1 Oh met kedekedeo nan pahr keisek wenou sang mwurin ipwidi en Krais, Lakonius, kepinahn sahpwo, alehdi kisin likou ehu sang kaun oh kepinahn pwihn en lipirap ko; oh iet nting kan me ntingdi, me mahsanih:

2 Maing Lakonius, kepina lapalap en sahpwet, kilang, I ntingihwei kisin likou wet ong komwi, oh kepingaiuk mehlel pwehki ahmw kehlail, oh pil kehlail en noumw aramas kan, nan kolokolete dahme kumwail kin medewe me amwail pwuhng oh saledek en momour; ei, kumwail kehkehlail, mwomwen me limen koht me sowese kumwail, nan amwail doare amwail saledek em mour, oh amwail dipwisou kan, oh amwail wehi, de me kumwail kin ndahki.

3 Oh e kansensuwed ong ie, maing Lakonius, me komw pahn sohte marain oh idawehn pein nsenomw ni omw pahn medewe me kumwail kak pelian ohl komwad tohto me I kin ruwese, me ahnsou wet onopadahr nan arail tehtehn mahwin, oh awiawih ni ar kasikasik mehlel ruwes me pahn mahsanih—Kohdihlahng Mehn Nihpai kan oh kemeirailla.

4 Oh pwehki I ese arail komwad, pwehki I songehr irail nan mahwin, oh pwehki I ese kailok poatoapoat me re ahneki ong kumwail pwehki sapwung tohto me kumwail wiahiong irail, eri ma re pahn kohwehng kumwail re pahn kohwei oh kamwomwala kumwail.

5 Eri I ntingiada kisin likou wet, katengehkihdi pein pehi, pwehki ei pwunodki amwail mour, pwehki amwail tengedieng dahme kumwail kamehlele me pwung, oh amwail eimah nan mahwin.

6 Eri I ntingwei rehmwail, pwehki I mwahuki kumwail pahn mweidehng nei aramas kan, amwail kahnihmw kan, sapwamwail kan, oh amwail dipwisou kan, mwahusang arail pahn kohwehng kumwail wa kedlahs oh kamwomwala kumwail.

7 De ni ehu koasoi, kumwail mweidehng kumwail pahn aht manaman, oh patehng kiht oh esehla aht doadoahk rir kan, oh wiahla riat pwe kumwail en kak duweikihtla—kaidehng nait lidu, ahpw riat oh iangaht nan soahng koaros me aht.

8 Oh kilang, I kahukihonguhk, ma ke pahn wia met, ni ahmw kahula, ke sohte pahn kamakamala; ahpw ma ke sohte pahn wia met, I kahukihonguhk, me nan sounpwung pahn wad I pahn ruwesehiong nei sounpei kan re en kohdihwehnguhk, oh re sohte pahn uhdi de kamaurala, ahpw pahn kemeikukala, oh pahn mweidehng kedlahs en peleiukedi lao ke mehla.

9 Oh kilang, ngehi me Kidianai; oh ngehi me wia kepina en pwihn rir en Kadienden; me wia pwihn oh doadoahk me I ese me mwahu; oh e sangete mahs oh e pepous kohdo lel reht.

10 Oh I ntingihwei kisin likou wet rehmw, Lakonius, oh I kasik me ke pahn mweidehng kiht sapwamwail kan oh amwail dipwisou kan, ni sohte kakerehdi nta, pwe nei aramas kan re en kak pwurehng arail pwuhng oh koapworment, oh ma ke sohte pahn wia me, I pahn dupuk sapwung me wiawihong irail. Ngehi iei Kidianai.

11 Oh met kedekedeo ahnsou me Lakonius alehdier kisin likou wet e udahn pwuriamwei mehlel, pwehki loalap en Kidianai eh kak nda re en mweidehng sahpwen Mehn Nihpai kan, oh kamkamasak aramas kan oh dipuk sapwung ong irail akan me sohte sapwung wiawihong irail, ihte irail me pein wiahiong irail sapwung ni arail pwupwidi oh iangala pwihn lipirap suwed oh sakanakan.

12 Met kilang, Lakonius, me wia kepinao, wia ohl pwung men, oh sohte kak masakada ruwes oh kamasepwehk en lipirap men; eri e sohte rong nein Kidianai kisin likouo, me wia kepinahn pwihn lipirapoko, ahpw e kahrehiong nah aramas kan re en peki rehn Kauno en ketin ketikihong irail kehlail ni ahnsou me pwihn lipirap kan pahn kohdohng irail.

13 Ei, e ahpw kadarpeseng pakair ehu rehn aramas koaros, me irail en kihpene arail pwoud kan, oh neirail seri kan, neirail pelin sihpw kan oh neirail pelin kou kan, oh arail dipwisou kan wasahte ieu, ihte me soh sapwerail kan.

