1 Kedekedeo ahnsou me Sises mahsanihongehr mahsen pwukat rehn Nihpai, oh rehn irail kan me malipilipda, (met uwen tohtohn irail akan me e ketin malipehda, oh ketikihong irail manaman oh mweimwei en papidais, iei meh ehkriemen) oh kilang, e ketin kapahwei limehu ong pokokon, oh mahsanihong irail, ketihtihki: Meid pai kumwail ma kumwail pahn rong mahsen kan en ehkriemenet, me I piladahr sang nanpwungamwail pwe re en papah kumwail, oh re en wia noumwail ladu; oh I kihong irail manaman en papidaisihkin kumwail pihl; oh mwurin amwail pahn papidaiskihla pihl, kilang, I pahn papidaisihkin kumwail kisiniei oh iangahki Ngehn Sarawi; eri meid pai kumwail ma kumwail pahn kamehlele ie oh papidaisla, mwurin amwail kilangiehier oh ese me iei Ngehi me.

2 Oh pil, meid pai mehlel irail me pahn kamehlele amwail koasoi kan pwehki amwail pahn kadehdehki me kumwail kilang ie, oh me kumwail ese me Ngehi me. Ei, meid pai irail me pahn kamehlele amwail koasoi kan, oh kohdo nan karakarahk oh papidaisla, pwe irail pahn alehdi kisiniei oh iangahki Ngehn Sarawi, oh pahn alehdi kamwakelpen diparail kan.

3 Ei, meid pai me aktikitik ni palingehn oh kohdo rehi, pwe iei arail wehin nanleng.

4 Oh pil, meid pai irail koaros me kin mwahiei, pwe [Kauno] pahn ketin kaloalamwawihirialla.

5 Oh meid pai me nan kapehd ohpampap, pwe irail pahn sohsohki sampah.

6 Oh meid pai irail koaros me kin men tungoale oh nim mour pwung, pwe irail pahn direkihla Ngehn Sarawi.

7 Oh meid pai me kin kalahngan ong meteikan, pwe irail pahn alehdi kalahngan.

8 Oh meid pai koaros me nan kapehd mwakelekel, pwe irail pahn udiahl Koht.

9 Oh meid pai koaros me kin wia doadoahk en kamwahu nanpwungen meteikan, pwe irail pahn kin likuwerki seri en Koht.

10 Oh meid pai irail koaros me kin lokolok pwehki mwarei, pwe iei arail wehin nanleng.

11 Oh meid pai kumwail ma aramas akan pahn lahlahwei kumwial oh kalokei kumwail, karaunkin kumwail soangen suwed oh likamw koaros, pwehki ngehi;

12 Pwe kumwail pahn nsenamwahu oh perenda mehlel, pwe ketingpamwail me laud nanleng; pwe ih duwen ar kaloke soukohp ako me tiengehr mwohmwail.

13 Mehlel, mehlel, I ndaiong kumwail, I kihong kumwail en wia soahlepen sampah; eri ma nemenemen soahl pahn sarasang, a ia mwomwen sampah eh pahn soahl? Soahlo pahn solahr katepe, ahpw e pahn lekdekla oh aramas akan pahn tiahkpeseng.

14 Mehlel, mehlel, I ndaiong kumwail, I kihong kumwail en wia marain en aramas pwukat. Kahnihmw ehu me mih pohn dohl ehu sohte kak rirla.

15 Kilang, aramas kin isikada lamp oh kihdiong pahn kohpwa? Soh, ahpw pohn dewe pwe en kamarainihada koaros me mi nan ihmwo;

16 Eri kumwail mweidehng amwail marain en sansal mwohn aramas pwukat, pwe irail en kak kilang amwail doadoahk mwahu kan oh kapikapingahki Samamwail me ketiket nanleng.

17 Kumwail dehr lemeleme me I kodohng kasohrehla kosonned en Moses de padahk en soukohp ako. I sohte kodohng kasohrehla, ahpw en kapwaiada;

18 Pwe mehlel I ndaiong kumwail, sohte ire pisetik ehu en kosonnedo pahn sohrala, ahpw sang rehi koaros pahn pweida.

19 Oh kilang, I kihong kumwail kosonnedo oh kosonned kan en Sahmo, kahrehda kumwail pahn kamehlele ie, oh kumwail pahn koluhkihla dipamwail kan, oh kohdo rehi nan mohngiong karakarahk oh ngehn peik. Kilang, kosonned kan mihmi mwohmwail, oh kosonndo pweidahr.

20 Eri kumwail kohdo rehi oh kumwail komourla; pwe mehlel I ndaiong kumwail, ma kumwail sohte pahn kapwaiada ei kosonned kan, me I kihong kumwail ahnsou wet, kumwail sohte pahn kak pidelong nan wehin nanleng.

