1 Met kedekedeo sounpar pahr duweisek ehu imwiseklahr oh sounparehr wenopwuki sang ahnsou me Lihai mwesel sang nan Serusalem; oh nan pahro me Lakonies me wia sounkopwung lapalap oh kepinahn sahpwo.

2 Oh Nihpai, me wia nein Ilemen pwutak, mweselsang nan sahpw en Saraemla, oh kasapwiliong nah pwutak Nihpai, me keieu laud, pwukoahn prahs pileit ko, oh poadoapoad kan koaros me wie nekinek, oh soahng koaros me kesempwal me re wie kolokol sangeteahnsou me Lihai mweselsang nan Serusalem.

3 E ahpw mweselsang nan sahpwo, oh wasa me e kohla, sohte aramas wehwehki; oh nah pwutak Nihpai ahpw weliandi oh tepida apwalih poadoapoad kan, ei, poadoapoad en aramas kan.

4 Kedekedeo ni tepidahn pahr duweisek riauo, kilang, kokohp en soukohp kan tepida pweida ni mehlel; pwe e tepida mie kilel kesempwal oh manaman kapwuriamwei wiawi rehn aramas kan.

5 Ahpw mie ekei me tepida nda me ahnsou me mahsen ko pahn pweida daulilahr, [mahsen kan] me Samuel, Mehn Leimen kohpadaho.

6 Oh re tepida kouruhrki riarail kan, ndinda: Kilang ahnsouo daulilahr, oh mahsen kan en Samuel sohte pweida; eri, amwail peren oh amwail pwoson duwen soahng wet sohte katepe.

7 Kedekedeo irail ahpw wiahda moromor lap nan sahpwo; oh aramas kan me kamehleleko tepida pahtoula mehlel, pwe e de pahn soahng ko me kokohpdahr sohte pweida.

8 Ahpw kilang, irail loaloapwoationg mwasamwasahn rahno oh pwohngo oh rahno me pahn wia rahntehieu duwehte sohte pwohng, pwe re kak ese me arail pwoson sohte likamw.

9 Met kedekedeo mie ah nehu me pwihn soupwoson ko koasoanehdi, me koaros me kamehlele tiahk [kokohp ko] pahn kamakamala ihte ma kilelo pahn pwarada, me soukohp Samuel kohpadao.

10 Met kedekedeo ahnsou me Nihpai, nein Nihpai pwutako, kilangadahr wiewia suwed en nah aramas akan, mohngiongi pahtoula mehlel.

11 Kedekedeo e ahpw pidohila oh poaridi nan pwehlo, oh weliandi nah aramas akan kapakap kehlail ong Koht, ei, kapakapki irail akan me pahn kamakamalahr pwehki arail pwoson tiahk en arail pahpa ko.

12 Kedekedeo e ahpw kapakap kehlail ong Kauno rahno pwon; oh kilang, kepitien Kauno ahpw kohdohng ih, mahmahsanih:

13 Kilengida oh ahneki koapworopwor; pwe kilang, ahnsouo lelehr, oh soutik wet kilelo pahn pwarada, oh lakapw I pahn ketdihwei pohn sampah, pwe en kasalehiong sampah me I pahn kapwaiada soahng koaros me I kahrehda nei soukohp sarawi kan en kohpada.

14 Kilang, I kohdo rehn pein nei aramas, pwe en kapwaiada soahng koaros me I kasalehiong aramas akan sangete ni poahson en sampah, oh wia kupwuren Sahmo oh Sapwellimehu—Sahmo pwehki ngehi, oh Sapwellimehu pwehki paliwereiet. Oh kilang, ahnsouo lelehr, oh soutik wet kilelo pahn pwarada.

15 Kedekedeo mahsen kan me kohieng Nihpai ahpw pweida, nin duwen eh mahsendahr; pwe kilang, ni ahnsou me ketipino wie kikihrla e sohte rotorotala; oh aramas akan tepida pwuriamwei pwehki e sohte rotorot ahnsou me pwohngo lel.

16 Oh mie me tohto, me sohte kamehlele mahsen kan en soukohp kan, me pwupwidi nan pwehlo duwehte re mehla, pwe re ese me koasoandi lap en kamakamala me re koasonehdiong irail me kamehlele mahsen en soukohp kan sohte pweida; pwe kilelo me kohieng irail lelehr.

