1 Mehlel, mehlel, I nda me I men kumwail en kin wia amwail wiewia mwahu ong me semwehmwe kan; ahpw [kumwail] kaleke pwe kumwail dehr kin wia amwail wiewia mwahu kan mwohn mesen aramas akan pwe re en kin kilang; pwe ma iei mwomwehn met, kumwail sohte pahn ale ketingpamwail sang rehn Samamwail me ketiket nanleng.

2 Eri, ahnsou me kumwail pahn wia amwail wiewia mwahu kan, kumwail dehr peuk koronihda mwohmwail, duwehte me mwalaun akan ar kin wia nan arail sinokoke kan oh nanial akan, pwe aramas en kin kapinga irail. Mehlel I ndaiong kumwail, irail pahn ale ketingparail.

3 Ahpw ahnsou me kumwail pahn kin wia amwail wiewia mwahu kan, kumwail dehr mweidehng pali meing en pehmw en ese dahme pali maun en pehmw pahn wia;

4 Pwe amwail wiewia mwahuo en wiawi ni rir; oh Samamwail me kin mwahngih amwail wiewia rir kan, pein ihr me pahn ketin katingih kumwail ni sansal.

5 Oh ahnsou me kumwail pahn kin kapakap, kumwail dehr alasang me mwalaun kan, pwe irail kin mwahuki uhda oh wia kapakap akan nan sinokoke kan oh nanial akan, pwe aramas koaros en kin kapinga irail. Mehlel I ndaiong kumwail, irail pahn ale katingparail.

6 Ahpw kumwail, ahnsou me kumwail pahn kapakap, kumwail pidelong nan amwail pere, oh ahnsou me kumwail pahn ritingedi, kumwail kapakap ong Samamwail me kin ketiket wasa rir; oh Samamwailo, me ketin mwahngi me rir kan, pahn katingih kumwail ni sansal.

7 Ahpw ahnsou me kumwail kapakap, kumwail dehr doadoahngki lokaia mwahl me kin kopwkopwurupwurieng nan amwail kapakap akan, duwehte me rotorot akan kin wia, pwe irail kin lemeleme me arail kapakap kan pahn pasapeng.

8 Ahpw kumwail dehr alasang irail, pwe Samamwailo ketin mwahngih dahme kumwail anahne mwohn amwail peki reh.

9 Eri iei met duwen amwail pahn kin kapakap: Samat me ketiket nanleng, mwaromwi me sarawi.

10 Kupwuromwi en kin wiawi nin sampah duwen eh kin wiawi nanleng.

11 Komw ketin mahngkihong kiht dipat akan, duwen aht kin mahkong koaros me kin wia dihp ong kiht.

12 Oh dehr ketin mweidohng kiht se en kin lelohng nan songosong, ahpw komw ketin nekid kiht sang me suwed kan.

13 Pwe sapwelimahr iei wehio, oh manamano, oh lingano, kokohlahte. Ahmen.

14 Pwe, ma kumwail pahn mahkikihong mehteikan sapwung kan me re wiahiong kumwail, Samamwail me ketiket nanleng pahn pil ketin mahkikihong kumwail dipamwail kan;

15 Ahpw ma kumwail pahn sohte mahkikihong mehteikan ar sapwung kan ong kumwail, eri Samamwailo sohte pahn pil mahkikihong amwail sapwung kan.

16 Kapatahiong, ahnsou me kumwail pahn kin kaisihsol, kumwail dehr alasang me mwalaun kan, me kin seren pahtou, pwe irail kin kawekala mwomwen masarail kan pwe aramas akan en ese me re kaikaisihsol. Mehlel I ndaiong kumwail, irail pahn ale ketingparail.

17 Ahpw kumwail, ahnsou me kumwail kaisihsol, kumwail usoarada, oh epwinekda;

18 Pwe en dehr sansal ong aramas akan me kumwail kaisihsol, ahpw ongete Samamwailo, me kin ketiket wasa rir; oh Samamwailo, me kin ketiket wasa rir, pahn katingih kumwail ni sansal.

