1 Kedekedeo Sises mahsanihong sahpwellime tohnpadahngko me re en patohwandohng ekei pilawa oh wain.

2 Oh ahnsou me irail kohlahng wahdo pilawa oh wain, e ahpw mahsanihong pokon re en mwohndi nan pwehlo.

3 Oh ahnsou me tohnpadahngko wahdo pilawa oh wain, e ahpw ale pilawao oh pilitikihpeseng oh kapaiada; e ahpw ketikihong tohnpadahngko oh mahsanihong irail en tungoale.

4 Oh ahnsou me irail tungoalehier oh medkihla, e ahpw mahsanihong irail re en patohwanong pokono.

5 Oh ahnsou me pokono tungoalehier oh medkihla, e ahpw mahsanihong tohnpadahng kan: Kilang emen rehmwail pahn kasarawihla, oh I pahn kihong ih manaman me e pahn kin pilitikihpeseng pilawa oh kapaiada oh kihong tohn ei mwomwohdiso, ong irail koaros me pahn kamehlele oh papidaisla ni mwarei.

6 Oh met kumwail pahn kin wia ahnsou koaros, ni duwen ei wiahier, ni duwen ei pilitikihpeseng pilawa oh kapaiada oh kihong kumwailehr.

7 Oh met kumwail pahn wiahki mehn katamanpen paliwereiet, me I kasalehiong kumwail. Oh e pahn wia mehn kadehdehiong Sahmo me kumwail kin tamatamanie ahnsou koaros. Oh ma kumwail pahn tamataman ie ahnsou koaros, Ngehnio pahn kin ieiang kumwail.

8 Kedekedeo ahnsou me e ketin mahsaniher mahsen pwukat, e ahpw mahsanihong sapwellime tohnpadahng kan me irail en ale kepin waino oh tungoale, oh me irail pahn pil kihong pokono pwe irail en kak iang tungoale.

9 Kedekedeo irail ahpw kapwaiada, oh tungoale oh medkihla; oh irail kihong pokono, oh irail pil tungoale, oh irail medkihla.

10 Oh ahnsou me tohnpadahngkan wiahier met, Sises ahpw mahsanihong irail: Meid pai kumwail pwehki dahme kumwail wiahier, pwe met iei pweidahn ei kosonned kan, oh met kadehdehiong Sahmo me kumwail inangih wia dahme I mahsanihong kumwail.

11 Oh met kumwail pahn kalapw wiahiong me kin koluhla oh papidaisla ni mwarei; oh kumwail pahn wia mehn katamanpen ntahi, me I kepwilipwikidier pwehki kumwail, pwe kumwail en kak kadehdehiong Sahmo me kumwail pahn tamataman ie ahnsou koaros. Oh ma kumwail pahn tamataman ie ahnsou koaros, Ngehnio pahn ieiang kumwail.

12 Oh I kihong kumwail kosonned ehu me kumwail pahn wia mepwukat. Oh meid pai kumwail ma kumwail pahn kalapw wia mepwukat, pwe kumwail wie kokouda pohn ei paip.

13 Ahpw mehmen me pahn wia laud sang de tikitiksang met sohte kokouda pohn ei paip, ahpw e kokouda pohn poahson en pihk, oh ahnsou me e pahn keteuda oh lapakehda, oh kisinieng ipidohng, oh ipihpir ihmwo; oh e pahn pwupwidi, oh ewen kehl en ehl pahn onopada aleiraildi.

14 Eri meid pai kumwail ma kumwail pahn kapwaiada ei kosonned akan, me Sahmo mahsanihong ie me I en kihong kumwail.

15 Mehlel, mehlel, I ndaiong kumwail, kumwail pahn kalapw mwasamwasahn oh kapakap, pwe tepilo de kasongosongih kumwail, oh kumwail lohdi oh idawehla ih.

16 Oh ni duwen ei kapakap rehmwail iei me kumwail pahn wia nan ei mwomwohdiso, rehn nei aramas kan me pahn koluhla oh papidaisla ni mwarei. Kilang ngehi me marain; I kasalehiong kumwailehr karasaras ehu.

17 Kedekedeo ahnsou me Sises mahsaniher mahsen pwukat ong sapwellime tohnpadangkan, e ahpw pwurehng pirekeklahng pokono oh mahsanihong irail:

18 Kilang, mehlel, mehlel, I ndaiong kumwail, kumwail pahn kalapw mwasamwasahn oh kapakap pwe kumwail de lohdi nan kasongosong; pwe Sehdan inangih kalowekumwaildi, pwe en kak sihpih kumwail duwehte wihd.

19 Eri kumwail pahn kalapw kapakap ong Sahmo ni mwarei;

20 Oh soahng koaros me kumwail pahn peki rehn Sahmo ni mwarei, ma e pwung, ni amwail kamehlele me kumwail pahn alehdi, kilang e pahn ketikihong kumwail.

