1 Kedekedeo ni ahnsou me sapwellimen Sises tohnpadahk kan kohkohseli oh kalkalohngki soahng kan me irail rongehr oh kilangehr, oh wiwia papidais ni mwaren Sises, irail ahpw pokonpene oh ehupene kapakap kehlail oh kaisihsol.

2 Oh Sises ahpw ketin pwurehng pwarohng irail, pwehki arail wie kapakapiong Sahmo ni mware; oh Sises ahpw ketido oh ninlengihda nanpwungarail, oh mahsanihong irail: Dahme kumwail men I en kihong kumwail?

3 Oh irail ahpw ndaiong ih: Maing Kaun, se men komwi en mahsanihong kiht ahd me se pahn kin ekeriki mwomwohdiso wet; pwe aramas akan kin akamaikipene duwen irair wet.

4 Oh Kauno ahpw mahsanihong irail: Mehlel, mehlel, I ndaiong kumwail, dahme kahrehda aramas akan pahn akipwung oh akamaiki soahng wet?

5 Irail sohte wadek pwuhksarawi kan, me mahsanih kumwail pahn alehda mwaren Krais, me iei mwarei? Pwe iei ahd wet me kumwail pahn lukuweriki ni imwin rahn akan;

6 Oh mehmen me pahn alehda mwarei, oh dadaurete lel imwi, e pahn komourla ni imwin rahno.

7 Eri, soahng koaros me kumwail pahn wia, kumwail pahn kin wia ni mwarei; eri kumwail pahn ekeriki mwomwohdiso mwarei; oh kumwail pahn kin kapakapiong Sahmo ni mwarei pwe e pahn kapaiada mwomwohdiso pwehki ngehi.

8 Oh ia mwomwen eh pahn wia ei mwomwohdiso ma e sohte adiki mwarei? Pwe ma mwomwohdiso ehu pahn adiki eden Moses eri ahn Moses mwomwohdiso mwo; de ma e pahn adaniki eden aramas men eri e pahn wia ahn aramas; ahpw ma e pahn adaniki mwareiet eri iei ei mwomwohdiso, ma irail poahsoniki ei rongamwahu.

9 Mehlel I ndaiong kumwail, kumwail poahsoniki ei rongamwahu; eri kumwail pahn ekeriki soahng kan me kumwail kin wia, ni mwarei; eri ma kumwail pahn peki rehn Sahmo, ong mwomwohdiso, ma e pahn sang ni mwarei Sahmo pahn ketin karonge kumwail;

10 Oh ma mwomwohdiso pahn poahsonikihda ei rongamwahu eri Sahmo pahn pein ketin kasalehda sapwellime doadoahk loale.

11 Ahpw ma e sohte poahsonikihda ei rongamwahu, oh poahsoniki ehn aramas doadoahk, de ahn tepilo doadoahk kan, mehlel I ndaiong kumwail me irail pahn ahneki peren ahnsou kis nan arail doadoahko, oh imwin ahnsou ahpw pahn leledo, oh irail pahn palidi oh lekidekla nan kisiniei, wasa me sohte me kin pwurasang ie.

12 Pwe arail doadoahk kan pahn ieiang irail, pwehki arail doadoahk kan me pahn kahrehda arail palidi; eri tamataman soahng kan me I ndaiong kumwail.

13 Kilang I kihong kumwail ei rongamwahu, oh met iei rongamwahu me I kihong kumwail—me I kohdo pohn sampah pwe I en wia kupwur en Semeio; pwehki Semeio me ketin kadariehdo.

14 Oh Semeio ketin kadariehdo pwe I en kalohpwuhla pohn lohpwuo; oh mwurin ei kalohpwulahr pohn lohpwuo, I pahn wahdo aramas koaros rehi, pwe nin duwen ei kalohpwuhlahr rehn aramas akan iei pil duwen Sahmo e pahn ketin langahda aramas akan, re en kesihnen mwohi, pwe re en pakadeingki arail doadoahk kan, ma irail mwahu de irail suwed—

15 Oh kahrepewet me I kalohpwukihla; eri, nin duwen sapwellimen Sahmo manaman I pahn wahdo aramas koaros rehi, pwe irail en pakadeik nin duwen arail doadoahk kan.

16 Oh e ahnsou pahn lelledo, me mehmen me pahn koluhla oh papidaisla ni mwarei pahn dirikihla [Ngehn Sarawi]; oh ma e pahn dadaurete lel imwi, kilang, I pahn doarehla ih mwohn silangin Semeio ni rahno, ahnsou me I pahn kesihnen oh kadeik sampah.