14 Oh e ahpw wiahda me re pahn wiahda wasahn rukulah kan en wiahwihda kapilirailpene, oh e pahn anahne kehlail mehlel. Oh e ahpw wiahda me sounpei kan, sang pali koaros en Mehn Nihpai oh Mehn Leimen kan, de irail koaros me wadawadiong rehn Mehn Nihpai kan, pahn kiheng soun silasil en tetehk irail, oh sile irail sang pwihn lipirap kan pwohng oh rahn.

15 Ei, e ahpw ndaiong irail: Nin duwen Kauno e ketin ieias, ma kumwail sohte pahn koluhkihla dipamwail kan, oh peki rehn Kauno, kumwail sohte pahn poadoandoarasang nan pehn pwihn en Kadienden lipirap kan.

16 Oh ahn Lakonius mahsen kan oh kokohp kan me kesempwal oh kapwuriamwei me kahrehda aramas kan ar lemwkihda; oh re nantihong nan arail kehlail en wia nin duwen mahsen kan en Lakonius.

17 Kedekedeo me Lakonius ahpw pilada emen kaun lapalap en sounpei kan en Mehn Nihpai kan koaros, pwe en kaweid irail ni ahnsou me pwihn lipirap kan pahn kohdihdo sang nan sapwtehn pwe en uhwong irail.

18 Met me keieu lapalap nan pwungen kaun lapalap en sounpei kan oh kaun lap en sounpei pwon en Mehn Nihpai kan ahpw pilipilda, oh ede iei Kidkiddonai.

19 Met iei tiahk en Mehn Nihpai kan koaros me re kin pilada neirail kaun lapalap en sounpei kan, (ihte kaidehn ahnsou me re kin suwedla) emen me ahneki ngehn en kaudihal oh pil kokohp; eri, Kidkiddonai mentet wia soukohp men rehrail, pil iangahki arail sounkopwungo.

20 Met aramas kan ndaiong Kidkidonai: Kapakapiong Kauno, oh mweidehng kitail en kohdahla pohn nahna kan oh nan sapwtehno, pwe kitail en kak kemehla pwihn lipirap kan oh kamwomwirailla nan pein sapwarail kan.

21 Ahpw Kidkidonai ndaiong irail: Kauno sohte mweidada; pwe ma kitail pahn kohdalahng irail Kauno pahn ketin mweidkitailla nan pehrail kan; eri kitail pahn kaunopada kitail nan wereneng sapwatail kan, oh kitail pahn kihpene neitail sounpei kan koaros, oh kitail sohte pahn kohlahng irail, ahpw kitail pahn awih lao irail kohdohng kitail; eri nin duwen Kauno e ketin ieias, ma kitail pahn wia met e pahn ketikiniraildo nan pehtail kan.

22 Kedekedeo nan pahr keisek isuho, nan imwin pahro, ahn Lakonius pakairo ahpw lelohngehr wasa koaros nan sahpwo, oh irail alehier werarail oahs kan, oh weren nan sapwakan, oh neirail pelin kou kan, oh pelin mahn tikitik kan, oh neirail sihp kan, oh arail werentuhke, oh arail dipwisou kan, oh mwekimwekid kohwei nan meh kid kan oh nan meh nen kan, lao irail koaros kohwei wasa me re koasonehdi me re pahn kohpene ie, pwe re en doarehsang irail arail imwintihtih kan.

23 Oh sahpwo me re koasonehdi iei sahpw en Saraemla, oh sahpw me mih nan pwungen sahpw en Saraemla oh sahpw en Sapwenrahk, ei, kohla lel irepen nan pwungen Sapwenrahk oh Sapwentehnla.

24 Oh mie aramas kid kei me kahdaniki Mehn Nihpai kan, me kapokonpene nan sahpw wet. Met Lakonius ahpw wiahda re en kapokonpene nan sahpw me mih palier, pwehki keriah lap me mih nan sahpw en paliepeng.

25 Oh irail sileirailsang arail imwintihtih kan; oh irail mihmi nan sahpwtehiu, oh nan pwihn ehute, oh irail lemwiki mahsen kan me Lakonius mahsanihong irail, kahrehda irail koluhkihla diparail kan; oh irail kin wia arail kapakap ong Kauno arail Koht, pwe en kak doareirailla nan ahnsou me arail imwintihti kan pahn kohdohng irail nan mahwin.

26 Oh irail ahpw pahtoula mehlel pwehki arail imwintihti kan. Oh Kidkidonai ahpw kupwurehda me irail pahn wiahda dipwisou en mahwin koaros, oh re pahn kehlail iangahki tehtehn mahwin, oh iangahki mehn sansar kan, oh mehn sansar tikitik kan, nin duwen sapwellime kaweid.