Pene 4
Te tamau-maite-raa
Na te imi-tamau-maite-raa i te mau hinaaro ti‘a e tauturu ia tatou ia faananea i to tatou mau taleni, ia faatupu i ta tatou mau opuaraa pae varua, e ia tavini ia vetahi ê.
No roto mai i te oraraa o Heber J. Grant
I roto i to’na oraraa taatoa, ua rave itoito o Heber J. Grant i te ohipa no te haamaitai ia’na iho, ma te ti‘aturi e, “e nehenehe te taata tataitahi e haamaitai ia’na i tera mahana e tera mahana, i tera matahiti e tera matahiti, e ia rahi roa’tu to’na ite no te rave i te mau ohipa i roto i te roaraa o te tau.”1 Ua itehia oia no to’na huru rave tamau-maite, e te parauhia ra no ni‘a ia’na e, “aita roa oia e tahitohito i te paruparu o te tahi atu mau taata, e aro râ oia i to’na iho.”2 Ua faati‘a oia i teie aamu no ni‘a i te hoê taime i to’na apîraa a faaite ai oia i tera huru rave tamau-maite to’na:
“I to‘u faaôraa ia‘u i roto i te hoê pŭpŭ tairi popo, te mau tamaroa e hoê â to matou matahiti, ua hauti ratou i roto i te pŭpŭ iva matamua, tera mea apî a‘e ia‘u, ua hauti ratou i roto i te piti o te pŭpŭ, e tera mea apî roa’tu ia‘u, ua hauti ïa i roto i te toru o te pŭpŭ, e tei roto vau ia ratou i te hautiraa. Te hoê o te mau tumu no te reira, no te mea ïa e, aita ta‘u e nehenehe e taora i te popo mai te tahi ti‘araa e tae atu i te tahi; te tahi atu tumu no te mea ïa e, aita i navai to‘u puai no te horo e aore râ, no te tairi maitai. Ia noaa te popo ia‘u, e tuo noa te mau tamaroa e, ‘Taora mai i ô nei, sissy!‘ Ua rahi roa te arearea o to‘u mau hoa taurearea no ni‘a ia‘u, no reira, tapu ihora vau ma te hanahana e, e hauti au i te tairi popo i roto i tera pŭpŭ iva matamua o te haru mai i te ti‘araa aito no Utaha.
“I taua taime ra, te haapa‘o ra to‘u mama i te mau taata e piha tarahu to ratou, no te tauturu i te oraraa, e na‘u e faaanaana i to ratou tiaa e tae roa’tu e ua noaa hoê tara marite ia‘u, no te hoo mai i te hoê popo. E ua pau ia‘u e rave rahi hora i te taora-noa-raa i te popo i ni‘a i te fare faaapu a te hoê taata tapiri mai i ô matou, (no Edwin D. Wooley) i parau ai oia e, o vau ïa te hoê tamaiti hupehupe roa a‘e i roto i te Paroita Ahuru Ma Toru. E mea pinepine to‘u rima i te mauiui e aita e afaro maitai te taotoraa i te pô. Ua tamau noa râ vau i te haapii ia‘u, e tae roa’tu e, ua faati‘ahia vau e hauti i roto i te pŭpŭ piti o ta matou taatiraa. I muri mai, ua faaô atu vau ia‘u i roto i te hoê pŭpŭ maitai a‘e, e ua hauti au i roto i te pŭpŭ tei rê te ti‘araa aito no to matou Tuhaa Fenua. E no te mea ua tupu te fafauraa ta‘u i fafau ia‘u iho, ua faaea vau i te hauti i te tuaro tairi popo.”
I muri a‘e, ua faite papu te Peresideni Grant e, “ua mau‘a” te “rahiraa hora e te rahiraa mahana e te rahiraa hepetoma e te rahiraa ava‘e” ia’na i te taoraora-noa-raa i te popo i ni‘a i te fare faaapu o to’na taata tupu. Te parau ra oia e: “Ua maere au i te mea e, … aita vau i ô i roto i te hoê ohipa teitei roa e tano i to‘u natura… Tera râ, hoê ohipa tei faatupuhia na roto i teie ohipa hauti popo tei ravehia e au, oia ho‘i, te faatupuraa i te hoê fafauraa tei fafauhia ia‘u iho.”3
Ua rave tamau atoa te taurearea Heber J. Grant i te haapii ia’na i te hauti pata poro, ua faananea i to’na ite i te tarame, e ua faananea i te ite i te papa‘i.
