¶ 1 OKU ou ofa kia Jihova, koeuhi kuo ne ogo‘i hoku le‘o mo eku lotu tāumau.

2 Koeuhi kuo ne fakatokaga‘i hono fofoga kiate au, koia teu ui ai ki he ene afio i hoku gaahi aho.

3 Nae kabui au e he gaahi mamahi oe mate, bea nae buke au e he gaahi mamahi o heli: naaku ilo ai ae tuutamaki moe mamahi.

4 Bea naaku toki ui ki he huafa o Jihova; E Jihova, oku ou kole kiate koe, ke ke fakamoui hoku laumalie.

5 Oku manavaofa a Jihova, mo maonioni; io, oku aloofa a ho tau Otua.

6 Oku fakamoui e he Otua ae taekākā: naaku vaivai, bea naa ne tokoni‘i au.

7 E hoku laumalie, ke ke foki ki ho mālōlōaga; he kuo lahi ae foaki a Jihova kiate koe.

8 He kuo ke fakamoui hoku laumalie mei he mate, mo hoku mata mei he loimata, mo hoku va‘e ke oua naa higa.

9 Teu eveeva i he ao o Jihova i he fonua oe moui.

10 Naaku tui, koia kuou lea ai: naaku mahaki lahi:

11 Naaku behe i he eku tootoo, Oku loi ae kakai kotoabe.

12 Koeha teu atu kia Jihova koeuhi ko ene gaahi mea ofa kotoabe kiate au?

13 Teu too ae ibu oe fakamoui, bea teu ui ki he huafa o Jihova.

14 Teu fai ni eku gaahi fuakava kia Jihova i he ao o hono kakai kotoabe.

15 Oku mahuiga i he ao o Jihova ae bekia o ene kakai maonioni.

16 E Jihova, koe mooni ko hoo tamaioeiki au; ko hoo tamaioeiki au, moe tama a hoo kaunaga: kuo ke vete hoku gaahi ha‘i.

17 Teu atu kiate koe ae feilaulau oe fakafetai, bea ui ki he huafa o Jihova.

18 Teu fai ni eku gaahi fuakava kia Jihova i he ao o hono kakai kotoabe,

19 I he gaahi lotoa oe fale o Jihova, i he lotolotoga oou, E Jelusalema. Mou fakamalo kia Jihova.