¶ 1 E OTUA, oua naa ke fakalogo be: E Otua, oua naa ke tae afio‘i, bea oua naa ke nofo be.

2 Vakai, oku fakatubu maveuveu e ho gaahi fili: bea ko kinautolu oku fehia kiate koe kuo nau hiki hake ho nau ulu.

3 Naa nau alea fakalilolilo ki hoo kakai, bea nau fakakaukau fakataha ki he kakai oku ke malu‘i.

4 Naa nau behe, Ha‘u, ke tau fakaauha akinautolu ke oua naa toe ui akinautolu koe buleaga; ke oua naa kei manatu ki he higoa o Isileli.

5 He kuo nau fakakaukau i he loto taha: oku nau fuakava o agatuu kiate koe:

6 Koe gaahi fale fehikitaki o Itomi, moe kau Isimeli; a Moabe, moe hako o Hekaa;

7 A Kebale, mo Amoni, mo Amaleki; koe kau Filisitia moe kakai o Taia;

8 Oku fakataha mo kinautolu foki a Asilia: kuo nau tokoni ki he fānau a Lote. Sila.

9 Fai kiate kinautolu o hage ko hoo fai ki he kau Mitiani; o hage ko Sisela, mo Jabini, i he vaitafe o Kisoni:

10 Aia nae auha i Enitoa: naa nau hoko o hage koe kinohaa ki he kelekele.

11 Gaohi ho nau gaahi eiki ke hage ko Olibi, bea tatau mo Siibi: io, ae nau houeiki kotoabe o hage ko Sibaa, mo Salimuna.

12 Aia naa nau behe, Ke tau ma‘u ae gaahi fale oe Otua moo tautolu.

13 E hoku Otua, ke ke gaohi akinautolu ke hage koe teka; ke hage koe veve oku viligia i he matagi.

14 O hage koe vela oe vao akau i he afi, bea hage kuo tutu ae gaahi mouga e he ulo afi;

15 Ke fakataga behe akinautolu aki hoo fuu taufa, bea fakamanavahe‘i akinautolu aki hoo afā.

16 E Jihova, fakafonu ho nau mata i he ma; koeuhi ke nau kumi ki ho huafa.

17 Tuku ke nau bubutuu mo mamahi o taegata; io, tuku ke ma mo auha akinautolu.

18 Koeuhi ke ilo e he kakai ko koe, ko ho huafa oou ko Jihova, koe Fugani Maoluga i mamani kotoabe.