Na roto i to’na haapiiraa i roto i to’na apîraa i te puai o te rave- tamau-maite, ua tamau noa oia i te faaohipa i te reira ture e paari noa mai nei oia. Hoê hi‘oraa, ua faaoti oia e, e haapii oia i te himene. Te parau ra oia e: “I te tau e iva to‘u matahiti, ua tamata vau i te himene. Ua tamata vau e rave rahi taime, mai te mea ra e, aita hoê apî i noaa mai. Ia tae‘ahia to‘u matahiti i te maha ahuru ma toru, te vaira to‘u papa‘i parau, e reo baryton nehenehe roa to’na. Ua parau vau ia’na e horo‘a vau i te mau huru mea atoa i te ao nei mai te mea e, e nehenehe ta‘u e himene i te nota noa a‘e o te himene. Ua ata oia e ua parau mai e, ‘Pauroa te taata e reo to ratou e te rave-tamau-maite, e nehenehe ta ratou e himene.’ Ua maiti oioi atura vau ia’na ei orometua haapii himene no-‘u.
“Ua haamaata ta‘u haapiiraa himene i te reira ihoa pô. Ia hope e piti hora haapiipiiraa, aita hoa ta‘u e nehenehe e himene hoê reni o te himene ta maua i haapii. I muri a‘e i to maua haapiiraa i taua himene ra hau atu i te pae tauatini taime, ua himene au i mua i te taata, e ua hape roa ta‘u himeneraa. Ua tamau â vau i te haapii faahou i te reira himene e ono ava‘e faahou i te maoro. I teie nei, e nehenehe ta‘u e tamau hoê himene i roto i te tahi tau hora rii.”4
Ua vai hau noa te Peresideni Grant i roto i ta’na tautooraa no te haapii i te himene, e aita oia i vaiiho i to’na mau hape e aore râ, te feia ata e te faaino a vetahi ê, ia faatopa i to’na mana‘o. I roto i te hoê a‘oraa na’na i te feia apî o te Ekalesia, ua parau oia e:
“I te taime a haapii ai au i te himene, …e haapii au hoê himene i te mahana, ahuru ma piti taime i roto i te hoê taime haapiiraa. E toru irava to te himene; no reira e toru ahuru ma ono ïa irava ta‘u e himene, e i roto i te hoê irava e hape au e pae taime, no reira, 180 ïa hape i roto i te haapiiraa hoê, e aita roa hoê mea e mau ia‘u. I te taime matamua a haamata ai au i te haapii i te himene, haere e toru e tae atu i te maha ava‘e e pau ia‘u no te haapii noa e piti himene ohie roa. I te tahi tau hepetoma i mairi a‘e nei, ua haapii au i te hoê himene i roto noa e toru hora te maoro—afa hora haapiipiiraa i te mau pô atoa i roto i te rahiraa e ono mahana, e ua mau maitai.”5
E mea pinepine te Peresideni Heber J. Grant i te faahiti i teie parau, tei parauhia i te tahi taime e, na Ralph Waldo Emerson: “Ia rave-tamau-maite noa tatou i te hoê ohipa, e riro mai te reira ei ohipa ohie no tatou ia rave—e ere e, ua taui te natura o taua ohipa ra, ua rahi atu râ to tatou puai no te rave i te reira.”6 Ua faaite mai te Peresideni Grant i te hoê hi‘oraa no teie parau mau, i roto ihoa râ i te parau no te taviniraa i te Fatu. Noa’tu te mau fifi e vaira, mai te oraraa veve e te pohe oioiraa to’na metua tane, ua haapa‘o-tamau-maite noa oia i te mau faaueraa, ua rave-tamau-maite noa i to’na mau piiraa i roto i te Ekalesia, e ua rave-tamau noa i te mau mea atoa e ti‘a ia’na ia rave no te patu i te basileia o te Atua i ni‘a i te fenua nei.
