1 Nou, kyk, Ek sê vir jou, omdat jy daardie geskrifte oorhandig het waaroor jy mag gegee is om te vertaal deur middel van die Urim en Tummim, in die hande van ’n bose man, het jy hulle verloor.

2 En jy het ook jou gawe terselfdertyd verloor, en jou verstand het duister geword.

3 Nietemin, dit is nou weer herstel aan jou; daarom, sien toe dat jy getrou bly en voortgaan met die voltooiing van die res van die werk van vertaling soos jy begin het.

4 Moenie vinniger hardloop of meer arbei as wat jy krag het en middele verskaf is om jou in staat te stel om te vertaal nie; maar wees ywerig tot die einde.

5 Bid altyd, sodat jy oorwinnaar mag wees; ja, dat jy Satan mag oorwin, en sodat jy die hande van die diensknegte van Satan mag ontvlug wat sy werk steun.

6 Kyk, hulle het probeer om jou te vernietig; ja, selfs die man op wie jy vertrou het, het probeer om jou te vernietig.

7 En om hierdie rede het Ek gesê dat hy ’n bose man is, want hy het probeer om dié dinge weg te neem waarmee jy toevertrou is; en hy het ook probeer om jou gawe te vernietig.

8 En omdat jy die geskrifte oorhandig het in sy hande, kyk, bose mense het hulle van jou geneem.

9 Daarom, jy het hulle oorhandig, ja, dit wat heilig was, aan boosheid.

10 En, kyk, Satan het dit geplaas in hulle harte om die woorde te verander wat jy laat skryf het, of wat jy vertaal het, wat uit jou hande gegaan het.

11 En kyk, Ek sê vir jou, omdat hulle die woorde verander het, verskil hulle van dit wat jy vertaal en laat skryf het.

12 En, op hierdie wyse, het die duiwel probeer om ’n geslepe plan te smee, sodat hy die werk mag vernietig.

13 Want hy het dit in hulle harte geplaas om dit te doen, sodat deur te lieg hulle mag sê dat hulle jou betrap het in die woorde wat jy voorgegee het om te vertaal.

14 Voorwaar, Ek sê vir jou, dat Ek nie sal toelaat dat Satan sy bose voorneme bereik in hierdie ding nie.

15 Want kyk, hy het dit geplaas in hulle harte om jou te kry om die Here jou God te versoek, deur te vra om dit oor te vertaal.

16 En dan, kyk, hulle sê en dink in hulle harte—Ons sal sien of God hom krag gegee het om te vertaal; indien wel, sal Hy hom ook weer krag gee.

17 En as God hom weer krag gee, of as hy weer vertaal, of met ander woorde, as hy dieselfde woorde voortbring, kyk, ons het hulle by ons, en ons het hulle verander.

18 Daarom sal hulle nie ooreenstem nie, en ons sal sê dat hy gelieg het in sy woorde, en dat hy geen gawe het nie, en dat hy geen krag het nie.

19 Daarom sal ons hom vernietig, en ook die werk; en ons sal dit doen sodat ons nie beskaamd mag wees aan die einde nie, en dat ons die glorie van die wêreld mag kry.

20 Voorwaar, voorwaar, Ek sê vir julle, dat Satan ’n groot houvas het op hulle harte; hy spoor hulle aan tot ongeregtigheid teen dit wat goed is.

21 En hulle harte is korrup, en vol boosheid en gruwels; en hulle het die duisternis lief eerder as die lig, want hulle dade is boos; daarom sal hulle My nie vra nie.

22 Satan spoor hulle aan, sodat hy hulle siele mag lei na vernietiging.

23 En so het hy ’n geslepe plan gesmee, dinkende om die werk van God te vernietig; maar Ek sal dit van hulle hande eis, en dit sal omkeer tot hulle skande en veroordeling op die dag van oordeel.

24 Ja, hy spoor hulle harte aan tot toorn teen die werk.

25 Ja, hy sê vir hulle: Bedrieg en lê op loer om te vang, sodat julle mag vernietig; kyk, daarin is geen kwaad nie. En so vlei hy hulle, en vertel vir hulle dat dit nie sonde is om te lieg sodat hulle ’n mens mag betrap in ’n leuen nie, sodat hulle hom mag vernietig.

