1 Kedekedeo tohn sahpwo pwon ahpw rongada kepitie ieu, ong pohn sahpwo pwon, me mahmahsanih:

2 Meid suwed, meid suwed, meid suwed ong aramas pwukat; meid suwed ong tohn shapwet pwon ma irail sohte pahn koluhla; pwe tepilo wie kokouruhr, oh nah tohnleng kan pereperen, pwehki kamakamalahn pwutak oh serepein masamwahu en nei aramas kan; oh pwehki arail wiewia suwed kan oh tiahk suwed kan me irail pwupwikihdier!

3 Kilang, kahnihmw en Saraemla kehlailo I isikadahr, oh toweh kan.

4 Oh kilang, kahnihmw en Moronai kehlailo I kakihrala wasa loal en nan sehd, oh toweh kan kadula irail.

5 Oh kilang, kahnihmw en Moronaia kehlailo I saripidi pahn pwehl, oh toweh kan, pwehn ekihla arail wiewia suwed oh arail tiahk suwed kan sang mwohn meseiet, pwe ntahn soukohp kan oh souleng kan en uhdihsang kohdahdo oh kadipairail rehi.

6 Oh kilang, kahnihmw en Kilkal I kakihrala, oh toweh kan seridi wasa loal nan pwehl;

7 Ei, oh kahnihmw en Onaia oh toweh kan, oh kahnihmw en Mokum oh toweh kan, oh kahnihmw en Serusalem oh toweh kan; oh pihl akan I wiahda en kohda, oh pwaindi arail wiewia suwed kan oh arail tiahk suwed kan sang mwohn meseiet, pwe ntahn soukohp kan oh souleng kan pahn uhdisang kohdahdo ohkadipairail rehi.

8 Oh kilang, kahnihmw en Kadiandai, oh kahnihmw en Kadiomna, oh kahnihmw en Seikop, oh kahnihmw en Kimkimno, koaros I kakihrala, oh wiahda dohl kan oh wahu kan nan dowarail ko; oh toweh kan I saripidi wasa loal nan pwehl, pwe en ekihla arail wiewia suwed kan oh tiahk suwed kan sang mwohn meseiet, pwe ntahn soukohp kan oh souleng kan pahn uhdihsang kohdahdo oh kedipairail rehi.

9 Oh kilang, kahnihmw en Seikopokad kehlailo, me aramas en nanmwarki Seikop kin kousoan ie, I wiahda en isihsda pwehki diparail kan oh arail wiewia suwed kan, me keieu suwed sang wiewia suwed kan koaros nan sampah, pwehki arail kamaramas rir oh tiahk en mwersuwed riri kan; pweki irail me kawehla popohl en nei aramas akan oh koapworment en sahpwet; eri I wiahda re en isihsla, oh kamwomwasang mwohn meseiet, pwe intahn soukohp kan oh souleng kan pahn uhdihsang kohdahdo oh kadipairail rehi.

10 Oh kilang, kahnihmw en Leimen, oh kahnihmw en Sohs, oh kahnihmw en Kad, oh kahnihmw en Kiskumen, I wiahda re en isihsla, oh toweh kan, pwehki arail wiewia suwed en kausala soukohp kan, oh kostakaih irail kan me I kadarewei pwe re en kalohngkihong irail duwen arail wiewia suwed kan oh arail tiahk suwed kan.

11 Oh pwehki arail kauseiei irail koaros, me kahrehda sohng me mwahu mih rehrail, I kadaridihdo kisiniei oh kamwomwala irail, pwe arail wiewia suwed kan oh tiahk suwed kan en kak ekieksang mwohn meseiet, pwe ntahn soukohp kan oh souleng kan me I kadarewei rehrail en dehr weriwersang nan pwehl on kadipairail.

12 Oh kamwomwala lap tohto me I wiahda en kohdo nan sahpwet, oh rehn aramas pwukat, pwehki arail wiewia suwed kan oh arail tiahk suwed kan.

13 Oh kumwail koaros me mourla pwehki amwail mour mwahusang irail, kumwail sohte pahn pwurodo rehi, oh koluhkihla dipamwail kan, oh weliakapwala, pwe I en kak kamwahuihkumwailla?

14 Ei, mehlel I ndaiong kumwail, ma kumwail pahn kohdo rehi kumwail pahn alehda mour soutuk. Kilang, sang ni kalahngan en limei kat I kapahwehng kumwail, oh mehmen me pahn kohdo, ih me I pahn alehda; oh meid pai irail kan me pahn kohdo rehi.

15 Kilang, Ngehi iei Sises Krais Sapwellimen Kohto. Ngehi me ketin kapikada nanleng oh sampah, oh audaparah kan koaros. I mih rehn Sahmo sangete nintapio. I kin mihmi nan kupwur en Sahmo, oh Sahme kin ketiket rehi; oh Sahmo pahn ketin kalinganahla mwareo pwehki ngehi.

16 I kohdo rehn pein nei aramas, oh pein nei aramas sohte aleiehda. Oh pwuhksarawi kan me koasoia duwen ei pahn kohdo pweidahr.

17 Oh koaros me aleiehda, ong irail I pahn wiahiong irail en wiahla sapwellimen Koht; oh iei me I pahn pil wiahiong irail koaros me pahn kamehlele mwarei, pwe kilang, sang rehi poadoandor pahn kohdo, oh sang rehi kosonned en Moses pweidahr.

18 Ngehi me marain oh mour en sampah. Ngehi me Alpa oh Omeka, tepin oh imwilahn mehkoaros.

19 Oh kumwail pahn uhdisang wia meirong en kakerehdi nta; ei, amwail meirong kan oh amwail meirong isihs kan pahn uhdier, pwe I sohlahr pahn alehda amwail meirong kan oh meirong isihs kan.

20 Oh kumwail pahn meirongkihong ie mohngiong karakarahk oh ngehn peik. Oh mehmen me pahn kohkihdo rehi mohngiong karakarahk oh ngehn peik, ih me I pahn papidaisihki kisiniei oh iangahki Ngehn Sarawi, iei duwehte Mehn Leimen kan, pwehki arail pwoson ie nan ahnsoume irail weliakapwala, re papidaiskihla kisiniei oh iangahki Ngehn Sarawi, oh irail sohte wehwehki.

21 Kilang, I kohdo pohn sampah pwe I en wahdo poadoandoar ong sampah, pwe en kamourala sampah sang dihp.

22 Eri, mehmen me pahn koluhla oh kohdo rehi nin duwen seri men, ih me I pahn alehda, pwe iei arail wehi, wehin Koht. Kilang, pwe irail me I pwilikihdiki ei mour, oh pwurehng alehda; eri koluhla, oh kohdo rehi kumwail koaros me mih ni keimw en sampah, oh komourla.