Te mau haapiiraa a Heber J. Grant
E nehenehe ta tatou e faaoti i te mau huru opuaraa maitai atoa mai te mea e, e rave-tamau- maite tatou.
Te ti‘aturi nei au e, e nehenehe ta tatou e faaoti i te mau huru opuaraa atoa ta tatou e feruri ra, e aita e tamaroa e aore râ e tamahine e ti‘a ia parahi noa e ia parau e, eita ratou e rave i te hoê noa a‘e ohipa no te mea eita ta ratou e nehenehe e rave maitai mai ta te tahi atu taata e rave. Ua horo‘a te Atua hoê ahuru taleni i te tahi mau taata; e hoê taleni na te tahi atu; te feia râ tei faahotu i te taleni hoê ra, e ora ïa ratou e tae roa’tu i te mahana e ite ai ratou i to ratou maitai rahi, hau atu i to te feia tei horo‘ahia hoê ahuru taleni e aita râ i faahotu i te reira.7
Te haapa‘o maitai, te ahonui (tamau-maite), e te hinaaro tuutuu ore, tera ïa te mau huru e tauturu ia outou ia upootia i roto i te aroraa o te oraraa nei.8
Te ti‘aturi nei au e, ia ore tatou e faatupu i te hinaaro puai no te faaoti e no te rave i te tahi mau mea, aita to tatou e parau rahi i roto i te aroraa o te oraraa nei. I teie tau, aita e ohipa oto atu ta‘u e ite nei maori râ te iteraa i te rahiraa o to tatou mau taata e faaru‘e nei i te varua o te parau ti‘a e o te haapa‘o e o te hinaaro rahi ia rave i te ohipa. Mai te mea ra ia‘u e, ua hape te mau mea atoa. E mea ti‘a ia vai i roto i te mau taata atoa te hinaaro ia faarahi i te ite no te rave i te ohipa. Aita e ohipa e oti na roto i te faatupu-noa-raa i te mana‘o e te hinaaro. E apiti râ tatou i te ohipa i taua hinaaro ra, no te faatupu i te mau mea ta tatou e hinaaro nei. Ua papu roa ia‘u e, te hoê taurearea tei oaoa maitai i te ohipa ta’na e rave nei, noa’tu te ha‘iha‘i o te reira ohipa, aita râ e hinaaro puai i roto ia’na, e vai noa oia i te vahi hoê. Ua papu râ ia‘u e, e nehenehe te taata tataitahi e haamaitai ia’na i tera mahana e tera mahana, i tera matahiti e tera matahiti, e ia rahi roa’tu to’na ite no te rave i te mau ohipa i roto i te roaraa o te tau. Te ti‘aturi nei au i te reira ma to‘u aau atoa.9
Na roto i te raveraa e te rave-tamau-noa-raa e riro mai ai tatou ei feia aravihi i roto i te mau huru toro‘a atoa e aore râ, i roto i te mau mea atoa o te oraraa nei, i te pae faaroo anei e aore râ, i te pae ite o te ao nei.10
Aita vau i ite i te rave‘a ohie e roaa ai te manuia. Tamau noa, tamau noa, TAMAU NOA; ohipa, ohipa, OHIPA—te reira te mea faufaa i roto i te aroraa o te oraraa nei.11
E titauhia te tamau-maite-raa no te ti‘araa i ni‘a i te e‘a e tae atu ai i te ora mure ore ra.
