1 Oh mehlel, mehlel, I ndaiong kumwail me mie pil ekei nei sihpw, me sohte mih nan sahpwet, de pil nan sahpw en Serusalem, de pil nan sahpw teikan me kapil sahpw me I wiahier doadoahk en kalohk.

2 Pwe irail akan me I koasoia me saikinte rong ngileiet; oh I pil saikinte kasalehiong irail pein ngehi.

3 Ahpw Sahmo ketin mahsanihong ie me I pahn kohla rehrail, oh irail pahn rong ngilei, oh irail pahn iang wadawadiong rehn nei sihpw kan, pwe en mie pwihn en sihp teieu, oh sileparail pahn metehmen; eri I pahn kohla oh kasalehiong irail pein ngehi.

4 Oh I kihong kumwail kosonned me kumwail pahn ntingihdi mahsen pwukat mwurin ei pahn kohkohla, pwe ma nei aramas akan nan Serusalem, me kilangiehier oh ieiang ie nan ei doadoahk en kalohko, sohte pahn peki rehn Sahmo ni edei, pwe irail en kak wehwehkihda duwen kumwail sang Ngehn Sarawio, oh pil duwen keinek teikan me irail sohte wehwehki, pwe mahsen pwukat me kumwail pahn ntingihdi pahn nekinekla oh pahn kasansaliong Mehn Liki kan, pwe sang ni unseklahn Mehn Liki kan, luhwen kadaudokerail kan, me mwerpesengehr pohn sampah pwehki arail soupwoson, pahn kak kopwurupwurdo, de pahn kak kopwurupwurdo ni arail pahn wehwehkiniehda, arail Soundoar.

5 Eri I ahpw pahn kapwureirailpene sang ni keimw pahieu en sampah; eri I ahpw pahn kapwaiada inou me Sahmo ketin inoukihong aramas en peneinei en Israel koaros.

6 Oh meid pai Mehn Liki kan, pwehki arail kamehlele ie, nan oh sang Ngehn Sarawi, me kadehdehiong irail duwen ngehi oh Sahmo.

7 Kilang, Sahmo ketin mahsanih, pwehki arail kamehlele ie, oh pwehki amwail sohte kamehlele ie, kumwail peneinei en Israel, ni imwin rahn akan mehlelo pahn kohdo rehn Mehn Liki kan, pwe unsek en soahng pwukat pahn kasansaliong irail.

8 Ahpw Sahmo ketin mahsanih meid suwediong sohpwoson en Mehn Liki kan—pwe mendahte arail kohdo pohn sahpwet, oh pwakihpeseng nei aramas me wia kisehn peneinei en Israel; oh nei aramas en Israel kan irail kesehieisang rehrail, oh tiahkiraildi pahn nehrail kan;

9 Oh pwehki sapwellimen Sahmo kalahngan kan ong Mehn Liki kan, oh pil sapwellimen Sahmo kopwung ong nei aramas en Israel, mehlel, mehlel, I ndaiong kumwail, me mwurin soahng pwukat koaros, oh I wiahda nei aramas kan me wia kisehn peneinei en Isael kan pahn kamakam, oh kalokolok, oh kamakamala, oh pahn lekidekla sang rehrail, oh re pahn kailongkin irail, oh re pahn kepitikinirail oh kapailokeirail—

10 Oh Sahmo ketin mahsanih me I pahn ndaiong kumwail: Ni ahnsouo me Mehn Liki kan pahn dipikihda ei rongamwahu, oh pahn kasohwe unsek en ei rongamwahu, oh pahn pohnmwahsohda nan mohngiongarail kan pohn wehi koaros, oh pohn aramas koaros nan sampah pwon, oh pahn direkihla soangsoangen likamw, liap, oh mwersuwed koaros, oh soangsoangen mwalaun koaros, oh kamaramas, oh prihskrap, oh nenek, oh wiewia suwed rir kan; oh ma irail pahn wia soahng pwuko koaros, oh pahn kasohwe ei rongamwahu unseko, kilang, Sahme ketin mahsanih, I pahn ketikihsang rehrail ei rongamwahu unseko.

11 Oh I ahpw pahn tamanda ei inou me I wiahiong nei aramas akan, kumwail peneinei en Israel, oh I pahn ketikihong irail ei rongamwahuo.

12 Oh I pahn kasalehiong kumwail, peneinei en Israel, me Mehn Liki kan sohte pahn ahneki manaman pohmwail; ahpw I pahn tamanda ei inou ong kumwailo, peneinei en Israel, oh kumwail pahn wehwehkihda ei rongamwahu unseko.

13 Ahpw Sahmo ketin mahsanih ma Mehn Liki kan pahn koluhla oh pwurodo rehi, kilang, irail pahn iang wadawadiong rehn nei aramas akan, peneinei en Israel.

14 Oh I sohte pahn mweidehng nei aramas, me wia kisehn peneinei en Israel, en kohla rehrail, oh tiakiraildi, Sahmo ketin mahsanih.

15 Ahpw ma irail sohte pahn sohpeido rehi, oh rong ngilei, I pahn mweidehng irail, ei, I pahn mweidehng nei aramas akan, peneinei en Israel, me irail pahn kohwei rehrail, oh pahn tiakiraildi, oh irail pahn duwehte soahl me sohla neme, me pahn solahr katepe, ahpw e pahn lekdekla oh nei aramas en Israel kan pahn tiahkpeseng.

16 Mehlel, mehlel, I ndaiong kumwail, Sahmo ketin mahsanihong ie—me I pahn kihong aramas pwukat sahpwet en wia arail sohso.

17 Oh mahsen kan en soukohp Aiseia ahpw pahn pweida, me ketihtihki:

18 Sapwellimomwi silepen kahnimwo kan pahn werkihda; ni ngihl ehu irail pahn koul; pwe irail pahn kilangki pein meserail ahnsou me Kauno pahn pwurehng ketikihdo Saion.

19 Ngisingiski amwail peren; kumwail ehupene koul wasa apwal kan en Serusalem; pwe Kauno ketin kaloalamwahwihala sapwellime aramas akan, e ketin doarehla Serusalem.

20 Kauno pahn ketin doadoahngki lime kan nan mesen wehi kan koaros, oh wasa koaros nan sampah pahn kilang komour en Koht.