Pene 6

Amuitahi i te mau utuafare na roto i te ohipa no te hiero e no te aamu utuafare.

Te horo‘a nei te mau oro‘a hiero i te rave‘a no te faateiteiraa i te mau tamarii a te Atua i na pae e piti o te paruru.

No roto mai i te oraraa o Heber J. Grant

Erave rahi taime i roto i to’na oraraa, ua faatusia Heber J. Grant i te mau mea o te ao nei, no te rave i te ohipa hiero e te aamu utuafare.Ua haamata te reira i to’na tau apîraa, i te taime a horo‘a ai te mau melo o te Ekalesia i te moni no te tauturu i te paturaa i te Hiero no Roto Miti. Te faati‘a ra oia e, “ I to‘u tamariiriiraa, ua aufau noa vau hoê dollar pauroa te ava‘e. E ia maraa rii ta‘u moni ohipa, ua horo‘a vau e piti dollars i te ava‘e, e i muri a‘e e toru dollars, e maha dollars, e pae dollars, e i te pae hopea ua horo‘a vau e rave rahi tauatini dollars no te faaotiraa i te hiero. No te aha? No te mea ua horo‘a mai te Fatu te Atua Manahope i te hoê iteraa e, ua faafariuhia te aau o te mau tamarii i to ratou ra mau metua; e te mau taviri tei mauhia na e te peropheta Elia, ua faaho‘ihia mai ïa ia Iosepha Semita ra raua o Oliver Cowdery.”¹

Na roto i te mau taviri o te autahu‘araa tei faaho‘ihia mai e Elia, ua nehenehe i te mau utuafare ia amuitahihia no teie tau e no te tau a muri noa’tu na roto i te mau oro‘a mo‘a o te hiero. Mai tei haamaramaramahia e te Peresideni Grant, e ohipa teie no te feia e ora nei e tei pohe: “Ua faaho‘ihia mai ia tatou nei te Evanelia a Iesu Mesia; tei ia tatou nei te faanahonahoraa no te ora e te faaoraraa; tei ia tatou nei te mau oro‘a o te Evanelia eiaha no te feia ana‘e e ora nei, no te feia atoa râ tei pohe. Tei ia tatou nei te mau mea atoa i titauhia, eiaha no to tatou ana‘e faaoraraa, ia riro atoa râ tatou ei ‘Feia faaora i ni‘a i te Mou‘a ra no Ziona, ’ [a hi‘o Obadia 1:21] e ia tomo i roto i te hiero o to tatou Atua e ia faaora i to tatou mau tupuna tei pohe ma te ite ore i te Evanelia.”²

Ua faaite te Peresideni Grant i to’na here i te ohipa hiero e te aamu utuafare, inaha te na o ra oia e: “E mea au roa na‘u teie ohipa.Te hinaaro nei au e faaitoito maitai i te taata ia tamau noa i te imi i to ratou tuatapaparaa tupuna, e ia oti ana‘e te reira, ia haere e rave i te ohipa i roto i to tatou mau hiero.”³ Na roto i to’na hi‘oraa e ta’na mau haapiiraa, ua here te mau melo o to’na utuafare i te ohipa hiero. I te ava‘e Tenuare 1928 ua faataa oia i te pô Mahana Maha ei pô hiero na te fetii Grant. E amui mai te mau melo atoa o te utuafare tei haere i te hiero no te tamaa i te ahiahi e i muri iho haere atu ai i te Hiero no Roto Miti no te farii i te mau oro‘a mo‘a ei maitai no to ratou mau tupuna i pohe ra. I te mahana no to’na oro‘a fanauraa i te matahiti 1934, ua amui mai e 50 melo no te fetii i roto i te hiero e ua taati ratou 1, 516 tamarii i to ratou ra mau metua.⁴

Te mau haapiiraa a Heber J. Grant

Aita e tusia rahi ia rohi tatou no te amuitahi i te mau utuafare na roto i te ohipa hiero.