21 Kumwail rongehr mehn mahs ako ar kin koasoia, oh e pil ntingdier mwohmwail, me kumwail sohte pahn kemehla aramas, oh mehmen me pahn kemehla aramas e pahn ale kadeikpe ni mwoalen kopwung en Koht;

22 Ahpw I ndaiong kumwail, me mehmen me pahn lingeringer pahn kompoakepah men pahn ale kadeikpe nan eh kopwungo. Oh mehmen me pahn ndaiong kompoakepah eh mwalaun suwed, e pahn ale kadeikpe nan kaunselo; oh mehmen me pahn ndaiong eh pweipwei, pahn ale kadeikpe nan kisiniei en ehl.

23 Eri, ma kumwail pahn kohdo rehi, de pahn inangih kohdo rehi, oh tamanda me kempoakepahmw men nsensuwed pahmw—

24 Kohwei mahs rehn kempoakepahmwo, oh kapwungala mahs nan pwungamwa, oh mwuri ke ahpw pahn pwurodo rehi nan mohngiong unsek mehlel, oh I pahn aleiukada.

25 Kapwungala mwadang nanpwung kowe oh imwintihtio ahnsou me ke mihmihte mwowe, pwe ede pahn poweiukidi, oh kowe lekdeklong an imweteng.

26 Mehlel, mehlel, I ndaiong kumwail, kumwail sohte pahn kapidohisang lao kumwail pwainla uwen sihnain koaros. Oh ahnsou me kumwail pahn mihmi nan imweteng, kumwail kak pwain ehute sihna? Mehlel, mehlel, I ndaiong kumwail, Soh.

27 Kilang, e ntingdier sang irail mehn mahs ako, me kumwail sohte pahn kamwahl;

28 Ahpw I ndaiong kumwail, mehmen me pahn kilikilang lih emen oh men dihpki, e wiadahr kamwahl nan mohngiongi.

29 Kilang, I kihong kumwail kosonned ehu, me kumwail en dehr mweidehng mepwukat en pidelong nan mohngiongamwail;

30 Pwe e pahn mwahu me kumwail soikasang kumwail mepwukat, ni amwail pahn wia kumwail pahn alehda amwail lohpwu, e pahn mwahusang ma kumwail pahn lekdekla nan ehl.

31 E ntingdier, me mehmen me pahn kesehla eh pwoud, e pahn kihong liho kisinlikoun kamweid.

32 Mehlel, mehlel, I ndaiong kumwail, me mehmen me pahn mweisang eh pwoud ni kahrepe ieu me kaidehkin kamwahl, kahrehiongehr liho nan kamwahl; oh mehmen me pahn pwoudikihda liho me mweisangehr eh pwoudo, pil wiadahr dipen kamwahl.

33 Oh e pil ntingdier, kumwail dehr wiahda inou mwahl, ahpw kapwaiad dahme ke kahukihla me ke pahn wiahiong Kauno;

34 Ahpw mehlel, mehlel, I ndaiong kumwail, kumwail dehr mwahn kahula; de pil kaukihla nanleng, pwe nanleng iei mwoalen Koht;

35 De pil kahukihla sampah, pwe sampah iei wasahn kommoalepen aluweluwe kan;

36 Kumwail sohte pahn pil kahukihla moangemwail kan, pwe sohte mehkot kumwail kak wiahda pwe pitenmoangamwail en pwetepwetala de toantoalla;

37 Ahpw amwail koasoi kan en kin, Ei, ei; Soh, soh; pwe me kin daulihala met e suwed.

38 Oh kilang, e ntingdier, pwoaren mas ehu pahn pwainla pwoaren mas ehu, oh ngih pwoat pil pahn pwainla ngih pwoat;

39 Ahpw I ndaiong kumwail, me kumwail sohte pahn dupungki me suwed ong emen me wia suwed ong kumwail, ahpw mehmen me pahn pohr uhk ni palimaun en likin sepomw, a ke en pil kihong pali teio;

40 Oh ma aramas men pahn lelekin uhk ni mwoalen kowpung pwe en adihasang omw sehten, a pil mweidohng omw sekiden;

41 Oh ma mehmen pahn itonehng uhk ke en iangala mwail ehu, a ke iangala mwail riau.

42 Kihong me pahn peki rehm mehkot, oh mehmen me pahn peki rehmw mehkot pwe en kapwuredohng uhk mwuhr dehr sohpeisang.

43 Oh kilang e pil ntingdier, kumwail pahn poako; hng mehn mpomw oh kailongki omw imwintihti kan;

44 Ahpw kilang I ndaiong kumwail, poakehng amwail imwintihti kan, kapaia irail me kin keriah kumwail, oh wia mwahu ong irail me kin kailongkin kumwail, oh kapakpaki irail me kin wiakauwe oh kaloke kumwail;

45 Pwe kumwail en wia sapwellimen Sahm me ketiket nanleng; me kin ketin dakerki sapwellime ketipin pohn me suwed oh me mwahu kan.

46 Eri soahng kan me mehn mahs ako, me mih pahn kosonnedo, koaros pweidahr rehi.

47 Soahng kan me mehn mahs imwiseklahr, oh soahng koaros weliakapwalahr.

48 Eri I men mourimwail en unsek duwehte ngehi, de Samamwailo me ketiket nanleng me unsek.