaiteraa i te hanahana o te ohipa ta tatou e rave nei. Te Momoni, mai te au i tei parau-noa-hia, o te Evanelia ïa a te Fatu Iesu Mesia. Ua horo‘a mai te Atua i te hoê iteraa papu ia‘u no ni‘a i teie mau mea.¹⁸

Te mau mana‘o tauturu no te haapiiraa e te aparauraa

No te aha te iteraa papu no ni‘a i te Peropheta Iosepha Semita i riro ai ei tuhaa no te hoê iteraa papu no ni‘a i te Evanelia?
Nahea e noaa ai ia tatou to tatou iho iteraa papu no ni‘a i te hanahana o te misioni a Iosepha Semita? Eaha te mea tei haapaari i to outou iteraa papu no ni‘a i te Peropheta Iosepha Semita?
Eaha te taaêraa e tupu i roto i to tatou oraraa i te mau mahana atoa mai te mea e, e iteraa papu to tatou no ni‘a i te Peropheta Iosepha Semita?
Eaha te tahi mau parau mau tei noaa ia outou no ni‘a i te Metua i te Ao ra e ia Iesu Mesia i to outou feruri-maite-raa i ni‘a i te aamu no te Orama Matamua? (A hi‘o Iosepha Semita— Aamu 1:11–20.) Nahea te iteraa e “Ua au i te Atua iho ia haere mai i te fenua nei e Ta’na Tamaiti here fanau tahi” i te tauturu ia outou?
Nahea te mau mahana hopea nei e riro ai “ei tau tuuraa no te maramarama”? Eaha te mau faaiteraa no te maramarama ta outou e ite nei i roto i te ao nei i teie mahana?
No te aha e mea faufaa ia faaho‘ihia mai te autahu‘araa? Eaha te mau haamaitairaa ta tatou e fana‘o i teie mahana na roto i te faaho‘i-raa-hia mai te autahu‘araa?
Nahea te parau poro‘i no te Faaho‘iraa i te horo‘a mai ia tatou i te ti‘aturiraa, a ora ai tatou i roto i te hoê ao ati?