Vahe 143
1 Oku kole a Tevita kia Jihova ke ne fakamāu ia i he ofa. 3 Oku ne fakaha a ene gaahi mamahi. 5 Oku ne fakamalohi ene tui i he fakalaulauloto moe lotu. 7 Oku ne kole ke ma‘u ae ofa, 9 moe fakamoui, 10 moe maonioni, 12 bea ke auha a hono gaahi fili.
Koe Same a Tevita.
¶ 1 E JIHOVA, fanogo ki he eku lotu, fakafanogo ki he eku gaahi lotu tāumau: bea i hoo mooni mo hoo maonioni, ke ke talia au.
2 Bea oua naa ke fakamāu‘i hoo tamaioeiki: koeuhi e ikai tonuhia i ho ao ha tagata moui e toko taha.
3 He kuo fakataga hoku laumalie e he fili; kuo ne ta‘i hifo eku moui ki he kelekele; kuo ne bule keu nofo i he bouli, o hage ko kinautolu kuo fuoloa e nau mate.
4 Koia kuo taomia ai a hoku laumalie; kuo lala hoku loto iate au.
5 Oku ou manatu ki he gaahi aho i mua; oku ou fakalaulauloto ki hoo gaue kotoabe; oku ou fifili ki he gaue a ho nima.
6 Oku ou mafao atu hoku nima kiate koe: oku holi a hoku laumalie kiate koe, o hage koe fonua fieinua. Sila.
7 E Jihova, afio vave kiate au: kuo vaivai a hoku laumalie: oua naa fufu ho fofoga iate au, telia naaku tatau mo kinautolu oku nau alu hifo ki he luo.
8 Ke ke fakatokaga‘i au keu fanogo ki hoo aloofa i he bogibogi; he oku ou falala kiate koe: fakailo mai kiate au ae hala aia oku totonu keu alu ai; he oku ou hiki hake hoku laumalie kiate koe.
9 Fakamoui au, E Jihova, mei hoku gaahi fili: oku ou hola kiate koe ke fakafufu au.
10 Akonaki‘i au keu fai ki ho finagalo; he ko koe ko hoku Otua; tuku ke tataki au e ho Laumalie lelei ki he fonua oe agatonu.
11 E Jihova, fakamoui au koeuhi ko ho huafa: koeuhi ko hoo maonioni ke ke omi hoku laumalie mei he mamahi.
12 Bea i hoo aloofa ke ke motuhi hoku gaahi fili, mo fakaauha akinautolu oku nau fakamamahi ki hoku laumalie: he ko hoo tamaioeiki au.