Ua ite au e, e titauhia ia tatou paatoa ia tautoo tamau noa, ei reira to tatou oraraa e manuia ai. Aita e tautooraa e titauhia no te tere mai i raro i te aivi, area no te ta‘uma i ni‘a i te tupuai o te aivi ra, e titauhia ïa te tautooraa. Aita e tautooraa no te haere na ni‘a i te e‘a aano e tae atu ai i te pohe ra; area no te ti‘a maite i ni-‘a i te e‘a titiaifaro e te pirihao e tae atu ai i te ora mure ore ra, e tituhia ïa te tautooraa.12
Te feruri nei au e, eiaha roa’tu tatou e faatopa i te mana‘o…Te ti‘aturi nei au e, mai te mea e, e faaoti tatou i roto i to tatou aau, na roto i te haamaitairaa a te Atua to tatou Metua i te Ao ra, e rave tatou i te hoê ohipa, e horo‘a mai te Atua i te ite ia tatou no te faaoti i te reira ohipa; mai te mea râ e, e faaru‘e tatou, mai te mea e, e haaparuparu tatou, mai te mea e, e hi‘o tatou i ni‘a i te mou‘a a parau ai e, eita e nehenehe e ta‘uma i ni‘a i te tupuai, aitâ ho-‘i tatou i tautoo atura, eita roa’tu ïa taua ohipa ra e oti.
Ua parau atu o Nephi i to’na metua tane e, e haere oia e rave i te mau mea ta te Fatu i faaue maira [a hi‘o 1 Nephi 3:7], e i te oreraa to’na na taea‘e e manuia i te rave mai i te mau papaa parau e ua ho‘i mai raua ma te topa te mana‘o, aita oia i haaparuparu…Ua parau atu oia i to’na na taea‘e: “Te ora ra te Fatu, e te ora nei ho‘i tatou, e ore tatou e haere i raro i to tatou metua i te medebara, e ia faati‘a tatou i te mea ta te Fatu i faaue mai ia tatou ra.” [1 Nephi 3:15.] Teie nei, tatou e te Feia Mo‘a i te mau Mahana Hopea nei, e haamana‘o tatou e, ua manuia o Nephi; haamana‘o tatou e, i mua i te mau fifi, ua roaa mai ia’na te mau papaa parau tei roto i reira te mau parau tao‘a rahi na te Atua; ua roaa ia’na te parau faufaa rahi; e parau aita e faaauraa to’na faufaa no to’na mau huaai, e ahiri e, aita te reira, e mea fifi roa ïa no ratou e rave rahi ia imi i te e‘a titiaifaro e te pirihao e tae atu ai i te ora mure ore ra.
Mai te mea e, te vaira te hoê huru i roto i te Buka a Moromona tei au-roa-hia e au, hau atu i te tahi, e tei au-roa-hia e au to’na hoho‘a, o te huru ïa o Nephi i tahito ra; aita oia e haaparuparu, aita e faatopa te mana‘o, ua vai ineine noa oia i te mau taime atoa, e te hinaaro mau ia rave i te ohipa ma te faahope i to’na aravihi, no te faatupu i te mau opuaraa a te Atua.13
Mai te mea e, e hinaaro outou ia ite e, nahea outou e ora ai, e nehenehe ta‘u e faaite atu ia outou; na roto ïa i te haapa‘oraa i te mau faaueraa a te Atua. Aita e mana i ni‘a i te fenua nei, aita e mana i raro a‘e i te fenua nei, e tapea ia outou, e aore râ, ia‘u e aore râ, i te Feia Mo‘a i te mau Mahana Hopea nei, ia faaorahia, maori râ, tatou iho. O tatou te tamuta i to tatou iho oraraa, e eiaha i teie noa nei oraraa, te ora mure ore atoa râ. E nehenehe ta tatou iho e rave i te mau ohipa atoa e te mau titauraa atoa ta te Atua i titau mai i te taata nei. Aita e faaueraa i horo‘ahia ia tatou ma te ore te Atua e horo‘a mai i te mana ia tatou no te haapa‘o i taua faaueraa ra. Mai te mea e, aita tatou i manuia, o tatou e o tatou ana‘e iho ïa te tumu no te reira manuia ore, no te mea, ua horo‘a mai te Atua i To’na mau tavini, mai te Peresideni o te Ekalesia e tae roa’tu i te melo haehaa roa a‘e, i te mau aravihi atoa, te mau ite atoa, te mau mana atoa i titauhia, ia ti‘a ia tatou ia faatiamâ ia tatou, na roto i te faaroo, te itoito e te ti‘a ho‘i, i te mau ohipa atoa e te mau titauraa atoa i tuuhia i ni‘a ia tatou, e na tatou e na tatou ana‘e e amo i te hopoia mai te mea e, aita tatou i manuia i reira.14
