1 Kedekedeo mwurin Sises e ketin mahsaniher mahsen pwukat, e ahpw mahseniong emen emen sapwellime tohnpadahk kan: Dahme kumwail inangih sang rehi, mwurin ei pahn kohla rehn Sahmo?

2 Oh irail koaros likin meh silimen koasoia: Se inangih me mwurin aht pahn momour lel sounpar en aramas mah, mwurin aht pwukoa me komw ketin malipehkin kiht pahn imwisekla, se pahn mwadangete kohwei rehmwi nan sapwellimahr wehi.

3 Oh e ahpw mahsanihong irail: Meid pai kumwail pwehk amwail inangih soahng wet sang rehi; eri, mwurin amwail pahn lel sounpar isihsek riau, kumwail pahn kohdo rehi nan ei wehi; oh kumwail pahn komoal rehi.

4 Oh mwurin eh ketin mahsaniong irail, e ahpw sohpeieng meh silimeno, oh mahsanihong irail: Dahme kumwail inangih I pahn wiahiong kumwail, mwurin ei pahn kohla rehn Sahmo?

5 Oh nan mohngiongarail kan pahtoula, pwe irail sohte men patohwanohng ih dahme irail inangiho.

6 Oh e ahpw mahsanihong irail: Kilang, I wehweki amwail madamadau kan, oh kumwail inangih soahng me Sohn, nei kempoako inangih sang rehi, me iangie nan ei doadoahk en kalohk, mwohn Mehn Suhs akan ar kalohpwuhiela.

7 Eri, meid pai kumwail mehlel, pwe kumwail sohte pahn kehndi mehla; ahpw kumwail pahn momour oh kilangidi sapwellimen Sahmo doadoahk koaros ong aramas akan, lao soahng koaros pahn pweida nin duwen kupwur en Sahmo, ahnsou me I pahn pwurodo ni ei lingan iangahki manaman en nanleng.

8 Oh kumwail sohte pahn kehn medek en mehla; ahpw ahnsou me I pahn pwurodo nan ei lingan kumwail pahn kiewek ni marep tehieu sang ni paliwar me kin mehla ong ni paliwar me kin momour kohkohlahte; oh kumwail ahpw pahn kapaida nan wehin Semeio.

9 Oh pil, kumwail sohte pahn kehn medek ahnsou me kumwail pahn momourki paliwar, de pil pahtou ihte pahtouki dihp akan en sampah; oh soahngkat koaros I pahn wia pwehki dahme kumwail inangih sang rehi, pwehki amwail inangih kumwail en kak wahdo aramas akan rehi, ni erein sampah e pahn mihmiehte.

10 Oh pwehki kahrepe wet kumwail pahn ahneki peren unsek; oh kumwail pahn mwohndi nan wehin Semeio; ei, amwail peren pahn unsek, duwehte Sahmo e ketikihong ie peren unsek; oh kumwail pahn duweiehte, oh ngehi duwehte Sahmo; oh ngehi oh Sahmo ehu;

11 Oh Ngehn Sarawi kin kadehdehki duwen Sahmo oh ngehi; oh Sahmo ketikihong Ngehn Sarawi aramas akan, pwehki ngehi.

12 Kedekedeo ahnsou me Sises ketin mahsaniher mahsen pwukat, e ahpw doahkehki emen emen irail sendinpeh ihte meh silimeno me pahn mihmi me soh, oh e ahpw ketin mweselda.

13 Oh kilang, nanleng ahpw ritpeseng, oh [Kauno] ahpw ketikiniraildahla nanleng, oh irail kilangada oh rongidi soahng kan me sohte kak koasoiahda.

14 Oh e sohte mweimwei ong irail en koasoia; oh irail pil sohte ahneki manaman en kak koasoia soahng kan me irail kilang oh rong;

15 Oh irail sohte kak ese ma irail mihmi nan paliwar de sohte paliwar; pwe e mwomwen me irail kiewekla, kahrehda irail kieweksang nan paliwar en uduk kolahng paliwar me sohte kin mehla, kahrehda irail kak kilang soahng kan me sang Koht.

16 Ahpw kedekedeo irail pwurehng kalohk pohn sampah; ahpw irail sohte kalohngki soahng kan me irail rongehr oh kilangidi, pwehki kosonned me irail alehdi sang nanleng.

17 Oh met, I sohte ese ma irail tungoalenki paliwar me kak mehla de soh mwurin rahn en arail kieweklao;

18 Ahpw ih uwen me I ese met, nin duwen poadoapoad kan me ntingdier—irail kohwei pohn sahpwo, oh kalohk ong aramas koaros, kihkihpene koaros nan mwomwohdiso me kamehlele arail padahk kan; papidaisla irail, oh koaros me papidaisla alehda Ngehn Sarawi.

19 Oh aramas akan me sohte wia tohn mwomwohdiso kesehlong irail nan imweteng. Oh imweteng kan sohte kak koliraildi, pwe re kin mweredi.