E vai noa tera mauruuru to‘u e tae noa’tu i to‘u poheraa, i te mea e, aita vau i faaroo i te tahi mau hoa to‘u, inaha, i to‘u apîraa, aitâ to‘u matahiti i tae roa i te piti ahuru ma hoê, ua opua vau e ratere mai Utaha e tae roa’tu i St. George no te faaipoipo ia‘u i roto i te Hiero no St. George. Ua tupu te reira na mua a‘e a hamanihia ai te purumu pereoo auahi no te haere i te pae tooa o te râ no Utaha, e i muri iho, na ni‘a atu ai i te pereoo puaahorofenua no te toea o te tere. I taua tau ra, e mea roa e te fifi ho‘i te tereraa, na ni‘a i te mau purumu iino e te papu ore, e e rave rahi mahana e hope ai te tere.

E rave rahi tei parau mai ia‘u e, eiaha e haere—eiaha e haere i tera atearaa e tae roa’tu i St. George no te faaipoipo ia‘u. Ua parau ratou e, e nehenehe ta te peresideni tĭtĭ e aore râ, ta to‘u episekopo e faaipoipo ia‘u, e ia oti te Hiero no Roto Miti, i reira vau e haere atu ai i reira e ta‘u vahine e te mau tamarii ia taatihia i ni‘a ia’na e ia taati i ta maua mau tamarii i ni‘a ia maua no te tau a muri atu.

No te aha aita vau i faaroo ia ratou? No te mea ua hinaaro vau i taua taime ra ia faaipoipohia vau no teie tau e no te tau a muri atu—no te mea ua hinaaro vau ia haamata i to‘u oraraa ma te ti-‘a. I muri a‘e, ua tupu te oaoa rahi i roto ia‘u no to‘u faaotiraa e faaipoipo ia‘u i roto i te hiero i taua taime, aita râ i tiai i te tahi atu taime tano…

Te ti‘aturi nei au e, e mea ti‘a i te hoê tane e aore râ, te hoê vahine Feia Mo‘a i te mau Mahana Hopea nei ia imi i te mau rave‘a atoa no te haere i te hoê fare o te Fatu no te haamata amui i te oraraa. Ua riro te mau parau tapu e ravehia i roto i taua vahi mo-‘a ra, e te mau fafauraa mo‘a i fafauhia no teie tau e no te tau a muri atu, ei [paruru ] i mua i te mau faahemaraa e rave rahi o te oraraa, o te nehenehe e haaparari i te mau utuafare e e haamou roa ho‘i i te oaoa…

Te mau haamaitairaa e te mau fafauraa e roaa mai na roto i te haamata-amui-raa i te oraraa, no teie tau e no te tau a muri atu, i roto i te hiero o te Fatu, eita ïa te reira e roaa na roto i te tahi atu huru rave‘a, e te mau tane e aore râ, te mau vahine atoa e haamata i te oraraa mai te reira te huru, e ite ratou e, ua riro to raua apitiraa mure ore na roto i te fafauraa mure ore ei niu i reira i haamauhia ai te hau, te oaoa, te maitai, te here, e te taatoaraa o te mau parau mau mure ore o te oraraa, i o nei e a muri a‘e.⁵

Aita e taa ia‘u e nahea ia faaite papu…i te faufaa ia haere mai te feia apî o te Ekalesia i roto i teie Fare, e ia faaipoipohia ratou ma te ti‘a e ia haamata i te aroraa o te oraraa nei i raro a‘e i te faaururaa a te Atua ora e na roto i te mau haamaitairaa o te mana o te Autahu‘araa o te Atua tei mauhia e To’na mau tavini e haa nei i roto i te Hiero. Te hinaaro nei au e faaite papu ia outou e, mai te mea e, aita outou e rave i te hoê noa a‘e ohipa, ia ore outou e rave i te hoê noa a‘e tusia, e tae mai ihoa te faautuaraa, i teie anei tau e aore râ, i te tau a muri a‘e; e mai te mea e, e rave tatou i te tusia i roto i ta tatou hopoia na roto i te raveraa i te mau mea maitai i mua i te aro o te Atua, e mea papu roa e, e haamaitaihia tatou i roto i to tatou oraraa.⁶