21 Kapakap nan amwail peneinei kan ong Sahmo, ahnsou koaros ni mwarei, pwe amwail pwoud kan oh noumwail seri kan en kapaida.

22 Oh kilang, kumwail pahn kalapw tuhpene; oh kumwail sohte pahn irehdi emen aramas en kohdo rehmwail ahnsou me kumwail pahn tuhpene, ahpw kumwail pahn mweidehng irail en kohdo rehmwail oh sohte irehdi irail;

23 Ahpw kumwail pahn kapakap kin irail, oh pahn sohte kauirailla; oh ma irail pahn kalapw kohdo rehmwail, kumwail pahn kapakapk irail ong Sahmo, ni mwarei.

24 Eri, kumwail kolada amwail marain pwe en kak kamarainih sampah. Kilang ngehi me maraino me kumwail pahn kolada—me kumwail kilangie I kin wia. Kilang kumwail kilangehr ei kapakap ong Sahmo, oh kumwail koaros kadehdehier.

25 Oh kumwail kilangehr me I sohte mahsanihong emen kumwail en kohkohla, ahpw I mahsanihong kumwail en kohdo rehi, pwe kumwail en kak kehn oh kilang; iei me kumwail pahn wiahiong sampah; oh mehmen me pahn kawehla kosonned wet mweidehngehr pein ih nan kasongosong.

26 Oh met kedekedeo ahnsou me Sises mahsaniher mahsen pwukat, e ahpw pwurehng pirekekla rehn nah tohnpadahngko me e piladahr, oh mahsanihong irail:

27 Kilang mehlel, mehlel, I ndaiong kumwail, I kihong kumwail ehu kosonned, oh I ahpw pahn kohkohla rehn Sahmo pwe I en kak kapwaiada kosonned teikan me ketikihong ie.

28 Oh met kilang, met iei kosonnedo me I kihong kumwail, me kumwail sohte pahn mweidehng emen tungoale udukei oh ntahi ni arail sohte warohng, ahsou me kumwail pahn patohwanda;

29 Pwe mehmen me pahn tungoale udukei oh nim ntahi sohte warohng, tungoalehier oh nimilahr lekideklahn palingene; eri ma kumwail ese aramas men me sohte warohng en tungoale udukei oh nim ntahi kumwail pahn ireiraildi.

30 Ahpw, kumwail sohte pahn kausirailsang rehmwail, ahpw kumwail pahn sowese ih oh kapakapkihong sahmo, ni mwarei; oh ma e pahn koluhla oh papidaisla ni marei, eri kumwail pahn alehda ih, oh pahn sowesehkiong udukei oh ntahi.

31 Ahpw ma e sohte pahn koluhla, e sohte pahn ian wadawadiong rehn nei aramas akan, pwe e de pahn kawehla nei aramas akan, pwe kilang I ese nei sihp, oh irail wadawadi.

32 Ahpw, kumwail sohte pahn kausirailsang nan amwail sinokoke kan, de amwail wasahn sarawi kan, pwe ong soangen aramas wet kumwail pahn uhsehla sowese; pwe kumwail sohte ese ma re sou pahn pwurodo oh koluhla, oh kohdo rehi nan mohngiong mehlel, oh I pahn kamaiauirailda; oh kumwail me pahn wia elen sowese wairaildohng komourla.

33 Eri, kumwail kapwaiada mahsen pwukat me I mahsanihong kumwail pwe kumwail de lekidekla; pwe meid suwediong ih me Sahmo pahn lakidala.

34 Oh I kihong kumwail kosonned pwukat pwehki akupwung kan me kin mih rehmwail. Oh meid pai kumwail ma kumwail sohte pahn akupwungpene nanpwungamwail.

35 Oh met I pahn kohla rehn Sahmo, pwe e konehng me I pahn kohla rehn Sahmo pwehki kumwail.

36 Kedekedeo ahnsou me Sises kaimwsekalahr mahmahsanih mahsen pwukat, e doahkehki lime kan tohnpadahk kang me e pilada, emen emen, lao e ketin doahke irail koaros, oh mahseniong emen emen irail ni e ketin doahke irail.

37 Oh pokono sohte rong mahsen kan me e mahsenih, eri irail sohte kadehdehki; ahpw tohnpadahngko kadehdehki me e ketikihong irail manaman en kihla Ngehn Sarawi. Oh I pahn kasalehiong kumwail mwurin met me kadehdeh wet mehlel.

38 Kedekedeo ahnsou me Sises doahke irail koaros, depwek ehu pa koh oh kipehdi pokono kahrehda irail sohte kak kilang Sises.

39 Oh ahnsou depweko kihpehdi irail, e ahpw ketilahsang irail, oh ketdahla nanleng. Oh tohnpadahko kilang oh ahpw kadehdehki me e pwurehng ketidahla nanleng.