Pene 23

Te haereraa i mua e te hopearaa o Te Ekalesia a Iesu Mesia i te Feia Mo‘a i te mau Mahana Hopea nei

E faatupu te Ekalesia i to’na hopearaa hanahana, e e hamaitairaa ho‘i no tatou te riroraa ei tuhaa no teie ohipa rahi.

No roto mai i te oraraa o Heber J. Grant

Ua fanauhia o Heber J. Grant i te matahiti 1856, i te tau o te mau tautooraa a te Feia Mo‘a no te faati‘a i Te Ekalesia a Iesu Mesia i te Feia Mo‘a i te mau Mahana Hopea nei, i Salt Lake Valley (Roto Miti). I taua tau ra, e 7 ana‘e tĭtĭ i roto i te Ekalesia nei, e e 64, 000 melo. Aita hoê hiero e tere ra i te reira taime.

I te matahiti 1882, i te faatoro‘a-raa-hia o Heber J. Grant ei Aposetolo, e mauraa papu to te Ekalesia i Salt Lake Valley. E rave rahi mau taata i te ao nei i taua taime ra, tei feruri i te mau mana‘o hape e te ti‘a ore no ni‘a i te Feia Mo‘a i te mau Mahana Hope‘a nei, ua tamau noa râ te Ekalesia i te tupu i te rahi. Ua fatata atu te rahiraa melo i te 146, 000, e ua ta‘ehia te rahiraa tĭtĭ i te 24. E pae matahiti na mua a‘e i te reira, ua haamaitaihia te hiero no St. George i Utaha—te reira ana‘e ïa te hiero e tere ra i taua taime ra.

Ua riro o Elder Grant, te hoê Aposetolo, ei ite papu no te tupuraa o te Ekalesia i te rahi. I te matahiti 1902—e maha hiero ta te Ekalesia e tere ra, e 50 tĭtĭ, e fatata roa e 300, 000 melo—ua parau oia i teie parau: “Aita te hoê mea e vai nei. Aita te Ekalesia e vai noa; te ite nei tatou i teie mahana i to’na tupuraa i te rahi noa, te maraaraa ta’na mau tuhaa ahuru, te maraaraa te hotu o te ohipa misionare ati a‘e te ao nei, e te maraaraa te maitai o te ohipa i roto i te mau pŭpŭ autahu‘araa, e i roto i te mau fare haapiiraa teitei a te Feia Mo‘a i te mau Mahana Hope‘a nei. Ua ite-atoa-hia te hoê tupuraa faahiahia i roto i te mau haapiiraa Sabati. Te haere nei te ohipa a te Atua i mua, area te mana e te raveraa a te enemi e te feia e aro mai nei ia tatou, te morohi atura ïa.¹

I to Heber J. Grant tiaraa ei Peresideni no te Ekalesia, mai te ava‘e Novema 1918 e tae atu i te ava‘e Me 1945, ua vai tamau noa te tupuraa rahi faahiahia o te Ekalesia. Ua maraa te rahiraa melo o te Ekalesia mai te 496, 000 e hau atu i te 954, 000. Ua maraa te rahiraa o te tĭtĭ mai te 75 tae atu i te 149, e ua maraa atoa te rahiraa hiero e tere ra mai te 4 e tae atu i te 7.

E mea pinepine te Peresideni Grant i te faahiti e, te haamata nei te taata i te faatupu i te mana‘o maitai no ni‘a i te Feia Mo‘a i te mau Mahana Hope‘a nei. Te na ô ra oia e, “Te ti‘aturi nei au e, te itehia nei tatou i teie nei, na te mau taata atoa tei matau ia tatou, mai te hoê nunaa taata tei mata‘u i te Atua, mai te hoê pŭpŭ taata afaro e te parau ti‘a.”² I roto i te amuiraa rahi no te ava‘e Atopa 1937, i muri noa a‘e i to’na ho‘iraa mai na te hoê tere farerei to’na i te mau misioni no Europa, ua faaite mai oia i teie nei hi‘oraa:

“Tei Europa vau [ei peresideni misioni, ] hau atu i te 30 matahiti i mairi a‘e nei…i roto i na matahiti e toru to‘u nohoraa i roto i te mau fenua Peretane, aita roa’tu vau i manuia i te tuu i te hoê parau pia i roto i te mau ve‘a. Ua nene‘ihia te tahi mau mea hairiiri roa e te ino, te faufau, te fifi ho‘i no ni‘a ia matou, area te feia faatere o te ve‘a, ua pato‘i etaeta roa ïa ratou ia faaroo mai i te hoê noa a‘e parau ta matou.

