1 Kedekedeo pahr keduweisek limao ahpw pil imwisekla, oh aramas kan ahpw tepida manokehla kilel kan oh soahng kapwuriamwei kan me irail rongehr, oh tepida sohla pwuriamweiki kilel de soahng kapwuriamwei me sang nanleng, kahrehda nan mohngiongarail kan tepida kekeluwakala, oh masukunla nan arail madamadau kan, oh tepida sohla kamehlele soahng koaros me re rongehr oh kilangehr—

2 Medmedewehda soahngen mehkot likamw kan nan mohngiongarail kan, me dene aramas oh sang ni manaman en tepilo me elehiong, pwe en kahluwahsang oh pitihdi mohngiong en aramas kan; oh met iei me Sehdan pwurehng kolkihdier mohngiong en aramas akan, kahrehda e kamaskunialahr masarail kan oh kahluwahlang irail en kamehlele me padahk mehlel en Krais kan likamw oh sohte katepe.

3 Kedekedeo aramas kan ahpw kehkehlaila nan arail wiewia suwed oh tiahk suwed kan; oh irail sohte kamehlele me pahn miehte ekei kilel de soahng kapwuriamwei kan wiawi; oh Sehdan ahpw kohseli, kakaluwahsang mohngiong en aramas kan, kaskasongosongih irail oh kahkahrehiong irail en wia mwekid suwed kan nan sahpwo.

4 Oh met kaimwsekalahr pahr duweisek wenouo; oh pil pahr duweisek isuh; oh pil pahr duweisek waluho; oh pil pahr duweisek duwao;

5 Oh pil sounpar epwiki daulihlahr mwein Mosaia, me wia nanmwarki en aramas en Nihpai kan.

6 Oh sounpar wenepwiki duwao daulihlahr ahnsou me Lihai mweselsang Serusalem.

7 Oh sounpar duwao daulihlahr ahnsou me kilelo pwaradao, me soukohp kan kohpada, me Krais pahn ketdihdo pohn sampah.

8 Met Mehn Nihpai kan tepida wadek ahnsou sang ni ahnsou me kilelo pwarada, de sang ni ipwidi en Krais; eri, sounpar duwao dauliher.

9 Oh Nihpai, me wia semen Nihpai, me pwukoahki poadoapoad ko, sohte pwurala nan sahpw en Saraemla, oh e sohte kak dierek nan sahpwo pwon.

10 Kedekedeo aramas kan pil duduwehte nan arail mour suwed kan, mendahte kalkalohk oh kokohp me pekederdohng irail; oh me pil kaimwsekalahr pahr eiseko; oh pahr eisek ehuo pil imwisekla nan arail dihpan.

11 Kedekedeo nan pahr keisek siluho mahwin oh pingiping tepida wiawi nan sahpwo pwon; pwe pwihn en Kadienden lipirap ko wie tohtohla, oh ahpw kemehla aramas tohto, oh kawehla kahnihmw tohto, oh wiwiahda mehla oh kamaramas nan sahpwo pwon, me kahrehda anahnepen aramas koaros, Mehn Nihpai kan oh Mehn Leimen kan koaros, re en alehda neirail dipwisou en mwahwin kan pwe re en doare irail.

12 Eri, Mehn Leimen kan koaros me weliakapwehng Kauno ahpw ehupenehng riarail kan, Mehn Nihpai kan, pwehki anahnepen, pererehn arail mour oh arail pwoud kan oh neirail seri kan, me karehda re alehda dipwisou en mahwin pwe re en pelian pwihn en Kadienden lipirap kan, ei, oh pwe re en pil doandoare arail pwuhng, oh arail kapai en ahneki mwomwohdiso oh arail kaudok, oh arail saledek oh saledek en momour.

13 Kedekedeo mwohn pahr keisek siluh eh imwisekla Mehn Nihpai kan kereniong re pahn kamwomwala pwehki mahwin wet, me kapahtoula mehlel.

14 Kedekedeo Mehn Leimen kan me miniminiongehr Mehn Nihpai kan iang wadawadiongehr rehn Mehn Nihpai kan;

15 Oh arail keriau kohsang rehrail, oh kilirail kan pwetepwetala duwehte Mehn Nihpai kan;

16 Oh neirail mwahnakapw kan oh peinakapw kan pil linganla mehlel, oh re wadawadiongehr mehn Nihpai kan, oh adanikihla Mehn Nihpai. Oh met kaimwsekala pahr eiseksiluh.

17 Kedekedeo ni tepin pahr keisek pahieuo, mahwin nanpwungen lipirap ko oh aramas en Nihpai kan ahpw doudoulahte oh kapahtoula mehlel; ahpw, aramas en Nihpai kan ekis paiamwahu sang lipirap ko, kahrehda re pwakirailsang nan sapwarail sahpw kan kohla nan nahna kan oh nan wasahn arail rukula kan.

18 Oh met kaimwsekala pahr eisek pahieu. Oh nan pahr eisek limauo re pwurehng kohdohng aramas en Nihpai kan; oh pwehki wiewia suwed en aramas en Nihpai, oh pwehki arail pingiping tohto kan oh pwupwidi kan, pwihn en Kadienden lipirap ko kin kaloweiraildi wasah kei.

19 Oh met kaimwsekalahr pahr eisek limau, oh met aramas kan mihmi nan irair en kahpwal tohto; oh kedlahs en kamwomwala wie tentenek pohrail, kahrehda kereniong irail pahn kamakamkihla, oh met pwehki diparail kan.