Vahe 71
1 Koe ma‘u lelei e Tevita ae tui moe falala ki he Otua, o ne lotua ia, mo ene lotu telia ae gaahi fili o hono laumalie. 14 Oku ne fakaha hono loto mau. 17 Bea lotu ia ke he tuu mau. 19 Oku fakamalo ia ki he Otua, bea ne tala te ne fai ia i he fiefia.
¶ 1 E JIHOVA, oku ou falala kiate koe: oua naa tuku au keu ma o taegata.
2 Fakamoui au i hoo maonioni, bea tuku keu hao: fakatokaga‘i ho fofoga kiate au, o fakamoui au.
3 Ke ke iate au koe nofoaga malohi aia teu hu mau ai be ki ai: kuo ke fekau ke fakamoui au; he ko koe ko hoku makatuu mo hoku hufaga.
4 E hoku Otua, ke ke fakamoui au mei he nima oe kau agahala, mei he nima oe kau tagata taemaonioni mo agamalohi.
5 He ko koe, E Eiki Jihova, ko eku amanaki lelei: ko koe ko hoku falalaaga talu eku kei jii.
6 Kuo ke boubou au talu eku mavae mei he manāva: ko koe ia nae too au mei he fatu o eku fa‘e: teu fakafetai mau ai be kiate koe.
7 Oku ou hage koe mea fakaofo ki he toko lahi: ka ko koe ko hoku hufaga malohi.
8 Tuku ke bito hoku gutu aki hoo fakamalo mo hoo fakaabaaba i he aho kotoabe.
9 Bea oua naa jiaki au i he aho o eku motua; oua naa liaki au oka mole iate au eku malohi.
10 He oku lea kovi kiate au a hoku gaahi fili; bea ko kinautolu oku lamaji hoku laumalie oku nau fakakaukau fakataha,
11 O nau behe, Kuo liaki ia e he Otua: fakataga o buke ia; he oku ikai ha toko taha ke fakamoui ia.
12 E Otua, oua naa ke mamao iate au: E hoku Otua, ke ke fai vave ke tokoni au.
13 Tuku ke bubutuu mo auha akinautolu oku nofo koe fili ki hoku laumalie; ke ufiufi aki ae ma moe manuki akinautolu oku kumi keu kovi.
14 Ka teu amanaki lelei mau ai be, bea e tubulekina be eku fakamalo kiate koe.
15 E fakaha atu e hoku gutu a hoo maonioni mo hoo fakamoui i he aho kotoabe; he oku ikai teu ilo ki hono lau oia.
16 Teu alu i he malohi ae Eiki ko Jihova: teu fakaha hoo maonioni, io, oou be.
17 E Otua, kuo ke akonaki‘i au talu eku kei jii: bea talu mei mua mo eku fakaha atu a hoo gaahi gaue fakaofo.
18 Bea koeni foki, E Otua, i he eku motua mo ulu hina, oua naa ke liaki au; kae oua keu fakaha ho malohi ki he toutagata ni, mo hoo mafimafi kiate kinautolu kotoabe e ha‘u.
19 Ko hoo maonioni foki, E Otua, oku maoluga aubito, akoe naa ke fai ae gaahi mea lahi: E Otua, kohai oku hage ko koe!
20 Akoe, kuo ke fakaha kiate au ae gaahi mamahi oku lahi mo kovi, te ke toe fakaake au, o toe o hake au mei he loto kelekele.
21 Te ke fakatubulekina hoku nāunāuia, o fakafiemalie‘i au i he botu kotoabe.
22 E hoku Otua, teu fakamalo foki kiate koe, io, ki hoo mooni aki ae saliteli: teu hiva kiate koe aki ae haabe, akoe koe Toko Taha Maonioni o Isileli.
23 E fiefia lahi hoku lougutu o kau ka hiva kiate koe; mo hoku laumalie aia kuo ke huhui.
24 E talanoa a hoku elelo foki ki hoo maonioni i he aho kotoabe: he kuo bubutuu, kuo hoko o ma, akinautolu oku kumi keu kovi.