20 Oh irail kin lekideklong nan pwoahr; ahpw irail kin kamwakidki pwehlo mahsen en Koht, me kahrehda sang ni sapwellime manaman irail kin kak pitsang wasa loal en nan pwehl; oh re sohte kak weirada pwoahr me loal ong irail.

21 Oh pak siluh irail lekideklong nan kisiniei mwehl oh sohte mwasingkihla.

22 Oh pak riau irail lekideklong nan kelen mahn lawalo; oh kilang irail mwadongehng mahn akan duwehte kisin seri men rehn sihmpwul men, oh re sohte kin ohla.

23 Kedekedeo irail ahpw kohwei rehn aramas en Nihpai koaros, oh ahpw kalohngki rongamwahu en Krais ong aramas koaros pohn sahpwo; oh irail weliakapw ong Kauno, oh iangala mwomwohdiso en Krais, oh met aramas en nan diho kapaida mehlel, nin duwen mahsen en Sises.

24 Oh met ngehi, Mormon, kaimwsekala koasokosoia duwen mepwukat ekis ahnsou.

25 Kilang, I apwtehn pahn ntingihdi eden irail ko me sohte pahn kehndi mehla, ahpw Kauno irehdi; eri I sohte ntingihdi ederail ko, pwe irail sohte sansal ong sampah.

26 Ahpw kilang, I kilangirailehr, oh irail kalohkehng ie.

27 Oh kilang irail pahn mih rehn Mehn Liki kan, oh Mehn Liki kan sohte pahn ese irail.

28 Irail pahn pil mih rehn mehn Suhs akan, oh mehn Suhs akan sohte pahn ese irail.

29 Oh ahnsou pahn leledo, ahnsou me Kauno koasoanehdi sang ni sapwellime eripit me e re pahn kalohkehng keinek en Israel me salongala kan, oh ong wehi kan koaros, peneinei lap akan, lokaia kan oh aramas, oh pahn wahdohsang rehrail aramas tohto rehn Krais, pwe arail inengo en kak pweida, oh pil pwehki manaman en Koht kehlail me mih rehrail.

30 Oh irail duwehte tohnleng kan en Koht, oh ma irail pahn kapakap ong Sahmo ni mwaren Sises irail kak pwarohng aramas sohte lipilipil me irail kilang pahn konehng.

31 Eri, doadoahk kesempwal oh kapwuriamwei irail pahn wiahda, mwohn rahn en ketido lapo ahnsou me aramas koaros pahn kesihnenda mwohn mwoalen kopwung en Krais;

32 Ei irail pil pahn wia doadoahk kesempwal oh kapwuriamwe rehn Mehn Liki kan, mwohn rahn en kopwungo.

33 Oh ma kumwail kolokol pwuhksarawi kan me kasalehda sapwellimen Krais doadoahk kapwuriamwei kan koaros, kumwail pahn ese me mepwukat udahn pahn wiawi, nin duwen mahsen en Krais.

34 Oh meid suwediong ih me sohte pahn rong mwahu mahsen kan en Sises, oh pil mahsen irail akan me e ketin piladahr oh kadaredo rehrail; pwe mehmen me sohte pahn alehda mahsen kan en Sises oh sohte alehda mahsen kan en me e ketin kadaredo; oh eri e sohte pahn alehda irail ni imwin rahno;

35 Oh e pahn mwahu ong irail ma irail sohte ipwidi. Pwe kumwail medewe me kumwial kak soikala kopwung pwung en Koht me kupwure ketin nsensuwedla, me aramas akan tiakidi pahn nehrail kan, me kahrehda komourla kak wiawi?

36 Oh met kilang, nin duwen ei koasoiahier irail akan me Kauno ketin piladahr, iei, meh silimeno me kohdalahr nanlengo, I sohte ese ma irail mwakelekelsang paliwar me kin mehla kohlahng mour me sohte kin mehla—

37 Ahpw kilang, sang ahnsou me I ntingih, I peki rehn Kauno, oh e ketin kasalehiong ie me e pahn konehng mie wekila ehu pohn paliwerarail kan, de ma soh a irail udahn pahn kehn mehla;

38 Eri, pwe irail sohte pahn kehn mehla e udahn mie wekila ehu pohn paliwararail kan, pwe irail en dehr kehn medek de pahtou ihte ong dihp akan en sampah.

39 Eri wekila wet sohte duwehte dahme pahn wiawi ni imwin rahno; ahpw mie wekila ehu wiawihong irail, kahrehda Sehdan sohte ahneki manaman pohrail, me kahrehda e sohte kak kasongosongih irai; oh paliwararail kan sarawihla, kahrehda irail sarawi, oh manaman en sampah sohte kakehng irail.

40 Oh nan koasondi en mwomw en mour wet me irail pahn ieiaski lao lel ni rahn en kopwung en Kraiso; oh ni rahno irail pahn alehdi wekila lap, oh pahn alahlda nan wehin Sahmo oh sohla pwurehng kohla liki, ahpw mihmihla rehn Koht nanleng kokohlahte.