1 Kilang, met kedekedeo ahnsou me Sises ketin mahsanih mahsen pwukat e ahpw pwurehng ketin kilang pokono, oh ahpw mahsanihiong irail: Kilang, ei ahnsou leledohr.

2 I kasawih me kumwail luwet, me kumwail sohte kak wehwehki ei kosoai kan me I Sahmo ketin mahsanihong I en ndaiong kumwail ahnsou wet.

3 Eri, kumwail pwurowei ihmwamwail kan, oh medemedewe soahng kan me I kosoaia, oh peki rehn Sahmo, ni edei, pwe kumwail en kak wehwehki, oh kaunopada amwail madamadau kan ong lakapw, oh I pahn pwurehng pwurodo rehmwail.

4 Ahpw me I pahn kohla rehn Sahmo, oh pil pwarohng keinek en Israel me salongala kan, pwe irail sohte salongala rehn Sahmo, pwe e ketin mahngih wasa me e ketikihong irail.

5 Kedekedeo ahnsou me Sises mahsenier, e ahpw pwurehng ketin kilenglahng pokono, oh kilangada me irail wie sengiseng, oh kilikilang ih mehlel duwehte me irail men peki en ekis mihmi werei rehrail.

6 Oh e ahpw mahsanihong irail: Kilang, loaleiet direkihla limpoak ong kumwail.

7 Mie me soumwahu rehmwail? Kumwail wahdo wasah. Mie rehmwail me nehtuk, de maskun, de sikel, de sohte kak alu, de toktok, de mwoatoar, de salongopon, de me ahneki soahngen kahpwal sohte lipilipil? Kumwail wahdo wasah oh I pahn kamwahuirailla, pwe I poakpoakei kumwail; loaleiet direkihla kalahngan.

8 Pwe I kasawih me kumwail inangih I en kasalehiong kumwail dahme I wiahiong riomwail ko nan Serusalem, pwe I kilang me amwail pwoson itarehng I en kamwahuihkumwailla.

9 Kedekedeo ahnsou me e mahsenier, pokono pwon, ehupene kohla, oh wahla neirail me soumwahu kan oh me ahneki kahpwal, neirail me nehtuk, neirail me maskun, oh neirail me salongopon, oh irail koaros me ahneki kahpwal sohte lipilipil; oh e kamwahuiala emen emen irail ni arail wisikdohng reh.

10 Oh irail koaros, me maiauda kan oh me sohte soumwahu kan, poaridi ni alualuwe kan, oh ahpw pwongih ih; oh koaros me me kak kohdo, pwe pokono pwon mitik alualuwe kan, me kahrehda irail kauseksekehkihla alualuwe kan pilenmesarail kan.

11 Kedekedeo e ahpw mahsanihong irail me re en wahdo neirail kisin seri kan.

12 Eri irail ahpw wahdo neirail kisin seri kan oh kapidakihpene oh koasoneiraildi nan pwehlo, oh Sises ahpw ninlengihda nan werenge; oh pokono keipeseng lao irail koaros wisikdo reh.

13 Kedekedeo ahnsou me irail koaros kodohr, oh Sises ninlengihda nan werenge, e mahsanihong pokono me irail en kilipwikihdi pohn pwehlo.

14 Kedekedeo ahnsou me irail kilipwikihdi pohn pwehlo, Sises ahpw ketin mekidkihda loale, oh mahsanih: Maing Sahm, I ahneki pahtou pwehki wiewia suwed kan en aramas en peneinei en Israel.

15 Oh ahnsou me e mahsaniher mahsen pwukat, e pil iang kilipwikihdi pohn pwehlo; oh kilang e ahpw loulou ong Sahmo, oh soahng kan me e loulouki sohte kak ntingdi, oh pokono me rong ih kadehdehki.

16 Oh ni mwohmw wet me irail kadehdehki: Soahng kan me mesen aramas saikinte kilang, de salengen aramas saikinte rong, pwe soahng kesempwal oh kapwuriamwei kan me se kilang oh rong Sises mahsanihiong Sahmo;

17 Oh sohte lowe kak koasoia, oh sohte aramas kak ntingihdi, oh sohte mohngiong en aramas men kak medewehda pwe pwe soahng kesempwal oh kapwuriamwei kan me se kilang oh rong Sises mahsanihiong; oh sohte emen kak medewehda soangen peren me audehla palingenat ahnsou me se rong eh wie louloukin kiht ong Sahmo.

18 Kedekedeo ahnsou me Sises ketin kaimwsekalahr loulouieng Sahmo, e ahpw ninlengihda; ahpw ia uwen peren lap me kipehdi pokono.

19 Kedekedeo Sises ahpw mahsen ong irail, ohmahsanih re en kesihnenda.

20 Oh irail ahpw kesihnenda sang nan pwehlo, oh e ahpw mahsaniong irail: Meid pai kumwail pwehki amwail pwoson. Oh met kilang, I ahneki peren mehlel.

21 Oh ahnsou me e ketin mahsanih mahsen pwukat, e ahpw tentenihr, oh pokono kadehdehki, oh e ahpw ale neirail kisin seri kan, wad emen, oh kapaiada irail, kapakapkin irail ong Sahmo.

22 Oh ahnsou me e ketin wiaier met e ahpw pwurehng tentenihr;

23 Oh e ahpw mahsan ong pokono, oh mahsanihong irail: Kilang noumwail me tikitik kan.

24 Oh ni arail kilengla pwe re en kilang, irail kilengdahla nanleng, oh irail kilangada nanleng ritpeseng, oh irail kilangada tohnleng kei kokodido sang nanleng duhwehte nan werengen kisiniei; oh re kohdihdo oh kapilpene seri tikitingko, oh irail kisiniei me kapil irail; oh tohnleng kan ahpw kapaiada irail.

25 Oh pokono ahpw kilang oh rong oh kadehdehki; oh irail ese me arail kadehdehka mehlel pwe irail koaros kilangki mesarail oh rongki salengarail, aramas koaros; oh irail aramas meh riekid limepwiki; oh irail wia ohl akan, lih akan, oh seri kan.