¶ 1 E OTUA, naa mau fanogo aki ho mau teliga, bea kuo tala kiate kimautolu e he e mau gaahi tamai, ae gaue naa ke fai i ho nau gaahi aho, i he gaahi kuoga i mua.

2 Naa ke kabuji kitua ae hiteni aki ho nima, mo ke to akinautolu: naa ke tautea ae kakai, bea mafola atu akinautolu.

3 He nae ikai te nau ma‘u ae fonua i he heleta anautolu, bea nae ikai fakamoui akinautolu e ho nau nima: ka ko ho aofi nima, mo ho nima toomatau, moe māma o ho fofoga, koeuhi naa ke ofa kiate kinautolu.

4 He ko koe ko hoku Tu‘i, E Otua: ke ke fekau ae fakamoui kia Jekobe.

5 Koe mea iate koe te mau tulaki ho mau gaahi fili: koe mea i ho huafa te mau malamalaki ki lalo akinautolu oku tuu hake kiate kimautolu.

6 Koeuhi e ikai teu falala ki he eku kaufana, bea e ikai fakamoui au e he eku heleta.

7 Ka ko koe kuo ke fakamoui akimautolu mei ho mau gaahi fili, bea kuo ke tuku ke ma akinautolu nae fehia kiate kimautolu.

8 Oku mau vikiviki i he Otua i he aho kotoa, o fakamalo ki ho huafa o taegata. Sila.

9 Ka kuo ke liaki, bea tuku ke ma akimautolu; bea ikai te ke alu atu moe mau gaahi kogakau.

10 Oku ke bule ke mau foki mai mei he fili: bea ko kinautolu oku fehia kiate kimautolu oku nau maumau ma anautolu.

11 Kuo ke foaki akimautolu o hage koe faga sibi kuo fili ki he kai; bea kuo ke fakahe‘i akimautolu ki he hiteni.

12 Oku ke fakatau hoo kakai tae ha totogi, bea oku ikai te ke fakalahi hoo koloa aki ho nau totogi.

13 Oku ke gaohi akimautolu koe manukiaga o ho mau gaahi kaugaabi, koe mea manuki moe taukaeaga okinautolu oku nofo takatakai iate kimautolu.

14 Oku ke gaohi akimautolu koe lumaaga oe hiteni, koe kalokaloaga oe ulu i he ao oe kakai.

15 Oku i hoku ao mau ai be eku kovi, bea kuo ufiufi aki au ae ma o hoku mata,

16 Koeuhi koe le‘o oia oku ne taukae mo kabe; koe mea i he fili moe fakafajifaji.

17 Kuo hoko ae mea ni kotoabe kiate kimautolu; ka nae ikai te mau fakagalogalo‘i koe, bea nae ikai te mau fai kākā i hoo fuakava.

18 Oku ikai foki kimui ho mau loto, be afe mei ho hala ho mau aluaga;

19 Kuo ke fejifeji akimautolu i he botu oe faga talakone, mo ufiufi aki akimautolu ae ata oe mate.

20 Kabau kuo mau fakagalo‘i ae huafa o ho mau Otua, be mafao atu ho mau nima ki ha otua kehe;

21 Ikai e eke ia e he Otua? he oku ne ilo‘i ae gaahi mea fufu oe loto.

22 Io, koeuhi ko koe oku tamate‘i akimautolu i he aho kotoabe; oku lau akimautolu o hage koe faga sibi ke tamate‘i.

23 Ke ke a, koeha oku ke mohe ai, E Jihova? tuu hake, oua naa ke liaki akimautolu o taegata.

24 Koeha oku ke fufu ai ho fofoga, o fakagalo‘i ho mau tautea mo ho mau taomia?

25 He kuo lolohifo ho mau laumalie ki he efu: kuo biki ho mau kete ki he kelekele.

26 Tuu hake ko ho mau tokoni, bea huhui akimautolu koeuhi ko hoo aloofa.