1 Oh met kilang, kedekedeo aramas koaros nan sahpwo ahpw rongada mahsenpwukat, oh kadehdehdi. Oh mwurin mahsen pwukat mie meleilei ieu nan sahpwo erein awah kei;

2 Pwehki aramas akan ar pwuriamwei mehlel irail uhdihsang sengisengki oh weriwerki mehlahn arail peneinei kan; eri mie melielei ieu nan sahpwo pwon erein awah kei.

3 Kedekedeo kepitiehu pwurehng peidohng aramas akan, oh aramas koaros ahpw rong, oh kadehdeh, me mahmahsanih:

4 Oh kumwail aramas en kahnihmw kehlail me pwupwidier, me wia kadaudoken Seikop, ei, me wia peneinei en Israel, pak depe me I kin pwoaleikumwailpene duwehte litok men me kin koampwoalepene nah kisin pwurok kan pahn peh kan, oh apwalih kumwail.

5 Oh pil ehu, pak depe me I kin pwoaleikumwailpene duwehte litok men me kin koampwoalepene nah kisin pwurok kan pahn peh kan, ei, Oh kumwail aramas en peneinei en Israel, me pwupwidier; ei, Oh kumwail aramas en peneinei en Israel, kumwail me kin mihmi nan Serusalem, nin duwen amwail pwupwidier; ei, pak depe me I pahn pwoaleikumwailpene duwehte litok men me kin koampwoalepene nah kisin pwurok kan pahn peh kan, oh kumwail sohte mwahuki.

6 Oh kumwail peneinei en Israel me I doarehlahr, pak depe me I pahn pwoaleikumwailpene duwehte litok men me kin koampwoalepene nah kisin pwurok kan pahn peh kan, ma kumwail pahn koluhla oh pwurodo rehi sang nan mohngiong mehlel unsek.

7 Ahpw ma soh, Oh peneinei en Israel, wasahn amwail kousoan kan pahn tehnla lao lel ahnsou me inou en amwail pahpa ko pahn pweida.

8 Oh met kedekedeo mwurin aramas kan ar rongehr mahsen pwukat, kilang, irail tepida pwurehng sengiseng oh weriwer pwehki arail peneinei oh kempoakepahrail kan me mehla.

9 Kedekedeo met kaimwsekalahr kesiluhn rahno. Oh iei nimenseng ehu, oh rotoroto ahpw sohrasang pohn sahpwo, oh sahpwo uhdisang rerrer, oh takai kan uhdisang pwalpeseng, oh mwahiei kelomwo ahpw uhdi, oh ngihl katairong koaros imwisekla.

10 Oh pwehlo pwurehng pwurpene, kahrehde e kehlail; ahn aramas me momour kan arail mwahiei, oh sengiseng, oh weriwer kan uhdi; oh arail mwahiei wekidekiong peren, oh arail lengiseng kan wekidekiong kaping oh kepikepinga Kauno Sises Krais, arail Soundoar.

11 Oh iei met me pweidahn pwuhksarawi kan me soukohp kan kohpadahr.

12 Oh iei pali laud en aramas mwahu kan me mourla, oh iei irail me alehda soukohp kan oh sohte kostakai irail; oh iei irail me sohte kakerehdi ntahn souleng kan, me mour poadoandoarla—

13 Oh irail poadoandoarla oh sohte kakihrla oh seridi pahn pwehl; oh irail sohte kaduhla wasa loal en nan sehd; oh irail sohte isihsla, de pil mehkot pwupwidi pohrail oh idangirailpene; oh irail sohte wisiksang nan elipipo; de lohdi pahn ediniei oh rotorot mosulo.

14 Oh met, mehmen me pahn wadek, en wehwehki; ih me mie nah pwuhksarawi kan, en rapahki loale, oh kadehde oh kilang ma soahngen mehla oh kamwomwala sang kisiniei, oh ediniei, oh sang kisinieng kehlail, oh elipip, oh pwalpeseng en pwehl pwe en aleiraildi, oh mepwukat koaros sou wia pweidahn kokohp kan en soukohp sarawi tohto.

15 Kilang, I ndaiong kumwail, Ei, tohto me kadehdehki mepwukat ni ketidohn Krais, oh kamakamkihla pwehki arail kadehdehki mepwukat.

16 Ei, soukohp Sihnos kadehdehkier mepwukat, oh pil Sihnok koasoia duwen mepwukat, ahpw mehlel pwehki arail kadehdehki duwen kitail, me wia kisehn kadaudokerail.

17 Kilang, atail pahpa Seikop pil kadehdehki duwen kisehn kadaudoken Sosep. Oh kilang, kitail sou wia kisehn kadaudok en Sosep? Oh mepwukat me kadehdehki duwen kitail, e sou ntingdi nan pileit en prahs me atail pahpa Lihai wahsang nan Serusalem?

18 Kedekedeo ni kerenlahng imwilahn pahr silihsek pahieuo, kilang, I pahn kasalehiong kumwail me aramas en Nihpai kan me mourla, oh pil irail kan me kahdaniki Mehn Leimen kan, me pil mourla, alehdi kupwuramwahu ong irail, oh kapai laud kohieng pohrail, kahrehda mwurinte ketdahlahn Krais nanleng e ahpw ketin pwarohng irail ni mehlel—

19 E ahpw ketin kasalehiong irail kahlape, oh ahpw kalohkehng irail; oh soiepen ah doadoahk en kalohk pahn kohdo mwuhr. Eri ahnsou wet I pahn kaimwsekala ei koasoi kan.