1 Kedekedeo e ahpw ketin mahsanihong irail re en ntingihdi mahsen kan me Sahmo ketikihong Malakai, me e pahn ketin mahsanihong irail. Kedekedeo mwurin mahsen ko eh ntingdier, e ahpw ketin kawehwehda mahsen ko. Oh iet mahsen kan me e ketin mahsanihong irail, ketihtihki: Sahmo ahpw mahsanihong Malakai—Kilang, I pahn kadarowei ei meninkeder pwe en kaunopada alei mwohi, oh Kauno me kumwail kin kasikasik ahpw pahn mwadangete ketidohng nan Tehnpese Sarawio, iei meninkeder en inouo, me kumwail inenen kasikasi; kilang, e pahn pwarodo, Kauno Wasa Lapalap mahsanih.

2 Ahpw ihs me pahn kak kanengamah ni rahno me e pahn ketido, oh ihs me pahn kak wie momour ni eh pahn ketido? Pwe e pahn ketin rasehng kisiniei me kin kamwakele mete, oh pil rasehng sohpw kehlail.

3 Oh e pahn ketiket nan mwoale rasehng aramas me kin isik oh kamwakele silper; oh e pahn kamwakelehda nein Lihpai pwutak kan, oh kamwakele duwehte kohl oh silper, pwe irail en kak wiahiong Kauno meirong sang ni mour pwung.

4 Eri Kauno ahpw pahn ketin kupwure meirong en Suda oh Serusalem, duhwehte mahso, oh duwehte sounpar en mwowe ko.

5 Oh I pahn kohdo rehmwail pwe I en kapwung kumwail; I pahn madangete wia kadehdeh me pahn uhwong irail sounwunahni kan, oh me kin kamwahl akan, oh me kin wia kadehde likamw akan, oh me kin pitih nah tohn doadoahk ni sohte isais pwung, me kin kaloke lihodi oh seri sopwoupwou kan, oh me kin sohpeisang mehn liki kan, oh sohte waunekin ie, Kauno Wasa Lapalap ketin mahsanih.

6 Pwe ngehi iei Kauno, I sohte kin wekila; eri kumwail nein Seikop pwutak kan sohte salongala douluhl.

7 Iei sangete mwehin amwail pahpah kahlap ako kumwail salongasangehr ei tiahk sarawihkan, oh solahr kapwaiada. Kumwail pwurodohng rehi oh I pahn sapahlwong rehmwail, Kauno, Wasa Lapalalap me ketin mahsaniher. Ahpw kumwail kin koasoia: Ia mwomwen aht pahn pwurewei?

8 Ia duwe, mie aramas kak pirapa Koht? Mehndahte amwail kin piripirapa ie. Ahpw kumwail kin nda: Ia mwomwen aht kin piripirapa komwi? Sang nan meirong eisek kis ehu oh meirong en kaisihsol.

9 Kumwail riahkilahr keriah ehu, pwehki tohn wehi wet pwon kin piripirapai ie.

10 Kumwail wahdo amwail meirong eisek kis ehu nan wasahn nahko, pwe en mie menge nan tehnpeseio; oh song duwen ei manaman ni mwohmw wet, Kauno Wasa Lapalap ketin mahsanih, ma I sou pahn ringadahng kumwail wenihmwtok en nanleng, oh kamwerediong kumwail kapai kan ni uwe ieu me dirala sohla dowe.

11 Oh I pahn kauhdi meninkauo pwehki kumwail me kahrehda, oh e sohte pahn kauwehla wahntuhkehn amwail mwetuwelo, de pil wahn amwail wain kan sohte pahn pwupwidi mwohn e pahn mahla, Kauno Wasa Lapalap ketin mahsanih.

12 Oh tohn wehi kan koaros pahn kahdanekin kumwail meid pai, pwehki spwamwail pahn wia sahpw kaselel, Kauno Wasa Lapalap ketin mahsanih.

13 Kauno mahsanih, kumwail kin lokaiahn aklapalap ong ie. Ahpw kumwail kin nda: Soangen lokaiahn aklapalap dah me se kin wiahiong komwi?

14 Kumwail kin nda: Sohte katepen aht pahn papah Koht, oh ia duwe, e kin mie kamwahupe ma kitail kin kapwaiada sapwellime tiahk sarawi kan oh me kitail kin mwahiei oh weweid mwohn Kauno Wasa Lapalap?

15 Oh met kitail kin wiahki aramas pohnmwahso me irail peren; ei, irail akan me kin wia doadoahk suwed kan me re pweida mwahu; ei, irail akan me kin kasongosonge Koht ahpw sohte me kin ale kalokepe.

16 Eri aramas akan me kin lemwwiki Koht ahpw koasoakoasoiapene nanpwungarail, oh Kauno ketin karonge oh kupwure me re koasoia; oh pwuhk en kataman ehu ahpw ntingidi mwohn sihlangi ong irail akan me kin lemmwiki Kauno, oh me kin medemedewe mwarehu.

17 Oh Kauno Wasa Lapalap ketin mahsanih, I pahn sapwellimankinirailla ni rahno ahnsou me kihpene nei kapwat kesempwal akan; oh I pahn doarehla duwehte aramas men mi kin doarehla pein nah pwutak me kin papah ih.

18 Eri irail ahpw pahn pwurodo oh kilang wekpeseng en aramas pwung kan oh aramas suwed kan, me kin papah Koht oh me sohte kin papah ih.