17 Oh mehmen me sohte pahn dadaurete lel imwi, iei aramaso me pahn palidi oh lekidela nan kisiniei, sang wasa me irail sohte kak pwurasang, pwehki kopwung pahrek en Sahmo.

18 Oh iei met mahseno me e ketikihong aramas akan. Oh kahrepe wet me e ketin kapwaikidahr mahsen kan me e ketikihdahr, oh e sohte kin likamw, ahpw e kin ketin kapwaiada sapwellime mahsen akan.

19 Oh sohte mehkot samin kak pidelong nan sapwellime wehi; eri sohte me kak pidelong nan sapwellime wasahn komoal, ihte irail akan me kamwakelehda arail likou kan nan ei nta, pwehki arail pwoson, oh koluhkihla diparail akan, oh loaloapwoat lel imwi.

20 Met iei kosonnedo: Koluhla, kumwail koaros me mih nan sampah, oh kohdo rehi oh papidaisla ni mwarei, pwe kumwail en kak sarawihkihla alahldi en Ngehn Sarawi, pwe kumwail en kak kesihnen mwohi ni imwin rahno.

21 Mehlel, mehlel, I ndaiong kumwail, iei met rongamwahuo; oh kumwail esehier soahng kan me kumwail pahn wia nan ei mwomwohdiso; pwe doadoahk kan me kumwail kilang I kin wia iei ih me kumwail pahn pil wia; pwe dahme kumwail kilang ie I kin wia kumwail pahn wia;

22 Eri, meid pai kumwail ma kumwail pahn wia mepwukat, pwe kumwail pahn pwekpwekdahla ni imwin rahno.

23 Kumwail ntingihdi soang kan me kumwail kilangehr oh rongehr, ihte me sohte mweimwei kan me soht.

24 Kumwail ntingihdi ehn aramas pwukat arail doadoahk kan, me pahn wiawi, duwehte me ntingdier, me wiawiher.

25 Pwe kilang, sang nan pwuhk kan me ntingidier, oh me pahn ntingidi, me aramas pwukat pahn pakadeingki, pwe sang irail arail doadoahk kan pahn sansalada ong aramas akan.

26 Oh kilang, soahng koaros Sahmo ketin ntingihdier; eri sang nan pwuhk kan me pahn ntingidi sampah pahn pakadeikda.

27 Oh kumwail sohte ese me kumwail pahn wia sounkopwung en aramas pwukat, nin duwen kopwung me I pahn kihong kumwail, me pahn pwung pahrek. Eri, soahngen aramas dah me kumwail pahn wia? Mehlel I ndaiong kumwail, kumwail en duweiehte.

28 Oh met I pahn kohla rehn Sahmo. Oh mehlel I ndaiong kumwail, soahng koaros me kumwail pahn peki rehn Sahmo ni mwarei pahn kohieng kumwail.

29 Eri, kumwail peki, oh kumwail pahn ale; kumwail letelet, oh e pahn ritidahng kumwail; pwe mehmen me pahn peki, pahn alehdi; oh me pahn letelet, e udahn pahn ritidahng ih.

30 Oh met, kilang, ei peren unsek mehlel, pwehki kumwail, oh pil dih wet; ei, oh Sahmo pil perenki, oh pil tohnleng sarawi kan, pwehki kumwail oh dih wet; pwe sohte emen irail salongala.

31 Kilang, I men kumwail en wehwehki; pwehki I kosokosoia irail akan me momour nan dih wet; oh sohte emen irail pahn salongala; oh pwehki irail I ahneki peren unsek.

32 Ahpw kilang, I pahtoukihla pwehki kapahieu en dih sang dih wet, pwehki irail lohdi oh salongala rehn [Sehdan] duwehte nein me kamwomwalao; pwe irail pahn pangkiniehla silper oh kohl, oh soang kan me soangenmwet kin kauwehla oh me lipirap akan kak kauwehla oh pirapahla. Oh ni ahnsouo I pahn pwarek irail, iei I pahn dupunkiong irail arail doadoahk kan.

33 Kedekedeo ahnsou me Sises kaimwseklahr mahsen pwukat e ahpw mahsanihong sapwellime tohnpadahk kan: Kumwail en pidelong nan ewen kehl tehtiko; pwe ewen kehlo me tehtik, oh ahl en komour me tehtik, oh malaulau me pahn diar; ahpw tehlap ewen kehlo me kohlang mehla, oh tohto me pahn keid loale, lao pwohngo kohdo, wasa me sohte aramas kak wia arail doadoahk kan.