“Ua faaitehia mai ia‘u i roto i teie nei tere to‘u e, e mea maitai roa te mau parau i roto i te mau ve‘a no ni‘a ia tatou, i Helemani, i Herevetia, i Tchecoslovaquie, i Horane e i Beletita. Aita roa’tu hoê a‘e mau parau faaino, te tahi noa râ mau parau faaite no ni‘a i ta tatou mau pureraa, e i te tahi taime, te mau parau tei papa‘ihia i roto i te mau ve‘a i te mau fenua Peretane, eita ïa e roaa ia tatou ia papa‘i mai te reira te nehenehe. Te haamana‘o nei au e, aita roa hoê noa a‘e parau pia tei papa‘ihia ma te ore e faaite i te parau maitai, te faatura e te nehenehe no ni‘a i to tatou mau taata. Te oaoa nei au no taua mau mea nei. E tauiraa faahiahia mau to te varua feii e te faaino ta‘u i ite i roto i te feia papa‘i ve‘a ta‘u i farerei na, hau atu i te 30 matahiti i mairi a‘e nei.”³

E mea pinepine te Peresideni Grant i te faaite i to’na mau mana‘o mauruuru no ni‘a i te haereraa i mua o te Ekalesia i te pae tino e i te pae varua. I roto i taua mau faaiteraa no te mauruuru ra, ua faaite oia i te mau haamaitairaa a te Fatu e te haapa‘o o te Feia Mo‘a i te mau Mahana Hope‘a nei, noa’tu te ati tei farereihia e ratou. I roto i te mau taime ahoaho no taua Tau Ati ra, ua parau oia e: “Aita e ti‘a ia tatou ia rave i te mau ohipa ta tatou e rave nei ahani e, aita teie iteraa hohonu e te paari to tatou. A feruri na tatou, i roto i teie mau mahana ati e te peapea, ua ti‘a ia tatou ia haamau‘a ehia rahiraa milioni moni no te hamani i te mau fare pureraa! Fatata pauroa te Sabati, e rave rahi hepetoma, te tahi i muri iho i te tahi, ua titauhia ia‘u ia haamaitai i te mau fare pureraa, e pauroa te taime, ua î roa taua mau fare ra i te feia tei tae mai i taua mau pureraa ra…Te tupu nei tatou i te rahi ma te nehenehe. Te vai nei te mana‘o ti‘aturi papu. Te vai nei te ti‘aturiraa papu e, e upootia te ohipa a te Atua ia tae i te hopea ra.⁴

Te mau haapiiraa a Heber J. Grant

E hopearaa hanahana to Te Ekalesia a Iesu Mesia i te Feia Mo‘a i te mau Mahana Hopea nei.

Te faaite atu nei au ia outou i teie mahana i to‘u iteraa papu e, e Peropheta Iotepha Semita na te Atua ora mau, e ua riro oia ei mauhaa i roto i te rima o te Atua no te faati‘a faahou i te faanahoraa no te ora e no te faaoraraa i ni‘a i te fenua nei, eiaha no te feia ora ana‘e, no te feia pohe atoa râ, e teie Evanelia, ta to te ao nei e parau nei e, “Te Momoni”, o te faanahoraa mau ïa no te ora e te faaoraraa, te Evanelia na te Fatu ra o Iesu Mesia, e ua ootihia mai te ofa‘i na‘ina‘i mai roto mai i te mou‘a ra, e e ohu ho‘i te reira e î roa’tu te fenua nei [a hi‘o Daniela 2:31–45; PH&PF 65:2].⁵