17 Oh re tepier wehwehki me Sapwellimen Kohto udahn pahn ketido; eri, ni oaralap, aramas koaros me mih pohn sahpwo pwon sang palikapi kohla palimese, nan sahpw en paliepeng oh nan sahpw en palieir koaros, pwuriamweikihla mehlel kahrehda re pwupwidi nan pwehlo.

18 Pwe re ese me soukohp kan kadehdehkiermepwukat sounpar tohto kei, oh kilel me kohieng irailehro lelledohr; oh re tepida masak pwehki arail wiewia suwed oh arail soupwoson.

19 Kedekedeo sohte rotorot pwohngo pwon, ahpw e marain duwehte nan wereng souwas. Kedekedeo ketipino ahpw pwurehng dakada ni mensengo, nin duwen koasondi en dakada; oh re ese me iei rahno me Kauno pahn ketin ipwidi, pwehki kilelo eh ketin wiawiher.

20 Oh e wiawiher, ei, soahng koaros, ni pisetik, nin duwen mahsen akan en soukohp kan.

21 Kedekedeo pil ehu usu kapw pwarada, nin duwen mahseno.

22 Kedekedeo sang ahnsouo kohla likam akan tepida kohseli rehn aramas akan, sang Sehdan, pwe kakeluwakala mohngiongarail kan, kahrepehu pwe re en kak sohte kamehlele kilel ko oh soahng kapwuriamwei kan me re kilangehr; ahpw mehndahte likamw oh widing pwukat pali laud en aramas akan kamehlelehte oh weliakapwla ong Kauno.

23 Kedekedeo Nihpai ahpw kohla rehn aramas kan, oh pil ekei me tohto, papidaisihla me koluhla, me kahrehda mie kamwakelpen dihp laud. Oh met kahrehda aramas akan pwurehng tepida ahneki popohl nan sahpwo.

24 Oh sohte pingiping ahnsouo, ihte ekei me tepida padahngki, nannantihong kasalehda sang pwuhksarawi kan me e solahr konehng kapwaiada kosonned en Moseso. Met nan soahng wet re sapwungalahr, pwehki re sohte wehwehki pwuhksarawi kan.

25 Ahpw kedekedeo re tepida weliakapwala, oh kopwungupwungla nan sapwung me re mih loale, pwe e kasansalohng irail me kosonnedo saikinte unsekla, oh me e pahn pweida nan mehkoaros; ei, mahseno kohieng irail me e udahn pahn pweida; ei, me sohte ehu pahn imwisekla loa koaros mehngihtikpe pahn pweida; eri nan pahrohte irail wehwehkihda arail sapwungala oh ahpw wehkada arail sapwung kan.

26 Oh met pahr duweisek riauo ahpw imwisekla, ni e wadohr rongamwahu ong aramas kan pwehki kilel kan me pwaradahr, nin duwen mahsen en kokohp kan en soukohp sarawi koaros.

27 Kedekedeo me nan pahr duweisek siluho ahpw pil imwisekla nan popohl, ihte pwihn en Kadienden lipirap ko, me kin koukousoan pohn nahna kan, me rekla nan sahpwo; pwehki wasahn ar rukila oh kouson rir kan me kehlail kahrehda aramas kan sohte kak powehdi irail; eri re kin kam aramas tohto, oh ahpw kehmehla pokon en aramas.

28 Kedekedeo nan pahr duweisek pahieu re ahpw tepida kekeirda laud mehlel, pwehki tohto me pwupwidi sang Mehn Nihpai kan me kin kohkohla iangala irail, me kin elehiong pahtou laud rehn irail Mehn Nihpai kan me kin mihmihte nan sahpwo.

29 Oh pil mie pahtou laud rehn Mehn Leimen kan; pwe kilang, mie neirail seri tohto me kekeirda oh tepida mahmahla nan arail sounpar, karehda irail uhtohrla, oh idawehnla ekei Mehn Soromai kan, sang ni arail koasoi likamw oh arail widing kan, re en iangala pwihn en Kadienden lipirap ko.

30 Oh met kahrehda Mehn Leimen kan pili ang lokolok, oh tepida tikitikla nan arail pwoson oh mour pwung, pwehki wiewia suwed en dih me kohkohda.