1 Oh dahme ntingdiero ahpw pahn pweida: Koul, komwi me sohte kak nainiki seri; ahpw met, ke kakehr koul oh ngisingiski omw peren, komwi me sohte lokolongki medek en neitik; pwe met ke rasohng lih tehnla me pahn naineki seri tohtohsang lih pwopwoud, Kauno ketin mahsanih.

2 Kalaudehla imwomwi impwal me ke kin kousoan loale, oh mweidehng irail en kadangpeseng omwi kahdeng kan; kareireila selipe kan oh katengehdi kisin lepin tuhkehn kitenge kan;

3 Pwe ke pahn kalaudehla irepen sapwomw ni pali koaros, oh noumw aramas akan pahn sapwanikihla sahpw en Mehn Liki kan oh kadirehla kahnihmw kan me sohte towe.

4 Dehr masak, pwe ke solahr pahn sarohdi; de pil ohla, pwe ke solahr pahn namenekla; pwe ke pahn manokehla kanamenek en ni omwi pwulopwulo, oh pahn sohla taman namenek en ni omw pwulopwulo oh pahn sohla taman namenek en omw wia liohdi men.

5 Pwe ih me ketin kapikuhkada pahn rasehng omw pwoud, mware, iei Kauno Wasa Lapalahpie; oh e pahn kahdaniki omwi Soundoar, Me Sarawi en Israelo—iei ih Koht en sampah pwon.

6 Pwe Kauno ketin karasahionguhk lih pwopwoud men, me eh pwoud keselahr, oh kin wie pahpahtou, oh lih pwopwoud pwulopwul men ni ahnsou me ke likideklahr, omwi Koht me ketin mahsanih.

7 Pwe erein ahnsoutehkis me I manokeiukalahr, ahpw ni ei kupwurkalahng lapalahpie I pahn kapwureiukodo.

8 Ahnsou kis I sohpeisang uhk ni ei engieng, ahpw I pahn kasalehiong uhk ei kadek poatoapoat sang ni ei pahn kupwureiukala, Kauno omwi Soundoar me ketin mahsanih.

9 Pwe met [pahn duwehte], ni mwehin Noha, I kahukilahr oh inoukidahr me I solahr pahn kauwehkihla sampah nohlik lapalap, eri, I pil inoukihda met me I solahr pahn pwurehng engieng pahmw;

10 Pwe nahna kan oh dohl akan katete re en mwerpeseng, ahpw ei kadek limpoak ong uhksohte ka ke en sohrala, pil duwehte ei inoun popohl sohte pahn sohrala, Kauno me ketin kupwureiuk me mahsanih.

11 Oh kowe me kin lokolok, sohte sawasepe, oh sohte koaloalamwahula! Kilang, I pahn onekihda sapahl poahsoan kan en omwi kahnihmw takai kesempwal.

12 Oh I pahn kaukihda omw wasahn iroir kan takai weitahta kesempwal me ede rupi, kehl kan me kapiluhkpene koaros pahn kokoukihda takai kesempwal akan.

13 Oh Kauno me pahn padahkih noumw seri kan koaros; oh arail popohl pahn mwahu mehlel.

14 Ke pahn soahndi nan mour pwung; ke pahn silasil mwahu sang pahn kehnaudek pwe ke sohte pahn masak, oh silasil sang me kamasepwehk pwe e sohte pahn karaniuk.

15 Kilang, irail me pahn uhwong uhk, ke en ese me kaidehn ngehi me mweidohng; oh mehmen me pahn uhwong uhk e pahn pwupwidi.

16 Kilang, ngehi me wiahda sounsuk mete kan me kin saunda kisiniei, oh wiahda dipwisou en eh doadoahk; oh ngehi me pil wiahda sounkawehlao me kin kamwomwala.

17 Sohte dipwisou en mahwin ehu pahn kak kauweiukala; oh koaros me pahn uhwong uhk nan kopwung ke pahn kawehla. Met iei inou me ei laduo pahn sohsohki sang rehn Kauno oh arail mour pwung kan sang rehi, Kauno mahsanih.