¶ 1 NAAKU tagi ki he Otua aki hoku le‘o; io, ki he Otua aki hoku le‘o; bea ne tokaga kiate au.

2 I he aho o eku mamahi naaku kumi ki he Eiki: nae au be eku mamahi i he bouli, bea ikai tuku: nae liaki e hoku laumalie ae fakafiemalie.

3 Naaku manatu ki he Otua, beau mamahi ai: naaku fakalaulauloto, bea nae lemohekina hoku laumalie. Sila.

4 Oku ke bule ke a hoku mata: oku lahi eku mamahi, koia oku ikai ai teu faa lea.

5 Naaku fakamanatu ki he gaahi aho i mua, ki he gaahi ta‘u i he gaahi kuoga i mua.

6 Oku ou fakamanatu ki he eku hiva i he bouli: oku ou fakakaukau mo hoku loto: bea nae eke lahi a hoku laumalie.

7 E liaki mau ai be e Jihova? bea e ikai te ne toe finagalo ofa mai?

8 Kuo mole aubito o taegata a ene aloofa? be kuo taehoko ene talaofa ki he toutagata moe toutagata?

9 Kuo galo i he Otua ke fai ofa? kuo ne tabuni i he houhau a ene gaahi aloofa ogofua? Sila.

10 Bea neu behe, Ko eku vaivai eni: ka teu manatu ki he gaahi ta‘u oe nima toomatau oe Fugani Maoluga.

11 Teu manatu ki he gaahi gaue a Jihova: koe mooni teu manatu ki hoo gaahi mana i mua.

12 Teu fakalaulauloto foki ki hoo gaue kotoabe, o talanoa ki hoo gaahi faiaga.

13 E Otua, ko ho hala oku i he fale tabu: kohai ha Otua oku lahi o hage ko ho tau Otua!

14 Ko koe koe Otua oku fai ae gaahi mea fakaofo: kuo ke fakaha ho malohi i he lotolotoga oe kakai.

15 Naa ke huhui aki ho nima a ho kakai, koe gaahi foha o Jekobe mo Josefa. Sila.

16 Nae mamata kiate koe ae gaahi vai, E Otua, nae mamata kiate koe ae gaahi vai; bea naa nau manavahe: nae gau‘eu‘e foki ae gaahi loloto.

17 Nae liligi ae vai e he gaahi ao: nae fakauulu mei he lagi ae logoaa: bea nae buna foki hoo gaahi gahau ki he mamao.

18 Nae i he lagi ae le‘o o hoo mana: nae fakamāma aki a mamani ae gaahi uhila: nae tetetete mo galulu ae fonua.

19 Ko ho hala oku i he tahi, mo ho haeleaga oku i he vai lahi, bea oku ikai iloga a ho gaahi aluaga.

20 Naa ke tataki atu ho kakai o hage koe faga sibi i he nima o Mosese mo Elone.