Ua faati‘a te Fatu i Ta’na Ekalesia i teie anotau hopea nei ia ti‘a i te taata ia faauehia ia tatarahapa, ia faaorahia e ia faateiteihia ho‘i to ratou ra varua. E rave rahi taime To’na parauraa i te Peropheta Iotepha e i te mau taata i piha‘i iho ia’na e “inaha, ua teatea roa te aua e ua ineine ho‘i no te auhune.”(PH&PF 4:4; 6:3; 11:3; 12:3; 14:3; 33:3, 7.) E ua tamau noa Oia i te faaue ia ratou ia poro i te tatarahaparaa ana‘e i teie nei u‘i (PH&PF 6:9; 11:9; 14:8) e na ô maira:

“E e faaite haere i te mau parau oaoa, oia ïa, a haaparare i te reira i ni‘a i te mau tupuai mou‘a, e i ni‘a i te mau vahi teitei atoa, e i rotopu i te mau nunaa taata atoa o ta oe e faati‘ahia ia ite ra.

“E e rave oe i te reira ma te haehaa‘toa, ma te ti‘aturiraa mai ia‘u, e mai te faaino ore ia ratou o tei faaino mai ra.

“E e ore roa oe e parau i te parau haapiiraa noa, e parau râ oe i te parau tatarahapa e te faaroo i te Faaora, e te haamatararaa i te hara na roto i te bapetizoraa, e na roto i te auahi, oia ïa, te Varua Maitai.

“Inaha, o teie te hoê faaueraa rahi e te mea hopea ta‘u e horo‘a’tu ia oe no ni‘a i teie nei mea; no te mea e navai te reira no ta oe hahaereraa i roto i te mahana ra, e tae noa’tu i te hopea o to oe oraraa ra.

“E e mamae rahi ta oe e farii mai te mea e haapa‘o ore oe i teie nei mau a‘oraa, oia ïa, e tae noa’tu te reira i te haamouraa ia oe iho e ta oe mau faufaa ho.” (PH&PF 19:29–33.)

E haapa‘o tatou i teie mau faaueraa e ti‘a ai, ia ite ho‘i te taata i te Atua e ia Iesu Mesia i Ta’na i tono mai, inaha, “teie ho‘i te ora mure ore.” (Ioane 17:3.)

O teie ho‘i te tumu i faati‘ahia ai te Ekalesia, i heheu-faahou-hia mai ai te Evanelia i roto i to’na ra îraa, i faaho‘i-faahou-hia mai ai te Autahu‘araa o te Atua, e to’na mau ti‘araa atoa, to’na mau mana atoa, to’na mau taviri atoa e ta’na mau ohipa atoa. Teie te ohipa a te Ekalesia. Te faaueraa hanahana tei horo‘ahia’tu i te mau aposetolo i tahito ra (Mataio 28:19; Mareko 16:15) ua horo‘a- faahouatoa-hia mai ïa i teie nei anotau, oia ho‘i, e hopoihia’tu te Evanelia i to te mau nunaa atoa ra (PH&PF 38:33), i te Atiuda e te Etene ho‘i (PH&PF 18:26); e faaitehia’tu te reira ma te oaoa (PH&PF 28:16); e tere atu te reira e tae noa’tu i te mau hopea o te fenua nei (PH&PF 84:76.) Aita hoê ohipa ta tatou e aore râ, ta te Ekalesia e rave no te haapeapea i teie faaueraa ta te Atua i horo‘a mai.⁶

Te misioni a Te Ekalesia a Iesu Mesia i te Feia Mo‘a i te mau Mahana Hopea nei, e misioni ïa no te hau. Ua faataahia te reira no te faaineine i to te ao nei no te ho‘i-piti-raa mai o te Mesia, e no te omuaraa o taua mahana rahi ra ia tae mai te mileniuma, e ia faatere te Mesia ei Arii no te mau arii, ma te ti‘a i te upoo o te hui taea‘e o te taata nei.⁷

Ua riro te tupuraa e te haereraa i mua o te Ekalesia i tahito ra ei tapa‘o no te tupuraa o te parau tohu.

