1 Oh met kedekedeo ahnsou me Sises mahsaniher mahsen pwukat e ahpw pwurehng sohpeila rehn pokono, oh pwurehng mahsaniong irail, ketihtihki: Mehlel, Mehlel, I ndaiong kumwail, dehr kadeik mehteikan, pwe kumwail de pakadeikda.

2 Pwe Koht pahn ketin kadeik kumwail nin duwen amwail pahn kadeik mehteikan; oh e pahn ketin sohngkin kumwail mehn sohngohte me kumwail kin sohngki mehteikan.

3 Oh dahme ke kin tehngki diper me mi nan pwoaren mesen riomwen, a ke ahpw sohte kin nsenohki lepin tuhke me mih nan pwoaren mesomwen?

4 De ia duwen omw kak ndahng riomwo: Mweidehng I en kihsang diperen nan pwoaren mesomwen—ahpw kilang, lepin tuhke pwoat mih nan pwoaren mesomwen?

5 Mwalaun ahmwen, kihsang mahs lepin tuhkehn nan pwoaren mesomwen; oh ke ahpw pahn kak kilang mwahu duwen omw pahn kihsang diperen nan pwoaren mesen riomwo.

6 Kumwail dehr kihong kidi kan mehkot me sarawi, kumwail dehr pil kesehdiong mwohn pwihk kan noumwail kisin takai kesempwal akan, pwe irail pahn tiakpeseng, oh sohpeiong kumwail oh tehrkumwailpeseng.

7 Peki, oh kumwail ahpw pahn ale; rapahki, oh kumwail ahpw pahn diar; letelet, oh e ahpw pahn ritidahng kumwail.

8 Pwe koaros me kin peki, re pahn ale; me kin rapahki, re pahn diar; oh me kin letelet, e pahn ritidahng.

9 De mie aramas men rehmwail me kak kihong nah pwutak takai, ma e peki pilawa?

10 De sinek, ma e peki kisin mwomw?

11 Ma kumwail suwed, ahpw kumwail kin ese kihong noumwail seri kan dahme kin mwahuong irail, eri, ia uwen soahng tohto me mwahu me Samamwail me ketiket nanleng pahn ketikihong irail kan me kin patohwan peki reh?

12 Eri, kumwail wiahiong mehteikan me kumwail kin anahne aramas akan en kin wiahiong kumwail, pwe iei met wehwehn kosonnedo oh mahsen en soukohp akan.

13 Kumwail keid nan ewen kehl wetikitiko; pwe elen kolahng nan ehl me tehlap oh mengei, oh aramas tohto kin keid ie;

14 Ahpw wenihmw me kolahng mour me wetikitik, oh malaulau me kin diar.

15 Kumwail kalekeikumwailsang soukohp likamw akan, me kin pwarodohng kumwail ni mwomwen sihpw, a loalarail re udahn rasehng kidien wel kan.

16 Kumwail pahn esehkin irail arail wiewia kan. Pwe dah, mie aramas kin dolungasang wahn wain ni dihpw tekatek, de wahn pik ni tuhke leles?

17 Iei pahn mwomwe, tuhke mwahu kin wah mwahu; a tuhke sakanakan kin wa suwed.

18 Tuhke mwahu sohte kin kak wa suwed, oh tuhke sakanakan sohte kak wa mwahu.

19 Tuhke koaros me sohte kin wa mwahu kin paldi, oh lekdekiong nan kisiniei.

20 Eri, kumwail pahn kin esehki sang ni arail wiewia kan.

21 Kaidehn aramas koaros me kin likwerih ie, ndinda, Maing Kaun, Maing Kaun, pahn pidelong nan wehin nanleng; ahpw irail kan me kin kapwaiada kupwur en Semei me ketiket nanleng.

22 Me tohto pahn ndahng ie ni rahno: Maing Kaun, Maing Kaun, se sou kohpadahr ni mwaromwi, ni mwaromwi se kausekihsangehr tepil kan, oh se wiadahr manaman tohto ni mwaromwi?

23 Oh ngehi ahpw pahn ndahng irail: I sohte mwahn esei kumwail; kohkohweisang ie, kumwail me mouren tiahk suwed kan.

24 Eri, mehmen me kin rong ei padahk pwukat oh king kapwaiada, I pahn karasahiong ih ohl loalokong men, me kauwada imwe pohn paip ehu—

25 Oh ahnsou me e pahn keteuda oh lapakehda, oh kisinieng ipidohng, oh ipihpir ihmwo; oh e sohte pahn pwupwidi, pwehki e kokoudahr pohn paip ehu.

26 Oh mehmen me kin rong ei padahk pwukat oh sohte kin kapwaiada, pahn rasehng ohl pweipwei men me kauwada imwe pohn pihken ni oaroahr—

27 Oh ahnsou me e pahn keteuda oh lapakehda, oh kisinieng ipidohng, oh ipihpir ihmwo; oh e pahn pwupwidi, oh ia pahn uwen ohla wet.