¶ 1 KOE mooni oku agalelei ae Otua ki Isileli, io, kiate kinautolu oku loto maa.

2 Ka ko au nae meimei mole hoku va‘e: naaku meimei hekea i he eku gaahi laka.

3 He naaku meheka i he kau vale, i he eku mamata ki he fiemalie ae agakovi.

4 He oku ikai ha nau mamahi i he e nau mate: ka oku mau be ho nau malohi.

5 Oku ikai moua i he mamahi akinautolu o hage koe kakai kehe; bea oku ikai ahiahi‘i akinautolu o hage koe kakai niihi.

6 Koia oku takatakai ai akinautolu e he laukau o hage koe ukamea fihifihi; oku ufiufi akinautolu e he agamalohi o hage koe kofu.

7 Oku hohobo ho nau mata i he e nau jino: oku nau ma‘u mea o lahi hake i he holi oe loto.

8 Kuo kovi akinautolu, bea lea kovi i he fakamalohi: oku nau lea fakafiefielahi.

9 Oku nau hagatonu atu ho nau gutu o agatuu ki he gaahi lagi, bea oku eveeva ho nau elelo i mamani.

10 Koia oku liu mai ai ki heni hono kakai: bea oku tatau ae vai kiate kinautolu ke bito ae ibu.

11 Bea oku nau behe, Oku ilo fefe e he Otua? bea oku ai ha ilo i he Fugani Maoluga?

12 Vakai, ko eni ae kau agakovi oku fiemalie i he mamani; oku tubu be e nau koloa.

13 Koe mooni oku taeaoga eku fakamaa hoku loto, mo eku fanofano hoku nima i he maonioni.

14 He kuo ahiahi‘i au i he aho kotoabe, bea kuo tautea au i he bogibogi kotoabe.

15 Kabau teu tala, teu lea behe; vakai, ko eku fai hala ki he toutagata o hoo fānau.

16 Bea i he eku ahiahi ke ilo ae mea ni, nae faigataa ia kiate au;

17 Ka i he eku hu ki he fale tabu oe Otua; naaku toki ilo ai ho nau ikuaga.

18 Koe mooni naa ke tuku akinautolu i he gaahi botu hekeheke: kuo ke laku hifo akinautolu ki he gaahi fakaauha.

19 Kuo omi vave akinautolu ki he malaia, o hage koe kemo be taha oe mata! kuo fakaauha aubito akinautolu i he gaahi ilifia.

20 Hage koe miji oka a hake ha taha; ke behe be, E Eiki, oka ke ka a hake, te ke manuki‘i ho nau tatau.

21 Nae mamahi behe be hoku laumalie, bea nae mahuhuhuhu ai hoku loto.

22 Nae behe eku vale, bea nae ikai teu ilo: naaku hage koe manu i ho ao.

23 Ka koe mooni oku ou iate koe mau ai be: bea kuo be buke au i hoku nima toomatau.

24 Te ke tataki au i hoo boto, bea hili ia te ke ma‘u au ki ho nāunāu.

25 He kohai mo koe oku ou ma‘u i he loto lagi? bea oku ikai ha toko taha i mamani oku ou holi ki ai, ka ko koe be.

26 Oku vaivai hoku kakano mo hoku loto: ka koe makatuu o hoku loto ae Otua, mo hoku inaji o taegata.

27 Vakai, e auha akinautolu oku mamao iate koe: kuo ke fakaauha akinautolu kotoabe oku alu mei ate koe o fai kovi.

28 Ka oku lelei kiate au eku unuunu ke ofi ki he Otua: kuou falala ki he Eiki ko Jihova, koeuhi keu fakaha ai hoo gaue kotoabe.