Te mau ohipa tei ravehia e te Feia Mo‘a i te mau Mahana Hope‘a nei, ua tupu mau ïa te reira mai te au i te parau tohu tei vavauhia e te Peropheta Iotepha Semita i te hiti anavai no Mississippi, mai tei papa‘ihia i roto i te buka aamu o te peropheta i te 6 no Atete 1842:

“Ua tohu vau e, e tamau â te Feia Mo‘a i te farii i te mau ati e rave rahi e e arata‘ihia’tu ratou i te mau Mou‘a Ofa‘i ra. E rave rahi te taiva, e taparahi-pohe-hia te tahi pae e to ratou mau taata hamani ino e aore râ, e pohe ratou i te to‘eto‘e e aore râ i te ma‘i, area te tahi pae o outou ra, e ora ïa no te haere e tauturu i te haamauraa i te mau mataeinaa e te paturaa i te mau oire, e ia ite i te Feia Mo‘a ia riro mai ei nunaa puai i roto i te mau Mou‘a Ofa‘i ra.” [History of the Church, 5:85.]

…Ua faatupu mau tatou i taua parau tohu ra noa’tu te parau e, e mea faufaa ore te pae tooa o te râ. Ia feruri ana‘e outou i tera fenua màrô, ia feruri ana‘e outou e, ua faarirohia ei fenua faufaa ore, e a ite ai i te ohipa i ravehia, e mea papu maitai e, ua faatupu mau tatou i taua parau tohu ra.⁸

Te oaoa nei au i te tupuraa i te rahi e te haereraa i mua te ohipa a te Atua i ni‘a i te fenua nei…Te haamana‘o nei au i te hoê taime i Idaho, tei reira te Peresideni Wilford Woodruff, te ti‘a noa ra oia i roto i te hoê pereoo puaahorofenua, …e te paraparau ra i te tahi mau taurearea e ono e aore râ hoê ahuru e ma piti ratou i reira, e te haamana‘o papu nei au i te mau parau a taua peropheta no te Atua ra…Te haamana‘o nei au e, ua huru paruparu rii te mana‘o o te mau taurearea i Sand Creek, i to ratou hi‘oraa i te fenua, aita hoê a‘e raau i ni‘a iho, aita atoa e uru raau rii, te tahi noa râ mau aihere rii faano‘ano‘a, aita atoa e hoê a‘e fare raau. Ua parau atura te Taeae Woodruff i te mau taurearea na ô atura: “Eiaha e haaparuparu te mana‘o; eiaha e faatopa te morare, no te mea, ua haamaitai te Atua i teie fenua. Eita e maoro roa e ti‘a mai i teie vahi e rave rahi oire rii no te Feia Mo‘a i te mau Mahana Hope‘a nei. Te feruri nei outou e, ua faaru‘e outou i to outou mau hoa, e mai te mea ra e, tei rapae roa outou i te ao nei i teie nei, eita râ e maoro e ti‘a mai te hoê fare pure na outou, e te hoê fare haapiiraa, e te mau mea atoa tei itehia e outou hou a tere mai ai outou i ô nei. E haamaitai mai te Atua i teie fenua e e faariro ei fenua auhune.” Eaha te itehia nei i teie mahana? Te ti‘a nei te oire no Iona i tera vahi, e te mau pû faatereraa no te hoê o te mau tĭtĭ no Ziona, e te rahiraa taata fatata e pae tauatini, e ere atura ho‘i e ono e aore râ e hitu ana‘e taurearea; Ua tupu te mau parau a te Peropheta Wilford Woodruff e hope roa a‘e.⁹

Ia feruri ana‘e au i te mau mea atoa tei tupu i roto i te ohipa a te Atua, mea fifi roa na‘u ia imi i te parau no te arue i te mau mea atoa i ravehia.¹⁰

Te feruri nei au e, ua riro te mau hamani-ino-raa e te mau ati atoa tei farereihia e tatou, ei faaineineraa e ei haapaariraa ia tatou no te mau mea teitei a‘e.¹¹

Ua riro mau te Feia Mo‘a i te mau Mahana Hope‘a nei mai ta te Peropheta Iotepha i parau ra, ei nunaa puai i roto i te mau Mou‘a Ofa‘i ra, e tei te omuaraa noa â tatou. Te haamata nei tatou i te tupu i te rahi e ia riro mai ei nunaa puai, aita iti nei teie, ia faaauhia i to tatou huru araua‘e iho.¹²

Aore e mea e tapea i te Ekalesia ia faatupu i to’na ra haerea.

