1 Met kilang, I pahn kasalehionguhk me irail sohte wiahda nanmwarki pohn sahpwo; ahpw nan pahrohte, ei, pahr silihseko, irail kawehla sehr en sounkopwungo, ei, irail kemehla sounkopwung lapalap en sahpwo.

2 Oh aramas akan katohrohrpeseng nanpwungarail; oh irail tohrohrpesenge wiahda ehu ehu keinek, emen emen ohl nin duwen eh peneinei oh ah peneinei laud oh kompoakepah kan; oh met irail kawehla koapwormet en sahpwo.

3 Oh ehu ehu keinek pilada arail kaun de me pahn kaunda irail; oh met irail wiahla keinek kan oh kaun kan en keinek kan.

4 Met kilang, ohl koaros tohn eh kisin peneinei me laud oh tohto peinei laud oh kempoakepah; eri arail keinek kan kehlail mehlel.

5 Met soahng pwukat koaros wiawiher, oh saikinte mahwin wiawi nanpwungarail; oh wiewia suwed pwukat koaros wiawihongehr aramas pwukat pwehki arail mweidehng irail pahn manaman en Sehdan.

6 Oh petehkpen koapworment ohla, pwehki pwihn suwed rir en kepoakepah oh peneinei en irail kan me kemehla soukohp kan.

7 Oh irail wiahda pingping laud nan sahpwo, me kahrehda pali laud en aramas me mwahu kan kereniong koaros suwedla; ei, miehte aramas mwahu ahpw nan pwungarail ahpw malaulau.

8 Oh met saikinte lel sounpar wenou ahpw pali laud en aramas akan sohpeisangehr mour pwung, duwehte kidi me kin pwurehng ah mwus, de pwihk duhduwer pwurehng tapwur nan pwelmatak.

9 Met pwihn suwed rir wet, me kahreda wiewia suwed laud rehn aramas kan, ahpw pokonpene nanpwungarail, oh pilada emen ohl arail kaun me re kin ekeriki Seikop;

10 Oh irail ekeriki arail nanmwarki; eri e wiahla nanmwarki en pwihn suwed pwukat; oh e wia emen me keieu en iang uhwong soukohp kan me kadehdehki Sises.

11 Kedekedeo irail sohte dir duwehte keinek kan en aramas akan, me ehupene ihte arail kaun kan me kin koasonehdi arail kosonned kan, emen emen nin duwen eh keinek; ahpw irail imwintihti; mehndahte arail sohte wia aramas pwung, ahpw irail ehupene ni arail kailongki irail kan me wiahda inou en kawehla koapworment.

12 Eri, pwehki Seikop e kilang me arail imwintihti kan tohtohsang irail, pwehki e wia nanmwarki en pwihn wet, e ahpw ruwesehiong nah aramas kan me irail pahn tangala nan sahpw me keieu mih paliepeng, oh wasahu re pahn wiahda arail wehi, lao me pwupwidih kan pahn kin iangirailla, (pwe e pitikinirail me tohto me pahn pwipwidi) oh re ahpw pahn kak kehlaila pwe re en pelian keinek kan en aramas kan; oh irail ahpw wia met.

13 Oh arail tango me mwadang kahreda e sohte kak kauhdi lao irail dohla oh aramas akan sohte kak koledi irail. Oh met kaimwsekala pahr silihseko; oh met iei wiewiahn aramas en Nihpai.

14 Kedekedeo nan pahr silihsek ehuo irail katohrohrpeseng nan keinek kan, emen emen ohl nin duwen eh peneinei tikitik, peneinei laud oh kempoakepah; ahpw irail pwungkipene me irail sohte pahn mahwinpene nanpwungarail; ahpw arail kosonned kan tohrohrpeseng, oh wiepen arail koapworment, pwe e kin wiawihda nin duwen madamadau en arail soumas kan oh arail kaun kan. Ahpw irail wiahda kosonned kehlail me ehu keinek sohte pahn kotelain ong ehu, kahrehda irail kak ahneki popohl nan sahpwo; ahpw, mohngiongarail kan sohpeisangehr Kauno arail Koht, oh irail kostakaihdi soukohpw kan oh kesehieisang irail nan pwungarail.

15 Kedekedeo me Nihpai—pwehki tohnleng kan ar kin pwarohng oh pil kepitien Kauno, eri pwehki e kilangehr tohnleng kan, oh pwehki e pein kilangki mese, oh pwehki manaman kohiengehr ih pwe en kak wehwehki duwen sapwellimen Krais doadoahk en kalohk, oh pwehki e pil pein kilangki mese arail mwadahng en pwurasang mour pwung pwuralahng wiewia suwed oh mour suwed kan;

16 Eri, pwehki e nsensuwedkihla kekeluwak en mohngiongarail kan oh maskun en arail madamadau kan—nan pahrohte e ahpw kohwei nanpwungarail, oh tepida kadehdehki, ni eimah, duwen koluhla oh kamwakel en dihp kan sang pwoson Kauno Sises Krais.

17 Oh e ahpw kalohngkihong irail soahng tohto; oh koaros sohte kak ntingdi, oh ekeite e sohte pahn itar, eri e sohte pahn ntingdi an pwuhk wet. Oh Nihpai ahpw kalohk sang ni manaman oh mweimwei kehlail.

18 Kedekedeo irail ahpw lingeringer pah, iei pwehki e ahneki manaman laudsang irail, pwe apwal irail en kasapwunge ah koasoi kan, pwehki eh pwoson kehlail Kauno Sises Krais tohnleng kan kin kalohkehng ih rahn koaros.

19 Oh sang ni mwaren Sises e kin kausala tepil kan oh ngehn saut kan; oh mehlel e pil kamaurada rie pwutak sang mehla, mwurin eh kostakaidi oh lokolongki mehla sang aramas kan.

20 Oh aramas akan kilangidi, oh kadehdehdi, oh lingeringer pah pwehki ah manaman; oh e ahpw pil wia doadoahk kapwuriamwei tohto, mwohn meseng aramas akan, sang ni mwaren Sises.

21 Kedekedeo pahr silihsek ehuo ahpw imwisekla, oh mie me malaulau me weliakapwehng Kauno; ahpw koaros me weliakapwala kasalehda ni mehlel ong aramas kan me manaman oh Ngehn en Koht lelohng irail, me sang rehn Sises Krais, me irail kamehlele.

22 Oh koaros me tepil kan kohsang irail, oh maiaudahsang nan arail soumwahu kan oh arail kahpwal kan, kasalehda ni mehlel ong aramas akan me Ngehn en Koht sair irail, oh irail kamaiauda; oh irail pil kasalehda kilel kan oh ahpw wia ekei doadoahk kapwuriamwei rehn aramas kan.

23 Met pil kaimwsekala pahr silihsek riauo. Oh Nihpai ahpw kalohk ong aramas akan nan tepin pahr silihsek siluho; oh e kalohngkihong irail koluhla oh kamwakelpen dihp kan.

24 Met I men pil katamankin kumwail, me sohte emen me kin koluhla me sohte kin papidaiskihla pihl.

25 Eri, mie ohl kei me Nihpai kasarawihong nan pwukoa wet, me koaros me pahn kohdo rehrail pahn papidaikihla pihl, oh met en wia mehn kadehde oh kedehde mwohn Koht, oh ong aramas kan, me irail koluhlahr oh alehdi kamwakelpen diparail kan.

26 Oh nan tepin pahr wet mie me tohto me papidaisla sang koluhla; oh met pali laud en pahro imwiseklahr.