Vahe 36
1 Koe kovi ae kakai agahala. 5 Ko hono lelei lahi oe aloofa ae Otua. 10 Oku lotu a Tevita he ma‘u ae ofa e he fānau ae Otua.
Ki he Takimua, koe Same a Tevita koe tamaioeiki a Jihova.
¶ 1 OKU lea ae talagataa ae agakovi ki hoku loto, oku ikai ha manavahe ki he Otua i hono ao.
2 He oku ne fakaholoholo‘i eia ia i hono ao, ke oua ke hoko o ha mai ae kovi o ene hia.
3 Koe gaahi lea a hono gutu koe kovi moe kākā: kuo tuku eia ene boto moe fai lelei.
4 Oku ne fifili ki he bauu i hono mohega; oku ne fokotuu eia ia i he hala oku ikai lelei; oku ikai te ne fehia ki he kovi.
5 Ko hoo aloofa, E Jihova, oku i he gaahi lagi; bea oku a‘u hake hoo agatonu ki he gaahi ao.
6 Ko hoo maonioni oku hage koe gaahi mouga oe Otua; ko hoo gaahi fakamāu koe fuu moana; E Jihova, oku ke fakamoui ae tagata moe manu.
7 Otua, hono ikai mahuig fau a hoo aloofa! koia oku falala ai ae fānau ae tagata ki he malu o ho kabakau.
8 Te nau fonu lahi i he mahu lelei o ho fale; bea te ke fakainu akinautolu i he vaitafe o hoo fiemalie.
9 He oku iate koe ae matavai oe moui: te mau mamata i hoo māma ki he māma.
10 Ke tuu mau be hoo aloofa kiate kinautolu oku nau ilo koe; mo hoo maonioni ki he agatonu i loto.
11 Oua naa hoko kiate au ae va‘e oe laukau, bea oua naa hiki au e he nima oe agakovi.
12 Kuo higa i ai ae kau fai kovi: kuo li ki lalo akinautolu, bea e ikai te nau faa tuu hake.