I te mau matahiti atoa, e puai rahi a‘e to te Ekalesia i to te matahiti na mua’tu. Te haere nei te Ekalesia i mua, aita e haere nei i muri. E hape â te taata, area te Ekalesia ra, e vai papu noa ïa.¹³

Ua feruri te enemi o te taata nei, te haamou, oia te haamou roa i te ohipa a te Atua, o’na e to’na ho‘i mau teuteu e, na roto i te taparahi-pohe-raa i te Peropheta [Iotepha Semita] e te Patereareha [Hyrum Smith] e nehenehe ïa ta ratou e faataupupu i te ohipa a te Atua ora tei faati‘a-faahou-hia i ni‘a i te fenua nei; tera râ…te tupuraa nehenehe o te Ekalesia, te hiero nehenehe o te Atua i [Salt Lake City], to tatou fare menemene nehenehe, te pû faatereraa o te Ekalesia…, te mau patu haamana‘oraa e te mau hiero, mai Canada e tae atu i Vaihi, e i Saint George, e te haere-raa-rahi i mua o te ohipa a te Atua, —ua riro teie mau mea atoa ei faahaparaa etaeta i te feia tei feruri e, e nehenehe ta ratou e tapea i te ohipa a te Fatu. Te iteraa papu no ni‘a ia Iesu Mesia tei ama i roto i te aau o te Peropheta e o te Patereareha, te tumu ho‘i i horo‘a ai raua i to raua ora, te ama atoa nei ïa i roto i to tatou aau paatoa, tatou tei farii i te haamaitairaa no te maramarama, no te ite e no te iteraa papu no ni‘a i te hanahana o te ohipa ta tatou e rave nei.¹⁴

Te feruri nei te tahi mau taata e…mai te mea e, e rave teie Ekalesia mai te raveraa o teie tau, oia ho‘i, mai ta te tahi mau ekalesia e na reira nei, eita ïa oia e upootia. Te Feia Mo‘a atoa i te mau Mahana Hope‘a nei o te feruri nei hoê noa a‘e minuti e, eita teie Ekalesia e manuia, e ere ïa ratou i te Feia Mo‘a i te mau Mahana Hope‘a nei faafariu-mau-hia. Aita e ohipa aita e upootia i roto i teie Ekalesia. Teie ho‘i to’na faati‘araa hopea, e ore roa oia e riro faahou i roto i te rima o te tahi atu nunaa, e e ore roa ho‘i e haamou-faahou-hia.¹⁵

Aitâ te mau enemi i rave a‘e nei i te hoê mea tei haapepe i teie ohipa ta te Atua, e eita roa’tu ratou e manuia. Te hi‘o nei au i te mau vahi atoa, te tai‘o nei, te feruri nei e te uiui nei. Tei hea a‘e nei te mau taata mana e te ti‘araa teitei, tei aro a‘e nei i te Feia Mo‘a i te mau Mahana Hope‘a nei?…Tei hea a‘e nei te nunaa no te faahanahana ia ratou? Aita ratou e itehia…Tei hea a‘e nei te mau taata tei aro mai i teie ohipa? Tei hea to ratou mana? Ua mo‘e ê ïa mai te hupe e tahe i ni‘a i te mahana ra. Eiaha tatou e mata‘u, tatou te Feia Mo‘a i te mau Mahana Hope‘a nei. E turu tamau noa te Atua i teie ohipa; e paturu ho‘i Oia i te parau ti‘a.¹⁶

Te ora nei te Atua, o Iesu te Mesia, e peropheta o Iotepha Semita na te Atua ora mau; e teie ohipa tei parauhia “Te Momoni” o te Evanelia ïa a Iesu Mesia to tatou Faaora, e o te faanahonahoraa ïa no te ora e te faaoraraa; e eita ho‘i te ti‘aturi ore o to te ao nei, e te mau pato‘iraa atoa a to te ao nei, e nehenehe e tapea i te reira, inaha, na te Atua i faati‘a i te reira, e haere ho‘i te reira e tae roa’tu i te taime e tupu hope roa ai to’na ra haerea!¹⁷

E faati‘amâ tatou ia tatou no te rave i te ohipa i roto i te tereraa o te Ekalesia.