26 En so vlei hy hulle, en lei hulle verder totdat hy hulle siele aftrek tot in die hel; en so laat hy hulle vang in hulle eie strik.

27 En so gaan hy op en af, heen en weer op die aarde, soekende om die siele van mense te vernietig.

28 Voorwaar, voorwaar, Ek sê vir jou, wee hom wat lieg om te bedrieg, want hy veronderstel dat ’n ander lieg om te bedrieg, want diesulkes is nie vrygestel van die geregtigheid van God nie.

29 Nou, kyk, hulle het hierdie woorde verander, want Satan sê vir hulle: Hy het julle bedrieg—en so vlei hy hulle weg om ongeregtigheid te pleeg, om jou te kry om die Here jou God te versoek.

30 Kyk, Ek sê vir jou, dat jy nie weer daardie woorde sal vertaal wat uit jou hande gegaan het nie;

31 Want, kyk, hulle sal nie hulle bose voorneme bereik deur te lieg teen daardie woorde nie. Want, kyk, indien jy dieselfde woorde sou voortbring, sal hulle sê dat jy gelieg het en dat jy voorgegee het om te vertaal, maar dat jy jouself weerspreek het.

32 En, kyk, hulle sal dit bekendmaak, en Satan sal die harte verhard van die mense om hulle harte aan te hits tot toorn teen jou, sodat hulle nie my woorde sal glo nie.

33 So dink Satan om jou getuienis te oorweldig in hierdie geslag, sodat die werk nie te voorskyn mag kom in hierdie geslag nie.

34 Maar kyk, hier is wysheid, en omdat Ek aan jou wysheid toon, en jou gebooie gee aangaande hierdie dinge wat jy moet doen, toon dit nie aan die wêreld totdat jy die werk van vertaling voltooi het nie.

35 Verwonder jou nie dat Ek vir jou gesê het: Hier is wysheid, toon dit nie aan die wêreld nie—want Ek het gesê, toon dit nie aan die wêreld nie, sodat jy behoue mag bly.

36 Kyk, Ek sê nie dat jy dit nie sal toon aan die regverdiges nie;

37 Nietemin, omdat jy nie altyd die regverdiges kan oordeel nie, of omdat jy nie altyd die bose kan onderskei van die regverdiges nie, daarom sê Ek vir jou, swyg tot Ek goeddink om alle dinge bekend te maak aan die wêreld aangaande die saak.

38 En nou, voorwaar, Ek sê vir jou dat ’n verslag van daardie dinge wat jy geskryf het, wat uit jou hande gegaan het, is gegraveer op die plate van Nefi;

39 Ja, en jy onthou dat dit gesê is in daardie geskrifte dat ’n meer besondere verslag gegee is van hierdie dinge op die plate van Nefi.

40 En nou, omdat die verslag wat gegraveer is op die plate van Nefi meer besonderhede bevat aangaande die dinge wat, in my wysheid, Ek tot die kennis van die mense in hierdie kroniek wil bring—

41 En nou, jy sal die graverings vertaal wat op die plate van Nefi is, verder tot jy kom by die heerskappy van koning Benjamin, of tot jy kom by dit wat jy vertaal het, wat jy behou het;

42 En kyk, jy sal dit publiseer as die kroniek van Nefi; en so sal Ek diegene verneder wat my woorde verander het.

43 Ek sal nie toelaat dat hulle my werk sal vernietig nie; ja; Ek sal aan hulle toon dat my wysheid groter is as die geslepenheid van die duiwel.

44 Kyk, hulle het slegs ’n gedeelte, of ’n verkorting van die kroniek van Nefi.

45 Kyk, daar is vele dinge gegraveer op die plate van Nefi wat groter lig werp op my evangelie; daarom, dit is wysheid in My dat jy hierdie eerste gedeelte van die graverings van Nefi sal vertaal, en uitstuur in hierdie werk.

46 En, kyk, die res van hierdie werk bevat al daardie gedeeltes van my evangelie wat my heilige profete, ja en ook my dissipels, begeer het in hul gebede, na hierdie volk moet kom.