Te faaroo e te ite aore e ohipa e mea faufaa ore ïa. Aita e faufaa to te taatoaraa o te ite i roto i te ao nei mai te mea e, aita tatou e faaohipa i te reira ite. O tatou te tamuta e te feia patu i to tatou oraraa, e mai te mea e, aita tatou e faaohipa i to tatou ite e aita ho‘i e rave i te mau ohipa i titauhia ia tatou, te faaino ra ïa tatou i te oraraa.15
Na roto i te tauturu a to tatou Metua i te Ao ra, aita e titauraa e aita ho‘i e ture i roto i te Ekalesia nei aita e nehenehe ia tatou ia haapa‘o. E horo‘a mai te Fatu ia tatou i te puai e te ite no te faaoti i te mau hopoia atoa e te mau ohipa atoa tei tuuhia mai i ni‘a ia tatou, i te hoê faito au i to’na hi‘oraa. Hoê noa iho uiraa, oia ho‘i, te vai ra anei te hinaaro i roto ia tatou? I nanahi ra ua faaroo vau i te parau no te hoê [taata] tei parau e, eita ta’na e nehenehe e faaea i te inu i te taofe. Aita vau e ti‘aturi nei e, e parau mau ta taua taata ra. Te feruri nei râ vau e, aita e vai ra i roto ia’na te hinaaro ia tamata e ia faaru‘e i te reira peu.16
Mea rahi te taata ta‘u i farerei tei parau mai e, “E Grant tane, i to oe mana‘oraa, no te aha te mau taata e rave rahi tei faaite i to ratou iteraa papu e to ratou iteraa no ni‘a i te hanahana o te ohipa tei parauhia te Momoni, e no ni‘a i te hanahana o te misioni a te Peropheta Iosepha Semita, e i muri iho, ua huritua ratou i te Evanelia a te Feia Mo‘a i te mau Mahana Hopea nei e ua riro mai ei feia pato‘i etaeta i te reira?” E pahono ohie noa vau ia ratou e, aita roa’tu e vaira hoê fafauraa i fafauhia mai i te hoê tane, te hoê vahine e aore râ, te hoê tamarii e, e vai ti‘a papu noa ratou i ni‘a i te e‘a titiaifaro e te pirihao e tae atu ai i te ora mure ore ra na roto noa i te haapa‘oraa ratou i te mau faaueraa a te Atua, noa’tu eaha te huru o te iteraa papu tei roaa ia ratou, e aore râ, eaha te huru o te ite e te maramarama tei tae mai i roto ia ratou no ô mai i te Atua ra. Aita vau i ite a‘e nei i te hoê taata i rotopu i te Feia Mo‘a i te mau Mahana Hopea nei tei haapa‘o tamau noa i to’na pure utuafare e to’na iho mau pure, tei haere tamau noa i ta’na mau pureraa e i te mau pureraa autahu‘araa, tei vai ineine noa e tei hinaaro mau i te aufau hoê tuhaa i ni‘a i te ahuru o ta’na mau apî i te matahiti ei tuhaa ahuru na te Fatu, tei haapa‘o tamau noa i te mea ta tatou e parau nei e, te Parau Paari—Te parau nei au e, aita vau i ite a‘e nei i te hoê taata mai te reira te huru, tei faaru‘e i te Ekalesia. Ua ite râ vau e rave rahi o ratou tei mairi i te pae aratia, noa’tu te mau mea rarahi e te faahiahia e rave rahi tei faaitehia mai ia ratou, no te mea ua haapa‘o ore ratou i te mau ohipa e te mau hopoia tei tuuhia mai i ni‘a ia ratou i roto i to ratou ti‘araa ei Feia Mo‘a i te mau Mahana Hopea nei.17