Hau atu i te hoê matahiti i mairi a‘e nei, ua faaoti au e, mai te mea e, e faanahonaho maitai au i ta‘u mau ohipa, mai te mea e, e vaiiho vau i te ohipa tai‘oraa buka, e aore râ, te haereraa i te mau arui himeneraa, e aore râ, arui hautiraa teata taata ora, e aore râ, te mau opera, e nehenehe ïa ta‘u e haere i te hiero hoê a‘e taime i te hepetoma e ia rave i te mau oro‘a no te tahi mau fetii tei faaru-‘e mai. Na roto i te faaotiraa e, e nehenehe ta‘u e rave i teie mau mea, aita roa’tu vau i fifi no te haere i te hiero hoê a‘e taime i te hepetoma i roto i te matahiti taatoa…Oia mau, ua mairi paha vau hoê opera e aore râ, hoê teataraa taata ora e aore râ, te tahi atu mau mea o ta‘u i hinaaro e haere e hi‘o, aita râ vau i fifi no te reira…

E nehenehe ta tatou e rave i te mea ta tatou e hinaaro e rave. E itehia i te hoê taurearea te taime no te parahi i pihaiiho i to’na hoa here. E nehenehe ta’na e faanahonaho i to’na oraraa no te rave i te reira. E nehenehe ta tatou e faanahonaho i to tatou oraraa ia ti‘a ia tatou ia haere e hauti i te hui popo, e i te tahi atu mau hauti. E nehenehe ta tatou e faanahonaho i to tatou oraraa ia ti-‘a ia tatou ia arearea. E mai te mea e, e nehenehe ta tatou ia na reira, e nehenehe atoa ïa ta tatou e faanahonaho i to tatou oraraa ia ti‘a ia tatou ia rave i te ohipa hiero, te hi‘o nei au i ni‘a ia‘u iho.⁷

Mai te mea e, e taime to‘u no te haere i te hiero no te rave i te ohipa hiero hoê a‘e taime i te hepetoma, aita vau e ti‘aturi nei e, hoê ana‘e taata i roto i Te Ekalesia taatoa a Iesu Mesia i te Feia Mo‘a i te mau Mahana Hopea nei, te nehenehe, mai te mea e, e hinaaro o’na, e faanahonaho i ta’na ohipa. Te parau nei au no te mau taata e ora nei i te vahi e hiero to reira, eiaha râ no te feia e tere atea no te haere i reira…Aita vau i ite e, te vai ra anei hoê taata mea rahi atu ta’na ohipa i ta‘u, e mai te mea e, e nehenehe ta‘u, e nehenehe atoa ïa ta ratou, hoê noa mea e titauhia maori râ, ia vai te varua i roto i to ratou aau e to ratou feruriraa ia hinaaro e rave. Te fifi o te mau taata e rave rahi maori râ, aita e hinaaro to roto ia ratou.⁸

I to‘u feruriraa, hoê haamaitairaa rahi roa ta tatou te Feia Mo‘a i te mau Mahana Hopea nei e fana‘o nei maori râ, te raveraa tatou i te ohipa hiero no to tatou mau tupuna tei pohe ma te ite ore i te Evanelia…

…Mai te mea e, e tuu outou i roto i to outou aau e to outou feruriraa e, teie te hoê o te mau ohipa faufaa roa te ti‘a ia tatou ia rave, tatou te Feia Mo‘a i te mau Mahana Hopea nei, e itehia ïa ia outou te hoê rave‘a no te raveraa i te reira.⁹

Mai te tau a faaho‘ihia mai ai te mau taviri no te taatiraa, e rave rahi mau taata tei faatupu i te hinaaro ia imi i to ratou mau tupuna.

Mai te tau a tae mai o Elia, no te faaho‘i mai i te mau taviri tei mauhia e a’na, oia te faafariuraa i te aau o te mau tamarii i to ratou ra mau metua [a hi‘o PH&PF 110:13–15], ua tupu i roto i te aau o te mau taata atoa i te ao nei, te hoê hiaai ia ite i te parau no to ratou mau tupuna.¹⁰

Ua haamata te mau tane e te mau vahine o te ao atoa nei i te faatupu i te mau taiete, e ia maimi i to ratou mau tupuna, e ia haaputu i te mau parau tuatapaparaa o to ratou mau utuafare. Ua faaohipahia e rave rahi Milioni dollars no teie mau ohipa. Ua paraparau vau e ua faaroo vau e rave rahi taime i te tahi mau taata tei haamau‘a te tahi mau tino moni rahi no te haaputu i te mau parau no to ratou mau metua, e ia oti te reira i te haaputuhia, ia uihia’tu ratou e, no te aha ratou i rave ai i te reira, ua parau mai ratou e: “Aita vau i ite; ua tupu te hoê hiaai rahi i roto ia‘u ia haaputu i taua mau parau ra e ia haamau‘a i te moni no te rave i te reira ma te faahepo ore. E i teie nei ua oti i te haaputuhia, aita ta‘u e faaohiparaa taaê no te reira.” Te haafaufaa nei te Feia Mo‘a i te mau Mahana Hopea nei i te mau buka mai te reira te huru, aita e faaauraa to ratou faufaa e te moni.¹¹