47 En Ek het vir hulle gesê, dat dit gegee sal word aan hulle volgens hulle geloof in hul gebede;

48 Ja, en dit was hulle geloof—dat my evangelie, wat Ek aan hulle gegee het sodat hulle in hulle dae mag preek, tot hulle broers die Lamaniete mag kom, en ook almal wat Lamaniete geword het vanweë hulle twiste.

49 Nou, dit is nie al nie—hulle geloof in hul gebede was dat hierdie evangelie ook bekendgemaak sou word, indien dit moontlik sou wees dat ander nasies hierdie land sou besit;

50 En dus het hulle ’n seëning gelaat oor hierdie land in hul gebede, sodat wie ook al sou glo in hierdie evangelie in hierdie land die ewige lewe mag hê.

51 Ja, dat dit vry mag wees vir almal van watter nasies, stamme, tale en volke, of mense hulle mag wees.

52 En nou, kyk, volgens hulle geloof in hulle gebede sal Ek hierdie deel van my evangelie bring tot die kennis van my volk. Kyk, Ek bring dit nie om dit te vernietig wat hulle ontvang het nie, maar om dit op te bou.

53 En om hierdie rede het Ek gesê: As hierdie geslag nie hulle harte verhard nie, sal Ek my kerk vestig onder hulle.

54 Nou, Ek sê dit nie om my kerk te vernietig nie, maar Ek sê dit om my kerk op te bou;

55 Daarom, wie ook al behoort aan my kerk hoef nie te vrees nie, want diesulkes sal die koninkryk van die hemel beërwe.

56 Maar dit is hulle wat My nie vrees nie, nóg my gebooie onderhou, maar kerke opbou vir hulleself om gewin te kry, ja, en al diegene wat boos optree en die koninkryk van die duiwel opbou—ja, voorwaar, voorwaar, Ek sê vir julle, dat dit hulle is wat Ek sal verontrus, en laat bewe en skud tot die binneste.

57 Kyk, Ek is Jesus Christus, die Seun van God. Ek het na my eie gekom, en my eie het My nie ontvang nie.

58 Ek is die lig wat skyn in die duisternis, en die duisternis begryp dit nie.

59 Ek is Hy wat gesê het—Ander skape het Ek wat nie van hierdie kudde is nie—aan my dissipels, en vele was daar wat My nie verstaan het nie.

60 En Ek sal aan hierdie volk toon dat Ek ander skape het, en dat hulle ’n tak is van die huis van Jakob.

61 En Ek sal aan die lig bring hulle wonderbaarlike werke, wat hulle gedoen het in my Naam.

62 Ja, en Ek sal ook aan die lig bring my evangelie wat aan hulle bedien is, en, kyk, hulle sal nie ontken dit wat jy ontvang het nie, maar hulle sal dit opbou, en sal aan die lig bring die ware punte van my leer, ja en die enigste leer wat in My is.

63 En dit doen Ek sodat Ek my evangelie mag vestig, sodat daar nie soveel twis mag wees nie; ja, Satan spoor die harte aan van die mense tot twis aangaande die punte van my leer; en in hierdie dinge dwaal hulle, want hulle verdraai die skrifture en verstaan hulle nie.

64 Daarom, Ek sal vir hulle hierdie groot verborgenheid ontvou.

65 Want, kyk, Ek sal hulle bymekaarmaak soos ’n hen haar kuikens bymekaarmaak onder haar vlerke, as hulle nie hulle harte sal verhard nie.

66 Ja, as hulle wil kom, mag hulle, en vryelik drink van die waters van die lewe.

67 Kyk, dit is my leer—wie ook al bekeer en na My kom, diesulkes is my kerk.

68 Wie ook al meer of minder as dit verkondig, diesulkes is nie van My nie, maar is teen My; daarom is hy nie van my kerk nie.

69 En nou, kyk, wie ook al van my kerk is, en volhard in my kerk tot die einde, hom sal Ek vestig op my rots, en die poorte van die hel sal nie seëvier oor hulle nie.

70 En nou, onthou die woorde van Hom wat die lewe en die lig van die wêreld is, jou Verlosser, jou Here en jou God. Amen.