1 Oh mehlel I ndaiong kumwail, I kihong kumwail ehu kilel, pwe kumwail en kak ese ahnsou me mepwukat pahn tepida wiawi—me I pahn kapwurehdo nei aramas akan, peneinei en Israel, sang wasa irail salongala ie ahnsou werei, oh pahn pwurehng wiahda Saion rehrail;

2 Oh kilang, iei met me I pahn kihong kumwail pwe en wia kilel ehu—pwe kilang I ndaiong kumwail me ahnsou me mepwukat me I ndaiong kumwail, oh me I pahn pein ndaiong kumwail mwurin met, oh sang ni manaman en Ngehn Sarawi me pahn kohieng kumwail sang rehn Sahmo, pahn sansalohng Mehn Liki kan pwe irail en esehda duwen aramas pwukat me wia kisehn peneinei en Seikop, oh duwen nei aramas pwukat me irail pahn pwakihpeseng;

3 Mehlel, mehlel, I ndaiong kumwail, ahnsou me Sahmo pahn ketin kasalehiong irail mepwukat, oh Sahmo ketikihong kumwail sang rehrail;

4 Pwe iei sapwellimen Sahmo eripit, irail en kousoanla pohn sahpwet, oh wiahla aramas saledek kei sang ni manaman en Sahmo, pwe mepwukat en kak kohdohng kisehn kadaudokemwail akan sang rehrail, pwe inou en Sahmo en kak pweida me e ketin inoukihong sapwellime aramas, peneinei en Israel;

5 Eri, ahnsou me doadoahk pwukat oh doadoahk kan me pahn kohieng kumwail mwurin met pahn kohsang Mehn Liki kan, oh kohdohng kadaudokemwail akan me pahn pwupwikihdi sohpwoson pwehki wiewia suwed;

6 Pwe kilang met iei kupwur en Sahmo me e pahn kohsang rehn Mehn Liki kan, pwe en ketin kasalehiong sapwellime manaman ong Mehn Liki kan, pwe kahrepe wet me Mehn Liki kan, ma irail sohte pahn keptakaiala mohngiongarail kan, pwe irail en kak koluhla oh kohdo rehi oh papidaisla ni mwarei oh esehla iren ei padahk pwung kan, pwe irail en iang wadawadiong rehn nei aramas akan, peneinei en Israel;

7 Oh ahnsou mepwukat pahn pweida me kadaudokemwail kan pahn tepida wehwehkihda mepwukat—e pahn wia kilel ehu ong irail, pwe irail pahn ese me sapwellimen Sahmo doadoahk tepidahr ong pweidahn inouo me e ketin inoukihong aramas akan me wia peneinei en Israel.

8 Oh ahnsou me rahn pahn leledo, e pahn pweida me nanmwarki kan pahn pwuriamwei, re sohla pahn kak mahsen, pwe re pahn mahsanihada oh mwahngihadamehkot me re sohte kin karonge oh mwahngih sang mahs kohdo.

9 Pwe ni rahno, Semeio pahn ketin wia doadoahk ehu pwehki ngehi, me pahn wia doadoahk kesempwal oh kapwuriamwei rehn aramas akan; oh e pahn mie rehrail irail akan me sohte kin kamehlele, ahpw aramas pahn kin kalohngkihong irail.

10 Ahpw kilang, mour en ei laduo pahn mihmi nan pehi; eri irail sohte pahn kamedekehla, ahpw e pahn wekila pwehki irail. Ahpw I pahn kamwahuiala, pwe I pahn kasalehiong irail me ei eripit lapasang widing en tepilo.

11 Eri ahnsouo pahn leledo me mehmen me sohte pahn kamehlele ei mahsen kan, ngehi iei Sises Krais, me Sahmo pahn ketin wiahiong ih en wahdohng Mehn Liki kan, oh pahn kihong ih manaman pwe en kak wahdohng Mehn Liki kan, (e pahn pweida nin duwen Moses e mahsanih) irail pahn lekidekla sang rehn nei aramas akan me wia aramas en inouo.

