1 Oh met kedekedeo ahnsou me Sises ketin kaimwsekala mahmahsanih mahsen pwukat, e ahpw sakih pokono, oh mahsanihong irail: Kilang, kumwail rongehr soahng kan me I padahkiong kumwail mwohn ei pahn kohdahla rehn Semeio; eri, mehmen me pahn tamataman ei mahsen kat oh kapwaiada, irail me I pahn kihdahla ni imwin rahno.

2 Kedekedeo ahnsou me Sises ketin mahsaniher mahsen pwukat, e ahpw ketin kasawiada me mie ekei me wie pwonopwonki, oh medemedewe dahme kupwurke duwen kosonned en Moseso; pwe irail sohte wehwehki mahseneno me soahng kan mehn kawa imwiseklahr, oh mehkoaros wiliakapwalahr.

3 Oh e mahsanihong irail: Kumwail dehr pwonopwonki ei nda me soahng kan mehn kawa imwiseklahr, oh mehkoaros wiliakapwalahr.

4 Kilang, I ndaiong kumwail me kosonnedo me Moses kihdo pweidahr.

5 Kilang, Ngehi me kihong kosonnedo, oh ngehi me wiada inou ong nei aramas en Israel kan; eri, kosonnedo pweidahr rehi, pwe I kohdohn kapwaiada kosonnedo; eri e imwiseklahr.

6 Kilang, I sohte kawehla mahsen en soukohp kan, pwe koaros me saikinte pweida rehi, mehlel I ndaiong kumwail, koaros udahn pahn pweida.

7 Oh pwehki I ndaiong kumwail me soahng kan mehn kawa imwiseklahr, I sohte kawehla soahng kan me kokohpdahr duwen me pahn kohdo.

8 Pwe kilang, inouo me I wiahiong nei aramas kan, koaros saikinte pweida; ahpw kosonnedo me kohieng Moses me imwiseklahr.

9 Kilang, ngehi me kosonnedo, oh maraino. Kumwail koapworopworkin ie, oh dadaur lel imwi, oh kumwail paohn mourla; pwe mehmen me pahn dadaurete lel imwi iei ih me I pahn kihong mour soutuk.

10 Kilang, I kihong kumwail kosonned kan; eri kapwaiada ei kosonned kan. Oh met iei kosonnedo oh mahsen en soukop kan, pwe koaros kin kadehdehkin ie.

11 Oh me kedekedeo ahnsou me Sises mahsaniher mahsen pwukat, e ahpw mahsanihong ehkriemeno, me e ketin piladahr:

12 Kumwail iei nei tohnpadahk kan; oh kumwail wia kamarainpen aramas pwukat, me wia kisehn kadaudok en peneinei en Sosep.

13 Oh kilang, sahpw wet iei sapwamwail sapwen sohso; oh Sahmo ketikihong kumwailehr.

14 Oh sohte ahnsou ehu me Sahmo mahsanihong ie me I pahn ndaiong riomwail ko nan Serusalem.

15 Pil sohte ehu ahnsou me Sahmo mahsaniong ie me I en ndaiong irail duwen ekei keinek en peneinei en Israel kan, me Sahmo ketin kahluwasang nan sahpwo.

16 Iet uwen me Sahme mahsanihong ie, me I en ndaiong irail:

17 Pil mie ekei nei sihpw me sohte mih nan kehl wet; I pahn pil wairaildo, oh irail udahn pahn rong ngilei; oh irail pahn wia pwihn en sihp teieu, oh sileparail pahn metehmen.

18 Oh met, pwehki arail keptakai oh soupwoson irail sohte wehwehki ahn koasoi; eri Sahme mahsanihong ie me I solahr pahn koasoiahiong irail soahng wet.

19 Ahpw, mehlel, I ndaiong kumwail me Sahmo mahsanihong ie, oh I ndaiong kumwail, me kumwail tohrohrsang irail pwehki arail wiewia suwed kan; eri, pwehki arail wiewia suwed kan me irail sohte wehwehki duwen kumwail.

20 Oh mehlel, I ndaiong kumwail me mie ekei keinek me Sahmo katohrehsang irail; oh met pwehki arail wiewia suwed kan me irail sohte wehwehki duwen irail.

21 Oh mehlel I ndaiong kumwail, me kumwail iei pwihn me I nda: Mie ekei nei sihpw me sohte mih nan kehl wet; I pahn pil wairaildo, oh irail udahn pahn rong ngilei; oh irail pahn wia pwihn en sihp teieu, oh sileparail pahn metehmen.

22 Oh irail sohte wehwehki, pwe irail medewe me e pahn Mehn Liki kan; pwe irail sohte wehwehki me Mehn Liki kan pahn weliakapwala sang ni arail kalohk.

23 Oh irail sohte wehwehki me I nda irail udahn pahn rong ngilei; oh irail sohte wehwehki me Mehn Liki kan sohte pahn rongedi ngilei—me I sohte pahn kasalehiong irail pein ngehi ihte sang ni Nehng Sarawi.

24 Ahpw kilang, kumwail rongehr ngileiet, oh pil kilangiehier; oh kumwail iei nei sihpw, oh kumwail iang wadawadiong irail akan me Sahmo ketikihong ie.