1 Oh met kedekedeo ni ahnsou me Sises ketin padahngkier mepwukat, e ahpw ketin kawehwehiongehr pokono; oh e ketin kawehwehiong irailehr, soahng koaros, me kesempwal akan oh me sohte nohn kesempwal kan.

2 Oh e ketin mahsanih: Pwuhksarawi pwukat, me kumwail saikinte alehdi, Sahmo ketin mahsanihong ie I en kihong kumwail; pwe iei koasondi en sapwellime eripit me e pahn konehng kohieng dih en mwuhr akan.

3 Oh e ahpw ketin kawehwehdar soahng kaoros, me sangete ni tapio lao lel ahnsou me e pahn ketido nan sapwellime lingan—iei, ni mehlel, me mehkoaros me pahn kodohng pohn pwelen sampah, lao pahn peipesengki karakar laud sang mehkan me wia irailda, oh sampah pahn pirapirpene duwehte doaropwe me kin pirapir ong ni lepin tuhke, oh nanleng oh sampah pahn sohrala;

4 Oh me ni rahn lapalapo oh rahn neko, ni aramas koaros, oh keinek koaros, oh wehi koaros, oh sahpw koaros, oh loh koaros pahn uh mwohn Koht, pwe en ale kadeik en arail doadoahngkan, ma irail mwahu de suwed—

5 Ma irail pahn mwahu, irail pahn iasadahn mour poatoapoat; oh ma irail pahn suwed, irail pahn iasadahng kalokolok soutuk sang ni ara sohte kak pahrek pene kohkohlahte, nin duwen mahk, oh pwung, oh sarawi me mih rehn Krais, me ketier mwohn kapikipikdahn sampah.

6 Oh met e sohte kak kilelehdi nan pwhk wet nin duwen epwiki kis ehu en me Sises, ni mehlel, ketin padahkihongehr aramas akan.

7 Ahpw kilang pleit en Nihpai kan audaudikidahr pali laud en mehkan me e ketin padahkihongehr aramas akan.

8 Oh mepwukat me I kilelediher, iei pali tikitik en mehkan me e ketin padahkihongehr aramas akan; oh I kileledier irail ong ni kahrehpen mepwukat en kak pil pwuodohng aramas pwukat, sang rehn mehn liki kan, nin duwen mahsen akan me Sises ketin mahsaniher.

9 Oh ahnsou me irail pahn alehda met, me iei e konehng irail en alehda mahs, pwe en sohngada arail pwoson, oh ma mehlel me re pahn kamehlel mepwukat, eri me inenen kopwuriamwei kan ahpw pahn kin sansal ong irail.

10 Oh ma mehlel me re sohte pahn kamehlele mepwukat, eri me kopwuramwei akan pahn kohsang rehrail pwehn kahrehiong irail en lekdekla.

11 Kilang, I aptehn pahn ntingihdi, koaros ntingkan me ntindi nan pleit en Nihpai, ahpw Kauno keinapwiedi, oh mahsanih: I pahn song pwoson en nei aramas akan.

12 Eri ngehi, Mormon, kileledier mehkan me Kauno ketin poahngokihongiehier. Oh met ngehi, Mormon, pahn uhdihsang ei koasoi, oh doula ntingih soahng kan me I pahngokieng.

13 Eri, I men kumwail en wehwehki ni mehlel me Kauno udahn padahkih aramas akan, erein rahn siluh; oh mwurin mwo e ketin pwarohng irail pak tohto, oh wia pilitikihpeseng kamadipw sarawio, oh kapaiada, oh ketikihong irail.

14 Kedekedeo e ahpw padahkih oh kapaiada seri kan me iang pokono me koasoiepe wiawiher, oh e ketin lapwahdalorail akan, oh irail ahpw koasoiaiong arail pahpah kan soahng kesempwal oh kapwuriamwei kan, me pil lapasang soahng kan me e ketin kasalehiong aramas akan; oh e ketin lapwadahr lohrail akan pwe irail en kak lokaia.

15 Kedekedeo mwurin eh ketidahla nanleng—keriapak en eh ketin kasalehiong irail pein ih, oh ketidahla rehn Sahmo, mwurin eh ketin kamwahuialahr arail soumwahu kan koaros; neirail me mwator kan, oh ketin kapehd pesengehr me masukun kan, oh ketin kamwahuialahr salengen me salengepon kan, oh e ketin kamwahuialahr soangen soumwahu koaros nanpwungarail, oh ketin kamourada ohl emen sang mehla, oh ketin kasalehiong irailehr sapwellime manaman, oh e ahpw ketidalahr rehn Sahmo.

16 Kilang, kedekedeo mandahsang rahno pokono ahpw kapokoneirailpene, oh irail kilang oh rong seri pwukat; ei, seri pwelel kan koasoida oh ndinda soahng kapwuriamwei kan; oh soahng kan me irail koasoia sohte mweimwei aramas men en ntingihdi.

17 Kedekedeo tohnpadahk kan me Sises ketin pilada tepida sang ahnsou kohla papidais oh padahki koaros me kin kohdo rehrail; koaros me papidaisla ni mwaren Sises direkihla Ngehn Sarawi.

18 Oh irail tohto me kilangada oh rongedi soahng kan me apwal en koasoia, me sohte mweimwei en ntingdi.

19 Oh irail padahk, oh sawaspene nanpwungarail; oh soang koaros me irail ahneki duwepene, aramas koaros wiwia mwahupene nanpwungarail.

20 Kedekedeo irail ahpw wia soahng koaros nin duwen dahme Sises ketin mahsanihong irail.

21 Oh irail akan me papidaisla ni mwaren Sises kin kahdaniki mwomwohdiso en Krais.