¶ 1 TEU fakahikihiki koe, ko hoku Otua, koe tu‘i; bea teu fakafetai ki ho huafa o lauikuoga bea taegata.

2 Teu fakafetai kiate koe i he aho kotoabe; bea teu fakamalo ki ho huafa o lauikuoga bea taegata.

3 Oku lahi a Jihova, bea oku gali ke faa fakamalo kiate ia; bea ko hono lahi oku tae faa ilo‘i.

4 E fakamalo ae toutagata e taha ki hoo gaahi gaue o a‘u ki he taha, bea te nau fakaha hoo gaahi gaue lahi.

5 Teu lea ki hono ogoogolelei lahi o hoo afio, bea mo hoo gaahi gaue fakaofo.

6 Bea e lea  ae kakai ki hono malohi o hoo gaahi gaue fakailifia: bea teu fakaha hoo mafimafi.

7 Te nau faa fakaha ae fakamanatu o hoo ulugaaga lelei lahi, bea te nau hiva aki hoo maonioni.

8 Oku agalelei a Jihova, bea fonu i he manavaofa; oku toohi hono houhau, bea oku lahi a ene aloofa.

9 Oku agalelei a Jihova ki he kakai kotoabe: bea oku kabui ene gaue kotoabe e he ene gaahi aloofa ogogofua.

10 E Jihova, e fakamalo kiate koe a hoo gaahi gaue kotoabe; bea e fakafetai kiate koe a hoo kakai maonioni.

11 Te nau lea ki he nāunāu o ho buleaga, bea talanoa ki hoo mafimafi;

12 Ke fakailo ki he gaahi foha oe tagata ene gaahi gaue lahi, bea moe ogoogolelei lahi o hono buleaga.

13 Ko ho buleaga koe buleaga taegata, bea ko hoo bule oku tologa ia i he gaahi toutagata kotoabe.

14 Oku boubou hake e Jihova akinautolu kotoabe kuo higa, bea oku ne fokotuu akinautolu kotoabe kuo mabelu ki lalo.

15 Oku haga ae gaahi mata kotoabe kiate koe; bea oku ke foaki e nau mea kai i he feituulaa totonu.

16 Oku ke mafola ho nima, mo fakamakona ae holi ae mea moui kotoabe.

17 Oku agatonu a Jihova i hono hala kotoabe, bea maonioni i he ene gaahi gaue kotoabe.

18 Oku ofi a Jihova kiate kinautolu kotoabe kuo ui ki he ene afio, kiate kinautolu kotoabe oku nau ui kiate ia i he mooni.

19 Te ne fai ki he holi anautolu oku manavahe kiate ia: e fanogo foki ia ki he e nau tagi, bea te ne fakamoui akinautolu.

20 Oku fakamoui e Jihova akinautolu kotoabe oku nau ofa kiate ia: ka koe agakovi kotoabe te ne fakaauha.

21 E lea aki e hoku gutu ae fakamalo kia Jihova: bea tuku ke fakafetai ae kakano kotoabe ki hono huafa maonioni o lauikuoga bea taegata.