Vahe 39
1 Koe tokaga a Tevita ki he ene gaahi mahalo. 4 Ko ene manatu ki he fuonounou moe vaiga oe moui, 7 moe manavahe ki he gaahi fakamāu ae Otua, 10 moe lotu, koe gaahi mea taofi ia ki he tae faa kataki.
Ki he Takimua ko Jitutuni, koe Same a Tevita.
¶ 1 NAAKU behe, Teu vakai ki hoku gaahi hala, telia naaku agahala i hoku elelo: teu ai ae noo ki hoku gutu, i he kei i hoku ao ae agakovi.
2 Naaku noa i he fakalogo be, naaku taofi au mei he lea, io, mei he lelei; bea nae tubu ai eku mamahi.
3 Nae vela hoku loto iate au, bea lolotoga eku fifili nae vela ae afi: beau toki lea aki hoku elelo,
4 E Jihova, ke ke fakailo kiate au hoku gataaga, mo hono fuofua o hoku gaahi aho, be koeha ia; koeuhi keu ilo ki hono lahi o eku vaivai.
5 Vakai, kuo ke gaohi hoku gaahi aho ke tatau moe aofinima be taha; bea ko eku moui oku hage koe mea noabe i ho ao: koe mooni koe tagata kotoabe i he ene tuu mau koe matuaki vaiga ia. Sila.
6 Koe mooni oku alu ae tagata kotoabe i he ata loi: koe mooni kuo nau mamahi taeaoga: oku ne tanaki ae koloa, bea oku ikai te ne ilo be kohai te ne ma‘u ia.
7 Bea koeni, E Jihova, koeha oku ou tatali ai? oku iate koe be eku amanaki lelei.
8 Fakamoui au mei he eku gaahi talagataa kotoabe: oua naa ke gaohi au koe manukiaga oe vale.
9 Naaku noa, nae ikai teu mafaa hoku gutu; koeuhi ko koe naa ke fai ia.
10 Too atu hoo ta iate au: kuou auha i he ta a ho nima.
11 Oka ke ka tautea ae tagata aki ae takitala i he ene hia, oku ke bule ke mole atu hono lelei o hage koe ane: koe mooni koe vaiga ae tagata kotoabe. Sila.
12 Fanogo mai ki he eku lotu, E Jihova, mo ke fakafanogo ki he eku tagi; oua naa ke fakalogo be i hoku gaahi loimata: he koe muli au i ho ao, moe aunofo, o hage ko eku gaahi tamai kotoabe.
13 Tuku jii ai be au, koeuhi keu toe ma‘u eku malohi, i he teeki ai teu alu i heni, bea teu ikai leva.