No te hoê Feia Mo‘a i te mau Mahana Hopea nei, hoê buka mai teie te rahi [ma te faaite i te Buka a Moromona], tei roto te mau i‘oa o to’na mau tupuna, e mea faufaa rahi ïa, e rave rahi hanere taime te faufaaraa, hau atu i to’na teiaha i te faito auro.¹²

Ia farii ana‘e tatou i te mau oro‘a hiero no to tatou mau fetii i pohe, te riro ra ïa tatou “ei feia faaora i ni‘a i te Mou‘a ra i Ziona.”

E oaoa rahi to‘u no te ohipa faahiahia e ravehia nei i roto i to tatou mau hiero, no te faaho‘i-raa- hia mai te haamaitairaa no te bapetizoraa i ni‘a i te fenua nei, na roto i te mana o te Atua ora, no te feia tei pohe, e te raveraa i te mau oro‘a, mai te mea e e faariihia, o te arata‘i i te feia pohe i te ora mure ore e i te faaoraraa, noa’tu e, ua pohe ratou ma te ite ore i te Evanelia.¹³

Te ui nei to te ao nei e, nahea e ti‘a ai ia rave i te reira, oia ho-‘i, ia bapetizohia te hoê taata no te tahi atu taata? Tera râ, mai te mea e, te ti‘aturi nei tatou i te ohipa monoraa a te Mesia, e ti‘aturi ïa tatou e, e nehenehe ta te hoê taata e rave i te ohipa no te tahi atu, e e riro mai ho‘i tatou “ei feia faaora i ni‘a i te mou‘a ra i Ziona.” [A hi‘o Obadia 1:21.]¹⁴

E hopoia… na tatou ia haamana‘o i te mau tamarii a to tatou Metua tei faaru‘e mai ia tatou ma te ite ore i te Evanelia, e ia iriti i te uputa faaoraraa no ratou i roto i to tatou mau hiero, i reira ho‘i tatou i faauehia ai ia rave i te reira.¹⁵

Mai te mea e, e haapa‘o maitai tatou, e faaineine te Fatu i te rave‘a no tatou no te rave i te ohipa hiero e te aamu utuafare no to tatou fetii i pohe.

Te pure nei au ia faauru mai te Fatu ia tatou tataitahi e ia tatou paatoa ia rave itoito ma to tatou puai atoa, i te mau hopoia e te mau ohipa tei faataahia na tatou no te raveraa i te ohipa faaoraraa i to tatou feia pohe…Mai te mea e, e imi tamau maite tatou, i tera matahiti e tera matahiti, ia ite i to tatou mau fetii tei pohe ma te ite ore i te Evanelia, ua papu ia‘u e, e roaa te reira iteraa ia tatou.¹⁶

No‘u nei, e mea fahiahia mau teie ohipa tuatapaparaa. E mea faahiahia ia hi‘o i te e‘a i faaineinehia no tatou e anaanatae nei i te rave i te reira ohipa. Mai te hoê ra temeio te rave‘a i roaa i ta-‘u vahine i to’na imiraa i te mau parau tuatapaparaa no to’na mau metua. E mea faahiahia mau te huru no te roaaraa mai ia maua te mau buka e te tahi atu mau haamaramaramaraa. Ia tito ana‘e maua i ni‘a i te hoê papa‘i ofa‘i, e auraa parau teie, mai te huru ra e, te vai ra hoê apoo i ni‘a i taua papa‘i ra e na reira maua i te tomo e tae atu ai i te tahi pae mai, e i reira e itehia mai ai ia maua te tahi ohipa faufaa rahi.¹⁷

E rave rahi matahiti to ta‘u vahine imi-noa-raa i te tupuna o te papa ruau o to’na papa, Gideon Burdick te i‘oa. E hitu ui o to’na fetii tei itehia i roto i te Ekalesia, i mua’tu râ ia’na, aita ïa e haamaramaramaraa e vai ra. Ua imi oia na te mau vahi atoa, e aita te i‘oa o to’na papa i itehia.