12 Oh nei aramas akan me wia kisehn kadaudok en Seikop pahn mih rehn Mehn Liki kan, ei, nanpwungarail duwehte laion men nan pwungen mahn en nanwel kan, oh duwehte laion pwulopwul men nan pwungen pelin sihpw, me, ma e pahn kohwei e pahn tiakiraildi oh tehrirailpeseng, oh sohte me kak doarehla.

13 Pehrail kan pahn kohdahng pohn amwail imwintihti kan, oh amwail imwintihti koaros pahn kamala.

14 Ei, meid suwediong Mehn Liki kan ihte ma irail koluhla; pwe rahno pahn leledo, Sahmo ketin mahsanih, me I pahn kemehla weremwail oahs akan sang rehmwail, oh I pahn kawehla weremwail werennansapw kan;

15 Oh I pahn kawehla amwail kahnihmw kan, oh kesehdi kehl kehlail kan;

16 Oh I pahn kemehla sounwunahni kan sang nan sapwamwail kan, oh sohla pahn mie amwail sounkosetipw;

17 I pahn kawehla amwail dikedik en eni kan, oh I pahn kawehla amwail dikedik en eni me uhda kan, oh kumwail sohla pahn pwongih doadoahk en pehmwail kan;

18 Oh I pahn usadahsang amwail tuhkehkan mwohmwail; duwehte ei pahn kawehla amwail kahnihmw kan.

19 Oh ahnsouo pahn leledo me likamw kan, oh ketewehdi kan, oh noahrok kan, oh akamai kan, oh prihskrap kan, oh kamwahl akan koaros, pahn imwisekla.

20 Pwe ahnsouo pahn leledo, Sahmo mahsanih, me ni rahno mehmen me sohte pahn koluhla oh kohdo rehn nei Pwukat Kempoakeo, I pahn kalipasang irail rehn nei aramas akan, peneinei en Israel;

21 Oh ni ei engieng laud I pahn dupukiong irail, duwehte me rotorot akan, pwehki arail sohte kin rong ie.

22 Ahpw ma irail pahn koluhla oh rong ei mahsen kan, oh sohte keptakaiala mohngiongarail kan, I pahn wiahda ei mwomwohdiso rehrail, oh irail pahn pidelong nan inouo oh iang wadawadiong rehn kisehn kadaudok en Seikop, me I kihongehr sahpwet en wia arail sohso;

23 Oh irail pahn sowese nei aramas akan, kisehn kadaudok en Seikop, oh pil koaros peneinei en Israel me pahn kohdo, pwe irail en kauada kahnihmw ehu, me pahn kahdanihki Serusalem Kapw.

24 Oh irail pahn sowese kapwurehdo nei aramas akan nan Serusalem Kapw, aramas akan me mwerpesengehr pohn sahpwe pwon.

25 Oh manaman en nanleng ahpw pahn kohieng irail; oh I pahn pil ieiang irail.

26 Oh sapwellimen Sahmo doadoahk ahpw pahn tepida nan ahnsouo, iei ahsouo rongamwahu wet pahn kalohkohng kisehn aramas pwukat. Mehlel I ndaiong kumwail, ni ahnsouo sapwellimen Sahmo doadoahk pahn tepida rehn nei aramas koaros me salongpeseng, iei, keinek kan me salongalahr, me Sahmo ketin kahluwahsang nan Serusalem.

27 Ei, doadoahk wet pahn tepida rehn nei aramas koaros me salongpeseng, oh Sahmo pahn ketin kaunopada ahlo pwe irail en kak pwurodo rehi, pwe irail en kak eker Sahmo ni mwarei.

28 Ei, oh doadoahk wet ahpw pahn tepida, oh Sahmo pahn ketin kaunopada wehi koaros pwe sapwellime aramas akan en kak kopwurupwurdohng imwarail nan sapwarail sahpw en sohso.

29 Oh irail pahn kohwei sang nan wehi koaros; oh irail sohte pahn kohwei ni karuaru de sopohla; pwe I pahn tihengwei mwohmwail, Sahmo ketin mahsanih, oh I pahn sinsile mwurumwail.