¶ 1 FIEFIA ia Jihova, akimoutolu oku maonioni: he oku tāu moe agatonu ae fakafetai.

2 Fakafetai kia Jihova aki ae haabe: hiva kiate ia aki ae saliteli oku filo e hogofulu.

3 Hiva kiate ia i he hiva foou; ta ke malie mo le‘o lahi.

4 He koe folofola a Jihova oku totonu; bea oku fai ene gaahi gaue kotoabe i he mooni.

5 Oku ofa ia ki he maonioni moe fakamāu: oku fonu a mamani i he aloofa a Jihova.

6 Nae gaohi e he folofola a Jihova ae gaahi lagi; mo ho nau nāunāu kotoabe e he mānava o hono fofoga.

7 Oku ne tanaki fakataha ae vai oe tahi o hage koe tafugofuga: oku ne faoaki ae moana i he gaahi feleoko.

8 Ke manavahe a mamani kotoabe kia Jihova: ke maluia ae kakai kotoabe o mamani kiate ia.

9 He nae folofola ia, bea hoko leva; naa ne fekau, bea tuu mau ia.

10 Oku iku‘i e Jihova ae fakakaukau ae hiteni: oku ne fakataeaoga‘i ae gaahi tuutuuni ae kakai.

11 Koe akonaki a Jihova oku tuu mau o taegata, moe gaahi mahalo o hono finagalo ki he toutagata kotoabe.

12 Oku monuia ae buleaga koia oku Otua aki a Jihova; bea moe kakai kuo ne fili koe tofia oona.

13 Oku afio a Jihova mei he lagi; oku ne vakai ki he gaahi foha oe tagata.

14 Mei he botu o hono afioaga oku ne afio‘i ae kakai kotoabe o mamani.

15 Oku ne gaohi ho nau loto kotoabe; oku ne tokaga ki he e nau gaue kotoabe.

16 Oku ikai ha tu‘i oku moui i he fuu toko lahi oe kau tau: bea oku ikai haohaofaki ae tagata malohi e he malohi lahi.

17 Koe mea vaiga ae hose ki he fakamoui: bea e ikai te ne fakamoui ha toko taha i he ene malohi lahi.

18 Vakai, koe fofoga o Jihova oku iate kinautolu oku manavahe kiate ia, io, kiate kinautolu oku manavahe lelei ki he ene aloofa;

19 Ke fakahaofi ho nau laumalie mei he mate, bea ke fakamoui akinautolu i he hoge.

20 Oku tatali ho tau laumalie kia Jihova: ko ho tau tokoni ia mo ho tau fakaū.

21 Koeuhi e fiefia ho tau loto iate ia, he oku tau falala ki hono huafa maonioni.

22 E Jihova, ke iate kimautolu a hoo aloofa, o hage koe mau amanaki lelei kiate koe.