E faehau teie taata i roto i te tama‘i i te fenua Marite, no reira, ua mana‘ohia e, e nehenehe paha e itehia te tahi haamaramaramaraa i roto i te mau parau mana no Washington, D.C. Tera râ, te faaite ra te mau parau e, e piti Gideon Burdicks tei rave i te tau faehau i roto i te nuu tama‘i Marite i taua tau ra, e ua riro te reira ei haafifi roa’tu â i te ohipa maimiraa.

Tau matahiti i mairi a‘e nei, ua haere atu te tuahine Grant e o vau nei i Washington e ua haere maua e hi‘o i te mau parau haaputu no te piha toro‘a no te faatuhaaraa. Ua itehia ia’na i reira te parau aniraa a Gideon Burdick no te faatuhaaraa. I to’na hi‘opo-‘araa i te reira parau, ua ite a‘era oia e, ua tuea noa te matahiti e faaitehia ra i reira i te matahiti o to’na tupuna…Te hoê no te mau ite tei tarima i taua parau ra, o Hyrum Winters ïa, oia te huno‘a a Gideon, e to’na atoa ïa papa ruau.

…Ua itehia to’na vahi fanauraa i teie nei, oia ho‘i, i Rhode Island, [no reira], te ohipa e toe ra, o te faatuatiraa ïa ia’na i to-’na fetii i roto i taua tuhaa fenua ra.

I muri a‘e i te tahi atu â mau tuatapaparaa ua ite a‘era te tuahine Grant na roto i te hoê rata e, te vai ra te hoê taata o Harcourt tane, te haaputu ra oia i te parau tuatapaparaa no te fetii Burdick. Ua papa‘i oioi atura oia i te hoê rata ia’na, e ua tae mai te rata pahonoraa a ta’na tamahine ma te faaite mai e, ua pohe oia ahuru matahiti i mairi a‘e nei, e aita taua buka ra i roto faahou i te rima o to’na fetii i teie nei, e aita to’na hoê noa a‘e iteraa no ni‘a i te reira.

Ua riro teie mai te tahi faahou papa‘i no te tapea ia maua, te hoê papa‘i eita e roaa ia maua ia ta‘uma. Tera râ, na o maira ta‘u vahine e, “Eita vau e faaea i o.” Ua papa‘i oia i te hoê rata i te taata haapa‘o i te fare rata no te vahi i reira to Harcourt tane oraraa, e ua ani ia’na ia horo‘a i ta’na rata i te hoê taata no te fetii Burdick.

Ua horo‘ahia’tura taua rata ra i te Taote Alfred A. Burdick, e ere to’na faaearaa i te mea atea roa i te Fare Rata. Ua pahono oioi mai teie taata, ma te parau e, tei ia’na ra te buka a Harcourt, e te tamau noa ra â oia i te rave i te tuatapaparaa o te fetii Burdick, ma te feruri e, e hamani oia i te hoê buka no ni‘a i te reira. Ua parau mai teie taata e, tei ia’na ra te parau no te fetii Burdick taatoa e tae roa’tu i ni‘a ia Gideon, aita râ ta’na e parau a‘e no ni‘a i to’na fetii, no te mea ua mo‘e te reira i te taime a faanuu atu ai oia i te pae tooa o te râ. Ua papa‘i oia e, “a hapono mai i te mau haamaramaramaraa atoa no ni‘a ia Gideon, e na‘u e faatae atu ia oe ra i te mau mea atoa ta oe e hinaaro no ni‘a i to’na mau tupuna.”

Ua na reirahia, e ua hapono mai oia i te hoê tuatapaparaa no ni‘a i te mau metua o Gideon Burdick, ma te faati‘a ia’na ia faaohipa i te reira mau parau mai ta’na e hinaaro. Mai tera ïa te huru no te roaaraa mai ia’na te haamaramaramaraa ta’na i imi maoro noa na, e i teie nei, ua ti‘a ia’na ia tuati i to’na fetii i ni‘a i te fetii i Rhode Island…

I muri a‘e, ua tai‘o vau … i teie aamu i muri nei no ni‘a i te parau no Burdick.

