Iralaud 29
Kohdohn Pwuhk en Mormon iei kilel ehu me Kauno tepdahr kihpene Israel oh kapwaiada sapwellime inou kan—Irail akan me pahn kasohwe Sapwellime kaudiahl en imwin rahn akan oh kisakis kan pahn riahla. Ele Sounpar 34–35 Mwurin Ipwidi en Krais.
1 Oh met kilang, I ndaiong kumwail me ahnsou me Kauno pahn ketin mwahngih me e konehng, ni duwen sapwellime eripit, me mahsen pwukat pahn kohdo rehn Mehn Liki kan nin duwen sapwellime mahseno, eri kumwail en ese me inouo me Sahmo ketin inoukihong aramas en Israel, duwen kopwurupwurdohn sapwarail sahpw en sohso, tepdahier pweida.
2 Oh kumwail en ese me mahsen kan en Kauno, me soukohp sarawi kan mahsaniher, koaros pahn tepida pweida; oh kumwail sohte anahne nda me Kauno kapwandehla sapwellime ahnsou en ketido rehn aramas en Israel.
3 Oh kumwail sohte anahne medewe nan amwail mohngiong kan me mahsen kan me wie neikinek sohte katepe, pwe kilang, Kauno pahn tamatamante sapwellime inou me ketin wiahiong sapwellime aramas en peneinei en Israel.
4 Oh ahnsou me kumwail pahn kilang mahsen pwukat kohdo rehmwail, eri kumwail sohte konehng kaskasohwehte sapwellimen Kauno wiewia kan, pwe kedlahs en sapwellime kopwung pwungo mihmi nin lime palimaun; oh kilang, rahno, ma kumwail pahn kasohwehte sapwellime wiewia kan, e pahn ketin wiada en poweiukedi ahnsou mwadang.
5 Meid suwediong ih me pahn soikala sapwellimen Kauno wiewia kan; ei, meid suwediong ih me pahn lahlahwe Krais oh sapwellime doadoahk kan!
6 Ei, meid suwediong ih me pahn lahlahwe sapwellimen Kauno kaudiahl akan, oh me pahn nda me Kauno sohlahr kin wiahda doadoahk en kaudiahl, de kokohp, de kisakis kan, de lokaia kan, de kamaiauda, de sang ni manaman en Ngehn Sarawi!
7 Ei, oh meid suwediong ih me pahn nda ni rahno, kepwehpwehla, pwe sohte manaman kapwuriamwei kak wiawi sang Sises Krais; pwe mehmen me pahn wia met e pahn duwehla nein soun kamwomwalao, me ong ih sohte mahkpe, nin duwen mahsen en Krais!
8 Ei, oh kumwail sohte konehng kawe, de soikala, de kepitiki mehn Suhs kan, de pil ekei luhwen kisehn peneinei en Israel; pwe kilang, Kauno kin ketin tamatamante sapwellime inou ong irail, oh e pahn wiahiong irail nin duwen dahme e inoukihda.
9 Eri kumwail dehr medewe me kumwail kak wekidala palimaun en limen Kauno ong palimeing, pwe en dehr kapwaiada sapwellime kopwung ong pweidahn inou me e ketin inoukihong peneinei en Israel.