¶ 1 MOU atu ae fakafetai kia Jihova, he oku agalelei ia: koeuhi oku tologa o taegata a ene aloofa.

2 Ke lea behe e he kakai kuo huhui e Jihova, akinautolu kuo ne huhui mei he nima oe fili;

3 Bea tanaki akinautolu mei he gaahi fonua, mei he botu hahake, bea mei he botu luluga, mei he botu tokelau, bea mei he feituu toga.

4 Naa nau alu fano be i he toafa i he hala liaki; nae ikai te nau ilo ha kolo ke nofo ai.

5 Bea i he fiekaia moe fieinua, nae bogia ai ho nau laumalie iate kinautolu.

6 Bea naa nau toki tagi kia Jihova i he e nau tuutamaki, bea ne ne fakamoui akinautolu mei he e nau gaahi mamahi.

7 Bea naa ne tataki atu akinautolu i he hala totonu, koeuhi ke nau hoko ki he kolo nae kakai.

8 Taumaiā ke fakamalo ae kakai kia Jihova koeuhi ko ene aloofa, bea koeuhi ko ene gaahi gaue fakaofo ki he fānau ae tagata!

9 He oku ne fakamakona ae laumalie oku holi, mo ne fakabito aki ae lelei ae laumalie oku fiekaia.

10 Ko kinautolu oku nofo i he fakabouli bea moe ata ae mate, kuo ha‘i aki ae mamahi moe ukamea;

11 Koeuhi naa nau agatuu ki he gaahi folofola ae Otua, mo nau fehia ki he akonaki ae fugani Maoluga:

12 Koia naa ne fakavaivai‘i ho nau loto i he gaue; naa nau to ki lalo, bea nae ikai ha taha ke tokoni.

13 Bea naa nau toki tagi kia Jihova i he e nau tuutamaki, bea ne fakamoui akinautolu mei he e nau gaahi mamahi.

14 Naa ne omi akinautolu mei he fakabouli moe ata oe mate, o ne motuhi ho nau gaahi ha‘i.

15 Taumaiā ke fakamalo ae kakai kia Jihova koeuhi ko ene aloofa, bea koeuhi ko ene gaahi gaue fakaofo ki he fānau ae tagata!

16 He kuo ne maumau‘i ae gaahi mataba balasa, bea ne tutuu ae gaahi ukamea fakamau.

17 Oku mamahi ae kau vale koeuhi koe nau talagataa, bea moe nau gaahi hia.

18 Oku fehia ho nau laumalie ki he mea kai kotoabe; bea oku nau fakaaau ki he gaahi mataba oe mate.

19 Bea oku nau toki tagi kia Jihova i he e nau tuutamaki, bea oku ne fakamoui akinautolu mei he e nau gaahi mamahi.

20 Naa ne fekau ene folofola, bea ne fakamoui akinautolu, mo ne fakahaofi akinautolu mei he e nau gaahi mea fakaauha.

21 Taumaiā ke fakamalo ae kakai kia Jihova koeuhi ko ene aloofa, bea koeuhi ko ene gaahi gaue fakaofo ki he fānau ae tagata!

22 Bea tuku ke nau feilaulau aki ae gaahi feilaulau oe fakafetai, mo fakaha ene gaahi gaue i he fiefia.

23 Ko kinautolu oku alu hifo ki he tahi i he gaahi vaka, mo fai ae gaue i he gaahi vai lahi;

24 Oku nau mamata ki he gaahi gaue a Jihova, mo ene gaahi mea fakaofo i he moana.

25 He oku fekau eia, bea oku fakatubu ae matagi malohi, aia oku tubu hake ai hono gaahi beau.

26 Oku nau alu hake ki he lagi, oku nau toe alu hifo ki he gaahi loloto: kuo vela o vai ho nau laumalie koeuhi koe mamahi.

27 Oku nau tajiba, bea luelue o hage koe tagata kona, bea kuo mole ho nau boto kotoabe.

28 Oku nau toki tagi kia Jihova i he e nau tuutamaki, bea oku ne omi akinautolu mei he e nau gaahi mamahi.

29 Oku ne gaohi ae afā ke tofuki, koia oku ikai gau‘e ai hono beau.

30 Bea oku nau toki fiefia koeuhi oku nau fiemalie ai; bea oku ne omi akinautolu ki he taulaga kuo nau holi ki ai.

31 Taumaiā ke fakamalo ae kakai kia Jihova koeuhi ko ene aloofa, bea koeuhi ko ene gaahi gaue fakaofo ki he fānau ae tagata!

32 Tuku ke nau fakahikihiki a ene afio i he fakataha oe kakai, mo fakamalo kiate ia i he fakataha oe kau mātua.

33 Oku liliu eia ae gaahi vaitafe koe toafa, moe gaahi matavai koe kelekele momoa;

34 Moe fonua mahu koe hogea, koeuhi koe agakovi ae kakai oku nofo ai.

35 Oku ne liliu ae toafa koe ano vai, moe fonua momoa koe gaahi matavai.

36 Bea oku ne bule ke nofo ai ae fiekaia, koeuhi ke nau teuteu ae kolo ke nofo ai;

37 Mo tūtū‘i ae gaahi goue, bea to ae gaahi goue vaine, aia oku faa omi ae gaahi fua kuo tubu.

38 Oku ne fakamonuia foki akinautolu, koia kuo nau tubu o toko lahi aubito; bea oku ikai te ne tuku ke fakaaau ke jii e nau faga manu.

39 Bea oku toe fakaaau ke toko jii mo vaivai akinautolu i he fakamalohi, moe mahaki, moe mamahi.

40 Oku ne liligi ae manuki ki he gaahi eiki, bea oku ne bule ke nau alu fano i he toafa, aia oku ikai ha hala i ai.

41 Ka oku ne hiki hake ae majiva mei he mamahi, bea oku ne gaohi maana ae gaahi kaiga o hage koe faga sibi.

42 E mamata ki ai ae agatonu, bea fiefia; bea e tabuni e he agahala kotoabe hono gutu.

43 Kohai oku boto, bea tokaga ki he gaahi mea ni, te nau ilo‘i ae aloofa ogogofua a Jihova.