Tau matahiti i mairi a‘e nei ua haamata o M. B. Harcourt e te Taote Alfred A. Burdick i te hamani i te tuatapaparaa o te fetii Burdick. E rave rahi mau haamaramaramaraa tei haaputuhia mai e ua apapa-maitai-hia te reira, ma te mana‘o e, e nene‘i i te reira.

I taua taime ra, ua pohe o Harcourt tane, e ua ravehia te buka na te hoê cousin to te Taote Burdick e ua afa‘i i te reira na muri iho ia’na i New York. I te haamataraa ua feruri oia e nene‘i i taua buka ra, tera râ, e rave rahi matahiti i muri mai, ua papa‘i atu oia i te rata i te Taote Burdick ma te parau atu e, mai te mea e, e aufau oia i te haamauaraa no te haponoraa, e horo‘a oia i taua buka ra na’na. Tera râ, no te inoino o te Taote Burdick i te ohipa ta te tahi i rave na roto i te afa‘i-ê-raa i te buka, aita oia i pahono, noa’tu te faariariaraa a te tahi ia tutu‘i i te reira buka.

No reira ua faaue te cousin i te taata tamâ aua ia afa‘i i taua mau parau tao‘a rahi ra i te tahua fare i raro i te repo e ia tutu‘i i te auahi. Aita i taahia e eaha râ te tumu, tera râ, aita te taata tamâ aua i rave i te reira ohipa, e i te iteraa te cousin i te reira i muri a‘e, ua puohu oia i taua mau parau atoa ra e ua hapono atu i to’na taea‘e ra. Tera râ, aita ta to’na taea‘e e vahi vairaa i roto i to-’na fare, e ua afa‘i i te reira i rapae i te fare. Ua vai noa te reira e rave rahi ava‘e te maoro i raro a‘e i te ua e te mahana, e aita hoê taata i ite e, eaha te ohipa e rave no te reira.

Pohe atura te vahine a te taea‘e, e ua tae atu te Taote Burdick i te oro‘a hunaraa. E i reira to’na iteraa e, teihea taua mau parau ra, e ua parauhia mai ia’na e, e nehenehe ta’na e rave i te reira, mai te mea e, e mea faufaa te reira no’na. Ua faaho‘i mai oia i te reira mau parau i te fare, e, no to’na mata‘u a‘unei e mo‘e faahou ai, ua hamani oia i te hoê hoho‘a na’na, tera buka e tera buka. E rave rahi tuhaa o te mau parau tei ino na roto i te vai-noa-raa i rapae, tera râ, i to’na hi‘opo‘a-maite-raa i te taatoaraa o te mau parau, ua oaoa oia i te mea e, te mau mea faufaa taatoa te maitai noa ra.

Mai taua taime ra e tae roa mai i teie nei, ua rave tamau noa oia i ta’na mau maimiraa,

I te ava‘e Ditema i mairi a‘e nei, i Washington, ua tere atu te tuahine Grant e o vau nei i te hoê tere taaê i Baltimore no te farerei i teie taata tei tauturu maitai ia maua…Ua ite mai oia ia maua na roto i te hoê hoho‘a ta maua i hapono atu ia’na, e ua toro mai to’na na rima no te aroha mai ia maua. Ua arata‘i oia ia maua i roto i to’na piha toro‘a, e ua faaite mai ia maua i te mau buka e rave rahi no te mau parau tuatapaparaa ta’na i haaputuputu, no ni‘a i te aamu o te fetii Burdick e te tahi atu. Ua parau maira oia e, “No ni‘a i teie tumu parau, e nehenehe ta‘u e parahi i raro e ia paraparau ia orua i teie pô taatoa.”

Te vaira ta’na e piti ahuru buka no ni‘a i te Burdick ua oti i te apapa-maitai-hia. E maha o te reira mau buka, e mau buka ïa no ni‘a i te reni afaro ti‘a o Gideon. I roto i to’na maitai rahi, ua pŭpŭ maira oia i te reira ia maua, no te papa‘i i ta maua hoho‘a e no te faaohipa mai te au i to maua hinaaro. Ua parau atu vau ia’na e, e tono mai au i te hoê taata papa‘i steno i roto i to’na piha toro‘a, no te papa‘i, e aore râ, no te hamani i te…hoê hoho-‘a na maua. Tera râ, tuu maira oia i te buka i roto i to‘u na rima ma te parau mai e, “Peresideni Grant, e nehenehe ta‘u e ti‘aturi ia oe no teie mau buka, no te mea ua ite au e, eita ratou e fifi i roto i to oe rima.”