E rave rahi te mau mea faahiahia ta te Atua i fafau mai no teie nunaa. Tei mua ia tatou te hoê haerea nehenehe, e te faaineine tamau maite nei tatou ia tatou ia ô tatou i roto i taua haerea ra.¹⁸

Mai te mea e te vai nei te hoê mea tei hau atu i te tahi o ta‘u e hinaaro nei e haapapû maitai i roto i te aau o te Feia Mo‘a i te mau Mahana Hope‘a nei, o te aniraa ïa ia tatou ia tavini maite i te Atua ma to tatou puai atoa, to tatou aau atoa, ia tuati noa ho‘i to tatou haereraa i mua i te haereraa i mua o ta’na ohipa i ni‘a i te fenua nei.¹⁹

E haerea faahiahia te haerea o te Feia Mo‘a i te mau Mahana Hope‘a nei. Ua ite au e, te mau parau tohu atoa tei tohuhia no ni‘a i teie nunaa taata, e hope paatoa te reira i te tupu. Te ofa‘i iti tei ootihia mai roto mai i te mou‘a ma te rima ore, e ohu ïa e î roa’tu te fenua nei. Te ite nei au e, e mea ti‘a i ta tatou mau tamarii ia ineine, ia ti‘amâ, e ia faaineinehia na roto i te haapiiraa, e na roto atoa i te faaroo i te Atua, to tatou Metua i te Ao ra, e i Ta’na ra Tamaiti o Iesu Mesia ra, ia upootia ho‘i ratou i roto i to ratou haerea. Ua papu roa ia‘u e, e faatupu mau te Feia Mo‘a i to ratou haerea, e rave atoa ratou i te mau mea atoa ta te Atua i titau mai ia ratou ia rave. No tatou râ te taata hoê nei, tei ia tatou iho ïa te raveraa i te mau mea atoa te ti‘a ia tatou ia rave. Ua parau pinepine au i roto i ta‘u mau parau i ni‘a i te Feia Mo‘a e, o tatou iho te taata patu i to tatou oraraa; e haamaitai mai te Atua ia tatou ia au i to tatou haapa‘o e to tatou itoito.²⁰

Ua papu roa ia‘u e, e faarahi te Fatu i te Feia Mo‘a i te mau Mahana Hope‘a nei, e e rahi atu â Ta’na haamaitairaa ia ratou i te mau tau a muri a‘e, aitâ Oia i na reira a‘e nei i mua a‘e nei, mai te mea e, e vai haehaa tatou e te itoito; mai te mea e, e imi tatou i te rave‘a no te faahaere i te basileia o te Atua i mua, eiaha râ e haapa‘o i to tatou feruriraa e to tatou hinaaro. Ua faaho‘i- faahou-hia mai ia tatou nei te Evanelia a Iesu Mesia; tei ia tatou nei te faanahonahoraa no te ora e te faaoraraa; tei ia tatou nei te mau oro‘a no te Evanelia eiaha no te feia ora ana‘e no te feia pohe atoa râ. Tei ia tatou nei te mau mea atoa e titauhia, eiaha no to tatou ana‘e faaoraraa, ia riro mau râ tatou ei mau “Faaora i te Mou‘a no Ziona”, [hi‘o Obadia 1:21] e ia tomo i roto i te mau hiero o to tatou Atua e ia faaora i to tatou mau tupuna tei pohe ma te ite ore i te Evanelia.²¹

