1 Oh met, kilang, I ndaiong kumwail, me kumwail anahne rapahki mepwukat. Ei, I kihong kumwail kosonned ehu me kumwail en loaloapwoationg rapahki mepwukat; pwe mahsen kan en Aiseia me kesempwal mehlel.

2 Pwe mehlel e koasoia duwen soahng koaros me pid nei aramas me wia peneinei en Israel; eri e konehng me e pahn pil koasoia duwen Mehn Liki kan.

3 Oh soahng koaros me e koasoia pweidahr oh pahn pweida, iei nin duwen mahsen kan me e koasoiahier.

4 Eri kumwail rong ei mahsen kan; kumwail ntingihdi soahng kan me I pahn ndaiong kumwail; oh nin duwen ahnsou oh kupwuren Sahmo re pahn kohwei rehn Mehn Liki kan.

5 Oh mehmen me pahn rong ei mahsen kan oh koluhla oh papidaisla, iei ih me pahn komourla. Kumwail rapahki mahsen en soukohp kan, pwe tohto irail me kadehdehki mepwukat.

6 Oh met kedekedeo ahnsou me Sises mahsaniher mahsen pwukat, e ahpw pwurehng mahsanihong irail, mwurin eh ketin kawehwehiong irail pwuhksarawi kan koaros me irail alehdier, e ahp mahsanihong irail: I men kumwail en ntingihdi ekei iren pwuhksarawi, me kumwail sohte ntingihdi.

7 Kedekedeo e ahpw mahsanihong Nihpai: Patohwando nting kan me kumwail kolokol.

8 Oh ahnsou me Nihpai patohwando nting ko, oh pwilikihdi mwowe, e ahpw kilang ntingko oh mahsanih:

9 Mehlel I ndaiong kumwail, I mahsanihong nei ladu Samuel, Mehn Leimeno, me e pahn kadehdehiong aramas pwukat, me ni rahn me Sahmo pahn ketin kalinganehla mwareo pwehki ngehi, tohto souleng kan pahn iasadahsang mehla, oh pahn pwarohng aramas tohto, oh pahn kalohkehng irail. E ahpw mahsanihong irail: Met sou wiawi?

10 Oh sapwellime tohnpadangko sapeng ih oh nda: Ei, maing Kaun, Samuel kohpada nin duwen sapwellimomwi mahsen kan, oh koaros mahsen kan pweida.

11 Oh Sises mahsanihong irail: Dahme kahrehda e soahng wet sohte ntingkihdi, me tohto souleng kan iasada oh pwarohng aramas tohto oh kalohkehng irail?

12 Kedekedeo Nihpai ahpw tamanda me soahng wet sohte ntingdi.

13 Kedekedeo Sises ahpw mahsanihme e pahn anahne ntingdi; eri e ntingdi nin duwen e ketin mahsanih.

14 Oh met kedekedeo ahnsou me Sises oarepene oh kawehwehdahr pwuhksarawi kan koaros, me irail ntingihdi, e ahpw mahsanihong irail me re pahn padahkihong soang kan me e ketin kawehwehiong irail.