19 [Kumwail] dehr nekinekidala amwail pai nan sampah, wasa me mer oh loangenmwet kin kauwehla, oh wasa me lipirap akan kin dapengpeseng ihmw kan oh pirap ie;

20 Ahpw [kumwail] nekidala amwail pai nanleng, wasa me mer oh loangenmwet sohte kin kauwehla, oh wasa me aramas lipirap akan sohte kak dapengpeseng ihmw akan oh pirap ie.

21 Pwe wasa me amwail pai kan mih ie, iei pil wasa me mohngiongamwail pahn mih.

22 Pwoaren masamwail kan iei mehn sere paliwaramwail; eri, ma, pwoaren masamwail pahn mwakelekel, paliwaramwail unsek pahn diren marain.

23 Ahpw ma pwoaren masamwail kan pahn suwed, paliwaramwail unsek pahn diren rotorot. Eri, ma marain me mih rehmwail pahn rotorot, ia uwen lap en rotoroto!

24 Sohte aramas men kak papah soumas riemen; pwe e pahn kailongki emen oh poakehng emen, de e pahn koledi emen oh kailongkihla emen. Kumwail sohte kak papah Koht oh pil kepwehn sampah kan.

25 Oh met kedekedeo ahnsou me Sises ketin mahsaniher mahsen pwukat, e ahpw ketin kilang ehkriemen me piladahro, oh ndaiong irail: Kumwail tamataman mahsen kan me I koasoiahier. Pwe kilang, kumwail me I piladahr en wia doadoahk en kalohk ong aramas pwukat. Eri I ndaiong kumwail, kumwail dehr medewe amwail mour, dahme kumwail pahn kang, de dahme kumwail nim; de pil ong paliwaremwail, dahme kumwail pahn likauwih. Pwe ia duwe, mour sou kesempwalasang kisin mwenge, oh paliwar sou kesemwpalasang likou?

26 Kumwial kilang menpihr kan en pahnlahng, pwe irail sohte kin padokedi [wahntuhke], re sohte pil kin dolung de nahkpene nan imwen nekinek kan; Ahpw Samamwail nanleng kin ketin kamwenge irail. A ia duwe, kumwail sou kesempwalasang irail?

27 Ihs rehmwail me kak kareireikihla eh mour kisin ahnsou kis pwunupwungodki eh mour?

28 Oh mehnda kumwail pahn pwunodki likou? Kumwail kilang kiopw en nansapw akan ar kin keirda; re sohte kin doadoahk, re sohte kin pein wiahda ar likou;

29 Ahpw I ndaiong kumwail pwe pil Solomon, nan eh kepwehpwe mehlel, sohte mwahn kawatkihda likou kaselel ehu duwehte apwoat irail.

30 Eri, ma Koht me kin ketin kapwatahda dipwen nansapw akan, me kin mie rahn wet, oh mengila lakapw oh lekidekiong nan kisiniei, eri iei e pahn pil kalikawihkumwail, ma kumwail sohte pahn meid pwoson tikitik.

31 Eri kumwail dehr pwunodki, ndinda, Dahme kitail pahn tungoale? de, Dahme kitail pahn nim? de, Iawasa me kitail pahn diar atail likou?

32 Pwe Samamwail nanleng ketin mwahngih duwen amwail anahne mepwukat koaros.

33 Ahpw kumwail rapahki mahs wehin Koht oh sapwellime koasondi pwung kan, oh mepwukat koaros ahpw pahn kohieng kumwail.

34 Eri kumwail dehr kin pwunodki dahme pahn wiawi lakapw; pwe lakapw pahn pwukoahki pein eh pwunod. Kahpwal en rahno itarehr oh kitail sohte anahne pwunodki ekei.