Mai te mea e, e haapa‘o maitai tatou, mai te mea e, e mea ti‘amâ tatou i roto i te Evanelia, ta te Atua ho‘i i horo‘a mai i te iteraa papu no te reira, aita roa’tu e peapea ia haapepe mai to te ao nei ia tatou. Eita roa’tu to te tahuti nei e nehenehe e haapepe mai ia tatou, e au mau taea‘e e au mau tuahine e, maori râ, na tatou iho e haapepe ia tatou. Ia ore tatou e tavini i te Atua, ia ore tatou e rave i te ohipa ti‘a, te faaere ra ïa tatou ia tatou iho i te ti‘araa e te mana no te tupu i te rahi, no te faarahi i to tatou faaroo e to tatou ite, no te farii atoa i te mana i piha‘i iho i te Atua e i piha‘i iho i te feia parau ti‘a ra.²²

E ere i te parau hape ia tohu e, e tamau noa te mau taata o Te Ekalesia a Iesu Mesia i te Feia Mo‘a i te mau Mahana Hopea nei i te tupu i te rahi e i te haere i mua i te pae varua e i te pae tino nei, mai te mea e, e tamau noa ratou (1) i te haapa‘o i te mau faaueraa a te Atua e (2) i te haapa‘o tamau noa i te haerea o Ta’na e faaite mai na roto i To’na mau tavini faauruhia tei mau i te Autahu‘araa Mo‘a. E mau taata ïa o te riro ei haamaitairaa e ei maitai no te nunaa taatoa, na roto i to ratou faaroo, ta ratou mau haapiiraa, to ratou tarani, e to ratou haereraa i mua i te pae tino e i te pae varua. E mau taata aita e mata‘u to roto ia ratou, e haamaitai râ e e farii maitai ratou, no te mea, o te hinaaro o te Fatu ta ratou e titau ia rave, e no te mea atoa, e peu ti‘a e te paieti ta ratou e rave i ni‘a i te mau taata atoa, inaha, e feia haapa‘o ho‘i ratou iho i te mau ture, ma te haapa‘o i te mau ture e te mau arata‘iraa o te mau faatereraa hau ti‘a o te fenua nei, e te Evanelia ora a Iesu Mesia, tei faati‘ahia e tei faaho‘i-faahou-hia mai na roto i te mauhaa ra o Iotepha Semita, na roto i te fâraa mai te Atua e Ta’na ra Tamaiti, o Iesu Mesia, o te ti‘a nei i te upoo o te ohipa rahi e te umerehia o ta tatou e rave nei. “Te Parau Mau e te Ti‘amâraa”, ta ratou ïa parau poro, e e faatae ratou i te reira i te mau taata atoa, ma te titau i te mau taata atoa ia farii i te faaururaa o te hau e te parau ti‘a e vai ra i roto i te Evanelia a Iesu Mesia—te rave‘a hoê roa e ti‘a ai i te hau e te autaea‘eraa o te taata nei ia tupu i te ao atoa nei.²³

Te mau mana‘o tauturu no te haapiiraa e te aparauraa

Eaha te haerea o Te Ekalesia a Iesu Mesia i te Feia Mo‘a i te mau Mahana Hopea nei?
Eaha te mea e faaite papu mai nei i teie mahana e, ua riro te mau melo no Te Ekalesia a Iesu Mesia i te Feia Mo‘a i te mau Mahana Hopea nei ei “nunaa taata puai”? No te aha te Ekalesia i tupu ai i te rahi mai teie te huru?
Eaha te haapiiraa e roaa mai ia tatou mai roto mai i te mau tautooraa a te Feia Mo‘a i tahito ra no te upootiaraa i ni‘a i te mau ati, e no te paturaa i te basileia o te Atua?
Eaha te faaauraa i rotopu i te haereraa o te Ekalesia i mua i te tau o te Peresideni Grant e i to teie tau?
Nahea te iteraa e, “teie [te faati‘araa hopea o te Ekalesia], e ore roa oia e riro faahou i roto i te rima o te tahi atu nunaa, e e ore roa ho‘i e haamou-faahou-hia”, i te tauturu ia outou?
Nahea tatou i te tauturu i te faatupuraa i te haerea o te Ekalesia? Nahea te mau metua ia tauturu i ta ratou mau tamarii “ia ineine, ia ti‘amâ, e ia faaineinehia” no te tauturu i taua haerea ra?