Te hoê o te mau ohipa rahi ta [te enemi] e rave, o te faatupuraa ïa i te mana‘o i roto ia tatou e, e mau taata tahuti ino tatou e te veve, e ua au tatou i taua huru ino to tatou ra, e e tamata oia i te imi i to’na maitai i ni‘a i tera huru to tatou, no te horo‘a i te mana‘o i roto ia tatou e, e ere tatou i te mea maitai, e aita e faufaa te ohipa ta tatou e rave nei. Tera râ, e mea papu roa e, mai te mea e, e tamau noa tatou i te rave i tera mahana e tera mahana, i te mau hopoia ha‘iha‘i roa tei horo‘ahia ia tatou nei, e ineine ïa tatou no te mau hopoia rarahi a‘e, ia tae mai te ohipa rahi a‘e e rave no te maitai o ta’na ohipa, na roto i te arata‘iraa maitai a te Fatu.18
Te hinaaro nei au e oomo i roto i te feruriraa o te feia apî e, noa’tu e, aita ratou i manuia i mua ra, e aore râ, aita ratou i ora i te hoê oraraa ti‘a, eiaha roa’tu ratou e mana‘o e, aita ïa e maitai faahou to ratou a muri a‘e. Aita e haapiiraa na to tatou Fatu o Iesu Mesia tei hau atu i te maramarama i te haapiiraa ta’na i hohora mai no ni‘a i te parau e, eita tatou e faahapahia i te hoê noa a‘e o ta tatou mau hapa tahito mai te mea e, ua tatarahapa tatou e ua faaru‘e tatou i te reira, a rave itoito ai tatou i te ohipa maitai.19
Mea ti‘a ia tatou ia tamau maite i te tauturu ia vetahi ê.
Mea pinepine au i te faati‘a i te parau no te Taote Karl G. Maeser. Te faaite ra oia i te haereraa mai te hoê vahine ivi veve e ta’na tamaiti e farerei ia’na. Ua faaite teie vahine i te Taeae Maeser e, tera ana‘e ta’na tamaiti aita’tu ai; e ua rave oia i te ohipa pu‘a ahu no te taata ia noaa ta’na moni no te afa‘i i ta’na tamaiti i te fare Haapiiraa Teitei Brigham Young, no te mea, ua faaroo oia e, e nehenehe ta te taea‘e Maeser e faaafaro i te mau tamaiti haapa‘o ore. Ua parau atu teie vahine i te taea‘e Maeser e, eita ta’na e nehenehe e faatere faahou i ta’na tamaiti, eita atoa te episekopo e to’na na tauturu e nehenehe faahou e faatere ia’na, e ua feruri ratou paatoa e, e tamaiti ino mau teie.
Ua haamata a‘era teie tamaiti i ta’na haapiiraa, e aita i maoro, ua fifi. Te faati‘a ra te Taeae Maeser i te huru no to teie tamaiti ofatiraa i te mau ture o te fare haapiiraa. Aita ta te mau orometua e nehenehe e rave hoê noa a‘e ohipa e o’na, e ua riro oia ei hi‘oraa ino no te fare haapiiraa. Ua faataiâ rii te Taeae Maeser i te tiavaru i teie tamaiti i rapae i te fare haapiiraa no te mea, ua feruri oia i taua vahine ivi veve ra tei haere e rave i te ohipa pu‘a ahu no te taata ia ti‘a i ta’na tamaiti hoê roa ia haere mai i te haapiiraa; no reira, ua faaoromai oia i te huru tau‘a ore e te faaroo ore o taua tamaiti ra e tae roa’tu eita e maraa faahou ia’na i te faaoroma‘i. E ua tiavaru oia i teie tamaiti i rapae i te fare haapiiraa.
Ia poipoi a‘e i te hora va‘u, i te taeraa’tu te taea‘e Maeser i roto i to’na piha toro‘a, te patotohia mai nei i ni‘a i te opani. I to’na iritiraa’tu, te ti‘a noa mai nei teie tamaiti. Te parau ra te Taeae Maeser e, i to’na hi‘oraa’tu i teie tamaiti e a haamana‘o ai oia i te mau fifi atoa ta’na i rave i roto i te fare haapiiraa, ua hinaaro oia “ e taora i te rima i ni‘a i to’na mata.” Tera to’na mana‘o matamua no ni‘a i teie tamaiti tei tiavaruhia i nanahi ra.
