1 Oh met kedekedeo ahnsou me Sises ketidalahr nanleng, pokono ahpw pwurpeseng, oh emen emen ohl ahpw kahrehda eh pwoud oh nah seri kan oh pwuralahng pein nimwarail.

2 Oh mwohn e soutipene, aramas akan ahpw madangete pakairkiseli me pokono kilangadahr Sises, oh me e ketin papah oh kalohkehng irail, oh lakapw e pahn pwurehng pwaredohng pokono.

3 Ei, oh pwohngo pwon re ahpw pakapakairkiseli duwen Sises; oh irail kadarewei rehn aramas akan kahrehda tohto aramas, ei, tohto mehlel, me doadoahk laud pwohngo, pwe lakapw irail en kak kohdo wasa me Sises ketin kasalehiong pein ih pokono.

4 Kedekedeo mandahn rahno, ahnsou me pokono kapokonpenehr, kilang, Nihpai oh rie ohl me e kamourda sang mehla, me adaniki Dimodi, oh pil nah pwutak, me adaniki Sonas, oh pil Madonai, oh Madonaia, rie ohl, oh Kumen, oh Kumenonai, oh Seremaia, oh Semnon, oh Sonas, oh Sedekaia, oh Aiseia—met iei eden irail tohnpadahk kan me Sises ketin piladahr—kedekedeo irail ahpw kohwei oh kesihnenda nan werengen pokono.

5 Oh kilang, uwen pokono eh laud mehlel irail wiahda re en katohrohrpeseng wiahda pwihn eisek riau.

6 Oh ehkrimeno ahpw padahkih pokono; oh kilang, irail ahpw wiahda me pokono pahn kelipwikidi pohn pwehlo, oh pahn kapakap ong Sahmo ni mwaren Sises.

7 Oh tohnpadahk kan ahpw pil kapakap ong Sahmo ni mwaren Sises. Kedekedeo irail ahpw kesihnenda oh kalohkehng aramas akan.

8 Oh ahnsou me irail kalohngkihongehr irail mahsenko me Sises ketin mahsanih—ni arail sohte wekidala ehute mahsen me Sises mahsanih—kilang, irail kelipwikihdi oh kapakap ong Sahmo ni mwaren Sises.

9 Oh irail kapakapki dahme irail keieu inangih; oh Ngehn Sarawi me irail inangih pahn kohieng irail.

10 Oh ahnsou me irail nek kapakap, irail ahpw kohdihla ni keilen pihlo, oh pokono idawehn irailla.

11 Kedekedeo Nihpai ahpw kohdihla nan pihlo oh ahpw papidaisla.

12 Oh e kohdahsang nan pihlo oh tepida papidais. Oh e papidaisla koaros me Sises ketin pilada ko.

13 Kedekedeo ahnsou me irail koaros papidaisla oh doudahsang nan pihlo, Ngehn Sarawi ahpw ketdohng pohrail, oh irail direkihla Ngehn Sarawi oh iangahki kisiniei.

14 Oh kilang, e mwomwen me kisiniei me kapilirailpene; oh e kohdihdo sang nanleng, oh pokono kilangidi, oh ahpw kadehdehki; oh tohnleng kan ahpw kohdido sang nanleng oh papah irail.

15 Kedekedeo ahnsou me tohnleng kan wie papah tohnpadahk kan, kilang, Sises ahpw ketido oh ninlengihda nanpwungarail oh papah irail.

16 Kedekedeo e ahpw mahsaniong pokono, oh mahsanih me irail en pwurehng kelipwikidi pohn pwehlo, oh pil nah tohnpadahngko en pil kelipwikidi pohn pwehlo.

17 Kedekedeo ahnsou me irail koaros kelipwikihdi pohn pwehlo, e ahpw mahsanihong sapwellime tohnpadahngko me irail pahn kapakap.

18 Oh kilang, irail tepida kapakap; oh irail kapakap ong Sises, ekeekeriki arail Kaun oh arail Koht.

19 Kedekedeo Sises ahpw ketlahsang nanpwungarail, oh ketla ekis ekis keilahsang irail oh poaridi pohn pwehlo, oh mahsanih:

20 Maing Sahm, I kapingkihong komwi pwehki omwi ketikihong Ngehn Sarawi irail akan me I piladahr; oh pwehki arail kamehlele ie me I pilkinirailda sang nan sampah.