Te vaira i teie nei te mau hoho‘a patapatahia no te taatoaraa o te mau buka, e ua faaho‘ihia hoê hoho‘a na te Taote Burdick. Ua amui-atoa-hia’tu i reira te tahi atu mau haamaramaramaraa no roto mai i ta maua iho tuatapaparaa, e no roto atoa mai i te aamu utuafare, no te faati‘a roa i ta’na tuatapaparaa…

Mea maitai e, e riro teie ei faufaa eiaha no te tuahine Grant ana‘e e no‘u nei, no te feia atoa râ e imi nei i to ratou tuatapaparaa, ei faaiteraa i te huru no te raveraa a te Fatu i rotopu i ta’na mau tamarii i rapae i te Ekalesia, e ei faaururaa atoa i te feia faatere o te Ekalesia e i te feia faatere i roto i te mau tĭtĭ e te mau paroita o te Ekalesia ia rave tamau noa ma te tuutuu ore i ta ratou maimiraa. “E imi, e itea ïa ia outou.” [Mataio 7:7.]¹⁸

Ua riro te faaoraraa o te feia pohe ei hoê o te mau tumu faufaa rahi i faaho‘ihia mai ai te Evanelia Mure Ore, e i faati‘a-faahouhia ai te Ekalesia a Iesu Mesia i teie anotau. Ua riro te anaanatae rahi o te Feia Mo‘a i roto i teie tuhaa faufaa roa o te misioni faaora a te Faaora, ei tapa‘o faaite mau no te reira. Poipoi roa e tae roa’tu i te pô, te î nei to tatou mau hiero i te feia tei hinaaro i te faaora i to ratou mau tupuna tei faaru‘e mai, e ia tauturu i te faatuatiraa i te mau tau tuuraa Evanelia, e ia arata‘i mai i te mau mea atoa i te Mesia ra, i ni‘a i te ra‘i e i ni‘a i te fenua nei—e ohipa tei faataahia no te Tau Tuuraa no te Îraa o te mau Tau. Aue te oaoa e tiai maira i te feia tei rave itoito i te ohipa i roto i te Fare o te Fatu, ia tomo atu ratou i roto i te Ao Varua e ia farii-poupou-hia mai ratou na te feia ta ratou i pŭpŭ i teie tauturu faito ore!¹⁹

Te mau mana‘o tauturu no te haapiiraa e te aparauraa

E mea nahea to outou oraraa i te haamaitai-raa-hia no to outou raveraa i te mau oro‘a no te hiero? Eaha te ti‘a ia tatou ia rave ia rahi atu â to tatou fana‘oraa i te mau haamaitairaa no te hiero?
No te aha e mea faufaa ia faaipoipohia tatou i roto i te hiero? Nahea te faaipoiporaa hiero i te haapuai i te mau auraa i rotopu i te tane e te vahine faaipoipo?
Eaha te auraa no te parau ra “feia faaora i ni‘a i te Mou‘a ra no Ziona”? (A hi‘o atoa PH&PF 128; 138:47–48, 53–54, 57–58.) E mea nahea to te mau oro‘a hiero e te aamu utuafare tautururaa ia outou ia faafariu i to outou aau i te mau melo o to outou utuafare, te ora nei e tei pohe?
Eaha te mau rave‘a ta te Ekalesia e horo‘a nei no te tauturu ia tatou ia rave i te ohipa aamu utuafare?
E mea nahea to te Fatu tautururaa no te faaineine i te rave‘a ia ti‘a ia roaa ia outou te mau haamaramaramaraa no te aamu utuafare? Eaha te mau tapa‘o ta outou i ite no te faaiteraa e, ua tupu te hinaaro i roto i te mau taata atoa o te ao nei ia ite o vai to ratou mau tupuna?
Eaha te ti‘a ia tatou ia rave no te faataa i te taime no te haere tamau i te hiero? No te rave i te ohipa aamu utuafare?
Nahea te mau utuafare e ora nei i te atea ê i te hiero e nehenehe ai e haamau i te hoê peu faatura e te auraro i te ohipa hiero?