Na o mai nei teie tamaiti e: “E te Taeae Maeser, farii mai oe hoê noa a‘e taime, e tamata faahou vau.”
I muri a‘e te [parau ra] te Taeae Maeser e: “Ua ti‘a noa vau i reira, aita vau i taa faahou e nahea râ, ia feruri ana‘e au e, te ani mai nei teie tamaiti e tamata faahou oia. Mana‘o ïa o’na e, e vaiiho faahou vau ia’na ia tamata hoê a‘e taime toe; na o mai nei teie tamaiti e: ‘E te Taeae Maeser, e te Taeae Maeser—farii mai oe hoê a‘e taime, e tamata faahou vau.’”
I tera taime, ua oto rii te reo o te Taeae Maeser, e ua horo atu oia i roto i na rima mahora e te taparu o taua tamaiti ra, e ua tauahi ia’na e ua apa ia’na, e ua fafau atu ia’na hoê hanere a‘e rahiraa taime tamata-faahou-raa.
Te parau ra te Taeae Maeser e, “Eaha ho‘i ïa to outou mana-‘o—e tauturu episekopo teie tamaiti i teie nei i roto ihoa i te oire i reira oia i te riroraa na ei tamaiti ino…
Teie te mau huru haamaitairaa faufaa—oia te mau haamaitairaa no te faufaa o te taata. Te mau ohipa ta tatou e rave na roto i te faaoroma‘i, te rohirohi ore e te pure tamau, no to tatou feia apî te ti‘a ia tauturuhia, e no te feia atoa tei taiva ê atu ia tatou nei no tera tumu e tera tumu, i te rahiraa o te taime, e oaoa rahi te roaa ia tatou i roto i te mau tau a muri a‘e.
E ti‘a anei ia tatou ia rave tamau maite ma te faaea ore, ma te faaoroma‘i, ma te faaore i te hapa, e ma te hinaaro e te pure tuutuu ore i rotopu i te feia atoa i titau i ta tatou tautururaa!20
Te mau mana‘o tauturu no te haapiiraa e te aparauraa
-
Eaha te mea i tupu i ni‘a ia outou e ua haamaitai mai te Fatu ia outou no to outou rave- tamau-maite-raa?
-
Eaha te mea e tura‘i ia tatou ia rave tamau maite i ta tatou hopoia i mua i te Fatu?
-
Eaha te mau haafifiraa i reira tatou e faaineine ai ia tatou no te aro, ia rave tamau ana‘e tatou i te faahotu i to tatou mau taleni e to tatou mau aravihi? Ia haapa‘o tamau ana‘e tatou i te mau faaueraa? Ia tauturu tamau ana‘e tatou ia vetahi ê?
-
No te aha e mea faufaa ia tautoo tamau noa i te ora i te hoê oraraa parau ti‘a e te manuia e a muri noa’tu? (A hi‘o atoa 1 Nephi 13:37; 3 Nephi 27:16; PH&PF 14:7.)
-
Ua faaite te Peresideni Grant i te mana‘o faahiahia rahi no te peropheta Nephi. Eaha te mau vahi tuea noa i rotopu ia Nephi e te Peresideni Grant? Eaha te ti‘a ia outou ia rave no te pee i to raua hi‘oraa?
-
Nahea tatou ia tavini i te feia “tei taiva ê ia tatou”?
-
Nahea outou i te haamaitai-raa-hia na roto i te mau tautooraa tamau maite a vetahi ê?
Ua faahotu o Heber J. Grant i te huru tamau maite i roto i to’na apîraa. Te parau ra oia e: “Aita vau i ite i te rave‘a ohie e roaa ai te manuia. Tamau noa, tamau noa, TAMAU NOA; ohipa, ohipa, OHIPA—te reira te mea faufaa i roto i te aroraa o te oraraa nei.”