21 Maing Sahm, I peki rehmwi me komwi en ketikihong Ngehn Sarawi rehn irail koaros me kamehlele ei mahsen akan.

22 Maing Sahm, komw ketikihong irailehr Ngehn Sarawio pwehki arail kamehlele ie; oh komw mahsaniher me irail kamehlele ie pwehki omwi karonge irailehr, oh irail kapakap ong ie; oh irail kapakap ong ie pwehki ei ieiang irail.

23 Oh met maing Sahm, I kapakap ong komwi pwehki irail, oh pil irail koaros me pahn kamehlele arail mahsen kan, pwe irail en kak kamehlele ie, pwe I en kak mih rehrail duwehte komwi, maing Sahm, omwi kin ketiket rehi, pwe kitail en kak ehu.

24 Kedekedeo ahnsou me Sises kasakasiongehr Sahmo, e ahpw sapahldo rehn sapwellime tohnpadahngko, oh kilang, irail doudoulahte, sohte uhdisang kapakap ong ih; oh irail sohte doadoahngki mahsen tohto, pwe e kohieng irail dahme re pahn kapakapki, oh irail ianangih mehlel.

25 Kedekedeo Sises ahpw kapaiada irail ni arail wie kapakap ong ih; oh sihlangi ahpw poloalkin irail, oh marain en sihlangi kamarainirailda, oh kilang irail pil pwetepwetala duwehte sihlangi oh pil ehn Sises likouo; oh kilang pwetepwetiho daulihala pwetepwet koaros, iei, sohte mehkot pohn sampah me pwetepwet duwehte pwetepweti.

26 Oh Sises mahsanihong irail: Kumwail kapakap; oh irail sohte uhdihsang kapakap.

27 Oh e ahpw pwurehng ketin sohpeisang irail, oh ekis ketilahsang wasao oh poaridi nan pwehlo; oh e ahpw pwurehng kasakasiong Sahmo, mahmahsanih:

28 Maing Sahm, I kapingkihong komwi pwehki omwi kamwakehlehda irail akan me I piladahr, pwehki arail pwoson, oh I kapakapkin irail, oh pil irail akan me pahn kamehlele arail mahsen kan, pwe irail en kak mwakelekelda rehi, sang ar pahn pwoson arail mahsen kan, iei duwehte arail mwakelekel rehi.

29 Maing Sahm, I sohte kapakapki sampah, ahpw irail akan me komw ketikihong ie sang nan sampah, pwehki arail pwoson, pwe irail en kak mwakelekelda rehi, pwe I en kak mih rehrail duwehte komwi, maing Sahm, omwi ketiket rehi, pwe kitail en kak ehu, pwe I en kak linganla rehrail.

30 Oh ahnsou me Sises mahsaniher mahsen pwukat e ahpw pwurehng sapahldo rehn sapwellime tohnpadahngko; oh kilang, irail poadidiong wie kapakapiong ih, oh sohte uhdihsang; oh sihlangi ahpw pwurehng poloulkin irail; oh kilang, irail pwetepwetala iei duwehte Sises.

31 Kedekedeo e ahpw pwurehng ekis ketilahsang wasao oh kasakasiong Sahmo;

32 Oh sohte lowe me kak koasoia mahsen kan me e ketin kasakaski, oh pil sohte aramas me kak ntingihdi mahsen kan me e kasakaski.

33 Oh pokono rongidi oh kadehdehki; oh mohngiongarail kan ritida oh irail ahpw wehwehki nan mohngiongarail kan mahsen kan me e kasakaski.

34 Ahpw, mahsen kan me e ketin kasakaski kesempwal oh kapwuriamwei me kahrehda irail sohte kak ntingdi, de pil aramas sohte kak koasoia.

35 Kedekedeo ahnsou me Sises kaimwsekala kasakaso, e ahpw pwureng sapahldohng tohnpadahngko, oh mahsanihong irail: I sohte kin kilang pwoson laud rehn Mehn Suhs kan koaros; eri I sohte kak kasalehiong irail manaman kapwuriamwei kan, pwehki arail sohpwoson.

36 Mehlel I ndaiong kumwail, sohte emen rehrail me kilangidi soahng kesempwal duwehte me kumwail kilangehr; de pil rongehr soang kesempwal me kumwail rongehr.